Monday, July 30, 2007

اعتذار


الاصدقاء الاعزاء


انا بعتذر عن عدم متابعتي او تأخري في متابعة مدوناتكم ومواضيعكم الجديدة

الصراحة انا اتاخدت على خوانة...انا 75% من متابعتي كانت عن طريق الشغل على اساس اني بكون هناك اكتر من ء10 ساعات يوميا

وهوب مرة واحدة ال-اي تي قطعوا عليا مياه ونور ومابقتش عارف ادخل على البلوجر ولا اعمل اي كومينت دا غير ان لا صورة ولا مزيكا ولا فيديو بيشتغلوا لما بفتح اي مدونة وفعلا الموضوع دا فرق معايا كتير لان وقتي في البيت بيكون ضيق اوي ومابلحقش اعمل اي حاجة فيه....خصوصا اني برجع من الشغل مهدود (70 كم الطريق) وبالتالي اتاخرت اوي واتراكم عليا مواضيع كتير لسه ماقريتهاش

لكن ان شاء الله انا هحل الموضوع ده واظبط وقتي كويس الفترة اللي جايه لانه فارق معايا اوي في حياتي وكمان احنا عندنا في الشغل حاجة كده زي انترنت كافيه هيشتغل من نص اغسطس وهيحل جزء كبير من المشكلة

رجاء قبول اعتذاري

محمد سمير

Thursday, July 26, 2007

صلصة


تعليق قريته على مصراوي وعجبني



يامصر لو نيلك دا صلصة مش هيكفي الكوسة اللي فيكي


Saturday, July 21, 2007

الحداية والكتاكيت

اعتذر عن التأخير


ياجماعة بجد بجد ماينفعش اللي بيحصل ده…انا خلاص بجد هطق…انا قاعد اضحك من الصبح وبجد شر البلية مايضحك…ايه اللي بيحصل ده…ايه الفن في السرقة ده…بجد بجد بجد تفنن ومخمخة وسلطنة ودماغ عالية عالية عالية الصراحة…لا لا لا انا دماغي هيطير مش قادر…بجد عبقرية في اللف والدوران شغل البيضة والحجر وكايدا العزال انا من يومي ايوه اه...بجد بجد انا هاتجنن من اللي بيحصل


من كام يوم قريت خبر جميل اوي ان وزارة الاتصالات قررت تخفيض اسعار اشتراك الدي اس ال وانه هيكون 45 جنيه بدل ماكان 95 جنيه ودا طبعا لان مصر من الدول اكبر الدول اللي فيها استهلاك انترنت وان احنا بقينا مش عارف ايه وان مصر يقت ام الدنيا والكلام الكبير الهجص ده...واحلى حاجة ان عنوان المقال كان جامد جدا "تخفيض أسعار الانترنت استجابة لنبض الشارع" كلام كبير دخل معاميق قلبي اللي كان بينبض الصراحة وقلت كده عشرة على عشرة وكده هو فعلا حل مشكلة الوصلات اللي من بيت لبيت حل نهائي وحل ذكي كمان لان مش هتفرق كتير ان واحد يدفع 45 جنية بعد لما كان بيدفع 35 جنيه مقابل ان هيوصلة الدي اس ال لوحده من غير واحد غتت مشاركه و واخد الباند ويدث كلها لحسابة ومن غير واحد تاني بيرتب اوضته فيفصل فيشة الكهرباء عن الراوتر يوقع النيتورك كلها وطظ في الناس التانية...يعني الحياه هتبقى حلوة والناس هتقول باي باي لخط التليفون...وفضلت ماشي بغني هي دي هي فرحة الدنيا دق ياقلبي غني ياعنيا
وفجأه قلبى انقبض وجالي هاجس كده قالي لا لا ماتفرحش اوي كده قلتله ياقلبي ماتقلقش ان بعض الظن اثم...قالي لا لا انا مش مطمن الحداية مابتحدفش كتاكيت...قلتله لا لا الكلام واضح كله هيبقى تمام


انهارده بقى وانا بستفتح كده على اخونا مصراوي وبشوف اخبار مصر ام الدنيا ايه بعد لما اتطلقت واذ فجأه لقيت قلبي حط ونط وفط من مكانه وقالي شوفت اهوه ..مش قلتلك..انا كان عندي حق..انا احساسي مايخيبش ابدا...قلتله استنى بس لما اشوف في ايه...ولاقيت الخبر ده....اه ياني...... الناس الصراحة ماكدبوش يعني الاشتراك الشهري هيكون ب 45 جند بس الاشتراك هيكون محدود ياحلو مش هيكون مفتوح كده ع البحري....يعني ايه؟ يعني ال45 جند دول مقابل اشتراك الدي اس ال لمدة شهر بحد اقصي استهلاك 60 ساعة في الشهر او 2 جيجابايت على حسب ماتختار....مش فاهم...اقولك
يعني زمان كان الواحد لما يشترك في الدي اس ال..خلاص النت مفتوح عنده طول اليوم ومافيش مشكلة انما دلوقتي لا...انت لما تيجي تشترك عندك اختيار من اتنين يااما تتحاسب بالوقت يااما تتحاسب بكمية البيانات اللي بتعملها داونلود... لو اخترت انك تتحاسب بالوقت كبيرك 60 ساعة في الشهر يعني ساعتين في اليوم بس ياحلو مش هتنام ع الشات زي زمان والساعة الزياده بجنية ونص...وادفع بقى....طب هاختار اتحاسب بكمبية البيانات...جميل كبيرك 2 جيجا بايت يعني يدوبك تنزلك اغنيتين على كام صورة وماتزودش في الايميلات التقيلة عشان ماتدفعش زياده عشره جنيه عن كل جيجابايت زياده



ايه رأيكوا بقى...بالذمة مش دماغ عالية اوي وصاحبها رجل يحلق في فراغات البعد الافقى المتوازي...ياجدعان انا الكمبيوتر ماقفلتوش بقالي اسبوع تقريبا وعلى طول متوصل ع النت...معنى كده اني لو اشتركت بالساعة هاخلص ال 60ساعة في 3 ايام....بلاش انا بقرا المدونات بس في ساعتين غير الايميلات وياسلام لو بعمل تقرير او حاجة للشغل وعايز اجيب صورة او مقال من ع النت لازم كل شوية اوصل الكابل واعمل سيرش ولما اخلص افصل الكابل تاني وهكذا كل شوية ماهو الوقت بيتحسب بقى والبيت بقى انترنت كافيه بس كافيه اوليه
بلاش لو قلت هشترك بالجيجا سلملي بقى عاليوتيوب والاغاني والكلام الكبير ده..دا كان زمان ياشاطر...انا امبارح كنت بدور على اجوان الاهلي في الترجي وخبطت في كام فيديو كده اتفرجت عليهم بس بعد كده مش هاينفع ياحلو...كله بتمنه...اساسا وانت متوصل ع النت ومش بتعمل حاجة ...لو بس فاتح الاوتلوك والاكسبلورر العداد بيعد والساعة بجنية ونص والحسابة مابترحمش...وبعدين الصراحة الكلام كان صريح جدا ومن الاخر ...اسمع ياسيدي " أن الزيادة عن هذا المعدل تحدث عند تحميل أفلام أو موسيقى أو أغانى وهو ما يستوجب دفع المقابل عن هذه الخدمة مشيرا إلى أن الهدف من الانترنت هو إتاحة المعلومات والاستفادة منها وليس مجرد تحميل الأفلام"....يعني من الاخر ابجني تجدني واللي ماعهوش مايلزموش



في نفس الوقت وانا مصدوم لسه لقيت المقال ده "مذكرة لرئيس الوزراء لرفع أسعار استهلاك الكهرباء اعتبارا من نوفمبر " قلت كفايه كده عالصبح وقفلت مصراوي خالص ..كده كفايه اوي عليا انهارده ومن ساعتها وانا باغني بانوا بانوا بانوا على اصلكوا بانوا


صحيح الحداية مابتحدفش كتاكيت ...ابدا

تحديث

صرح وزير الاتصالات طرق كامل بان التعديل في اسعار الانترنت هيكون باضافة شريحة ال 45 جنيه دون الغاء النظام القديم بحيث يكون الاختيار للمستخدم
سؤال مهم
هل دي كانت معلومة لم يتم ذكرها عند اعلان قرار تخفيض الاسعار او انه تعديل في القرار نفسه كرد فعل لغضب المستخدمين؟؟؟

رأيكوا ايه

Sunday, July 08, 2007

عسلامة ياتونس

عسلامة اشني احوالكم...صحة لا بأس؟ مرجلين اموركوم؟...زعمة اليوم باهي برشا بش نمشوا نعملوا قهوة ونحوسوا غاديك في الحومة...شوف من المفروظ ثم اشكون نقابلوا غادي علي نصف النهار ودرجين وبش نمشوا للمغازة نشروا الحوايج تبع اشنو هكا الاباريي مي زعمة الريزو تكون مزيانة مشان مش نعمليك ابييل وتخلط علينا غادي....واكهو



الكلام اللي فوق ده كان بلهجة أهل تونس اللي خلتني اقعد اسبوع تقريبا مش فاهم نص اللي بيتقال وكنت بضطر سعات ان حد يترجمهالي بالانجليزي عشان افهم لكن بعد كده فهمتها وحبيتها اوي اوي ويمكن من ساعة مارجعت مصر بحب اتفرج اوي على المحطات التونسية عشان اللهجة دي مانسهاش
تونس العروس الجميلة ذات الرداء الاخضر البلد الجميلة اللي حبيتها اوي اوي اوي...يوم مانزلت مطار قرطاج كان كل معلوماتي عن تونس هي بنك الحظ وخرجت منها وانا متعلق بكل حاجة فيها.
انا هنا بتكلم عن بلد قعدت فيها شوية واتعاملت مع ناسها وعرفتهم وصاحبتهم وحبيتهم بغض النظر عن ظروف السياسة والدين هناك. انا ماسمعتش عبد الحليم وام كلثوم زي ماسمعتهم هناك.."انت مصري؟" كان دايما سؤال بتسأله مصحوب بابتسامة مشرقة ومرحبة بطريقة ماتتوصفش وياه بقه لما حد يصمم يتكلم معاكي بالهجة المصرية..اكنه طفل لسه بيتعلم النطق
تونس بلد جميلة اوي ونظيفة اوي ومنظمة واهلها طيبين وبيحبوا المصريين اوي ماعدا في الكرة...هما كلهم كده على بعض مكملوش 10 ميلون فبالنسبه لي البلد فاضييييييه والشوارع واسعة والدنيا جميلة ...شتاها برد يقرص وحرها نار تلسع وارضها كلها خضرة تفتح النفس وتخلي الروح طايرة في الهوا الممتع حواليك
انا روحت تونس وحبيتها اوي وبجد واتعلقت بيها بطريقة مش معقولة بشوارعها ومطاعمها وكافيهتها وبكارفور وشامبيون وبناسها وحتى اكلها.
انا مش عارف كتبت البوست ده ليه بس يمكن لاني لسه كنت بتفرج على شوية صور وهفني الشوق...ودي صور من هناك..يارب تعجبكوا






الساعة..اشهر ميادين تونس العاصمة عند تقاطع شارع الحبيب بورقيبة مع محمد الخامس



سيدي بوسعيد..اجمل مدن تونس من وجهة نظري ..المدينة كلها مدهونة بالابيض والشبابيك والابواب بالازرق


قهوة سيدي شبعان (ع الشمال) من اشهر القهاوي في سيدس بوسعيد وتونس المنظر منفوق تحفة واحلى حاجة قعده عليها مع كوباية شاي اخضر باللوز



مدينة بنزرت من اجمل الاماكن..المكان ده فيها واسمه الناظور ودي صورتي انا و صديق تونسي اسمه نسيم اللي صداقته كانت اكبرحاجة كسبتها من هناك



لافيات- حي جميل في تونس العاصمة كان دايما يفكرني بمحطة الرمل في اسكندرية


ده يبقى -لبيب للبيئة حبيب- شخصية كارتونية عشان الاطفال تحافظ ع البيئة ولبيب يحبهم

نزل الهنا ونزل افريقيا ...اكبر فندقين ع الحبيب بورقيبة في العاصمة



الابواب المميزة اوي في تونس


القهوة العالية من اشهر الاماكن في سيدي بو سعيد وتونس كلها

الصور من :- تصويري والجوجل ومدونة كريم

Friday, July 06, 2007

وكمان تاج

التاج ده وصلنى من شيماء-بحبك يامصر والصراحة انا اتاخرت في الرد شوية بس اخيرا رديت.....الحقيقة الاسئلة
كانت صعبة ومحتاجة بحث وتفكير


من هوأحب شخص لقلبك فى الدنيا؟

ناس كتير


انسان مستعد تضحي بحياتك - ركز فى كلمة حياتك- علشانة؟


هما الناس الكتير بردو


اسم أول حب؟


ندا وعلا وولاء وسهام ومروة وشاهيستا وتاهيناروماهينوروسارة وعلياء وكاميليا وروان وهنا وناريمان وبوسي وكيكي و....كفاية كدا


اسم اخر حب؟


ليه كده بس...انا قلبي كبير والحب مالوش اخر


ما هو :اسم أجمل كتاب كتبه بشر قرأته ومحتفظ به حتى الان ؟


رجل المستحيل- المغامرة 120


اسم كتاب-كتبه بشر برضة- انت متعلق بيه وبتقرأه كل فترة؟


ملف المستقبل – المغامرة 120


اهم جهاز منزلى انت متعلق بيه او بتستخدمه كتير ؟


التلاجة


شىء تحس بالراحة النفسية عندما تنظر اليه ؟


صينية فراخ في الفرن بصوص الطماطم وقطع الفلفل الرومي


مكان تحس فيه بالحنين الى شىء لا تدرى ماهو و ذكريات جارفة الى لاشىء ؟


كنتاكي


مكان تحس بالراحة عندما تدخله ؟


ياجماعة مافيش غير مكان واحد......احم احم بلاش احراج


اجمل مدينة زرتها داخل مصر ؟


اسكندرية مارية وترابها زعفران


أجمل مكان طبيعي رأيته داخل مصر؟


نيل اسوااااااااااان


نوع هاتفك المحمول؟


زوكيا


سرعة بروسيسور جهازك ؟


سريعة اوي زي الطيارة


حجم ذاكرة –هارد- جهازك ؟


كبيرة اوي ااااد البحر


المساحة التى تشغلها المواد الاسلامية على جهازك ؟


مش مهم المساحة...المهم الاستفادة


نفس المساحة السالف ذكرها فى قلبك-الاجابة لنفسك عشان الرياء يا اخواننا ؟


ربنا يجعلنا من عباده المتقين


أهم هدف انت واضعه لحياتك دلوقتى ؟


دلوقتي دلوقتي ....اني اقوم اشرب عشان هاموت من العطش


مواصفات فتاة الأحلام بالنسبة لك ؟


ااااااه انا مواصفاتي سهله خالص....تكون امورة وحلوة ولذيذة ومرحة مش كئيبة تكون ستايل واجتماعية
شعرها يكون طوييييييييييييييييللللل ولونة بني فاتح وعيونها لونها بني او اخضر او ازرق مافيش مشكلة بس تكون واسعة.....مممممم
تكون شيك وسمياتيك..... نقطة الاخلاق والاحترام والكلام ده مش هنختلف عليها كتير...ايزي يعني


صف ما يأتى :شعورك لما بتسمع كلمة مصر؟


وانا جواها ولا براها ؟؟؟؟؟؟

شعورك لما بتسمع كلام عن اليهود ؟


ببص ورايا


شعورك لما بتشوف ظابط شرطة ؟


مش كنت جبت 50% في ثانوي وكان زماني فلحت


شعورك لما بتشوف الكناس العجوز فى الطريق ؟


بشكر ربنا واحمد فضله على اللي انا فيه وبالعن ابو الظروف واللي بالي بالك


لون البطانية اللى بتتغطى بيها فى الشتاء ؟


كستنائي متشنبح بخطوط جنجاه بالطول ومنقط بلون ارجواني


لون الجورب-الشراب- المفضل لديك ؟


الاسود ثم الاسود ثم الرمادي ثم البني في المناسبات


احساسك اذا داست قدمك فى الطريق على مخلفات اخراج حيوان- *** ولا مؤاخذة؟


ولامؤاخذه....انت مالك؟؟؟؟!!!ء

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟


الاسلام دين عصري متجدد وعمره ماكان قالب متجمد


احساس يراودك فى اشارة مرور مغلقة بسبب مسئول كبير؟


بيبقى نفسي وقتها اتحول لسوبرمان ولا باتمان ولا أي حاجة من دول واروح افرجه ع الناس وعذابها في العطلة
وبعدين اخده اتسلى عليه

تمرر التاج ده لمين؟

لا ياعم التاج ده صعب اوي وبعدين موسم التاجات عدي خلاص
الموسم الجاي ان شاء الله
تحديث
بعض الناس لاموني تصريحا او تلميحا ان انا اخدت الموضوع هزار بالرغم من ان فكره التاج انها تكون بتنقل صوره عن افكار الشخص اللي بيجاوب عليه وعن شخصيته شكلها ايه...حاضر ياجماعة انا هجاوب جد عشان محدش يزعل
ما هو :اسم أجمل كتاب كتبه بشر قرأته ومحتفظ به حتى الان ؟
الرحيق المختوم
اسم كتاب-كتبه بشر برضة- انت متعلق بيه وبتقرأه كل فترة؟
المسيح-عبد الحميد جوده السحار
أهم هدف انت واضعه لحياتك دلوقتى ؟
اخلص سكريبت ضخم كده بحاول اعمله هيسهل عليا الشغل شويا انا وزمايلي
كده تمام ؟؟؟ بس اعتقد ان بقية الاسئله زي اسم الحب الاول والاخير ولون البطانية ونوع الموبيل مايعكسوش اي وصف للشخصية ولا اي فكره عن دماغ الراجل اللي بيجاوب
تحياتي
محمد سمير

Monday, July 02, 2007

التخرج

بما اننا اليومين دول في ايام نتائج الكليات وفي ناس كتير هتتخرج خلاص حبيت افتكر معاكوا فرحة كبيرة حسيتها لما اتخرجت...فرحة النجاح دي مافيش بعدها حاجة وخصوصا لوكنت فعلا تعبت اوي... اللي مكتوب تحت ده كان ايميل كتبته وبعته لزملاء دفعتي ساعة مااتخرجنا يعني من 4 سنين..كاناخر ميل ابعته عالجروب بتاع الدفعة..كانت ايام جميلة اوي ومتعبه اوي .. اسيبكوا معاه






زملائي وزميلاتي..اخوتي و أخواتي وأصدقائي

لقد اجتازت الأمة الهندسية فترة من تاريخها تفشى فيها الفساد واستغلال السلطة وتعددت صور الأذلال والتعذيب والترهيب و التهديد بكل الوسائل الممكنة و الغير ممكنة , المشروعة منها والغير مشروعة ما بين امتحانات وكويزات وريبورتات وتحليلات واثباتات ومقارانات ووحدات وماتلاب وأوركاد, وأما عن الامتحانات فحدث ولاحرج فلقد سجلت مراكز التعداد والأحصاء عدة الاف من الامتحانات التى اتخذت أشكال عديدة عبر خمس سنوات تحت نيران الحكم السابق ما بين امتحان عادي و امتحان mid-term و quiz و امتحان اعمال سنة و امتحان على الماشي و امتحان علشان بتتكلموا و امتحان بدل الغياب وغيرها كثير, وكلها استهدفتالبنية التحتية للحالة النفسية للطلاب اللي معملوش حاجة قي دنيتهم الا أنهم حبوا يكونوا مهندسين...............

ولذا و من أجل المحافظة على ما تبقى من القدرة العقلية والحالة النفسية لنا فقد قررنا القيام بالثورةو الأنقلاب والأستقلال بحياتنا ومصائرنا- هو بصراحة بمزاحهم هما مش بمزاجنا- والعمل على حكم نفسنا وفي هذة الأثناء ومن هذا المنبر يشرفني أن أشيد بكل طلبة الدفعة ( وأنا معاكوا بردو) على قوة الاحتمال والصبر على الضغوط الرهيبة والكثيرةوالتي تعدت قدرات البشر في بعض الأحيان – نظام 17 report & 3 quiz -التي مررنا بها ومازلنا محتفظين ببعض القدرة على تمالك النفس وعدم التحول الى " ذوي احتياجات خاصة" , ويجول بخاطري الأن ذكرى المجازر والمذابح الهندسية التي مررنا بها والتي راح ضحيتها مئااات الدرجات وكانت نقطة تحول في كثير من التقديرات, وهى على سبيل المثال وليس الحصر:-


اولا:-مذبحةالهندسة الوصفية (مايو 1999)

حيث حدثت هذة المذبحة تحت خط الأرض وخرج الطلبة منها مابين موازي وعمودي و "موازي عمودي موازي"

ثانيا:-مذبحة electronic materials (يناير 2000)


وهو الامتحان الذي تحدى قدرات العقل البشري والذي ظهرت به ولأول مرة معادلات يشيب لهولها الولدان, وأختلف مستوى الأسئلة مابين معقد ومستحيل و غير قابل للحل البشري.........ولوحظ الاقبال على بائعي الكازوزة بعد الامتحان للمراجعة وعد ال pupples جوة الأزازة


ثالثا:-مذبحة الElectromagntic fields (يناير 2001)

"ماكسويل يعود لينتقم" امتحان للكبار فقط, ممنوع لمرضى القلب و الشكر و الضغط ةالأنف و الأذن و الحنجرة.

رابعا:_مذبحة ال Microwave Telecommunications (مايو 2001, يناير 2002)

مذبحة السنة وكل سنة وتتراوح التقديرات فيها مابين ميئوس منه ومقبول و مقبول جدا و..... وهذا يكفي

خامسا:-مذبحة ال electronic testing (مايو 2002)

حيث سجلت مستشفي الأمراض النفسية والعصبية أكبر عدد من حالات الضحك الهستيري في هذ ا اليوم.ولقد كان زمن الأمتحان 3 ساعات منهم 1’2 ساعة محاولات مضنية لايجاد سؤال مفهوم يمكن الأجابة عليه و ساعتين من الضحك المتواصل مع تقليب المرقة يمين وشمال و 1’2 ساعة عمل طيارات ورق باستخدام ورقة الامتحان و.....هيييييييييييه


سادسا:-مذبحة ال Telecommunications Engineering(يناير 2003)

وهذا الامتحان لم يتحدى العقل البشري فقط بل أنه الأمتحان الذي تحدى نفسه .. الامتحان الذي تمرد على واضعيه وخرج عن السيطرة واخترق حاجز العلوم الطبيعية الى حدود ماوراء الطبيعة...ومازالت الجلسات مستمرة لأنقاذ كل مايمكن انقاذه...وربنا يتولانا برحمته ومنجلكوش في حاجة وحشه.

سابعا:-مذبحة الoptical communications.. (يناير 2003)

لاااااااااااااااااااااا تعليق..........ياولاد.

انها ليست كل المذابح ولكنها هى التي اهتز لها العالم...................................

ملحوظة صغيرة:- الاحصائيات الرسمية لامتحانتا كانت عباره عن 134 امتحان مابين ميد تيرم وفاينل ومعمل وتعتقد مراكز الاحصاء ان هناك مايقرب من ضعفهم امتحانات غير ذات صفة وجاري اتخاذ الاجراءات امام المحافل الدولية



والف الف الف الف مبروك ع النجاح ويارب دايما كده



محمد سمير