لا تعايرني ولا اعايرك

كضيف دائم على مصراوي اللي بستقي منه معظم الاخبار هو والبي بي سي صدمت لما قريت موضوع بعنوان لا تعايرني ولا اعايرك واللي كتبه الكاتب الكويتي فؤاد الهاشم ونشر (بضم الواو) في صحيفة الوطن الكويتية كرد على الهجوم اللي شنته الصحف المصرية وكتابها على الكويت والشرطة الكويتية بعد ما اتنشر عن تعذيب المصريين هناك. المقال ده اتكلموا عنه بردو في 90 دقيقة وان كنت ماشوفتش الحلقة دي.
الحقيقة ان المقال كان صادم لاقصى حد يعني خد عندك مثلا
الكتاب الصحافيون شنوا هجوما حادا ضد الكويت وكأنهم اكتشفوا ـ فجأة ـ ان "للمواطن المصري كرامة" بعد ان عودتهم حكومتهم على ان تسعيرة "المصري الغلبان" حين يموت في حادث قطار هو تعويض اهله بـ "2000 جنيه" ـ أي ما يعادل مائة دينار كويتي أو ثلاثمائة دولار امريكي أي ما يساوي سعر غسالة كورية في السوق الحرة بمطار القاهرة ـ اما حكاية.. "احنا اللي حررنا بلدكم من الغزو واحنا اللي رجعناكم واحنا و.. احنا"، فهذا القول مردود عليه بأن نقول.. "واحنا اللي اعطيناكم قروضا ومساعدات وهبات طيلة اربعة عقود، وقاتل جنودنا معكم في 67 و1973 وحرب الاستنزاف و.. و.."، وكما يقول المثل المصري الشهير.. "لا تعايرني ولا اعايرك.. ده الهم طايلني و.. طايلك"!

وفي مقدمة المقال كتب عن رد فعل كاتب امريكي عن ملاحظتة لتأثير رجال الشرطة وقال

كتب المراسل تقريره وارسله الى مجلته في نيويورك التي نشرته كاملا، ومن اهم ما جاء فيه تلك الفقرة التي يقول

فيها.. "الناس هنا تشعر بالرعب يطل من عيونها حين يقوم الضباط ـ والذين يرتدون ملابس مدنية ـ وهم برفقتي بإبراز بطاقاتهم عندما نريد الدخول الى مكان ما، لقد كانت هذه البطاقات تفعل مفعول السحر وتفتح الابواب المغلقة، وتجعل الجميع ـ بلا استثناء ـ يتراجعون الى الوراء حتى تلتصق ظهورهم.. بالجدران

المهم طبعا الاساتذة اللي عندنا سنوا الاقلام والسيوف ورجعوا هاجموا تاني زي مصطفى بكري ( اللي انا مش برتاحلوا خالص وحاسس ان وراه حكاوي وحواديت) واللي استنكر وشجب وقعد يقول كلام كبير من عينة " من هذا الذي يشتم مصر".... " من صاحب هذا القلم المسموم"... "هذا الكاتب لايمثل الشعب الكويتي"..وطبعا حث وزارة الخارجية علي مش عارف ايه والكلام اللي الناس حفظته ده ...ومن الاهرام قال سيد علي نائب رئيس تحرير الاهرام انه مذهول من اللي قراه وان اللي بيحصل في الكويت ده "مراهقة صحفية"ء

انا بقول بقه ايه.....انا بقا عايز اقول للناس اللي زعلت اوي واتشمللت اوي وقالت كلام كبير ده "القرع لما استوى

قال للخيار يالوبيا"...وياتري مين استوى ومين لسه
الناس دي زعلت من ايه وهاجمت الراجل ليه؟

هو قال حاجة غلط؟؟؟؟

الراجل بيقر واقع موجود ومحسوس ومتشاف والناس عايشاه

في كلمة من الكلام اللي قاله غلط؟؟؟

ايوه احنا ملناش تمن..وكويس انه قال غسالة كورية مش بوتجاز نور ابو اربع عيون..ايوه احنا كده...وايوه سمعة مصر وثقلها السياسي بقا في النازل كل يوم وبقينا بنعيش اسوأ حال ممكن يكون موجود في بلد المفروض ان مسقل ومسقر وكان زمان صاحب سيادة ومقام رفيع وكانت كلمته بتمشي على الكل الكبير فيهم قبل الصغير
ايوه لينا جمايل على الناس كلها...عرب وخلجيين وافارقة كمان...طب وبعديين...ايوه ايه المطلوب يعني نرخص نفسنا في بلدنا ونعمل عليهم اصحاب سياده وكرامة
هو المواطن المصري عنده كرامة في بلده ياجدعااااااان؟؟؟؟ حد يجاوبني..هو المواطن المصري ليه تمن في مصر؟

كام واحد عايز يهاجر وكام واحد بيتمسك على سواحل اوروبا وهو هربان من حياته هنا رغم انه عارف انه رايح على مستقبل غامض ولما تسأله يقولك.."ايه اللي رماك على المر...اللي امر منه...مصر" اهوه احنا اللي عايشيين فيه ده الامر منه

الناس دي زعلت ليه ؟؟ وكانوا فين وهما محموقين اوي كده لما فيديوهات التعذيب انتشرت وبانت والحكايه اتحكت؟؟؟ محدش اتكلم واللي اتكلم كان مكسوف
ايوه احنا كده..ملناش كرامة في بلدنا..ملناش تمن في بلدنا ..ملناش ظهر نتسند عليه...واذا كان دا في بلدنا عايزين
يبقلنا كل ده واحنا براها...صحيح الخيار بقا لوبيا

طب مين اللي عمل فينا كده...ورخصنا بالشكل ده؟
الكويت اللي بيعذبوا المصريين
ولا السعودية اللي عايزة خادمات مصريات
ولا ليبيا...ايوة ليبيا اللي جنينا دي واللي عملته مع اعمال المصريين
ولا العرب اللي بيجوا مصر من قطريين وعراقيين وكوايته وسعوديين ويبرطعوا فيها
؟؟؟؟؟؟؟؟؟؟؟؟؟؟؟؟؟؟
ياترى هما دول اللي عملوا كده؟؟؟
هو كمان كان في حد يقدر ولا يستجري يكلم واحد مصري او يضايقه...دي كانت الدنيا اتقلبت...دلوقتي جرب بس كده تعاكس واحد بعقال وجلبيه او واحده بعبايه سمرا في شوارع القاهرة وشوف هيحصلك ايه

الناس دي بلادهم وحكوماتهم عملولهم كرامة وتمن ونظام حياه محترم عشان يعيشوا زي البني ادميين واللي هيقولي

بقا امريكا وعلاقاتها وخيانة وقواعد ومش عارف ايه هقوله طب ماكل ده موجود عندنا وبزياده حبتيين.. ومع ذلك الشعب عايش في ضنك وضيق معيشة

انا مش هقول غير بجد حسبي الله ونعم الوكيل في كل اللي كان السبب في الحال اللي وصلنا ليه ده و تحياتي لكل قلم

شريف يرصد الحق وينقد الباطل بدون نفاق بدون رياء وبدون استهبال واستعباط