غادر القاهرة وزير الاسكان في طريقه إلي سويسرا عن طريق باريس بعد تعرضه لموقف محرج علي الطيران السويسري الذي رفض انتظاره بعد تأخره عن الموعد المحدد للصعود إلي الطائرة. وكان مندوب وزارة الاسكان قد انهي اجراءات سفر الوزير علي رحلة الخطوط السويسرية رقم 237 إلا ان الوزير تأخر عن موعد الطائرة. ورفضت شركة الطيران انتظاره فتم إلغاء سفر الوزير. وتقرر إعادة الحجز للوزير علي الخطوط الفرنسية والتي غادرت إلي باريس
الخبر اللي فوق ده نشر على موقع مصراوي ولو الخبر ده صحيح يبقى لازمن وحاتمن الحكوممة المصرية تقدم احتجاج رسمي فهمي نظمي الصراحة للحكومة السويسرية بعد التعدي السافر على حرية جناب فخامة سعادة وزير مساكن المحروسة...ايه يعني فخامته اتأخر شوية..ايه يعني لما الركاب ينتظروا سيادته ساعة ولا اتنين ولا عشرة حتى...ده وزييييييييير ياجدعان يعني مش فاضي وكل دقيقة فيها انجاز..لا لا اللي حصل ده لاممكن ابدا يتسكت عليه وبعدين احسن حاجة ان سيادته حجز علي الطيران الفرنسي اهو على الاقل يرتاح يومين في باريس من الاحراج اللي اتحط فيه والمفروض يستصدر قرار ويوقف كل رحلات الشركة السويسرية بعد المصيبة الي عملتها
طبعا لو سيادة الوزير كان تنازل وراح عن طريق مصر للطيران اللي هي بتاعتنا ديه كانوا طبعا استنوه لغاية لما سيادته يخلص كل اللي وراه ومش مهم الركاب يخبطوا دماغهم في اقرب سحابه...انما انا عارف ان مصر للطيران مش قد المقام. يللا حصل خير
انما هو كان رايح سويسرا يعمل ايه؟
20 comments:
برافو عليهم اللى سابوه يرن في المطار وطلعوا
سيادته فاكر نفسه في شركة طيران بلد لاتحترم الوقت والعملية سبهلله ويتأخر براحته يولع الركاب من الانتظار لما جنابه يشرف
مافيش مسؤول بيحترم مواعيده ابدا في البلد دي
جاتهم الهم كلهم
بس احسن والله فرحانة فيه ومتصورة منظره وهو بيشخط وينطر وبيهدد ويتوعد شركة الطيران عديمة النظر بأنه ح يمنعها من استخدام المجال الجوي المصري
هههههههههههههههههههه
ههههههههههه
لالالالا
انا لو منه؟؟؟
اعلن الحرب على سويسرا
اهه منه قصاص
ومنه نبقى عملنا حاجة متعملتش قبل كده
اننا نحارب البلد اللى مبتحاربش
وده عشان يضمن انه يكسبها
عشان هى معندهاش جيش
لا فكاكة فكاكة يعنى :-)
ياباشمهندس يادكتور ياوزييييييييير
حاربهم اسمع كلامى
وخدو مذذهم سبايا
ورجالتهم هاتوهملنا حنتصرف فيهم احنا بمعرفتنا :-)
اصل ده عار لا يمحوه الا الدم
تفوته طيارة؟؟؟
ليه؟؟
هو موظف بيجرى ورا اتوبيس نقل عام من اللى كان بيتشعلق عليهم ايام زمان ايام ماكان فى منظمة الشباب بيكتب تقارير فى صحابه؟؟؟
لالالا
ده وزير ملو بدلته
!!!!!!!!!!
الطار ولا العار يا وزوز
" دلع وزير"
الا هو اسمه ايه صحيح اسم النبى حارسه؟؟ :-)
هو اكيد كان فى سويسرا بيعمل بصمة صوت لفلوسه اللى هناك
;)
بس فعلا المصرى دلوقتى بقى بيضرب بيه المثل فى اى صفات سلبية ممكن تتخيلها
وخصوصا لو كان وزير
ههههههههههههه برضه ضحكتنى عالصبح ياآه ياآآآآآآآآه ... وعموما ناس كتير اوى محتاجة تتعلم ازاى تحترم المواعيد انا بعتبر ده شئ حضارى لابد منه
كماااان انا فرحانة للي حصل مش والله شماتة بقدر انه يعرف ان جميع البشر سواسية كاسنان المشط تحياتي للموضوع ده
بس ياريت نحس ونتعلم
---bella---
شكرا علي مرورك
حلوة موضوع يرن جيه على اساس انه جرس يعني :):)
هاهاها احسن انا برده فرحان فيه اوي
تحياتي ليكي ونورتيني
---البتاع---
ايه النور ده 2 كومينت في يوم واحد لا لا لا انا مش مصدق
سيبيك انتي حلوة فكرة الحرب والسبايا ديه وانا موافق وهيكون على كل مزة ساعة هدية
نورتي
---ميراج---
لا يابرنس كان في سويسرا بيجيب ساعة
لابن اخته عشان عيد ميلاده
وبعدين وحياتك حتى لو كان مدير مدرسة كان برده هيضرب بيه المثل
نورتني ياباشا
---بوسي كات---
كتير بانبسط لما اضحك حد وخصوصا لو كان ساعة الصبح وخصوصا برده لو كانت بوسي كات
تحياتي
---true love---
انا كمان فرحي ممزوج بشماته من النوع التقيل وكان نفسي اشوفه هناك شكله كان ايه
شكرا على مرورك
---سندباد---
ياريت ياباشا...بس بيقولك علم في المتبلم يصبح ناسي
شكرا على مرورك..نورتني
تحياتي لكم جميعا
محمد سمير
ياعم دة لو كان راح على مصر للطيران
كانوا نزلوا الركاب وخصصوا الطيارة لفخامة الفخامة
وبعدين ياعم دة باين عليه وزير بيئة
معقول معندوش طيارة خاصة لحد دلوقتي؟
يااااااااي
مش من مستوايا
صدق انا اول مرة اعرف ان سويسرا فيها رجالة
بتحافظ على بلدها وقيمة عملها حتى لو كان في
شركة طيران والعميل وزير
كل سواء
رجالة بجد
هى دى الحرية مش هنا طبعا يستنوه ليه ان شاء الله هناك الوزير زى المواطن العادى كله سواء انما تقول ايه بقى ربنا على الظالم و..........
هما كدا المصريين دايما كاسفينا بره
مافيش فايدة فينا خالص
.
.
يارجل دا حتي مافيش فرق بين وززير او زير
.
.
حاجة تنقط
--ابو سمرة---
عندك حق ياكبير..كانوا نزلوا الناس فعلا وفضولوا الطيارة
وبعدين هو طالب طيارة بس معاكسينوا في الجمارك شوية
نورتني
---الحسيني---
شكرا على مرورك
ياباشا سويسرا حتى لو مافيهاش رجاله..فيها اصول ونظام وقواعد وكله زي بعضة قدام النظام ده
تحياتي ونورتني
---د.هيما---
شكرا على مرورك
ي دي الحرية والمساواة والنظام مش زينا كلام والسلام
تحياتي
---ادم باشا---
هل هلالك ياباشا
انت فين من زمان؟
سيبك انت الناس دول علطول فاضحينا في كل حاجة
ربنا يفضحهم ويحرجهم اكتر واكتر
تحياتي
محمج سمير
على فكره شركه الطيران السويسريه ماعندهاش حق خالص تمشى و تسيب الوزير بتاعنا
مالها مصر للطيران .... ولا هى عقده الخواجه
شكرا على زيارتك ليا
و مدونتك هي اللي تستحق الزيارة بجد اكتر
اللي حصل من اطيران السويسري ينم على احترام شديد للمواعيد
حتى لو كان رئيس
في انجلترا بيحسابوا الملكة على الشك في انها بتتهرب من الضرائب
يا سلام يا ولاد كدة ميحترموش الوزير الوزير الوزير (وزير دة عندنا بس ) بس هناك لو رئيس الجمهوريه اتاخر بردو مش هيستنوة
والمفروض المحترم يدفع حساب الرحله الى اتاخر عليها من جيب اهله مش من جيب اهلينا وانت بتسال كان مسافر ليه دة ايه دة طب وانت مالك هو مين فيكم الوزير دى اسرار حربيه
انا هتشل يا جدعان
---داليا---
نورتي المدونة ياداليا
ماهو عشان كده انا بقول نمنعهم من العمل في الاجواء المصرية او نعلن عليهم الحرب زي ما البتاع بتقترح :)
تحياتي ليكي
---احمد المصري---
ياباشا شرفتني ونورتني وشكرا على المجاملة اللطيفة ديه
تحياتي
---َضد الظلم---
نورتني ياباشا
عندك حق والله في جيوبنا اللي اتقطعت من كتر مابيتاخد منها عشان خاطر سعادة الباشا هيتجوز وسعادة البيه عايز يدفس حبايبه في دافوس واهو كله علي حساب اهل المحل
تحياتي
محمد سمير
انت عارف حضرتك
تونى بلير اخدوه مخالفة سير
علشان هو رئيس على وزير
لكن وزيرنا غطا على زير
وتلاقى وزير الإسكان كان مشغول فى حريق قلعة الكبش بيبعت بنزين لمصر ولا أمبوبة ولا أي حاجة يجامل بيها ربنا معاه الراجل يلاقيها منين ولا منين الحرايق كتيرة والله ومش عارف يعمل أكتر من كده ايه
تحياتى ليك
---hapasa---
باشا نورتني
انا نفسي ان الناس هنا تتعامل زي بعضها
ياراجل دا انا لو ابن خالتي امين شرطة مش هاخد اي مخالفة فمابالك بقه بالوزير
تحياتي ليك يابرنس
محمد سمير
وبعدين بقى أنا حفتح عينى بعد كده وأنا داخلة علشان كل مرة اخبط فى حاجة جديدة
بعدين اتشغلى يومين فى الامتحانات ارجع الاقيك نزلت ثلاث بوستات، طب انا اعلق امتى بقى
بس الا موضوع الوزير ده، ده كلام ، يعنى يصح يعنى الراجل بعد ما يوصل المطار يقولوا خلاص الطيارة طلعت.. لالالالالا، ده موضوع ما يسكتش عليه ، هو الراجل ده شوية، بس هو ازاى فعلا ما عندوش طيارة خاصة هو فقير ده عنده فلوس وشركات وتوكيلات قد كده لو اقعدت اعدهالك مش حلحق اذاكر.. مش مستوعبة الموضوع اصله عنده فلوس كتييييييييييير، بعدين على فرض ان هو ما عندوش طيارة خاصة كان حتى استلف من قاريبه، ما هو اصل قاريبة فى الوزارة كتيييييييييييييير برده
---بحبك يامصر---
ياباشا الف سلامة عليك من الخبط
انا عغير لسم البلوج ل -فتح عينيك- اصل في ناس كتير اتخبطت برده واشتكت
المهم ايه اخبار الامتحانات شدي حيليك كده عشان تبقي وزيرة وتجيبي طيارة بالتقسيط ولا نحتاج طيران سويسري ولا طنطاوي
شكرا على مرورك
تحياتي ليكي وربنا معاكي
محمد سمير
Post a Comment