ليه؟...اشمعنا احنا

هو ليه العرب والمسلميين هما اكتر ناس مهانين

ليه العرب والمسلمين هما اكتر ناس فاشلين

ليه الفساد في كل صورة مش موجود غير في الدول العربية

ليه غياب الضمير والوصولية والواسطة والاهمال موجودين في اكبر صورهم في بلاد العرب

ليه فعلا الواحد بقا يتكسف لما يتقال عليه عربي

ليه الدنيا كلها بتتقدم وبتتصلح الا بلاد العرب والمسلميين

ليه الضعف بقا هو السمة السائدة على كل ماهو عربي مسلم

ليه بقينا ننضرب على قفانا كتير اوي

ليه احنا اللي بنضحك على نفسنا بنفسنا وبعدين نصدق نفسنا

احنا احسن ناس نشتغل نفسنا 

احنا عيشيتنا فل الفل ولا عندنا فقر ولا ازمة ولا مرض ولا اي حاجة

احنا الناس الوحيدة اللي بتفهم والباقي حمير

ليه كده 

اشمعنا احنا اللي كده

معلش كأبتكوا

ابو احمد البواب

جامدة  جدا

حاول تستخدم مترجم جوجل لترجمة الجملة دي

"Get well soon"

 

اضغط على اللينك ده

Google Translator

 

وشوف النتيجة ايه وقولي رأيك

البوست رقم 100

هاي عليكم ياشباب…ازيكوا جميعا…واحشني والله….انا بعتذر عن غيابي المستمر…انا بجد مفحوت في الشغل….ومازال النفخ مستمرا لكني قدرت اهرب انهارده واهدي الجو حبتيين.

البوست دا يبقى البوست رقم 100 في مدونتي العزيزة غمض عينيك … وقت ما ابتديت التدوين عمري مافكرت اني هكون مرتبط بيه كده...ولا عمري فكرت في اني ممكن اوصل للبوست ده

جميل اوي انك تكتب وتتكلم وتفضفض باللي جواك وفي نفس الوقت تكون في فرصة للناس انها تشاركك وتديك رأيها

الفضفضة هي كانت اساس التدوين عندي...كنت اوقات كتير ببقا عايز اتكلم او اعلق على موضوع معين ومش كنت باعرف..او كنت تقريبا بكون متوقع ردود الافعال والاراء من خلال معاشرتي للناس حواليا

لكن التدوين فتحلي سكك وطرق كتير اوي ورتني حاجات انا مكنتش اعرف عنها حاجة وعرفني على معلومات وناس ومعاني مانكرش فعلا انها غيرت حاجات كتير جوايا

ومع الوقت بقا التدوين حاجة مهمة اوي في حياتي..حتى وان كنت غبت عنه في الفترة اللي فاتت شوية..بس انا فعلا ارتبطت بمدونتي "غمض عينيك" واوقات كنت (ولازلت) بكتب حاجات لا تصلح للنشر وبحتفظ بيها في الدرافت بتاع المدونة

 

انا فعلا سعيد جدا بالخطوة اللي خدتها دي وسعيد جدا بالناس اللي اتعرفت عليهم من خلال المدونة سواء على صفحات الانترنت او من تشرفت بمقابلتهم وبقولهم بجد ياجماعة شكرا اوي على الاضافة اللي ضيفتوها في حياتي واتمنى ان علاقتنا الطيبة دي تفضل ممتدة الى مالانهاية

 

العزيزة "غمض عينيك" مبروك البوست رقم 100 وعقبال الالف

 

تحياتي

محمد سمير

الاردن وزلاطيمو

الشهر اللي فات سافرت
الاردن
في زيارة عمل سريعة
قعدت من سافرت الثلاثاء بليل ورجعت السبت الظهر وكان عندي كمية شغل رهيييبة لدرجة اني نزلت من الطيارة ع التاكسي ع الفندق اول حاجة عملتها قعدت ع المكتب اشتغل لغاية الساعة 2 بليل نمت

صحيت تاني يوم بدرى رحت على مكتبنا في عمان وفضلت هناك ل8 بلييل…خد بالك انا كل ده مغيب وتايه في الشغل اللي عندي ومش واخد بالي من اللي حواليا وان كنت في الاردن ولا مصر تالت يوم كان الخميس اشتغلت لغاية نص اليوم كده وقفلت الكمبيوتر وقلت مش هفتحه الا في مصر
كانت سارة وفرح معايا…ظلمتهم بصراحة وكنت مشغول اوي عنهم طول اليومين…بس اعمل ايه انا رايح في شغل مش فسحة
ابتديت بقا اشوف الاردن و اخد بالي منها
الاردن زي مصر اوي…حتى ناسها ماتفرقهمش عن المصريين لا في الشكل ولا في اللهجة
كلها جبال وهضاب وطول مانت ماشي طالع نازل ..نازل طالع
بعد السؤال عن مكان نتعشى فيه قالولنا على شارع اسمه الشيمساني…رحنا واتعيشنا هناك ورجعنا الفندق علطوول ظريفة والله..الاردن عموما شوارعها ومحلاتها قريبة من مصر ولكن بمقياس اصغر بكتير احلى حاجة عجبتني هناك التاكسي…زي اي دولة محترمة…عداد وتعريفة معروفة ولا تتخانق ولا حد يغالطك…بتفرق بس في المشاوير البعيدة بتكون بالاتفاق مش بالعداد ولو سألت كام سواق تاكسي هتعرف تقريبا السعر المعقول

تاني يوم خدنا اليوم من اوله اتفقت مع سواق يعملنا جولة حلوة ع الاماكن السياحية اللي اكتشفت انها كلها برا عمان
رحنا مكان جامد جدا اسمه حمامات ماعين…مياه كبريتية خارجة من قلب الصخر وفي منتهى السخونة ونازلة شديدة جدا تنزل ع الضهر تعمل مساج طبيعي
المكان هناك تحفة..سبحان الله بيقولوا سخن حتى في عز الشتا

وبعدين روحنا البحر الميت يدوبك قبل الغروب بشوية..وسبحان الله اسم على مسمى…البحر فعلا شكله ميت ولا موج ولا صوت ولا اي حاجة…كئيب..للي مايعرفش هو اسمه البحر الميت عشان مياهه مالحة بشكل كبير جدا لدرجة ان مافيش اي كائنات مائية بتعيش فيه ومن كتر ملوحته بيخلي الجسم يطفو..انا نزلت وكل لما اسيب نفسي الميه تشيلني…طفو قهري

بيقولوا ان طين البحر الميت مفيد للبشرة وفي منتجات كتير اوي مصنعة منه..صابون ومسكات وحاجات كده..كان لازم بردوا اجرب واشوف

كان يوم مرهق رجعنا الفندق على الساعة 8 بليل بس مكانش في وقت نريح لأننا كنا مسافرين تاني يوم..نزلنا وسط البلد واتمشينا فيها وسهرنا على قهوة كلاسيك اوي كان فيها عواد بيغني لأم كلثوم
كانت ليلة ظريفة

تاني يوم رحنا الصبح كهف اهل الكهف وسواق التاكسي لففنا فرجنا ع الكوبري المعلق وقصور الملك والامراء والقلعة الامريكية..اقصد السفارة الامريكية
هي كانت قلعة بالظبط…بدون وصف كفاية اقول ان كلل الفيلات اللي قدامها معلقة يافطة للبيع ومافيش حد بيشتري

مواقف ظريفة حصلتلي

سواق تاكسي مصري بقاله 30 سنة في الاردن حلف ما ياخد فلوس مقابل التوصيلة

عامل في المطعم مصري اتوصي بينا اوي في الاوردر

كنا في مخبز بنجيب فطار..اللي شغال هناك كان مصري جاب لينا حاجات على حسابه

القهوة اللي سهرنا فيها كان كل اللي شغال فيها مصريين وغرقونا شاي وميه ببلاش

بس من دردشتي مع سواقين التاكسي عرفت انهم بردو تعبانين اوي…الاسعار غالية والحالة تعبانة والناس مش قادرة تعيش كويس

رحنا شارع الوكالات والسيفوي ومكة موول…كل ده كان في صورة زيارات سريعة خاطفة واجنا راجعين كان لازم نجيب حلويات من عند زلاطيمو اشهر حلواني في الاردن

يعني كانوا يومين متعبين بس حلوين الحمد لله

اشوفكوا على خير

اي حاجة...مش فارقة

انا مخنوق اوي

من ايه؟ من اللي بيحصل في التكية

انا اكره اللي يستعبطنى اكتر من اللي يسرقني

اكره اللي  يعمل فيها عبيط وشايف الدنيا وردية والحياة حلوة والمعدلات عالية وهو عارف الحقيقة

عايز اقل ادبي وماسك نفسي بالعافية

انا بقيت اكره اتفرج ع التلفزيون والبرامج الحوارية

انا عرفت يعني ايه تعمل عبده العبيط اللي فاهم كل حاجة واولها ان الناس كلها حمير ومش فاهمة ومصلحتها ومش عارفة انه بيستعبطها

يانهار اسود ع البروود

يانهار اسود ع التكية المنهوبة اللي ملهاش صاحب

يانهار اسود ع الوشوش المكشوفة اللي لا بتحس ولا بتشعر

الدنيا كلها تقول حالة كساد وازمة واحنا نقول ميت فل وعشرة

كاننا احنا اللي بنفهم وهما اللي بقر

كأن حالتنا الاقتصادية هي اللي معدية والباقيين بيجروا ورانا

ايه ياجدعان في ايه...ايه الاستهبال ده

لا لا لا لا بس على فكرة كله عشان خاطر الشعب والمواطن

والحمد لله اهو موضوع صكوك بيع البلد دي هتفك ع الناس شوية

400 جنيه و 500 جنيه عشان الناس تعيش بقا وتشبرأ نفسها

وبعدين يا اخي من حكم في ماله ماظلم

وزحمة يادنيا زحمة ولا حد واخد باله

واهو مولد وصاحبة نايم

ولا لأ مش نايم

دا داير في الساقية اللي مالهاش نهاية

داير عشان يعيش...يعيش ع الاقل زي البني ادمين

بيقولك البترول بقا ب خمسين دولار

بس عندنا هنا لسه مش متأكدين من الموضوع ده عشان كده البنزين لسه زي ماهو

يلا اهو كله عند العرب صابون

واهو امبارح حظروا النشر وغيروا الحرز وهنقول مبرووك قريب

ومن تاني

زحمة يادنيا زحمة ولا نعرف مين الجاني

المهم

شوفتوا الماتش امبارح؟؟؟

خطاب النصر...مبروك اوباما

YES WE CAN
بهذة الكلمات هتف الالاف من انصار باراك اوباما امس في شيكاجو
وبكلمات مباشرة وباسلوب غاية في البساطة والصراحة خطب فيهم اوباما خطاب النصر
خطاب كان في بساطته وصراحته اعمق تأثيرا من الرسوم البيانية والارقام الحكومية التي ابتلانا بها الله
كانت ابتسامة اوباما الجذابة اكثر جدية وتأثيرا من عبوس البعض لدينا (بدون ذكر اسماء)ء
كان خطاب مؤثر بحق
كان خطاب النصر...في لحظة تهون عندها كل المتاعب والسهر والتعب والعناء
في لحظة يصير النجاح فيها ذو طعم خاص لا يشعر به احد الا الشخص نفسه
كان خطاب النصر الشريف لا المزور
ابعث بتهنئة حارة لشخص باراك اوباما اهنىء فيه النجاح والمثابرة والاجتهاد والحيوية والاصرار
اهنئه بتمكنه من ادواته وبتحديه للصعوبات
اهنىء فيه طفلا اسود اللون في مجتمع يعتليه البيض ولكن يتملكه الحلم فيحققه
اهنىء شعب اميركا بادارته التى احترمته واعطته الفرصة ليقول مايحب
واخيرا عايز اقولها بالقوي
جتنا نيلة في حظنا الهباب

ياترى مين؟

ياترى مين؟
اوباما ولا ماكين

باراك اوباما
ء 47 سنة

برنامجه هادىء وواقعى

بصراحة انا معجب جدا بباراك اوباما وبعقلانيته في عرض برنامجه الانتخابي
وكمان كاريزيميته الرائعة
والاكتر من كده وصوله الي مرحلة من النجاح والتفوق وصلته انه ممكن يكون اول رئيس اسود لأمريكا
متخيل
رئيس اسود
بعد لما كان السود بيتنقلوا في اقفاص معدنية في بطن المراكب لأمريكا كعبيد
دلوقتي واحد منهم على عتبة البيت الابيض
سيبك من حكاية مسلم ولا بيتنكر لاسلامة ولا امن اسرائيل اولا
انا بتكلم عن شخص اشتغل وكافح ومشي في طريق صعب انا متأكد انه واجه فيه احباطات كتيرة
لكن مين عارف
هو كان اول رئيس قسم اسود في كلية القانون جامعة هارفارد
وبعد لما بقى واحد من اصغر اعضاء مجلس الشيوخ سنا
وارد اوي يبقى اول رئيس اسود للولايات المتحدة








جون ماكين
ء72 سنة
برنامجه متهور زي قريبه بوش

الباشا دا انا محبتوش كده من اولها
شكلة مايديش على ريس...دا اخره رئيس مصلحة
لما قريت شويه عن برنامجه لقيته جاب من الاخر
مش هنمشي من العراق...هضرب ايران...مافيش كوريا ولا كوبا ولا اعرف شافيز
هقلل الضرايب والحالة هتبقى فل فل
باين اوي انه هيكمل طريق بوش
مش عارف انا محبتوش
وبعدين حتى النائبة بتاعته بقيت حاسس انها العبيطة بتاعة امريكا
لا لا ماينفعش
++++++++++++++++++++++++

يمكن يجي حد يقولي وهي فارقه ايه...كله زي بعضه...السياسة واحد ومابيحطهاش اشخاص
اه انا متفق في كل ده
بس انا حابب اعيش تجربه مش قادر اعيشها في بلدي
وبتعامل مع حلم اوباما على انه حلم بعيد المنال لأنسان ناجح اقترب من انه يكون حقيقة
وهازعل اوي لو مانالهاش
لأنه يستحقها
وفعلا هو عنده حق
CHANGE WE NEED

المشكلة مشكلتي

لو حكينا ياحبيبي نبتدي منين الحكاية
الحقيقة ان المشكلة مشكلتي
طبيعة شغلي الجديد اني بكون مسئول عن مناقصة
بكل اللي فيها من عروض فنية وعروض مالية واجتماعات ومناقشات واقتراحات
والطبيعي والعادي ان مافيش شغل حلو علطوول
لأ دايما في مشاكل وخناقات وحاجات تخنق الواحد وتخليه مش طايق نفسه
وازيد عليها كمان احباطات وحالة مزاجية زي الزفت
بس بردو زي ماقلت المشكلة مشكلتي
ليه مشكلتي؟
عشان انا مابفصلش
المفروض خلصت شغل وخرجت من باب الشركة يبقى انتهى الموضوع
المفروض عندي يومين اجازة يبقى فعلا اقضيهم اجازة

انما دا مابيحصلش
انا معظم اللي بتعامل معاهم في الشغل اوروبيين ووقت الشغل بيشتغلوا ووقت الراحة والاجازة ولا هما هنا
انما العبد لله طول مافي مشكلة في الشغل مزاجه مش رايق ومكشر ومخنوق وعلى قد ما المشروع بيكون كبير على قد مشاكله مابتكون كتير على قد دمي مابيتحرق ويطلع دخان
ودا غلط...اكبر غلط
المفروض الشغل شغل والاجازة اجازة والراحة راحة
هو دا الصح عشان اقدر اكمل
ودا اللي انا بحاول اعمله فعلا
انا ياجماعة بقيت اوقات اخاف افتح الميل بتاعي في البيت احسن الاقي مشكلة في الشغل واضطر اشتغل في الاجازة
مديري قالي ماتشتغلش في الاجازة مهما حصل ولو اضطريت قولي ونشوف الموضوع يستاهل ولا لأ
لكن انا مابعرفش...مابيجليش قلب اشوف حاجة وما اردش عليها
بقيت اخاف افتح الميل....والموضوع اتطور ومبقتش افتح الكمبيوتر في البيت اساسا
ايدي بتاكلني..لما افتحه ببص ع الميل ولما ببص ع الميل ببقى زي الطالب اللي مستني نتيجته
لازم افصل..لازم
الحياة مش شغل بس وانا بجد اعصابي تعبانة وبجد عايز ارتاح
انا من اول يوليو وانا مفحوت ومطحون
واكيد هظبط التظابيط

الصورة اللي فوق دي من الاردن..كانوا يومين كده الاسبوع اللي فات هحكي عنهم البوست اللي جاي ان شاء الله

مطحون

ياجماعة انا مطحوووون اوي...فوق الخيال....مطحون ومفحوت وكل الكلام اللي بيوصف الحالة دي

انا جيت بس اقول شكرا للي كل الي بيسأل عني سواء هنا او على الايميل

ومش هتاخر ان شاء الله

ادعولي

محمد سمير

قلة ادب

كنت دايما وانا صغير باسمع شتايم في الشارع...كنت ببقى عايز اعرف معنى الشتايم دي...عمري ماجربت اقولها او انطقها او اني اهين بيها حد...عيب
بس مكانش عيب ابدا اني احاول اعرف معناها وخصوصا ان احنا كمصريين عندنا قدرة غريبة في تلوين الكلام واستنباط الفاظ جديدة وشتايم غريبة
والحقيقة اني لما كبرت وشفت الدنيا واديني ماشي فيها بشوف واتعلم عرفت ان الشتايم والالفاظ دي مش دايما عيب
لأ ساعات بتتقال في موضعها وبتكون مطلوبة جدا لتوصيل معنى واقعي او تفريغ انفعال ووقتها عمرها ماتبقى قلة ادب

يعني لما اتفرج على محامي ممدوح اسماعيل وهو بيتكلم في العاشرة مساء واعلق عليه...دي عمرها ما تبقى قلة ادب
ولما اتفرج على اي مسئول حكومي او وزير بيتكلم عن التنمية ورغد العيش والمواطن المصري واقول رأيي...دي عمرها ماتبقى قلة ادب
ولما الناس كلها ميبقلهاش سيرة غير سبوبة الاسعاف...قصدي شنطة الاسعاف وارد واتكلم...دي عمرها ماتبقى قلة ادب
لما الثانوية العامة يحصل فيها كل اللي حصل والوزير يفضل في مكانه يبقى وقتها الكلام عمره مايبقى قلة ادب
لما الاعلام الحكومي يتكلم عن الطفرة التكنولوجية اللي هتظهر في شوارع مصر بعد تطبيق قانون المرور الجديد يبقى تعليقي وقتها عمره مايكون قلة ادب
لما الحكومة تأكد على توافر بنزين 80 في الاسواق يبقى الرد ساعتها عمره مايكون قلة ادب
لما يطلع احمد الهوان (جمعه الشوان) اليومين اللي فاتوا ويقول انا كنت متجوز سعاد حسني عرفي...يبقى لما اشتم ساعتها متبقاش قلة ادب
وغيرهم كتييير اوي
ياترى انا عندي حق ولا لأ؟

رحل جو

رحل جو
يوسف شاهين
احدى علامات السينما المصرية
ومرة اخرى تختفى احدى نقاط التفوق المصرية
وياترى كم بقيت من نقاط لتميزنا!
مهما كان الاختلاف ومهما كان الرفض من قبل بعض الناس لهذا الرجل
فلا شك ان لا احد يختلف على ابداعه وفنه وتفوقه وتألقه
يوسف شاهين كان صاحب رأي ورؤية وفن أثار به غضب كثير من الناس ولكنه لم يتراجع ولم يتلون كما ارادوا له ان يتلون
لم اكن مهووسا بيوسف شاهين الانسان
ولكني كنت مهووسا بيوسف شاهين المخرج العالمي المتألق والمتفوق
رحل جو من دنيانا
فلنتركه لاخرته وليحاسبه الله على افعاله خيرا كانت او شرا فلا مكان لنا هنا لنحكم
ولكن عسى ان نأخذ من تفوقه وابداعه وايمانه برأيه وعمله مثال نحتذي به
رحل يوسف شاهين وله كل الاحترام

تم الشحن - كل سنة وانتوا طيبين

احسن سلام لاحسن ناس
بقالي كتير مقعدتش اكتب وادردش...بقالي كتير اوي وزي ماقلت البوست اللي فات مش عارف ليه
ماعلينا...يعني هو الواحد بيحب يفصل من وقت للتاني كده...يفصل شحن حتى لو فصل عن حاجة بيحبها بس يفصل شوية بردو
لكن اللي ضايقني اني في عيد ميلاد "غمض عينيك" مكنتش بردو موجود
ارشيف المدونة بيبتدي من اكتوبر 2006 والحقيقة اني في الفترة دي كنت متابع صامت لكتير من المدونات...بدون اي تعليق
لما قررت اعمل مدونة..ابتديت انشر صور بس بدون كلام وطبعا مكانش فيه اي مشاركة او تعليق من اي حد..انا نفسي مكنتش بعلق عند حد
كانت المدونة اسمها " لو بطلنا نحلم" وفييين من اكتوبر2006 لغاية مايو 2007 لما رجعت من تاني باسلوب اكتر نشاط وغيرت اسم المدونة من "لو بطلنا نحلم" ل "غمض عينيك"ء
اسم مختلف وان كان له نفس المعنى عندي وخصوصا لو كملت الرباعية
غمض عينيك واحدة واحدة بقت تشغل حيز مهم في حياتي...وانتقلت من حيز الهوايات الي حيز الواجبات ويمكن دا هو اللي خلاني افصل خالص الفترة اللي فاتت
انا كنت وصلت لمرحلة ان المدونة بقت شىء اساسي لازم اتابعه يوميا مهما كنت مشغول او مش فاضى او عندي مشاكل في الشغل اوو غيره بالاضافة طبعا اني بقيت متابع لمدونات كتيرة مش عارف لغاية دلوقتي احط اللينكات بتاعتها في المدونة واكتفيت بمتابعتها عن طريق البرنامج الرائع "جوجل ريدر" اللي مديني دلوقتي رسالة ان عدد البويتات الجديدة اللي لسه مقريتهاش 543 بوست
ولو ضفنا لده شغلي الجديد اللي اعدت فترة بردو اركز فيه عشان اعرف جوانبه كلها واتعلم صح بالاضافة لبعض الاحباط اللي حسيت بيه بعد سفرية فرنسا وخصوصا ان حالنا هنا في مصر لايفرح عدو ولا حبيب
يمكن كل ده هو اللي خلاني عايز افصل بس انا حاسس ان انا دلوقتي احسن وان شوقى غلبني وبجد بجد قد ايه كان شوقى للمدونة ولزوار المدونة ولعالم التدوين كله
حتى وان كانت متأخرة
كل سنة وانتوا طيبيين
وكل سنة وانتي طيبة يا مدونتي العزيزة

مش عارف

مش عارف ليه ماليش نفس اكتب حاجة
بقالي شهر ويمكن اكتر مادخلتش ع المدونة ومش عارف ليه بجد
في وقت؟ اه عندي وقت...ممكن اكون مشغول اوقات لكن الاكيد ان اوقات تانية بيكون عندي وقت
طب في ايه؟ مش عارف
انا لا كنت بفتح المدونة ولا ابص عليها اصلا
ولا كنت بزور اي مدونات تانية
مع اني عندي مواضيع كتيير اوي اتكلم فيها
فعلا عايز اتكلم فيها بس مش عارف ايه اللي مفرملني
انا مش لاقي كلام اقوله فعلا
هحاول قدر الامكان اخرج من الحالة اللي انا فيها دي
وان شاء الله هانتظم اكتر من كده

حد قال هات

من باريس

بلد الازياء والموضة

التقطت هذة الصور وتركت لكم التعليق

جزمة (لامؤاخذة)2500 يورو للي مش شايف الرقم

طاقية او بيسموها شابوه ب 200 يورو

دي بقى لسته الاسعار بتاعت الاخت المانيكان اللي فوق

البرمودا 2550 يورو

المايوه (مش باين في الصورة) ب 450 يورو

الجاكيت الزينز الحلو دا ب2190 يورو

الدزمة (لا مؤاخذة يعني) ب460 يورو

البروش واحد ب 355 والتاني 415 يورو

اللفة اللي حولين الرقبة دي (الكولير) ب 960 يورو

الجينز ب 320 يورو

الحزام..الحزام..ايوة الحزام ب 490 يورو

الشنطة الامورة دي ب790 يورو

حد قال هات...يامدام يا انسه يا بيه

حد شاري

؟؟؟؟؟

خلص الكلام

خلص الكلام

ديزني لاند- باريس

برج ايفل

لوحة الموناليزا -متحف اللوفر

تحت التلج- وسط باريس

الكونكورد ولاديفانس

بعد لما ضربنا ساندوتش السمك الجامد بتاع ماكدونالدز جبت الكولا مع شيكولاته كيت كات وقلت انأنأ فيهم مستمعا للعزيزة اليسا وانا بكتب البوست ده جالسا على الارض والكمبيوتر ع السرير...الساعة دلوقتي 11 بليل..وانا راجع من نص ساعة كده...مش عارف ايه الموضوع ده المحلات كلها بتقفل من 7 او 8 بالكتير والمحلات الكبيرة والسوبر ماركت بيسهروا لغاية 10..انهاردة السوبر ماركت كان هيقفل عليا وكنت بجري عشان الحق الكاشير مع ان الساعة كانت يدوبك 10 الا ربع...بس في الشانزليزية في كافيتريات بتفضل فاتحة ل12 تقريبا وممكن تقعد عليها وخصوصا ان في ناس بتبقى ماشيه في الشارع..ويمكن اكتر حد شفته فاتح هو ماكدونالدز العزيز بيفضل فاتح لغاية الساعة واحدة

امبارح وانهاردة مالفتش كتير...رحت الشغل امبارح وكنت عامل حسابي اني هاروح بس اعمل شوية اجراءات زي الكارنيه وتصريح العمل للفترة اللي هقعدها والحاجات دي وامشي يعني حكاية ساعتين وهوب اتمسكت هناك لغاية الساعة 5 العصر دا غير ان انهارده خلصت متأخر اوي على 6.30 المشكلة ان الشغل في ضاحية من ضواحي باريس اسمها فيليزي باخد المواصلات ليها في ساعة..لي احد الزملاء من المغرب اسمه يوسف...قبل ما اوصل باريس سألته هنقعد فين قالي على اوتيل في فيليزي جنب الشركة علطول...ربع ساعة مشي...بس انا فضلت اني اقعد في قلب باريس واصحى بدري عن ما اقعد بعيد عنها...ياراجل دا انا بيني وبين الشانزلزية شارع واحد بس...وبعدين المواصلات متعه متعه متعه...انا بنزل اركب المترو 3 محطات وبعدين بغير لخط تاني حوالي 9 محطات وبعدين باركب اتوبيس وما ادراك ما الاوتوبيس وجمال الاوتوبيس وحلاوة الاوتوبيس دا عايزله بوست لوحدة..فسحة ياباشا
انا مستمتع جدا جدا وانا عايش زي اهل فرنسا كده اصحى الصبح بدري..امشي بخطوات سريعة انزل اركب المترو...انا بحاول اقلدهم بصراحة عايز اعيش في فرنسا الناس والحياة والتعاملات اكتر من فرنسا اللوفر وبرج ايفل والشانزليزية...في المترو تلاقي الكل يا اما ماسك جرنال بيقرا فيه يا اما ماسك كتاب او قصة...وبعدين الناس اللي راكبه كلهم مهندمين ومحترمين وهدومهم مكوية وبينزلوا وهي مكوية..مافيش زحمة ولا تقطيع...ممكن يكون في ناس كتير ومافيش مكان حد يقعد بس بردو تحس ان مافيش زحمة..انت بتطلع محترم وبتنزل محترم ....بردو المترو هيكون ليه بوست تاني غالبا مع الاوتوبيس لما اصورهم

امبارح بعد لما خرجت من الشركة يوسف كان عايز ينزل باريس معايا يتمشى في الشانزليزية وفعلا نزلنا واتمشينا فيه..بصراحة كان نفسي اروح برج ايفل بس انا محبتش اكروته..دا عايزله وقت فاضي ورايق ويوسف كان مستعجل يرجع عشان خاطر المواصلات في فيليزي اخرها 8 او 9 بليل..اتمشينا في الشانزليزية لغاية ماوصلنا ميدان الكونكورد حيث المسلة المصرية....من زمان وانا عارف الوصفة دي ( قوس النصر قدامة الشانزليزية وفي اخره ميدان الكونكورد وبعده متحف اللوفر) لكن اني اكون موجود واشوف الكلام دا كله بعنيا شعور فعلا مش قادر اوصفه...المهم وصلنا الكونكورد واتفرجت ع المسلة بس بردو في السريع عشان اخونا يوسف كان عايز يروح...معرفش ايه اللي جابه طالما مستعجل كده.... روحنا على نهر السين اتمشينا شوية وصورت كام صورة حلوة لبرج ايفل من بعيد بس واخونا رجع روح وانا كملت لف لغاية ما روحت
انهارده اتاخرت اوي في الشغل لدرجة ان الاوتوبيس اللي بيوصلني لمحطة المترو كان خلص (طبعا عرفت من الشاشة الالكترونية اللي في المحطة) قلت استعبط واركب اي اوتوبيس وانزل الموقف (اللي كان المحطة اللي بعديا علطول) واتصرف من هناك من حظي الوحش ان الاوتوبيس بعد لما ركبته رقمه اتغير (اصل الاوتوبيس الرقم مكتوب على شاشة وممكن يتغير حسب الزحمة والاحتياج) الاوتوبيس رقمة اتغير يامعلم وانا ايتديت اقلق..من حظي الحلو سواق الاوتوبيس طلع تونسي وبأمانة ظبطني احلى تظبيط وقالي اركب ايه ومنين وازاي ولو مالقيتش اتوبيسات اعمل ايه وعمل معايا احلى واجب الله يكرمه...وصلت المترو ونزلت باريس جري ع الاوتيل غيرت هدومي ولبست كاجوال ونزلت ع المترو تاني ركبت ورحت مكان اسمه "لا ديفانس" معرفش معناها ايه بس هناك في مباني ولا اكنك في نيويورك...الهيلتون وشركة توتال ومش عارف ايه!!! وفي مبنى كبير اوي اوي اوي بغباء يعني على شكل قوس...اسمه "القوس الكبير" لسه معرفتش دا بتاع ايه بالظبط انا لسه هاروح تاني لأني على ماوصلت كانت الساعة بقت 8.30 ومكانش فيه غير ماكدونالدز وهايبر ماركت بس هما اللي شغالين...في "لا ديفانس" كمان في موول ضخم في محلات كتير اوي كانت كلها مقفولة للاسف هدوم ومكياج واكسسوارات...ما علينا تتعوض ان شاء الله....قلت ادخل الهايبر ماركت...كبير طحن بيتهيألي اكبر من كارفور عندنا..قعدت الف فيه جبت زبادي ومياه وواحدة مانجو والكيت كات اللي بكلها دي...المهم اني جبت 6 ازايز من مياة ايفيان ب 1.8 يورو يعني الواحد واقفة ب 0.3 يورو يعني 2.5 جنيه وبتتباع عندنا في مصر في "اون ذا رن" ب 11 جنيه الحرامية...بس الحاجة في الهايبر ايه كلها كلها درجة اولى...كله سينييه واصلي يامعلم ...كل علبة زبادي او عصير او اي منتج مكتوب عليه مكوناته والفيتامينات والمركبات والكالوري وكل حاجة تخصه...فعلا تحس بفرق حياة الناس اللي عايشة في اوروبا...

خرجت من الهايبر وقلت اتمشي في لا ديفانس..سبحان الله يا اخي مهما كان بردو الواحد لما بيمشي في مصر بيبقى مطمن وفي اي وقت وفي اي مكان..حتى هنا في باريس في قلب اوروبا المشي بليل لازم يكون بحساب وخصوصا لما تبعد عن وسط المدينة...اصلا انا لاحظت ان طول اليوم البوليس مش ظاهر..موجود خد بالك بس مش ظاهر..لكن مجرد ما الشمس تغيب تلاقيهم بدأوا ينتشروا...انا لاحظت وانا في طريقي ل "لا ديفانس" ان في زنزجد كتير معايا في المترو ولما نزلت هناك لاقيت عدد كبير منهم فخدت حرصي منهم كالعادة وبعدت عنهم لأن قلما ما تلاقي حد فيهم محترم –اقصد بتوع الشارع طبعا- بس اللي طمنى هو الشرطة اللي لاقيتها...المهم بعد لما خرجت من الهايبر جيت اطلع لمكان كده كنت عايز اشوفه وكان طالع ع السلم المتحك قدامي شوية شباب حوالي خمسة كان واضح اوي من اللهجة انهم جزائريين لأني عارف لهجة التوانسة والمغربة كويس..المهم كان في واحد وصاحبته واقفين مع بعضيهم فوق...بيبوس بقا بيوشوش بيحكي مش موضوعنا ومش حاجة ملفته للنظر خالص هنا...المهم واحد من الشباب دو وبدون اي سابق انذار راح للبنت وعمل حركات مش ولا بد الواد صاحبها مسك فيه ضربوا في بعض وواضح انهم كانوا سكرانين والشرطة ظهرت ماتعرفش منين انا قلت بقا مالوش لازمة واروح احسن...المكان فعلا كان معظمة عرب او زنوج والاتنين دول وجودهم بالمنظر ده وفي التوقيت ده معناه مشاكل وتحرش وحاجات كتير الله الغني عنها...وللاسف هما دول اللي جايبين السمعة السيئة...وانا كنت الصراحة ملاحظتش اي تغيير او تمييز في المعاملة..يمكن لما بدخل محلات كبيرة بتكون العين عليا لان واضح من ملامحي اني عربي ولاحظت كذا مرة ان السيكيورتي بيبقا متابعني بس مابيقدرش يقولي كلمة طبعا وطول ما انا تمام طظ فيه...الصراحة هنا طول ما انت محترم الناس بتعاملك بكل احترام

دي شوية صور يارب تعجبكوا

دا تاكسي يااخوانا

المباني في "لا ديفانس"ء

القوس الكبير اللي بحكي عنه

انا في الشانزليزية

قدام محلات ديزني

مقهى في الشارع قدام الاوتيل -الله يمسيها بالخير قهوة غرام عمار اللي بقعد عليها في مصر

كشك جرايد ولا مؤاخذة

المسلة المصرية في ساحة الكونكورد
برج ايفل من على نهر السين
على نهر السين وورايا برج ايفل