Friday, June 29, 2007

ندية ام تكامل؟


هل العلاقة بين المرأة والرجل هي علاقة ندية أم تكامل؟

الاسبوع اللي فات نشر اخي احمد سمير في مدونته"الاغلبية الصامتة" موضوعين بعنوان " نظرة سلبية" و "المساواة" وكان حواليهم نقاش كتير مابين مؤيد لاحمد ومعارض ضده...الصراحة انا قعدت افكر في الموضوع ده وكانت جوايا افكار متضاربة ومتناقضة كتير وحبيت اخرجها ع الورق وافضفض معاكوا شوية باللي جوايا واللي انا مقتنع بيه وخصوصا في موضوع المساواة بين الرجل والمرأه ومفهومها عند الاتنين

لو بصينا على خلق ربنا سبحانه وتعالى هنلاقى ان المساواة اصلا مكانتش موجوده في خلق الذكر ولانثى لكن اللي كان موجود كان تكامل بين الاتنين.ربنا سبحانه وتعالى لما خلق ادم واسكنة الجنة خلق بعدها حواء لتكون لادم انيسه ورفيقة تؤنس وحدتة وتزيل عنه الوحشة لكن مش معنى كده ان بنات حواء يبقى مهمتهم في الحياه هو الترفيه عن الرجاله ولا ان الرجاله درجة اولى وهما درجة تانية لأ خالص...سبحان الله ربنا خلق الذكر والانثى بمواصفات يكملوا بيها بعض عشان يبنوا الحياة ويعمروها وفي نفس الوقت ماينفعش كل واحد منهم يعيش لوحده..مش هايعرف لان دي حكمة ربنا ...خلق الانثى وفيها حنية وعطف وقلب طيب واحساس عالي وخلقها ضعيفة لا تحتمل العنف ولا الخشونة وخلق جسمها بامكانيات اضعف بكتير من الرجل اللي زاده بسطه في الجسم والخشونة والصبر والتحمل والجلد وجعل عقله يغلب عواطفة وعشان كده التنين بيكملوا بعض.ء


المشكلة ان مجتمعنا ذكوري بجد...في كل حاجة من اول الولادة...ناس كتير وكتير اوي لسه بتفرح بالولد اكتر من البنت لأ وكمان ممكن يكدبوا ويقولوا دا بنت في اول كام يوم من الولاده قال ايه عشان مايتحسدش وكأن الناس لما يعرفوا انه جاب بنت هايقولوا ياحرام ربنا يكون في عونة ويعوضه...........نيجي بعد كده للتربية...تلاقي الباشا قاعد يتفرج ع الماتش ولا الفليم الاكشن وياعيني عطش....قومي هاتيلي اشرب...او تكون طلبت معاه مزاج وعايز يشرب كوباية شاي...قومي اعمليلي كوباية شاي...وياسلام بقه لو اعترضت هاتخدلها كلمتين محترمين ينكدوا عليها............دا طبعا غير ان الباشا قاعد يتسرمح طول اليوم في الشارع مع اصحابة والغلبانة مجرد ماتاخد الاجازة مابين غسيل وتنفيض وتجهيز غدا والشاي بعد الغدا وغسيل الاطباق وغيره وغيره............انا مابقولش ان البنت ماتساعدش في البيت او انها ماتخدمش اخوها لو احتاجها في حاجة لكن المشكلة ان اوقات كتير بيكون الوضع ظالم اوي بجد....مابيكونش في تعاون بيكون فيه امر ونهي....ياكده يا هتتهزئى...والولد يعمل وانتي ماتعمليش...ويخرج مع اصحابه وانت وراكي شغل البيت...ايه ياجدعان دا ولا معتقل ابو غريب

نفس الولد ده لما هيتجوز هيطلع عين مراته..عايز اشرب..هاتيلي شاي...جعاااااااان.....قومي شغلي المروحة...قومي اطفي التكييف..والبعيد مابيقومش من مكانه ولا بيتحرك...دا مافيش حتى كلمة "لو سمحتي"....او "من فضلك"....هو ده اللي عمل التفرقة وولد الخلاف مابين الرجل والمرأة وهو ده اللي خلا المرأه عايزه تتساوى بالرجل بعد لما حست فعلا انها بقت درجة تانية وعلطول هي اللي غلطانة ومهضوم حقها و بصراحة عندها حق في كل ده لكن بردو لازم يكون في شوية تفكير لأن المساواة المطلقة بين الرجل والمرأة مستحيلة فعلا...لكن المساواة نسبية يعني ايه؟ يعني في مجال العمل مثلا هتلاقي اماكن ماينفعش غير ان الرجل بس اللي يشتغل فيها زي المهن اللي بتحتاج مجهود بدني وتحمل عضلى وعصبي وفي نفس الوقت في مهن تانية ماتنفعش غير المرأة زي مثلا مدرسات الحضانة,الممرضات.....يعني المهن اللي بتطلب مهارة ممزوجة بالعاطفة والرحمة...لكن في اماكن تنفع الاتنين زي مجالات التصميم والجرافيكس والطب وغيرها كتير وفي المجالات دي ممكن ساعتها تحقق المساواة الكاملة بين الاتنين في نظام الشغل ونتائجه دون اختلاف ودون النظر اذا كان ده راجل او ست...هنا العقل هو اللي بيحكم...ء


و في البيت المرأه ربنا الهمها مهارة ادارة المنزل وترتيبة...مش تكون خدامة فيه على فكرة.....انما بردو الراجل رغم انه لازم يكون خير سند لزوجته في البيت مايقدرش يحقق التوازن مابين ادارة البيت وترتيبة وتربية الاطفال و غيرها كتير من الحاجات اللي فعلا ماتقدرش غير امرأه هي اللي تقوم بيها ودي فعلا مهارة بجد..لكن لازم الراجل يكون مساعد ومساند لزوجته ومايبعهاش عند اول مطب...بجد الست هي عصب أي بيت والراجل من غيرها هيتوه

كنت قريت بوست من كام يوم ظريف اوي اسمه
"قلب شجاع" في مدونة ناني "ياحلاوة ياعيال" كانت بتقول ان أي
راجل قلبه شجاع لانه كل يوم بيروح شغلة غصب عنه ماينفعش يجي يوم ويقول انا زهقت ومش عايز اشتغل...كلمة مش موجودة في قاموسه ..عشان يعيش حياه كريمة لازم يشتغل ..على عكس المرأه اللي لو حبت في أي لحظة انها تسيب الشغل القرار هيكون سهل اوي وهتكون مسؤولة من الرجل وهي دي قوامة الرجل على المرأة
كل الكلام اللي فوق والرغي ده كان قصدي بيه ان العلاقة مابين الرجل والمرأه هي علاقة تكامل وترابط مش علاقة سيد وخادمة ولا علاقة حقي وحقك....لا هو هايعرف يعيش من غيرها ولا هي هتعرف تعيش من غيره والمساواة اللي لازم تكون موجوده بين الاتنين مش هتكون مساواة مطلقه لكن هتكون سلوك وتعاون يقوم على الاحترام المتبادل مع حفظ الحقوق والمسؤوليات والحفاظ ع المرأه ومراعاة حدودها وامكانيتها وعدم التفرقة بينها وبين الرجل في الاحكام اللي تتعلق بالاخلاق والقيم والسلوك الاجتماعي...ء
الرسول عليه الصلاة والسلام قال " استوصوا بالنساء خيرا"ء

32 comments:

rack-yourminds said...

عشان نكون منصفين كتير منا نحن الرجال بينظر للمراة نظره مش كويسه ليس لها كيان ولا راي أو هي علي الهامش ,هذه ثقا فة هذا المجتمع ,بالتاكيد هذه نظره متناقضه مع الدين الذي كرم المراه ,لكن ابتلينا بصنف من الناس جعل العرف يطغي علي الدين ,يا سيدي الرجل الي الان بيخجل من ذكر اسم زوجته في حين رسول الله لم يخجل من هذا ,يا سيدي ما زال الكثير ينظر الي المراه علي انها عوره للاسف هذا ما يحدث ,نحن نحتاج الي ان نفهم ديننا كويس ونغربل الكثير من المفاهييم ونجعل الدين فوق العادات والتقاليد
بوست اكثر من رائع احييك عليه

Bella said...

وشهد شاهد من أهلها

قلت مايجب على كل رجل ان يفهمه حتى يسير المركب بمجدافين

اي يجدف فيه شخصين لامجداف واحد فقط

فلو جدف في المركب مجدافين متناغمين لسار المركب للأمام

لكن ان يجدف المجدافين متعاكسين فسينقلب المركب او على اقل تقدير لن يتحرك من مكانه

ولو جدف مجداف واحد سيسير المركب ولكن حتى تنفذ قوة القائم على المجداف المنفرد

نحن نحتاج الكثير حتى نحسن من علاقاتنا ببعض

وأول أمر ان نتخلص من تعدد المعايير الذي نتعامل به مع المرأة والرجل

والا يعتبر الرجل ان المرأة كائن ادنى منه وهو متميز عنها لالشيئ الا لانه رجل وهذا أمر لافضل له فيه وليس لها ذنب فيه.

المفاضلة بين الاثنين يجب ان تكون بناء على صفات كل طرف وليس بناء على الصفات التشريحية لاي منهما.

ساعود لاحقا لاستكمال التعليق

ولو اني لااحب مناقشة موضوعات المساواة والحرية والتحرر لان المفاهيم فيها عندنا مغلوطة لأقصى حد ويتم فيها خلط الاوراق بمهارة شديدة وكذلك يحدث تشويش على حقوق المرأة المشروعة ويتم اشهار سيف الخلاعة والمجون في وجهها اذا فكرت بطلب حق من حقوقها.

سأعود لاحقا لاستكمال النقاش

تحياتي

hana said...

الحقيقة انا بأحس انه الكثير من الرجال
يمكن بيكون ينظر للمراة على انها اقل منه وربما قد تفوقة هى فى العلم والثقافة
لا أعرف هل هذة النظرة جاءت نتيجة عاداتنا كمجتمع شرقى
وطريقة تربية الولد من البدايه على انه ليه من الحرية اكثر من الفتاة والخوف لا ادرى ربما يكون هذا هو سبب خلق
جذور العنصرية بداخل الرجل او بعض

الرجال ضد المراة
على الرغم من انه الحياة محتاجة للاثنين معا
كل منهم له دوره فى الحياة والذى لايقل أبدا اهمية عن دور الاخر
والعلاقة بينهم لما يكون اساسها التعاون والتكامل فى كل شىء
دة بيخلى الحياة تسير للافضل
لى عودةلمتابعة ما سيصل اليه النقاش
بوست بجد هايل

تحياتى لك

3abdo me7tas said...

صدق رسول الله صلى الله عليه وسلم
فى الأول أحييك على الموضوع الهائل بجد دى مشكلة بنمر بيها فى العصر اللى عايشينه وانا معاك بجد فى كل كلمة انت بتقولها . فيه بعض النساء بتاخد موقف من الأزواج اللى بيقعدو زوجاتهن من الشغل ويقولوا لا مينفعش امال فين المساواة المرأة لازم تشتغل زى الراجل عشان مش يتحكم فيها طيب ليه هم بياخدو الموضوع كده أنا عن نفسي لو تزوجت وعرفت أصرف على البيت مصاريف مرتاحة يعنى أخلى زوجتى تقعد فى البيت على الأقل تاخد بالها منه ومن الأولاد وحاجه تانية محدش واخد باله منها إنى عايز أريحها مش أخليها تتعب عايزها تكون مرتاحة طول عمرها وهى معايا ده الحاجه الاساسية اللى هتخلينى اقعدها ومش تشتغل آه ماشى يوجد بعض الفتيات يريدن أن يحققو أحلامهن وطموحهن تمام انا مقلتش حاجه بس تفتكر انهم هيستحملو الحكاية دى علطول تعب الشغل وقرفه دا احنا الرجالة قرفنا من الشغل وإحنا لسه فى أول المشوار
بصراحة فيه كلام كتير أوى عايز أقولة بس أنا تايه دلوقتى وهحاول أعلق تانى على الموضوع
جزاك الله كل خير

عمرو غريب said...

بجد وجهة نظرك رائعة

علي الالفي said...

احييك على منطقيتك الجامدة في التحليل

كمان عايز اعزمك على حفلتى الجاية ان شاء الله مع فرقة
step by step
الخميس الجاى 5/7 في ساقية الصاوي
و هايكون هناك مجموعة كبيرة و محترمة من البلوجرز

Radwa said...


بص انا هقولك الحقيقه وبعدين اقولك الواقع

العلاقه بين الرجل والمرأه تكامل مش نديه ودى الحقيقه

اما الواقع ان مع انتشار التعليم وامتلاء ساحات المحاضرات الجامعيه بالمرأة والى اوشكت على ان تكون 3/4 من المجمتع ونجاحها طبعا دا شئ معجبش _الرجل وبدأ يقف ضدها خاصة فى نجاحها لان اى رجل معندوش اعتراض فى موضوع الجامعه دا دا شرط من شروط الزواج طبعا_
والمرأة عنيده بطبعها فحاولت تنزل تفكير الراجل الارض وتثبت نفسها اكتر بالتالى اصبحت العلاقه نديه

بس فى حاجه اخيره
فى الاول وفى لاخر العلاقه تكامل لكن النديه دى فى حاجات معينه

Bella said...

موضوع كتبته على السريع

http://afkaar-bella.blogspot.com/2007/06/blog-post_9925.html

تحياتي

Monzer said...

تمام كلامك يا محمد وموافق عليه جدا
هى علاقة تكامل مش تطفل ولا افتراس

ولكن صدقنى الراجل بيخدم الست برده
يعنى مثلا ونكلم بصراحة انت ممكن تجيى على نفسك وماتدرش على رئيسك فى العمل وتهادن شوية علشان خاطر البيت، وده ماكنتش بتعمله لما كنت واحدانى

الى اللبس الى كنت بتلبسه أيام لجامعة بتوفره للمدام واأولاد ده برده خدمة

اكله مع أصحابك فى مكان من أيام زمان بتقول ما أجيب بيها جوزين فراخ وناكل كلنا ويفونا يومين ولا حاجة، ده خدمة

الامان والى انت توفرها بيت تبقى هي فيه الملكة وسيدة هذا البيت ده خدمة برده

لو قعدة على قهوة مع صحابك كنت بتقعدها كل يومين هاتبقى يوم واحد فى الهشر علشان توفر برده أي حاجة

الشاهد يعنى والله الراجل بيخدم الست وممكن فى حاجات أكبر بكتير وبييجى على نفسه كتير اوى

وحكاية الخدمة ده علشان تروح من ذهن المراة ليه ماتخدش الراجل على انه طفلها يعنى ابنها ، هو مش لو ابنها عيط بالليل وقالها قومى هاتيلى أشرب هاتقوم من احلاها نومة، ماتعمله على انه طفل، وبرده الراجل يعامل مراته على انه أبوها ومسئول عنها فى كل شيئ حنان وامان

أما حكاية الاخوات، فان صراحة أرفض ان البنت تخرج بالذات قبل مرحلة الجامعة انه تخرج مع زمايلها البنات بتحصل سخافات كتير الشباب كلهم عارفينها
مهمة الأب والام انهم يخرجوا بناتهم بنفسهم ويفسحوهم
والست هيى الى بتربى بنتها فهي بتبقى موافقه انها تجيب لأخوها يشرب

أنا طلوت أوى بس موضاعتكم هايلة بصراحة ، وانا أخدت كلمتين فى جنابى عند أحمد سمير
من اختنا حراس الحقيقة وفهمتنى غلط
فربنا يتسر وكلامنا يمر عندك مرور الكرام

تحياتى ليك يا جميل وآسف على الإطالة

صاحب البوابــة said...

مقال جميل للغاية

واجمل ما فيه ختمه بقول الرسول عليه الصلاة والسلام " استوصوا بالنساء خيرا"

تحياتي

Anonymous said...

wllahi ana lmma 2ret elpost da 7seeet feh 2mal wllahi!!
la2 w eeeeeeh...da walad elli by2ol keda wow!!
klam fe elsamem gedan
ashkorak 3leh

ياسر سليم said...

ازيك يا استاذ محمد

مقال قيم
ولكن عندى اعتراض بسيط
فى الجزء ده

لو بصينا على خلق ربنا سبحانه وتعالى هنلاقى ان المساواة اصلا مكانتش موجوده في خلق الذكر ولانثى لكن اللي كان موجود كان تكامل بين الاتنين

وليه ما نقولش كان الاتنين موجودين .. كان فى مساواه فى الخلق وبجانب كده كان فى تكامل .. ما ينفعش نقول ان الراجل نص والمرأه نص وهما الاتنين بقوا واحد صحيح

فهمتنى

يعنى لو مشيت على المعادله دى هتلاقى فى مساواه وتكامل فى نفس الوقت

تحياتى

MAKSOFA said...

لكل واحد درو ،لكن مع أختلاف الزمن أختلفت الأدوار وأصبحت للمرأه مكانه مساويه للرجل لأنها تعمل وتعول أسرتها واحيانا بتعول راجل قاعد علي قلبها مستحلي الحكايه ،وعلي فكره ممكن الراجل ده يكون جوزها أو أخوها أو أبوها وبتكون هي الفرخه اللي بتبيض للعيله بيضه دهب

Lemonada said...

عارف حاجة
المشكلة بناخد من الغرب الحجات الغلط والمش كويسة
وكمان مش بنفهم دينا صح
وقال اي عاوزين معاصرة وتقدم
معاصرة وتقدم اي يا عم
الام لو مش بتكون في بيتها مع العيال وتاخد بالها منهم مش حيكون في جيل صح متربي
والاب الي نازل فيا مراتو اوامر وفاكرها بس للخدمة بيدي انطباع خاطئ للعيال
كدة العيال بينشئو بافكار غلط ويعيدو من ثاني هبل ابوهم
والمراه لي عاوزة تشتغل وتخرج من بيتها لو كانت محتاجة لدة لازم تحاول توزن بين عملها وبيتها
يعني الموضوع شائك جدا
بس احييك جدا على نظرتك وتحليلك
تحياتي

الدمعه said...

السلام عليكم

اولا احييك على افكارك الجميله
يا ريت كل الرجاله تفكر زيك كدة
مظنش ان يكون في اي خلاف بين الرجل والمرءة
المهم
انت بتقول ان العلاقه بين الرجل والمرءة قائمه على التكامل
انا معاك في دي
لكن المساواة مش معاك فيها
لان الرجل مش زي المرءة خاااااالص الي بيطلب بالمساواة اكيد مش فاهم
ان الله سبحانه وتعالى فضل الرجل عن المرءة
ان الرجال قوامون عن النساء

الرجل عليه مسؤليه كبيرة جداااا
المفروض اي ست تحس بيها وتقدرها وتعذرة في اشياء كثيرة
بس دة كله تعطهوله لمجرد انها تحس منه بنظرة حب او عطف
الستات دول مخهم صغير وغلابه والله بس مين الي يعرف

انا اسفه للاطاله
وبجد فرحانه اني زورت مدونتك
بوست رائع وموضوع من الاكثر اهميه في الحياة

تحياتي

Unknown said...

بصراحة موضوع بجد هايل انت شرحت اساس الخلاف بين المراءة والرجل بشكل سليم
ودة الى خلاها تطالب بحقها لانها حاسة ان كتير من الرجالة وبصراحة بيتجوز ارخص من خدامة واسفة لصراحتى الشديدة
وياريت كل راجل يفكر شوية فى حق الانسانة الى متجوزها بس مين يقراء ومين يسمع
تلاقى الرجل من دول يقولك انا راجل انا قوام ولا بقى لما ياخدوا سنن النبى كلها ويقولك انا بعمل كدة علشان سنة طيب متشوف النبى كان بيعمل اية فى بيتة ولا دة مش سنة
رفقا بالقوارير

شاب نفسة يحقق حلمة said...

السلام عليكم
مقدرش اقولك غير ان وجهه نظرك رائعه
بس انا حاسس ان بعض الرجال بينظروا للمراءه علي انها شي لا وجود له مجرد مخلوق لتكتمل الحياه وده غلط
لان المراءه هي نص المجتمع من غيرها حاجات كتير مش هنقدر احنا يارجاله نعملها
تحياتي لك

Mirage said...

يادى الرجل والمرأو والمساواة والعدل

طيب

:)

سورى ياباشا
اصلى قريت الموضوع ده كتير قوى الأيام الى فاتت دى

غمض عينيك said...

ازيكوا ياجماعة
انا باعتذر عن التاخر في الرد...اصل انا في الاجازة مش بقعد ع الكمبيوتر كتير على اساس اني طول الاسبوع شغال على 3 كمبيوتر دفعة واحده فا بريح شوية ولكني متابع جيد للتعليقات من ع الموبيل

محمد سمير

غمض عينيك said...

---وحيد---
باشا شكرا على مرورك وتشريفك ليا بالتعليق
عندك حق فعلا ان ناس كتير غلبت العادات والعرف عن الدين في امور كتير ومن ضمنها النظرة المجحفة للمرأه ويمكن ده اللي هو عامل خلاف في حاجات كتير دلوقتي

تحياتي ليك ونورتني


---بيللا----

اعجبني فعلا طرحك لنقطة تعدد المعايير...فعلا افيش معيار واحد للحكم على سلوك المرأه لا دا كل حكم بيكون على حسب الهوى والمزاج
فعلا لازم يكومن هناك فهم من الرجل لحق المرأه مع تقدير من المرأة لحدود المساواة المطلوبة من جانبها

تحياتي ليكي يابيلا

---هنا---
هو فعلا كده ياهنا ان اللي اصل الموضوع ده في حياتنا دلوقتي الامور اللي اتربى عليها معظم ابائنا وامهاتنا ومن الطبيعي عايزين يربوا عليها اولادهم -الا من رحم ربي- اللي اثر علينا هي ثقافة سي السيد والبرقع والست امينة انما الدين ماقالش كده خالص بل انه كرم المرأه ايما تكريم

تحياتي بجد سعيد برؤيتك


---عبده محتاس---

نورتني ياباشا
وكلامك ده اللي انا قصدته لما اشت لمقالة ناني المسماه قلب شجاع....فعلا الرجل من اهداف انه يريح زوجته مهما كان تعبان في شغله..هو ده قدرة...وستات كتير فاهمة ده على انه استئثار بالنجاح بالرغم من انها مش هتستحمل اللي بيحصل فيه

تحياتي ليك

---عمرو غريب---

شكرا يانجم..نورتني


تحياتي لكم جميعا
محمد سمير

غمض عينيك said...

---علي الالفي---
شكرا ياباشا ع الزيارة وعالمجاملة وع الدعوة الجميلة

بس انت ماقولتليش الحفل الساعة كام؟

تحياتي

---سيندرلا---
شكرا على زيارتك ياسندريلا
انا بصراحة مش متفق معاكي في موضوع ان نجاح المرأه ده هو اللي معجبش الرجاله ماهما الرجاله مش متوحشين اوي كده ولا قاعدين للمرأه بالمرصاد
بس للاسف دي ثقافة شعب بحاله..المرأه تنجح وتكون من احسن الناس لكن ماتجيش ابدا على حق الراجل في الشغل ولا في النجاح ده حتى لو كان النجاح ده من حقها هي

تحياتي ليكي ونورتيني


---بيلا---
هاجيليك هناك


---منذر---

كلانك تمام ياباشا...انا مقصدتش بكلامي خالص ان الرجل بقسي ع المرأه او انه بيعتبرها خدامة...لا لا الرجل نفسه بيتعب ويستحمل ويضحى كتير عشان زوجته واهل بيته كلهم مايتعبوش وعشان يعيشوا حياه سعيدة وميسورة وياما الواحد بتحصله مشاكل في الشغل ويرجع بيته مبتسم عشان بس زوجته ماتضايقش
لكن انا قصدت ان في رجاله تانية بتعتبر ان ده عز الزوجه عيشه فيه وانها لازم ترد الجميل وتخدمة من غير كلمة اعتراض ولا مطالبه باي حق

تحياتي ليك ياباشا

--- صاحب البوابة---
سعدت بمرورك وبتعليقك ياباشا

تحياتي

---سمارت---
شوفتي لسه في امل في الرجالة

نورتيني ويارب اشوفك دايما

---ياسر سليم---

شكرا على مرورك ياباشا
انا قصدت بعدم وجود مساواه في مواصفات الخلق نفسة سواء المواصفات المعنوية او الفيزيائية انما اكيد كان في مساواة في التكريم والتكليف
لكن المساواة لو كانت موجوده في كل حاجة ماكانش هيكون فيه قوامة للرجل ع المرأه

نورتني يانجم


---مكسوفة---
بجد بجد سعيد برؤيتك

عندك حق في كلامك لكن انا كنت بتكلم عن القاعده مش عن الاستثناء

تحياتي ليكي وبجد نورتيني


محمد سمير

غمض عينيك said...

---ليموناده---
ازيك يانعنشه :)
عندك حق الموضوع موضوع اولويات للمرأه بيتها وشغلها وعلى الرجل انه يحترمها ويقدر ده كويس جدا


تحباتي ليكي ونورتيني وانعشتيني

---الدمعة---
شكرا على مرورك وتعليقك
كلامك تمام التمام

ربنا جعل للرجل قوامة عن المرأه وده اللي انا قولته ان المساواة المطلقة بين الاتنين مستحيلة لكن الاحترام المتبادل بين الاتنين وتقدير كمل طرف لدور الطرف التاني في الحياه هو ده اللي هيحقق المساواة الحقيقية والمنطقية او بمعنى تاني هيحقق التكامل بين الطرفين

تحياتي ليكي وانا فرحان بردو اوي بزيارتك ليا


---ايوية---
نورتيني وعندك حق
كان الرسول عليه الصلاة والسلام يخدم اهل بيته
المشكلة ان رجاله كتير فاهمة قوامة الرجل على انها تفضيل ولكنها في الحقيقة تكليف مش تفضيل ابدا
نورتيني بجد

---شاب نفسه يحقق حلمة---
عندك حق ياكبير...احنا من غير المرأه نتوه والله في حاجات كتير
بس تعمل ايه في رجاله بياعين كلام اوي ويقولك احنا محتاجينهم في ايه يعني


نورتني ياباشا وشكرا على مرورك

---ميراج---

عندك حق والله ياباشا ..انا بردو قريتو كتير

تحياتي



تحياتي لكم جميعا
محمد سمير

Anonymous said...

أولا عاوزة أحييك على الموضوع

موضوع المساواة وحقوق المرأة فعلا الكلام فيه بقى كتير أوى، وأنا معاك إن العلاقة بين الرجل والمرأة علاقة تعاون وتكامل بس احنا فعلا مجتمع ذكورى والأمثلة اللى أنت قلتها اكبر دليل على كده بالإضافة لحاجات تانية يعنى على سبيل المثال لو راجل مرآته ماتت حتلاقى ناس كتير بتقوله لازم تجوز وخصوصا لو عنده أولاد وحيبقى عادى جدا لو اتجوز، تعالى بقى للست تبقى قليلة الأصل وما صدقت إن جوزها مات لو فكرت إنها تجوز مع إن الأثنين طبقوا شرع الله وما حدش فيهم عمل حاجة غلط ولا تغضب ربنا.. بس نقول ايه بقى

برده الست المطلقة دايما الناس بتبصلها بصة مش كويسة وحركاتها بتبقى محسوبة عليها عكس الرجل مع أن جايز أوى تكون هى اللى اتظلمت أو مش لازم يكون فيهم حد ظلم التانى ممكن أوى يكونوا هما التنين أساوا الإختيار

فى أمثلة كتييييير أوى كفاية أن المرأة لحد دلوقتى فى بعض قرى ومحافظات الصعيد مش مسموح لها أنها تتطالب بحقها فى الميراث وخصوصا الأرض على أساس إن الأرض ما ترحش للغريب وإن كفاية عليها إن أهلها جوزوها مع أن ده ضد شرع ربنا

بعدين بقى عندنا مشكلة تقديس العادات والتقاليد وكأنها جزء من شريعتنا مع إن كتير منها إن ما كنتش كلها بعيدة كل البعض عن الشرع

كان ليه تعليق على تعليق الأخ منذر: هو بيقول إن الراجل بيخدم الست
أنا بختلف معاه لأنها ما سمهاش خدمة ده واجبه كزوج أنه يوفر حياة كريمة لزوجته وأولاده، بعدين هو مش حارم نفسة يعنى من متع الدنيا وهى قاعدة بتتفسح ما هى كمان بتشتغل سواء بتشتغل بره وجوة البيت أو بتشتغل فى البيت بس كله شغل ومسئوليتها والمجهود اللى بتقوم بيه ما يقلش عن اللى هو بيعمله لأن احنا قلنا أنهم بيكملوا بعض، يعنى حضرته ما بيخدمهاش ولا حاجة وزى ما هو بيقوم بواجبه هى كمان بتقوم بواجبها وزى ما هو ساعات بيجى على نفسه فهى كمان بتيجى على نفسها فى حاجات كتير يعنى ما بتأخذش فلوسه علشان تجيب بيها لبس زى أيام الجامعة برده ولا بتخرج مع صحابتها

فى حاجة كمان هى إن البنت ما تخرجش قبل الجامعة مع زمايلها.. ليه يعنى؟؟

وهو حيبقى صح إن أول تجربة ليها فى النزول للشارع لوحدها واحتكاكها بالناس تبقى وهى فى الجامعة، تبقى لأول مرة فى حياتها بتشوف الناس وبتتعامل معاهم مباشرة من غير بابا وماما وهى عندها 16 سنة، يعنى ايه المشكلة لما تخرج مع زمايلها وفى تربية وتوعية من الأب والأم ازاى تتصرف لما تقابلها سخافات وازاى تتعامل معاها ولا تفضل مع بابا وماما وفجأة تلاقى نفسها فى مجتمع مختلط ومفتوح وحتروح وحتيجى ومش حتبقى ساعتها سخافات بس لا ده حتلاقى حاجات تانية أسوأ وأفظع.. حتتعامل معاها ازاى وهى معندهاش أدنى فكرة أو خبرة أو معرفة؟؟؟

موضوع إن الست هى اللى بتربى بنتها فبالتالى هى بتبقى موافقة على أنها تجيب لأخوها يشرب أو أنها تخدمه أو غيره

محمد قال إن احنا مجتمع ذكورى وأنا متفقة جدا فى الرأى ده وبالتالى فالراجل والست هما الأتنين تربوا تربية واحدة فالست ده للأسف تربت برده على كده على إن البنت تقوم تخدم أخوها حتى لو هما الاتنين من سن بعض وحتى لو هو قاعد فاضى وهى بتذاكر أوبتعمل أى حاجة لما أخوها يطلب يشرب وهو قاعد بيتفرج على التليفزيون مثلا برده المفروض أنها تقوم تجيبله يشرب.. ده فى عدل مين يعنى؟؟؟

أسفة جدا جدا على الإطالة، بس الموضوع فعلا فيه خلط كبير جدا بين الشرع وبين العادات والتقاليد اللى بقينا نتعامل معاها على انها الشرع ونسينا شرع ربنا

وأسفة جدا يا أخ منذر بس بصراحة ما أقدرتش أعدى على كلامك وأسكت

hana said...

انا بصراحة مابحبش ابدا موضوع انه البنت تجيب لاخواها الحاجات وتخدمه وهوة قاعد كدة مايعملش حاجة
هو عادى أننا نجيب لاخواتنا شىء بس كمان اخونا برضوا لازم يعمل نفس الحكاية يعنى تبقى الخدمة متبادلة
بصراحة موضوع التفرقة بين البنت والولد زرعته جوانا التربية
الخطأوعدم الوعى
واللى لو هنقول يبقى هنقول كثير
وهنتعبك من الردود هههه
أنا بأتمنى أنه الكل يعرف أيه المفروض يعمله سواء بنت او ولد
من غير تقليل من شأن الاخر
وأنه كله يعرف أنه الحياة نصففين رجل وأمرأة
وأحترام الرجل للمرأة بيزييد من احترامها ليه
وحبها ليه طبعا لزوجها يعنى
أنما العكس للاسف بيكون من عدم الاحترام
أنا جيت تانى بقى أوعى تضربنى هههههه
بوست بجد بجد هايل
تحياتى لك
هنااا

mimi said...

موضوع جميل وزي ما اكون قريت افكارك لما كتبت البوست الجديد
رأيك عقلاني جدا بس اللي بيتبنى الرأي ده مش كتير
والاهم من كده انك تكون بتطبقه في حياتك
سلاماتي وتحياتي

كراكيب عادل said...

احسنت يا محمد

بوست في الجون

رينـــــــــــا said...

وشهد شـــــــــــــــــاهد من اهلهــــــــا
ايه يابنى دا
طيب والله كويس فى امل فى الرجاله
وان فى منهم فهمين اهوا
طيب الحمد لله
والله انا كنت بدأت افقد الامل تماما
احلى حاجة عجبتنى
اعترافك اننا فى مجتمع ذكورى بحت :D:D:D
مش قادرة اقولك ارتاحت اد ايه لما لقيت ان فى رجل معترف بيها
عة لتل يتفع اطبع البوست دا واوزعه :D:D:D:D
تكسب ثواب وربنا فى تفتتيح اذهانناس كتير :@ :@ :@

طبعا انا مقتنعه تماماااااااا ان العلاقه بين الرجل والمرأه تكميليه فى المقام الاول
ومفيش حاجة اسمها مساواه
لكن مش معنى كدا انى فعلا اتعامل على اساس انى درجه تانيه
انا مش عايزة اتكلم كتير لانك اوجزت وافدت

بوست رااااااااااائع
تقبل احترامى وتحياتى

غمض عينيك said...

---بحبك يامصر---
صح كده انن فعلا غلبنا العادات والتقاليد والتربية على الدين وعشان كده الم بتربي بنتها على انها هي اللي تخدم اخوها حتى لوكان فاضي والنقطة دي بالذات انا مش شايف فيها حاجة بشرط انها تكون عادي يعني" من فضلك بس كوباية مية" مش قهر وفرض عليهاانها تجيبلوا ويمكن ده هواللي كان يقصده منذر يعني لا افراط ولا تفريط...فاهمة قصدي؟
وعندك حق فعلفي موضوع الميراث واللي المفروض ان دي حاجة مافيهاش قولان ولا
اراء ولا بتنجان بس تقولي ايه

نقطة الخروج انا معاكي فيها بردو ويمكن انا معلقتش على الاخ منذر عشان انا بردو ان في وقتنا ده الخروج للبنات لازم يكون بشروط زي الاحساس بالامان والاطمئنان عليها وعلى صحبتها لان زمننا ده بقى وحش اوي بجد لكن مش معنى كده اني احبسها

ع العموم نورتيني ياشيماء واتمنى اشوفك دايما

---هنونة---
كده احنا متفقين تقريبا في كل اللي قولتية وده اللي انا قصده..التعاون واحترام الطرف الاخر
وانت تنوريني في اي وقت انتي عايزاه انا فاتح 24 ساعة :)

نورتيني بجد

---ميمي---

ميرسي ع المجاملة يا ميمي والحمد لله انا فعلا بحاول دايما تكون افعالي زي كلامي
سمعتي بيت الشعر اللي بيقول

لاتنه عن فعل وتأتي مثله ** عار عليك ان فعلت عظيما

نورتيني يا ميمي

---عادل---
شكرا ياباشا ع المجاملة..من بعض ماعندكم

تحياتي ليك


----رينا---
شوفتي بقه الرجالة لسه فيهم امل انتي بس شوفيني وانا هاظبطلك الكلام منشورات واعلانات وكل حاجة
انا شعاري في الحياة ابجني تجدني

نورتيني يارينا


تحياتي لكم جميعا

Egypt Rose said...

فيه لسة ناس بتفكر كدة في العالم .. في يوم من الايام سوف تنقرض المرأة المصرية المتخلفة من جراء ما يحدث لها في مصر ولن يبقى سوى الرجال المتخلفين ولن تقبل اى امرأة محترمة ان تقترن بهم .. الناس عندك بتتكلم بلغة يقلها 1400 سنة بل ربما
ربما 2375
لما راسطو سامحه الله اطلق نظريته عن الحتمية البيولوجية .. ان المرأة عبارة عن ارض يزرعها الرجل زي ما هو عايز .. وعاملتها كالمرحاض بدخله للتخلص من فضلاته .. بتعملو المرأة على انها كائن متخلف عقلياً لازم نقومه و نعدله ونعيشله .. يا جماعة .. حلو عنا بدنا نعيش .. حلو عنا
والاخ اللى عايز الست تعامله على انه طفل .. هو فعلاً طفل ولم ينضج بعد في افكاره .. وعايز يعمل سجان على البنت الغلبانة .. وحكاية الخلق ده من اليهوديات في الدين الاسلامي .. ولا توجد اى ايه قرانية بها ان الله قد خلق ادم قبل حواء .. ده كلام التوراه اللى عجبة يحول دينه لليهودية .. بس الاسلام ذكر ان الله قد خلقنا من نفس واحدة وخلقناكم من ذكر و انثي ..
والاخ الى بيقول ان المرأة تقعد في البيت تربي ابناءها وان الشغل هيخرب العيال احب اقول له ان جميع الطلاب الاوائل على مستوى الجمهورية امهاتهم سيدات عاملات !!!!
العمل عبادة ومن لا يعمل لا قيمة له على المرأة واجب في ان تساهم في بناء المجتمع والمشاركة في تنميته وتطوره .. نحن دولة نامية لا تنحمل رفاهية ان يجلس نصف المجتمع بل اكثر بدون عمل ..
الكلام ده راحت عليه العالم فيه مشاكل اكبر من كدة ..

معليش الموضوع ده جميل والهدف منه راقي بس بيوريك النظرة الحقيرة التى ينظر لها الرجل للمرأة في مصر .. اللى عايز ست من النوع الحلوف يروح ايران يروح باكستان يروح افغانستان .. يروح اى حته الست فيها مرحاض بعيد عنا .. عيزين نعيش ناس محترمين

hana said...

بجد بحييك على تفكيرك الجميل وارائــك
الموضوعيــة
شىءجميل بجد

تحيانى لك
هنا

BoTaNesToKeeSoo said...

السلامووو عليكوووووووووو


اولا دى اول زياره للبلوجه بس بجد احييك عليها


وخصوصن الموضوع دا


مش لانى بنت وانت بتتكلم عن البنات او المراه بشكل منصف

لا لانك فعلن بتتكلم بحياديه رائعه واسلوبك وتحليلك وتسلسل الافكار بجد جامد جدن

وبسيط فى نفس الوقت


ممكن لو كان البوست دا بنت اللى كتباه مكنتش هاستغرب لانه طبيعى بتحكى عن حاجه هى حسساها او مشكله عندها او حق مسلوب منها


انما لكونك ولد وبتتكلم يالطريقه دى فى الزمن دا فدا شئ تحفه


وانا قصدت الزمن دا لان ايام الرسول صلى الله عليه وسلم كانت النظره للمراه والتعامل معها كان غير الايام دى تمامن كانت بتحترم بشكل بشع وزى مانت قلت الرسول وهو بيموت وصى عالنساء

وافتكر موقف لصحابى كان رايح يشتكى لسيدنا عمر ان زوجته بتعلى صوتها عليه فبعد ماخبط سمع صوت زوجة سبدنا عمر بتعلى صوتها عليه فلما قال لعمر فرد عليه وقالله انها تربى الابناء وتراعى البيت ولم يامرها ربها بكدا فهل انا مااصبرش عليها


انما الايام دى وحتى الاجيال اللى قبلنا بسمع حاجات وبشوف حاجات من اهانه لتهديد بالطلاق كانه بيتكرم عليها بقعادها معاه فى البيت لتفضيل الاب والام الابن عن البنت بشكل يعقد البنت ويدى للولد ايحاء انه احسن منها

كنا مره بنتفرج على حلقه لعمرو خالد عن المراه فى الاسلام مع عيلتنا فبعد ما الحلقه خلصت قام ابن عمى قال مش للدرجادى يعنى يا عمر .........



فخلاص مفهوم ان الولد كائن درجه اولى والبنت درجه تانيه بقى مسلم بيه عند كتير من الولاد وللاسف كتير من البنات كمان

والسبب فى دا راجع اولن واخيرن للام لانها هى اللى بتربى الاحساس دا فى ابنها او بنتها اما عمدا او بغير عمد مثلا بتسكت عن حقها لما جوزها او اخوها بيغلطو فيها


انا الحمد لله لا اعانى من هذه المشكله فى البيت لان بابا ومام مثقفين وفهمين دينهم كويس وغير كدا معنديش اخوات ولاد كبار ولكن فعلن مجتمعنا زى مابتقول واحده صحبتى مجتمع ذكورى متعفن


انا اسفه جدن عالتطويل انا والله بعد ما كتبت الكومنت كنت عاوزه امسحه لانه طوييل زياده عن اللزوم ويا بخت مين زار وخفف وخصوصن ان دى اول مره بس بجد الموضوع شدنى جدن وخصوصن طريقة معالجته


اشكرك

غمض عينيك said...

BoTaNesToKeeSoo
يا اهلا وسهلا بيكي..نورتيني والله بالكومينت اللطيف بتاعك واللي كان نفسي يطول اكتر من كده

فعلا عندك حق..تراكم العادات والتقاليد طغى على امور الدين الصحيح في احيان كتير وزي مانتي بتقولي ان الام نفسها هي اللي بتحسس الابن والابنه بالفرق اللي بينهم واللي فيما بعد بيبان في عش الزوجية باحساس الزوج دايما ان زوجته درجة تانية وملهاش حق حتى تشاركه في القرارات المتصلة بالبيت وبحياتهم مع بعض...غير حاجات تانية كتير اوي اوي

وهو دا اللي خلا المراه تطالب بالمساواة اللي مع الوقت تعدت حدود المساوةاة المعقولة لمساواه تانية هيكون فيها ظلم للطرفين

في معايير كتير في مجتماعنا عايزة تتظبط سواء عند الرجل او عند المرأه

نورتيني
بجد
محمد سمير