فكرت في يوم انك تعيش أحلامك
فكرت تعيشها وأنت مفتح عينيك
فكرت تعيش في دنيا الاميرات والقصور والشاطر حسن والساحرة
فكرت تعيشها وأنت مفتح عينيك
فكرت تعيش في دنيا الاميرات والقصور والشاطر حسن والساحرة
ايه رأيك لو عرضت عليك تسكن في فيلا بجنينة كبيرة ويكون جارك بندق وكل يوم الصبح تسمع بلوتو وهو بيصحيه...شوية وتلاقي بطوط ماشي بيقولك صباح الخير وترد عليه الصباح تلاقي ميكي وزيزي راكبين العربية بتاعتهم اللي كلها الوان وخارجيين رايحين يقضوا يوم في الغابة
ايه رأيك لو حبيت الاميرة الجميلة بنت الملك وعشت معاها في دنيا الاساطير والساحرات وركبت معاها البساط السحري وطرت مابين هنا وهناك
ايه رأيك لو عشت دا كله ... وانت صاحي مش نايم
....اميرات الاحلام والاساطير...احلى الاميرات
كام واحد عاش قصصهم وحلم ان واحده منهم تكون اميرة احلامه...يركب معاها البساط السحري زي علاء الدين وياسمين..او يلعب معاها ويا الاقزام السبعة زي سنووايت..او يحارب الساحرة الشريرة عشانها زي اريال..اوحبها يحوله لاجمل امير زي بيلا واللي عملته في الوحش الامير...كام بنوته حلمت انها تكون سندريلا ويدور عليها الامير ويتجوزها وتكون هي الاميرة
انا عشت الحلم ده...عشته بكل وجداني بجد واستمتعت بيه استمتاع كبير اوي اوي اوي...عشته في عرض ديزني على الجليد...."الاميرات"...اقل وصف ممكن توصف بيه العرض ده هو ...الابهار...الابهار في عالم ديزني
العرض كان في الصالة المغطاة باستاد القاهرة في يوليو اللي فات...كان عبارة عن فصلين
الفصل الاول بيحكي حكاية الاميرات الستة – سنووايت...ياسمين..بيلا...اريال...مولان...ارورا- بيحكي حكايتهم من غير تفاصيل كتيرة...يعني حكايات مختصرة..وف كل حكاية كان بيقف عند ما تتحقق امنية الاميرة والامير من غير مايكمل ويدخل في حكاية الاميرة التانية..وطبعا اللي كان بيحكي ويقدم بعض الفقرات كان ميكي وميني وبندق
كام واحد عاش قصصهم وحلم ان واحده منهم تكون اميرة احلامه...يركب معاها البساط السحري زي علاء الدين وياسمين..او يلعب معاها ويا الاقزام السبعة زي سنووايت..او يحارب الساحرة الشريرة عشانها زي اريال..اوحبها يحوله لاجمل امير زي بيلا واللي عملته في الوحش الامير...كام بنوته حلمت انها تكون سندريلا ويدور عليها الامير ويتجوزها وتكون هي الاميرة
انا عشت الحلم ده...عشته بكل وجداني بجد واستمتعت بيه استمتاع كبير اوي اوي اوي...عشته في عرض ديزني على الجليد...."الاميرات"...اقل وصف ممكن توصف بيه العرض ده هو ...الابهار...الابهار في عالم ديزني
العرض كان في الصالة المغطاة باستاد القاهرة في يوليو اللي فات...كان عبارة عن فصلين
الفصل الاول بيحكي حكاية الاميرات الستة – سنووايت...ياسمين..بيلا...اريال...مولان...ارورا- بيحكي حكايتهم من غير تفاصيل كتيرة...يعني حكايات مختصرة..وف كل حكاية كان بيقف عند ما تتحقق امنية الاميرة والامير من غير مايكمل ويدخل في حكاية الاميرة التانية..وطبعا اللي كان بيحكي ويقدم بعض الفقرات كان ميكي وميني وبندق
الفصل الاول
العرض ابتدى بقصة ياسمين بنت الملك وعلاء الدين اللي حبته لما شافته...ولما علاء الدين لقى المصباح اتمنى انه
يكون امير عشان ياسمين تحبة ورغم كده ياسمين ولا حست بيه لانها كانت بتدور على الشاب الفقير اللي قابلته في السوق و قلبها حبه...وفي الاخر بتعرف ان الامير ده هو نفسه علاء الدين ويتحقق حلمه وحلمها....طبعا مشهد خروج المارد من المصباح وطيران علاء الدين وياسمين بالبساط السحري فوق القاعة كانت مشاهد ممتازة نقلت المشاهدين لدنيا تانية مع الموسيقى والديكورات الرائعة
اريال..عروسة البحر الشقية والجميلة اللي دايما تلعب مع صاحبها الكابوريا وتقضي الوقت بين السفن الغارقة والشعاب وسطح البحر...اريال عروسة البحر الشقية بنت ملك البحار اللي حبت الامير قبطان السفينة وانقذته من الغرق واتمنت انها تتحول لانسانة تعيش ع الارض معاه وتكون اميرة حبه وعشان كده تعمل صفقة انها تخلي الامير يحبها في يومين والا.....مافيش خروج من البحر خالص....الساحرة الشريرة تتخفى في صورة اريال عشان تخلي الامير يكرهها...لكن الامير يكشفها وينتصر عليها بمساعدة الكابوريا بعد ما يعرف ان الانسانة الجميلة اللي معاه هي نفسها عروسة البحر اللي انقذته...طبعا مش هاقول اني كنت موجود فعلا تحت البحر وبسبح معاهم في الديكورات الروعة اللي كانت موجودة
بيلا...البنوتة الجميلة بنت التاجر اللي طلبت منه وردة...ولما قطفها من القصر..ظهر الوحش وطلب يشوف بنته بيلا الجميلة والا مش هيرجعه...الوحش يحبس بيلا في القصر وكل يوم يعرض عليها انه يتجوزها وهي ترفض...لغايه في يوم الوحش كان هيموت من الحزن..بيلا حنت وبقلبها الطيب حبت...الوحش اتحول بحبها لامير ولا في الاساطير..ويتحقق الحلم والتعويذة الشريرة تتفك بحب اميرة
ارورا...الجمال النائم....كل الناس بتحبها..الا الساحرة الشريرة...سحرتها بمكنة الغزل...بعيد عن الحراس والساحرات الطيبة....نامت ارورا...ياترى هتصى امتى؟...لما يجيلها الامير اللي قابلته عند الغابة وحبته..قبله حبيب تفك التعويذة وترجع تاني احلى واجمل اميرة
سنووايت...الاميرة الجميلة...كانت دايما المرايه السحرية تقول للملكة "انتي جميلة بس سنووايت اجمل واجمل"....كرهتها الملكة...طردتها...عاشت سنووايت مع الاقزام السبعة..الاشقياء..لعبت معاهم في الكوخ الصغير في وسط الغابه...الملكة كرهتها اكتر..حبت تموتها..مرة واتنين والتالته تابته...ونامت سنووايت وزعل عليها الاقزام السبعة...حطوها في تابوت زجاجي...ياترى قبله الامير اللي شافها وحبها ممكن تصحيها وتفك التعويذة...وترجع تاني سنووايت تلعب وتغني وتحب؟؟؟؟
مولان....الاميرة الصينية...مات ابوها الملك...رفضوا انها تمسك الحكم عشان هي بنت....الاميرة بردو رفضت...تعبت...لعبت وادربت...ولشعرها قصت...وبقت هي الملكة والاميرة...وعاشت قصه حب مع الامير حبيبها اللي ساندها في وقت مالكل كانوا قدامها
الابهار في الاداء والموسيقى والاضاءة والديكور الرائع والدقة اللامتانهيه في حركة واداء المتزلجون...حاجة فوق الخيال
الفصل الثاني
كانت حكاية سندريلا...اللي زوجة ابوها وبناتها عاملوها وحش كانها خدامة وفي الاخر انتصرت عليهم بمساعدة الساحرة الطيبة وحب الامير
كلنا عارفين القصة دي وحافظينها...بس انا عشتها...كنت مع سندريلا وهي بتخدم في ملكها وكنت معاها وهي بتبكي فستانها اللي اتقطع..وكنت بفكر مع الساحرة الطيبة اللي نزلت من سقف الصالة المغطاه ازاي نوصل سندريلا لحفل الامير...وفضلت ادور مع الامير عن صاحبة الحزاء الزجاجى وكنت خليه يروح عند بيت سندريلا
كنت عايش جوا الحكاية
اخر مشهد في العرض خالص كان مشهد حفل زواج سندريلا والامير واللي ظهر فيه كل الاميرات والامراء
سندريلا
مولان
ارورا
ياسمين وعلاء الدين
اريال
بيلا
سنووايت
وكلهم كانوا في فساتين الفرح...فساتين وديكور المشهد الختامي كانوا هما جوهرة التاج الرائعة اللي خلبت لب المشاهدين وخصوصا لو كان في قمة القصر اشهر امير واميرة في لبس العرس
الامير ميكي ماوس والاميرة ميني ماوس
انا استمتتعت جدا جدا جدا بالعرض وعرفت يعني ايه كلمة ابداع وابهار
ودلوقتي اسيبكوا مع بعض صور من العرض..انا طبعا ماعرفتش اصور كويس فجبتلكوا الصور دي من ع النت وان كانت مطابقة تماما للعرض اللي حضرته...هي بالظبط
40 comments:
تسجيل حضووور يا باشا شكلي اول واحد يعلق
بقلك ايه انا هاجي بعدين اقراه لانه عاوز تركيز وطويل شويه
ماشي ولا مش ماشي ههههه
تحياتي لك
الله
الله
بجد عيشتنى فى حلم جميل قوى انت عارف انا طول عمرى ابقى مين
ابقى فى قصة الجميلة والوحش لانها بتعبر قد اية الحب ممكن يغير اى انسان حتى لو وحش بالحب تقدر تخلية ملاك
ياريت ابقى هية واقالبل الوحش دة واشسشاعدة واخلية امير
شكرا للموضوع الجميل دة والحلم الى فكرتنى بية
ايه عالم السحر والخيال اللى قعدتنا فيه ده بس يامعلم
بوست عالى عالى عالى
:)
تصدق بقي ان انت دماغك ..... لا لا متخفش دماغك جامدة هههههههه فكرتنى بالصور دى وانا صغير لما رحت مع بابا وماما واختى عرض علاء الدين والمصباح السحرى لما اتعرض لاول مرة فى مصر وكنت فرحان اوى
بجد ذكريات حلوة ..
بنتك عاملة ايه .. سلملى عليها :]
ربنا يخليهالك
مجرد حلم
---وحيد---
في انتظارك يا باشا ودايما كده منورني اول واحد
---ايوية---
خلاص يا ايوية انا بعد كده هسميكي بيلا
ايه رأيك؟
ويارب دايما كده تنوريني
---ميراج---
تسلم ياباشا وتنورني دايما
---اسلام---
ياباشا انت اللي دماغك عاليه وجامده
فعلا الواحد بيخرج من العرض ويفضل فاكرة بزكريات جميلة ولسنين وسنين
وسلامك لفرح يوصل ياباشا هي تمام الحمد لله
---عصفور بلا اجنحة---
لو بطلنا نحلم نموت
نورتني
تحياتي لكم جميعا
محمد سمير
اشكرك على نورتنى دى وانت كمان شرفتنى
اشكرك
غمض عنيك
بس فى مدونتى افتحها وطل عليها كتيير هههههههه
البوست ده غريب فى الاول ماكنتش حاسه انه حلو اوى وممكن اندمج فيه لكن لما قريته ودخلت فى البوست لغاية ماوصلت لأخره
كنت هعيط لانى كل شويه عماله اقول انا عايزه اروح اشوف الحاجات الحلوه دى
وأكتر قصه بحبها سندريلا بس مش عارفه ليه؟؟
لو عندك تفسير قوله؟
بجد شكرا على زيارتك ومشاركتك وتعليقك فى مدونتى بجد فرحت بيها ونورتنى
دايما كده تنورنى :)
يووووووو نسيت
انت بقى فاكر اننا هننسى بالبوست ده تفاصيل رحلة بور سعيد
لا والف لا
لانى من عشاق البحر والطبيعه والمصايف وكده
لو صورت صور ياريت تنزلها مع التفاصيل
وشكرا :)
ماتقلش انك رحت
يا عم رحت ونسيت ليمونادة ازاي
طب كدة مايصحش
طب يا عم اعتبرني بابي سيتر او مربية اطفال
للأمورة بنتك
اي حاجة
او حمالة شنط
مش مشكلة
بس خدني
السلام عليكم
هو مود افلام الكرتون الي ضارب اليوميبن دول ولا ايه؟
انا لحد دلوقت بتفرج عليهم وعندي شرايطهم
بس للاسف ديزني عماله بتاخد كل الحكيات دية وبتأمركها ده حتى ويني ذا بو مسلمش منهم
لكن في النهاية افلام الكرتون ليها حيز كبير في دماغي
:)
انا موافقة يا محمد سمينى بيلا لانى بحب الشخصية دة قوى
الله دول كميلين و كلهم صحابي
و نفسي ياخدوني اعيش معاهم في بلدهم الكميله الكرتونيه الكوكوهيه
ده ايه الجو الجميل الرائع ده
بجد بوست تحفه معمول بمزاج
تحياتى
بجد بوست جميل جدا خلتنى اندمج فيه على الرغم من انه طويل بس اندمجت فى قراته
احسن حاجة انك تعيش فى عالم الخيال
تحياتى
بوست جميل وتحس انك فعلا عشت معاهم القصة
نفسي بجد اتفرج علي حاجة زي دي
بس دزني في امريكا ولا فرنسا عالم تاني نفسي اروح اتفرج علية
ونفسي يبقي فية زية في مصر ويبقي علي نفس المستوي زي ما بيعملو الفنادق وكارفور وكدا
او زيارة وان شاء الله تتكرر
وعايزة اعرف اية الاماكن الحلوة في بورسعيد علشان بردة عمري ما رحتها
حمد الله ع السلامة :)
ايه الجو الخيالى ده... أنا بصراحة حلمت كده كتير بس فى زمن عبد الحليم مش فى جو الاميرات و سندريلا و كده
---عصفور بلا اجنحة---
انا اللي اتشرفت بحضورك والله
نورتيني بردو
: )
---كيتي---
على مدونتك انا مفتح عيني وطالل علطول
سندريلا كانت الماستر في العرض والصراحة هي قصة جميلة اوي اوي
انا عارف ان البوست طويل شوية بس انا حبيت انقل كل اللي شفته
بخصوص بورسعيد انا مش ناسي وهيكون لها بوست مخصوص
نورتيني ياكيتي
---ليموناده----
دا كلام ياليمو
انا انساكي بردو...انتي روحك كانتت بتهفهف حولينا في العرض
: )
وبعدين انتي تيجي معانا اميرة و ملكة مش بيبي سيتر ولا كلام من ده
المرة الجايه ان شاء الله تيجي معانا بس انتي اللي هتعزمي
: ) : )
---ناني---
والله ياناني بغض النظر عن امركتهم او لا انا بتكلم عن مدى الاستمتاع بجو الخيال ده
وبالابداع والابهار اللي موجودين في العرض
اما الارتباط بالكارتون فياترى في حد مابيحبوش؟
: ) :)
نورتيني ياناني
---ايوية---
عينيا يابيلا
: )
---كاوكوي----
والله انتي اللي كميلة
بس هاتروحي انهى بلد فيهم ومع انهي اميرة كميلة؟
مبسوط بزيارتك وياريت نوريني علطول بقه
---دودو---
سعيد اوي انه عجبك يادودو
منوراني دايما
---ملك---
معلش لو كان البوست طويل شوية
بس انا مبسوط باندماجك ده وبانه عجبك
ومبسوط اكتر بالزيارة دي وياريت تتكرر
نورتني
---My Hope---
اولا شكرا اوي ع الزيارة الجميلة دي
العرض اللي كان موجود هنا في مصر كان هو نفس العرض اللي بيتعرض في امريكا بالذات اني الصور والفيديوهات اللي جبتها من ع النت كانت بالظبط زي العرض اللي حضرته
بس لو كنت تقصد بكلامك ديزني لاند ويوروديزني فا دا موضوع تاني خالص
انا نفسي بس اعدي جنبهم حتى
بورسعيد كانت جميلة اوي قضيت فيها 3 ايام بس اكتر من طرح البحر والسوق وديليسبس ماروحتش وان شاء اللههاكتب بوست عن اليومين دول
نورتني اوي ويارب دايما تكون موجود
---عاليا حليم---
عارفة انتي ثبتيني بكلامك
زمن عبد الحليم كان جميل في كل حاجة...يمكن زي مابنعيشه في خيالنا
ومايفرقش عن جو الرومانسية اللي في حكايات الاميرات الا في الالوان
بس بجد كان عندي حق لما سميتيك اميرة الرومانسية
نورتيني اوي ياعاليا
بجد
تحياتي جميعا
محمد سمير
عزيزى
انا كمان رحت العرض .. احساسى كان فوق الانبهار الفظيع بحبتين تلاتة قول اربعة
انا بقى بمووووووووووووت فى اريال
The Little Mermaid
ولو قعدت قصاد الحدوتة بتاعتها سنيين مش هزهق منها ابدا
فاكر فى العرض الاعشاب عملوها بطريقة فسفورية ازاى ؟؟
يا رب عقبال كل سنة :)
بس الغريب فى الموضوع .. ان العرض ما اخدش الدعاية والاعلان الكافى عنه
بس سيبك شفت جردل الفشار ابو 30 جنيه :)
انا سعيدة جدا بزيارتك الدائمة .. وبمدونتك الرائعة
يا ريتني ما قريت البوست ده, خليتني اندم قوي اني ماشفتش الغرض ,كان نفسي اروح جدا خالص بس الأنتخة و الكسل!!!!تعمل ايه بقى!!!!
اعزم
مين دة
هو انت مين
مين انا
مش عارفة حاجة
هو حد قال عزومة يا جدعان
وديزني لاند كمان
ابقى سلملي على اعزم والنبي وقولو يمر على محمد سمير ياخد الفلوس :)
بعتذر علي التاخير يا عسل نبعت ده ومدخل علي التعليق
الحقيقه انا مش عاوز احلم تاني هههه
لاني حلمت كتير واحلامي لم تتحقق بعد
لكن مفيش مانع احلم وأعيش احلامي في الخيال
ولو ان احلامي لا ترقي لدرجة اني احلم باميره هههه
بس تصدق احيانا الواحد من احباط الواقع بيلاقي في الاحلام ضالته اهو تخفيف عن النفس
بوست جميل وخفيف محمد
مقتليش ايه اخبار العربيه والجاتووووووووووووه ههههه
انا يا عم عاوز العشرين جنيه بتعتي هههه
ولا افولك حوشهالي عندك ههه
تحياتي لك يا باشا
بعتذر مره اخري علي التأخير
---بنوتة من وسط البلد----
منوراني يابنوتة
ومبسوط اوي اني لاقيتك روحتي وفهمتى انا قصدي ايه من الابهار والتميز بتاع العرض
طبعا انا فاكر المشهد الي تحت البحر وعروسة البحر وهي طالعة من القاع لسطح البحر
اصلا انا كنت حاسس اني تحت الميه بجد من الاضاءة والصوت والديكور
ومعاكي فعلا ان العرض ماخدش الدعايه الكافية مافيش غير كام اعلان في الاهرام وخلاص
وبعدين انتي بتتكلمي عن كيس الفيشار ولا الجرانيتا الغريبة ولا ولا...الاسعار كانت غاليه اوي ومع ذلك انا قلت هجيب حاجة تذكار وكنت هجيب عروسة ميكي ماوس وهوب لاقيتها صنع في الصين قلت والله مانا جايبها
:):)
نورتيني ويارب اشوفك دايما
---ابو الفضل---
فاتك يامعلم
بس معلش ملحوقة ان شاء الله وتتعوض في عرض تاني
المهم اني كسبت زيارتك عندي وتشريفك ليا
نورت
---ليموناده---
كده خلاص
نداله من اولها
بعتيني وش عشان قلتلك تعزميني
مكانش العشم ياليمو والله
وعلى كده انتي ليموناده بسكر ولا من غير
:):):P:P
نورتيني يانعنشة
---وحيد---
ياباشا انت منورني حتى لو متاخر
ماينفعش نبطل نحلم يا وحيد والله
واقعنا وحياتنا ودنيتنا دي وخصوصا في مصر ام الدنيا مش هنعرف نعيشها من غير مانحلم
يمكن الحلم هو اللي بيجيب الامل اللي يخلينا نفضل عايشيين
وبعدين ياعم كوباية شاي ساعة عصرية ي البلكونة وفي مكان ضل وهوا يظبطولك احلى كلام
نورتني ياباشا
نورتوني جميعا
محمد سمير
بوست فوق الرائع
اعتذر عن تقصيريى فى الزيارة و لكن الحمدلله عدنااااااااااا
عارف ؟
انا الى بيعجبنى فى القصص الحلوة بتاعة السنو وايت والبناويت الحلوة دى
الروملنسية بجد بتبقى فظيعة
الواحد بيصدق القصص و بيصدق ردود الافعال
يلا
كل بوست و انت طيب
تحياتى
البوست حلو اوى
وكمان عرفنى بشخصيات الحقيقه يعنى اول مرة اعرفها
اصل انا مش بحب الكارتون اوى واخرى فيه بطوط
بس خلاص بعد كده هخلى الناس تقولى الاميرة يايمين
وانا فى انتظار علاء الدين بقي
مدونتك حلوةاوى
انا قريت كذا موضوع بس مضطرة اقوم دلوقتى
بس هرجع واكملها ان شاء الله
وشكرا على تشريفك مدونتى
سلام
---رانيا---
منوراني يارانيا
ودايما كده يارب
القصص دي بتبقى حلوة اوي ورومانسيتها مع رقتها بتخليكي تتمني لو كنتي واحدة منهم
تحياتي ليكي و ماتتاخريش عليا
:)
---ياسمين---
نورتيني يا ياسمين والله
ياتري علاء الدين لقى المصباح السحري ولا لسه
انا بردو مش ليا في الكارتون اوي يعني
بردو بطوط وتوم جيري وميكي وخلاص بس الحاجات التانية بعرفها من القصص والحكايات...الكارتون بردو بس المكتوبة
شرفتيني بزيارتك اوي ويارب دايما اشوفك
تحياتي
محمد سمير
تحفة بجد
يا بختك والله
طب كنت عملت اعلان قبلها كنا جينا احنا كمان
:)
الله انت محسسني اني بشوف فليم اجنبي ملئ بالخيال و المتعة بجد البوست جميل اوي
تحياتي الي الغد
فكرتنى بعرض كنت حضرته وانا صغيره اوى برضه لديزنى كان شبه ده على الجليد برضه فى قاعه المؤتمرات
فعلا كان مبهر وممتع ال اقصى حد وكفايه انى كنت فعلا طفله يعنى الابهار كان زايد الى اقصى حد:)
شكرا على وصفك الرائع الى حسسنى انى كنت هناك بتفرج انا كمان
السلام عليكم يا ريس اولا الف مليون شكر علي تعليقك عندي في البلوجز
ثانيا : موضوعك جميل جميل قوي و الحب اجمل بس اللي بيعيشوة زي الهباب انا اسف علي الفظ الناس مش عارفة تحقق اللي بيحصل في حواديت الحب و لما بيحاولوا بينيلوها اكثر الف شكر تاني مرة
انا عشت معاك فى الموضوع
اصلا انا كل لما اشوف سندريلا فى التلفزيون فى مسلسلات الاطفال اقعد وما اقومش حتى لو ورايا الف مشوار
لانى بحب قصتها موووووووت
اولا حمد الله على السلامه ولو انها متأخره
ثانيا انت جاي تغيظنا ولا ايه
انت كده خليتني افتكر ذكريات واحلام وحاجات كانت مسيطره على تفكيري لفتره طويله
ياخساره ياريتني كنت معاهم
---حدوتة---
نورتني ياجميل
المرة الجايه ان شاء الله ماتفوتكيش
: )
--عروس البحر---
سعيد جدا بتشريفك ليا في اول زيارة
انا مبسوط بردو ان ناس كتير حست انها شافت العرض بعد البوست ده رغم انه طويل حبتيين
نورتيني
---مانورا---
شكرا على مرورك عندي
والحمد لله ان البوست فكرك بذكريات جميلة
فعلا في حاجات في حياة الواحد بتفضل معلقة في ذلكرته مهما طال الوقت
اول زيارة نورتيني فيها ويارب تنوريني علطول
---مشربية---
ياباشا لا شكر على تعليق
: ):)
وبعدين انا ضيف دائم عندك بس مش دايما بعلق بصراحة
وبعدين واحدة واحده ع الناس...انا معاك بس الناس معذورة بردو احنا مش عايشين في زمن الاميرات والساحرات احنا بتوع المترو والميكروباص
: ): )
---قطة الصحراء---
سندريلا كانت احلاهم واجملهم وصاحبة الفرح
نورتيني يانانا والله
---ولو---
الله يسلمك ياباشا
ايه بس ياعم عملوها الوحووووش..وياريتني كنت معاهم والكلام ده
: ): )
انا بس كنت بخليك تعيش معايا حالة الانبهار اللي كنت فيها وطالما فكرتك بذكريات واحلام حلوة يبقى انا ميه ميه
J J
نورتني ياباشا
تحياتي جميعا
محمد سمير
ازيك انا جاية اقول لك اعذرنى عالتأخير بس مش عارفة ليه كل اما افتح مدونتك الاقيها مش بتحمل خالص ودلوقت بس فتحت .. القصة جميلة اوى بس تعرف انا متخيلتش نفسى فى يوم اكون زى دولا انا كنت احب اكون مكان اى واحدة كان بينكتب فيها وعشانها شعر زى ليلى وبثينة وكتير زيهم يا بختهم الدنيا كلها بتبقى عارف ان الشعر ده مخصوص عشانهم والحب وقتها كان له معنى وصدى تانى .. احييييك جدا
طب ومين قال ان انتي ماتكبلكيش شعر يا بوسي...يمكن ماتنشرش والناس ماعرفتوش لكن اكيد شخصية جميلة زيك اتكتبلها شعر وشعر جميل كمان
دمتي دايما بخير وسعاده يا بوسي
ونورتيني كعادتك لما تزوريني
محمد سمير
سحر..دي الكلمة المناسبة عشان توصف البوست الجميل ده
يا ريت يكون في أوبشن يخلي الواحد يدخل عالم الخيال ده يعيش فيه وقت ما يحب
المدونة كمان جميلة جدا
تحياتي
:)
ايما
ياريت يا ايما كان الاوبشن دا موجود كان زمان الواحد جدد في حياته وخلاها احلى واجمل
بس الاجمل هو زيارتك ليا
وياريت تتكرر دايما
تحياتي ليكي
ونورتيني
محمد سمير
ايه يا جميل الجمال دا البوست جامد جدا بجد حلو بس انته خيالى جدا وقصصص ممتعه جدابس انا حافظه الفصص دى كلها وشكرا اوى على مرورك فى مدونتى وفرحانه اوى انها عجبتك
بااى
نورتيني يا لينا
انا بردو مبسوط اوي اني زرت مدونتك اللذيذة مووت دي
ومبسوط اكتر ان البوست دا عجبك
يارب دايما منوراني علطول
باي
Post a Comment