ندية ام تكامل؟

هل العلاقة بين المرأة والرجل هي علاقة ندية أم تكامل؟

الاسبوع اللي فات نشر اخي احمد سمير في مدونته"الاغلبية الصامتة" موضوعين بعنوان " نظرة سلبية" و "المساواة" وكان حواليهم نقاش كتير مابين مؤيد لاحمد ومعارض ضده...الصراحة انا قعدت افكر في الموضوع ده وكانت جوايا افكار متضاربة ومتناقضة كتير وحبيت اخرجها ع الورق وافضفض معاكوا شوية باللي جوايا واللي انا مقتنع بيه وخصوصا في موضوع المساواة بين الرجل والمرأه ومفهومها عند الاتنين

لو بصينا على خلق ربنا سبحانه وتعالى هنلاقى ان المساواة اصلا مكانتش موجوده في خلق الذكر ولانثى لكن اللي كان موجود كان تكامل بين الاتنين.ربنا سبحانه وتعالى لما خلق ادم واسكنة الجنة خلق بعدها حواء لتكون لادم انيسه ورفيقة تؤنس وحدتة وتزيل عنه الوحشة لكن مش معنى كده ان بنات حواء يبقى مهمتهم في الحياه هو الترفيه عن الرجاله ولا ان الرجاله درجة اولى وهما درجة تانية لأ خالص...سبحان الله ربنا خلق الذكر والانثى بمواصفات يكملوا بيها بعض عشان يبنوا الحياة ويعمروها وفي نفس الوقت ماينفعش كل واحد منهم يعيش لوحده..مش هايعرف لان دي حكمة ربنا ...خلق الانثى وفيها حنية وعطف وقلب طيب واحساس عالي وخلقها ضعيفة لا تحتمل العنف ولا الخشونة وخلق جسمها بامكانيات اضعف بكتير من الرجل اللي زاده بسطه في الجسم والخشونة والصبر والتحمل والجلد وجعل عقله يغلب عواطفة وعشان كده التنين بيكملوا بعض.ء

المشكلة ان مجتمعنا ذكوري بجد...في كل حاجة من اول الولادة...ناس كتير وكتير اوي لسه بتفرح بالولد اكتر من البنت لأ وكمان ممكن يكدبوا ويقولوا دا بنت في اول كام يوم من الولاده قال ايه عشان مايتحسدش وكأن الناس لما يعرفوا انه جاب بنت هايقولوا ياحرام ربنا يكون في عونة ويعوضه...........نيجي بعد كده للتربية...تلاقي الباشا قاعد يتفرج ع الماتش ولا الفليم الاكشن وياعيني عطش....قومي هاتيلي اشرب...او تكون طلبت معاه مزاج وعايز يشرب كوباية شاي...قومي اعمليلي كوباية شاي...وياسلام بقه لو اعترضت هاتخدلها كلمتين محترمين ينكدوا عليها............دا طبعا غير ان الباشا قاعد يتسرمح طول اليوم في الشارع مع اصحابة والغلبانة مجرد ماتاخد الاجازة مابين غسيل وتنفيض وتجهيز غدا والشاي بعد الغدا وغسيل الاطباق وغيره وغيره............انا مابقولش ان البنت ماتساعدش في البيت او انها ماتخدمش اخوها لو احتاجها في حاجة لكن المشكلة ان اوقات كتير بيكون الوضع ظالم اوي بجد....مابيكونش في تعاون بيكون فيه امر ونهي....ياكده يا هتتهزئى...والولد يعمل وانتي ماتعمليش...ويخرج مع اصحابه وانت وراكي شغل البيت...ايه ياجدعان دا ولا معتقل ابو غريب

نفس الولد ده لما هيتجوز هيطلع عين مراته..عايز اشرب..هاتيلي شاي...جعاااااااان.....قومي شغلي المروحة...قومي اطفي التكييف..والبعيد مابيقومش من مكانه ولا بيتحرك...دا مافيش حتى كلمة "لو سمحتي"....او "من فضلك"....هو ده اللي عمل التفرقة وولد الخلاف مابين الرجل والمرأة وهو ده اللي خلا المرأه عايزه تتساوى بالرجل بعد لما حست فعلا انها بقت درجة تانية وعلطول هي اللي غلطانة ومهضوم حقها و بصراحة عندها حق في كل ده لكن بردو لازم يكون في شوية تفكير لأن المساواة المطلقة بين الرجل والمرأة مستحيلة فعلا...لكن المساواة نسبية يعني ايه؟ يعني في مجال العمل مثلا هتلاقي اماكن ماينفعش غير ان الرجل بس اللي يشتغل فيها زي المهن اللي بتحتاج مجهود بدني وتحمل عضلى وعصبي وفي نفس الوقت في مهن تانية ماتنفعش غير المرأة زي مثلا مدرسات الحضانة,الممرضات.....يعني المهن اللي بتطلب مهارة ممزوجة بالعاطفة والرحمة...لكن في اماكن تنفع الاتنين زي مجالات التصميم والجرافيكس والطب وغيرها كتير وفي المجالات دي ممكن ساعتها تحقق المساواة الكاملة بين الاتنين في نظام الشغل ونتائجه دون اختلاف ودون النظر اذا كان ده راجل او ست...هنا العقل هو اللي بيحكم...ء

و في البيت المرأه ربنا الهمها مهارة ادارة المنزل وترتيبة...مش تكون خدامة فيه على فكرة.....انما بردو الراجل رغم انه لازم يكون خير سند لزوجته في البيت مايقدرش يحقق التوازن مابين ادارة البيت وترتيبة وتربية الاطفال و غيرها كتير من الحاجات اللي فعلا ماتقدرش غير امرأه هي اللي تقوم بيها ودي فعلا مهارة بجد..لكن لازم الراجل يكون مساعد ومساند لزوجته ومايبعهاش عند اول مطب...بجد الست هي عصب أي بيت والراجل من غيرها هيتوه

كنت قريت بوست من كام يوم ظريف اوي اسمه "قلب شجاع" في مدونة ناني "ياحلاوة ياعيال" كانت بتقول ان أي

راجل قلبه شجاع لانه كل يوم بيروح شغلة غصب عنه ماينفعش يجي يوم ويقول انا زهقت ومش عايز اشتغل...كلمة مش موجودة في قاموسه ..عشان يعيش حياه كريمة لازم يشتغل ..على عكس المرأه اللي لو حبت في أي لحظة انها تسيب الشغل القرار هيكون سهل اوي وهتكون مسؤولة من الرجل وهي دي قوامة الرجل على المرأة

كل الكلام اللي فوق والرغي ده كان قصدي بيه ان العلاقة مابين الرجل والمرأه هي علاقة تكامل وترابط مش علاقة سيد وخادمة ولا علاقة حقي وحقك....لا هو هايعرف يعيش من غيرها ولا هي هتعرف تعيش من غيره والمساواة اللي لازم تكون موجوده بين الاتنين مش هتكون مساواة مطلقه لكن هتكون سلوك وتعاون يقوم على الاحترام المتبادل مع حفظ الحقوق والمسؤوليات والحفاظ ع المرأه ومراعاة حدودها وامكانيتها وعدم التفرقة بينها وبين الرجل في الاحكام اللي تتعلق بالاخلاق والقيم والسلوك الاجتماعي...ء
الرسول عليه الصلاة والسلام قال " استوصوا بالنساء خيرا"ء