مصر دولة... متقدمة

خلاص ياجماعة...اطمنوا اطمنوا
كله خلاص يقعد قاعد ويسكت ساكت
اطمنوا ومحدش يقلق خالص...دكتور نظيف خلاص طمنا وقال المفيد
دكتور نظيف اكد – واخدلي بالك من اكد دي- ان مصر هتكون دولة متقدمة عام 2020 ان شاء الله- غالبا ع الساعة 5 بعد العصر- وانها نجحت في تحقيق انجازات اقتصادية ملمسة...قصدي ملموسة وانها كمان هتكون نمر –لامؤاخذة- اقتصادي هي وجنوب افريقيا...وهيبقى اسمهم النمور الافريقية على وزن النمور الاسيوية كده
وخد عندك بقا الكلمتين الجامدين دول
وأوضح رئيس مجلس الوزراء أن النشاط الاستثماري المتزايد في مصر أسهم في اقامة مشروعات عديدة متطورة تقوم على التكنولوجيا الحديثة مما أوجد مشكلة جديدة هي عدم توافر العمالة الفنية المدربة بعد أن كانت الحكومة تعاني من مشكلة البطالة وايجاد فرص عمل للشباب الامر الذي تطلب الاهتمام بتنمية الموارد البشرية ......
ياحلاوة ياعيال...وهي الحمد لله العمالة الفنية خلصت والناس اللي قاعده ع القهاوي اشتغلت كلها ومبقاش في مشكلة بطالة....وبقت المشكلة ان مبقاش في ناس تشتغل...يعني حلينا مشكلة البطالة وبقى عندنا مشكلة اشتغالة
هي صحيح اشتغالة
المهم يا اخي ويا سبحان الله....في نفس اليوم وفي نفس الصفحة كان في خبر بالعنوان ده العالم المصري فاروق الباز:مصر نازلة لتحت....الراجل بيقول ان مصر كل يوم بتنزل لتحت عن اليوم اللي قبله وان احنا بقينا نستورد حاجتنا من بلاد كانت اقل مننا زمان وبلاد تانية لسه فعلا اقل مننا وان احنا عندنا وفرة من الكوادر الفنية الشابة الغير مستغلة
بس بيني وبينك..انا حاسس بمؤامرة...اصل فاروق الباز ده معاه الجنسية الامريكية ومتجوز امريكانية وعايش هناك وناسا وبتاع وكلام كتير كده...اكيد اكيد دي مؤامرة وبتحاك ضدنا من الامريكان عشان يحبطونا ويحسسونا ان بلدنا كلها مشاكل
انما لا لا ابسلويتلي
احنا معاك يادكتور نظيف ومصدقينك طبعا طبعا...مصر ياولاد هتكون دولة متقدمة سنة 2020 لا دا قبل كده كمان
ولعلمكوا بقا....مشكلة البطالة اتحلت ودي مفاجأة رمضان- كل سنة وانتوا طيبين
وكمان ايه.....مبقاش في كوادر ولا عمالة فنية...محتاجين نجيب من بره اكيد
أي خدمة يا جماعة...اخبار كويسه اهيه عشان محدش يقول اني حارمة من حاجة
وسمعني سلام ذئاب الجبل

تحديث

حكاية افتكرتها وانا بقرا التعليقات وهي متعلقه اوي بموضع البوست...انا مش فاكر تفاصيلها وان كنت فاكر التيمة بتاعتها كويس
يحكى انه سارت في البلاد اشاعة ان حمار جحا بيتكلم زي البني ادمين...وصلت الاشاعة لقصر الوالي...ارسل الوالي في طلب جحا ودار بينهم هذا الحوار
الوالي: ياجحا هل انت عندك حمار بيعرف يتكلم زي البشر؟
جحا: فعلا يا سيدي الوالي
الوالي: وكيف ذلك؟
جحا: انا علمته كيفية الكلام والحديث
الوالي: اريد ان اراه واتحدث معه
جحا: ولكنه لا يتحدث الى الغرباء
الوالي: اذن اشتريه منك
جحا: عذرا يامولاي...انه حماري وعليه اعتمد في كل شىء ولكن من الممكن ان اعلم حمارك الكلام والتحدث مثل البشر
الوالي: هل تستطيع ذلك حقا؟
جحا: نعم استطيع ولكن سأخذ الحمار ليعيش عندي و سترى النتيجه بعد عشر سنوات من الان
الوالي: موافق ولكن كم تطلب من المال
جحا: ليس اكثر من مصاريف الحمار ولتكن عشرة الاف دينار للعشر سنوات
الوالي: موافق ولكن بشرط
جحا: امرك يا مولاي
الوالي: بعد العشر سنوات ان لم يتحدث الي الحمار مثل البشر ساقطع رقبتك في السوق امام الناس
جحا: سترى النتيجه يا مولاي
ومشي جحا ومعاه الحمار والدنانير..لما روح قابلته زوجته وحكى الحكايه...قالتله وهل هناك حمار يعرف الكلام والحديث؟..جحا قال لأ طبعا...قالت اذا سيقطع الوالي رقبتك ياجحا...رد عليها جحا وقال: الان نحن نملك حماران وعشر الاف دينار وبعد عشر سنوات سيموت الوالي او سيموت الحمار او سيموت جحا
من الاخر ابقى قابلني يا...جحا