ندية ام تكامل؟

هل العلاقة بين المرأة والرجل هي علاقة ندية أم تكامل؟

الاسبوع اللي فات نشر اخي احمد سمير في مدونته"الاغلبية الصامتة" موضوعين بعنوان " نظرة سلبية" و "المساواة" وكان حواليهم نقاش كتير مابين مؤيد لاحمد ومعارض ضده...الصراحة انا قعدت افكر في الموضوع ده وكانت جوايا افكار متضاربة ومتناقضة كتير وحبيت اخرجها ع الورق وافضفض معاكوا شوية باللي جوايا واللي انا مقتنع بيه وخصوصا في موضوع المساواة بين الرجل والمرأه ومفهومها عند الاتنين

لو بصينا على خلق ربنا سبحانه وتعالى هنلاقى ان المساواة اصلا مكانتش موجوده في خلق الذكر ولانثى لكن اللي كان موجود كان تكامل بين الاتنين.ربنا سبحانه وتعالى لما خلق ادم واسكنة الجنة خلق بعدها حواء لتكون لادم انيسه ورفيقة تؤنس وحدتة وتزيل عنه الوحشة لكن مش معنى كده ان بنات حواء يبقى مهمتهم في الحياه هو الترفيه عن الرجاله ولا ان الرجاله درجة اولى وهما درجة تانية لأ خالص...سبحان الله ربنا خلق الذكر والانثى بمواصفات يكملوا بيها بعض عشان يبنوا الحياة ويعمروها وفي نفس الوقت ماينفعش كل واحد منهم يعيش لوحده..مش هايعرف لان دي حكمة ربنا ...خلق الانثى وفيها حنية وعطف وقلب طيب واحساس عالي وخلقها ضعيفة لا تحتمل العنف ولا الخشونة وخلق جسمها بامكانيات اضعف بكتير من الرجل اللي زاده بسطه في الجسم والخشونة والصبر والتحمل والجلد وجعل عقله يغلب عواطفة وعشان كده التنين بيكملوا بعض.ء

المشكلة ان مجتمعنا ذكوري بجد...في كل حاجة من اول الولادة...ناس كتير وكتير اوي لسه بتفرح بالولد اكتر من البنت لأ وكمان ممكن يكدبوا ويقولوا دا بنت في اول كام يوم من الولاده قال ايه عشان مايتحسدش وكأن الناس لما يعرفوا انه جاب بنت هايقولوا ياحرام ربنا يكون في عونة ويعوضه...........نيجي بعد كده للتربية...تلاقي الباشا قاعد يتفرج ع الماتش ولا الفليم الاكشن وياعيني عطش....قومي هاتيلي اشرب...او تكون طلبت معاه مزاج وعايز يشرب كوباية شاي...قومي اعمليلي كوباية شاي...وياسلام بقه لو اعترضت هاتخدلها كلمتين محترمين ينكدوا عليها............دا طبعا غير ان الباشا قاعد يتسرمح طول اليوم في الشارع مع اصحابة والغلبانة مجرد ماتاخد الاجازة مابين غسيل وتنفيض وتجهيز غدا والشاي بعد الغدا وغسيل الاطباق وغيره وغيره............انا مابقولش ان البنت ماتساعدش في البيت او انها ماتخدمش اخوها لو احتاجها في حاجة لكن المشكلة ان اوقات كتير بيكون الوضع ظالم اوي بجد....مابيكونش في تعاون بيكون فيه امر ونهي....ياكده يا هتتهزئى...والولد يعمل وانتي ماتعمليش...ويخرج مع اصحابه وانت وراكي شغل البيت...ايه ياجدعان دا ولا معتقل ابو غريب

نفس الولد ده لما هيتجوز هيطلع عين مراته..عايز اشرب..هاتيلي شاي...جعاااااااان.....قومي شغلي المروحة...قومي اطفي التكييف..والبعيد مابيقومش من مكانه ولا بيتحرك...دا مافيش حتى كلمة "لو سمحتي"....او "من فضلك"....هو ده اللي عمل التفرقة وولد الخلاف مابين الرجل والمرأة وهو ده اللي خلا المرأه عايزه تتساوى بالرجل بعد لما حست فعلا انها بقت درجة تانية وعلطول هي اللي غلطانة ومهضوم حقها و بصراحة عندها حق في كل ده لكن بردو لازم يكون في شوية تفكير لأن المساواة المطلقة بين الرجل والمرأة مستحيلة فعلا...لكن المساواة نسبية يعني ايه؟ يعني في مجال العمل مثلا هتلاقي اماكن ماينفعش غير ان الرجل بس اللي يشتغل فيها زي المهن اللي بتحتاج مجهود بدني وتحمل عضلى وعصبي وفي نفس الوقت في مهن تانية ماتنفعش غير المرأة زي مثلا مدرسات الحضانة,الممرضات.....يعني المهن اللي بتطلب مهارة ممزوجة بالعاطفة والرحمة...لكن في اماكن تنفع الاتنين زي مجالات التصميم والجرافيكس والطب وغيرها كتير وفي المجالات دي ممكن ساعتها تحقق المساواة الكاملة بين الاتنين في نظام الشغل ونتائجه دون اختلاف ودون النظر اذا كان ده راجل او ست...هنا العقل هو اللي بيحكم...ء

و في البيت المرأه ربنا الهمها مهارة ادارة المنزل وترتيبة...مش تكون خدامة فيه على فكرة.....انما بردو الراجل رغم انه لازم يكون خير سند لزوجته في البيت مايقدرش يحقق التوازن مابين ادارة البيت وترتيبة وتربية الاطفال و غيرها كتير من الحاجات اللي فعلا ماتقدرش غير امرأه هي اللي تقوم بيها ودي فعلا مهارة بجد..لكن لازم الراجل يكون مساعد ومساند لزوجته ومايبعهاش عند اول مطب...بجد الست هي عصب أي بيت والراجل من غيرها هيتوه

كنت قريت بوست من كام يوم ظريف اوي اسمه "قلب شجاع" في مدونة ناني "ياحلاوة ياعيال" كانت بتقول ان أي

راجل قلبه شجاع لانه كل يوم بيروح شغلة غصب عنه ماينفعش يجي يوم ويقول انا زهقت ومش عايز اشتغل...كلمة مش موجودة في قاموسه ..عشان يعيش حياه كريمة لازم يشتغل ..على عكس المرأه اللي لو حبت في أي لحظة انها تسيب الشغل القرار هيكون سهل اوي وهتكون مسؤولة من الرجل وهي دي قوامة الرجل على المرأة

كل الكلام اللي فوق والرغي ده كان قصدي بيه ان العلاقة مابين الرجل والمرأه هي علاقة تكامل وترابط مش علاقة سيد وخادمة ولا علاقة حقي وحقك....لا هو هايعرف يعيش من غيرها ولا هي هتعرف تعيش من غيره والمساواة اللي لازم تكون موجوده بين الاتنين مش هتكون مساواة مطلقه لكن هتكون سلوك وتعاون يقوم على الاحترام المتبادل مع حفظ الحقوق والمسؤوليات والحفاظ ع المرأه ومراعاة حدودها وامكانيتها وعدم التفرقة بينها وبين الرجل في الاحكام اللي تتعلق بالاخلاق والقيم والسلوك الاجتماعي...ء
الرسول عليه الصلاة والسلام قال " استوصوا بالنساء خيرا"ء

صباح الورد و..البيتزا

صباح الورد...الصبح اول ماجيت الشغل لقيت الحوار ده ع الميل عجبني اوي وحبيت اصبح عليكم بيه

حوار لطيف بين زوج مع زوجته

هو: حبيبتي أنا حأطلب بيتزا ، عايزة حاجة ؟ء

هي: لا يا حبيبي

هو : اوكي
هي: ولا اقولك .؟ء

هو: ها ، أطلب لك كمان ؟ء

هي: مش عارفة

هو: مش عارفة اذا كنتي عايزة؟ ء

هي: لا

هو: انتي جعانة ؟ء

هي: يعني

هو : يعني إيه يعني...؟ء

هي: يعني مش متأكدة اذا كنت جعانة ولا لأ

هو: الواحد لما بيكون جعان بيعرف

هي: لأ بس يمكن اجوع بعدين

هو: يعني اطلب لك بيتزا؟ء

هي: طيب واذا ما كنتش جعانة وقتها..؟ء

هو: ما تاكليش

هي : بس ده كدة يبقى تبذير

هو: خلاص ، تبقي تاكليها بكرة

هي: و اذا ما كانش لي نفس آكل بيتزا بكرة؟ء

هو: مش محتاجة نفس ، الواحد عادي ممكن ياكل بيتزا كل يوم

هي: انا لا .. أنا مش باكل بيتزا الا لما يكون عندي نفس للبيتزا

هو: طيب بلاش ، أطلب لك حاجة تانية؟ء

هي: بس أنا مش عايزة حاجة تانية

هو: يعني عايزة بيتزا؟ء

هي : لا

هو: يعني مش عايزة حاجة؟ء

هي: لأ برضه

هو : جننتيني ، طب أعمل إيه؟ء

هي: اطلب انت لنفسك

هو: الحمد لله ، اخيرا .. ماشي .

هي : بس اطلب بيتزا بالتونة

هو: نعم ؟ انا مش بحب البيتزا التونة

هي: بس انا بحبها

هو: وانتي مالك ؟ هو انا حاطلب ليا ولا ليكي

هي: ليك طبعا

هو: طيب أطلبها ليه بأة بالتونة...؟ء

هي: يمكن اجوع لما يوصل الاكل

هو : وبعدين؟ء

هي: يا سلام ، يعني تفتكر آكل حاجة مش عاجباني؟ء

هو: ليه هو انتي – أصلاً - عايزة تاكلي؟ء

هي : ليه لأ ؟ء

هو: يا مثبت العقل .. هو أنا حاطلب بيتزا لي , عشان احتمال انتي
تاكليها اذا كنتي جعانة؟؟ء

هي: بالضبط

هو: وأنا بلاش آكل؟ء

هي: يمكن وقتها أكون مش جعانة .. فتاكل انت ساعتها

ملحوظة

محكمة الجنايات قررت تبرئة الزوج من تهمةقتل الزوجة مع سبق الإصرار والترصد وتحويل التهمة إلى ..قتل الزوجة دفاعاً عن النفس

تحديث هام

الحوار السابق وصلني بالايميل ولم اعرف مصدره في الاول ولكن لزم التنوية عن ان البوست الاصلي نشر يو 19 سبتمبر عام 2005 في مدونة احمد شقير "حكاوي اخر اليل" تحت عنوان "يامثبت العقل والدين" لذا لزم التنويه

الملك هارالد

انهارده هاحكيلكوا حكايه ظريفة يارب تعجبكوا وخصوصا ان معظمنا ليه علاقة بيها بشكل او باخر...معلش البوست طويل شويه بس خليك معايا للاخر ومش هتندم

كان ياما كان في سالف العصر والزمان كان في ملك اسمه جورم كان بيحكم بلد اسمها يوتلاند, يوتلاند كانت شبه جزيرة كبيرة في شمال اوروبا وكانت متقسمه دويلات متناحرة ومتنافسة وكانت الديانه فيها وثنية ....في جنوب يوتلاند كان في احد النبلاء اللي اتأثر بالديانة المسيحية وكان عنده بنت جميلة اسمها ثيرا... وفي احد اللقاءات اعجب بها الملك جورم ولم يطل بها الوقت حتى اصبحت الملكة ثيرا زوجة الملك جورم..
مرت الايام وجاء ولي العهد الامير هارالد سنة 910 ميلادية...هارالد اتاثر بامه الي حد كبير واستجاب لمحاولتها زرع المسيحية جواه في نفس الوقت اللي كان ابوه الملك بيحارب ده بكل قوته, هارالد امن فعلا بالمسيحية وابتدى يدعو الناس ليها...مع الوقت ازداد عدد المسيحين لدرجة ان بعض النبلاء اتحولوا فعلا للمسيحية..في الوقت ده كانت قامت قبل كده محاولات كتير في اوروبا للدعوة للمسيحية لكن كلها كانت بتفشل اما للاغراءات او للتعذيب...سنة 935 ميلادية هارالد اصدر الامر لاول اسقف انه يبدأ الدعوة للمسيحيه ومكانش هارالد هو الملك لسه ... في الوقت ده كانت اعظم امبراطورية هي الامبراطورية الرومانية واللي كانت تحت حكم اوتو العظيم اللي ارغم هارالد على الاعتراف بيه كحامي اعظم للكنيسة مقابل مساعدته في اهدافه اللي كانت تنحصر في توحيد يوتلاند ونشر النصرانية...وقد كان ...وفعلا استطاع هارالد توحيد يوتلاند وبعض الدويلات الاخري وظهرت على الوجود الدانمارك تحت حكم الملك هارالد سنة 958 ميلادية وبعد فترة من الزمن ضم ليها جزء من النرويج عام 970 ميلادية ليكون ملك الدانمارك والنرويج المسيحيتين....لكن لم يحيا كثيرا ليستمتع بحلمه وقتل بيد ابنه سويين في معركة انقلب بيها على حكم والده سنة 985 ميلادية

الله.......؟ بس احنا مالنا ومال عم جورم والاخت ثيرا واخونا هارالد ؟؟؟؟؟؟ اه نسيت اقولكوا
هارالد كان داكن البشرة الي حد ما...يعني من الاخر كان غامق ومختلف عن اهل بلده (وبعض القصص بتقول ان لونة كان عادي بس كان عنده سن غامق عن بقية الاسنان ) فلقبوه ب "هارالد بلاتوند" او هارالد الداكن باللغة الدانماركية واللي اترجمت بالانجليزية لتكون هارالد بلوتوث

بلوتوث؟؟؟؟؟ الكلمة دي مش غريبة ؟؟؟ ايوووه هو البلوتوث بتاع نوكيا ده اللي بتبعت بيه الصور والرنات......طب

ايه اللي جاب عنب الشام لبلح اليمن؟؟؟ اقولك ياباشا...

البلوتوث هو تقنيه اخترعتها مؤسسه غير ربحية بتضم مجموعة من شركات التليفونات المحمولة والكمبيوتر والاتصالات وعلى رأسهم شركة اريكسون ونوكيا والاولى من السويد والتانية من فنلندا ... يعني من نفس المنطقة الاسكندنافية وبالمناسبة المنطقة دي هي اول مكان في العالم كله شرقه وغربه يستخدم اتصالات المحمول....نرجع تاني للبلوتوث..المؤسسه دي لما حططت الاستاندرد بتاعه سمته على اسم الملك هارالد بلوتوث وقالوا " لقد عمل الملك هارالد على توحيد اسكندنافيا وجعلها بلد واحد ونحن بهذه التقنيه نعمل علي توفير الاتصال بين كل الاجهزة الالكترونية لجعلها وحدة واحدة" وجعلوا الرمز بتاع البلوتوث عبارة عن اول حرفين من اسم الملك ولكن بالحروف اللاتيني القديمه زي اللي في الصورة.

البلوتوث هو عبارة عن بروتوكول عن طريقة بتقدر الاجهزة الالكترونية تتصل ببعضها لاسلكيا في حزمة ترددية معينة وبكفاءة في حدود 1 متر او 10 متر او 100 متر على حسب الدرجة المستخدمة من البلوتوث...وطبعا الدرجة التانيه هي المستخدمة في الموبيل والكمبيوتر والماوس اللاسلكي ومعظم تطبيقات البلوتوث الشخصية عشان من الاخر يوفر في البطارية وبعدين احنا مش محتاجين اتصال على مسافة 100 متر ... كمان في ميزة جامده جدا في البلوتوث وهي انك مش محتاج تحط الجهازين قدام بعضهم زي الانفراريد بتاع زمان...لأ انت بس لازم تكون في حدود المكان

لما يكون في جهازين متصلين ببعضهم عن طريق البلوتوث يكون في جهاز قائد و جهاز تابع...جهاز منهم هو اللي

بيتحكم في الاتصال والتاني بيسمع كلامه..هتفهم قصدي لما اقولك ان الحزمة الترددية دي فيها 79 تردد وان الجهاز القائد ده بيغير التردد كل شوية ويبخلي الجهاز التاني بردو يغير التردد بتاعه...الحكايه دي بتحصل 1600 مرة في الثانية متخيل؟...ده غير ان الاتصال بين الجهازين بيكون متشفر عشان مافيش حد يقدر يتصنت او يعمل هاك ع البيانات اللي بتتبعت والتشفير ده طبعا برده اللي بيتحكم فيه الجهاز القائد. اجمل حاجة ان ده كله بيحصل اوتوماتيك بدون تدخل الانسان

جنون البلوتوث...وانت سايق العربية التليفون بيرن ترد من السماعة البلوتوث اللي على ودنك ولما توصل البيت تسيب السماعة في العربية وتطلع تلاقي ان التليفون اتربط اوتوماتيكيا بتليفون البيت اللي فيه امكانية البلوتوث ولما يجيلك تليفون ع الموبيل ممكن ترد من سماعة تليفون البين وتوفر بطارية الموبيل شوية وتعجبك صورة فا تصورها وتبعتها بالبلوتوث على الطابعة وبعد الغدا ممكن توصل الموبيل بالكمبيوتر لاسلكيا بالبلوتوث برده عشان لوحبيت تشوف الميل بتاعك او تتابع البلوج ويسلام بقه لوحبيت تسمع شوية مزيكا من ع الموبيل لكن عن طريق الهاي فاي اللي فيه بردو بلوتوث...... جنان صح؟؟ بس هي دي الاتصالات

ملحوظة:- التواريخ المذكورة فوق صحيحة وان كانت غير دقيقة تماما
ياريت اللي يعجبة البوست يفحته

اول تاج

انا مبسوط اوي ان جالي التاج ده من سمير...انا شايف ان التيجان دي بتخلي المدونين بيتعرفوا على بعض بطريقة جميلة وبطريقة صادقة وبتكش جوانب حلوة في شخصيات اللي بيجاوبها وبعض الاسئلة بتخلي الواحد يفكر فيها كتير رغم انه كان فاكرها سهلة...زي بالظبط اول سؤال اللي جاوبت عليه اسهل اجابه رغم صعوبته الشديدة

انت مين؟

انا محمد سمير...26 سنة..مهندس اتصالات
بحب الحياة ونفسي الحق استمتع بيها


مين اكتر 6 اشخاص بتحبهم؟

بالظبط هما 6 والدي ووالدتي واخواتي كريم واسلام وزوجتي وبنوتي فرح

انت سعيد؟

الحمد لله...مهما كانت الظروف اللي بتخلى الواحد يضايق لكن ثقته في ربنا سبحانه وتعالى
بتخلى كل حاجة تهون والحياة تبقى حلوة من تاني
وكفايه رضا اهلي عني وكرم ربنا عليا انا وزوجتي وبنتي

لو اجتمعت انت وحسني مبارك في غرفة واحدة؟

هقوله انزل ياريس الشارع وشوف الناس عايشه ازاي....انت في يوم من الايام كنت واحد منهم
هقوله شوف الدول التانيه الانسان غالي فيها ازاي واحنا هنا ولا لينا اي تمن
هقوله شوف مصر كانت كلمتها عاملة ازاي ودلوقت تسوى ايه
هقوله الحق اللي فاضل وصلح اللي اتكسر ولو على الناس متقلقش..الناس هتديلك الامان وهتحترمك كاول رئيس سابق لمصر
هقوله شوف ياباشا المطبات والفواصل اللي في محور 26 يوليو عامله ايه في العربيات

لو معاك مليون ونص جنيه......تعمل بيهم ايه؟

ممممممممممم
نص مليون لاخواتي واهلي
نص مليون اعمل بيه مشروع خيري
ونص مليون ادلع بيه نفسي انا واسرتي الصغنتوتة

بتحب مصر؟

اوي وزعلان عليها اوي اوي اوي اوي

بتحب البنات؟

البنات دول الزهرة الجميلة اللي في الدنيا...ياسلام سبحان الله بجد
خلق الانثى وفيها كل الجمال اللي في الارض سواء في الطيبة والحنية والرقة والشياكة والزوق
وحاجات كتير اوي (مع بعض الاستثناءات) ز
هاكتفي بالجابة دي عشان مش عايز اعمل توتر في العلاقات الدبلوماسية مع القيادة العليا

انت مسلم؟

الحمد لله

ليه؟
ربنا سبحانه وتعالى اكرمني بالاسلام وكل ما الواحد بيكبر بيعرف اد ايه فضل ربنا كان كبير عليه

مين اكتر شخصية ما تقدرش تستغنى عنها في حياتك؟وليه؟

والله اي حد من الستة اللي فوق مقدرش استغنى عنه..انا رومانسي حبتين بطبيعتي ومرتبط باهلى واسرتي لاقصى الحدود وربنا يخليهم ليا ويباركلي فيهم واكون راضيهم

ايه اكتر موقف محرج اتعرضت ليه في حياتك؟واتصرفت ازاي؟

هو الصراحة موقف مش هانساه..من كام سنة راجع من صلاة الجمعة لاقيت خالتي من ضهرها ماشية في الشارع ورايحة ناحية بيتنا...حبيت اخضها فاروحت مقرب منها براحة وشديت منها الشنطة وجريت
وطبعا انتوا عارفين اللي حصل ...ايوووووووووووووه...ماطلعتش خالتي....ووشي جاب الوان الطيف كلها واعتذرت الف مرة والحمد لله اني كنت تحت االبيت تقريبا والناس كانت عارفاني

ايه الأمنية اللي بتدعي ربنا دايما انه يحققها لك؟

ان ربنا يرضى عني ويهديني ويكرمني ويجعلني انسان بار بأهلي وباسرتي ويلهمني النجاح والتفوق في شغلي وحياتي

تمرر التاج دة لمين؟

امرر التاج ده ل

البتاع
الله..الوطن...المدونة
حنين
رينا
كراكيب عادل
جزء مني
كلام رضوى الجامد

شيماء وبحبك يامصر

وطبعا اي حد عاجبة التاج يتفضل مع خالص التمنيات

البركة في البكور

ازيكوا ياجماعة...وحشتوني والله...انا متشكر جدا لكل اللي سأل عني او دخل يزورني خلال الفترة اللي غبت فيها..انا بس كنت مطحون حبتين الفترة اللي فاتت بس الحمد لله الدنيا هديت شوية...
من يومين حصل معايا موقف لفت نظري بشدة...كان عندي معاد في الشغل الساعة 10 الصبح..وانا رايح في الطريق جاي بدوس فرامل دوست ملقتهاش اضطريت اعتذر عن المعاد خصوصا اني بمشي على طريق سريع وانا رايح الشغل ومش هاينفع امشي كده من غير فرامل... قلت حلاوتها في حموتها ويللا نروح للميكانيكي كانت الساعة 9.30 الصبح ...رحت لقيته لسه مافتحش...قلت امشي قدام شوية كده عند واحد تاني لاقيته برده لسه مفتحش ولاحظت ان معظم المحلات في الشارع لسه قافلة....غريبة اوي الساعة 9.30 انا استغربت واتهيألي للحظة ان اليوم كان الاحد بس لأ دا انهارده الخميس
اللي اعرفة ان البركة في البكور وان الساعة 9.30 دي مش بدري اوي كده عشان الناس كلها تكون لسه قافلة وبعدين دا المفروض الناس اللي هيا فاتحة محلات وورش اكتر ناس تنزل بدري الصبح عشان ربنا يباركلهم في رزقهم...يقولك ده مافيش زباين بتيجي قبل الساعة 10 ماشي موافق ولا حتى لغاية 12 ياعم بس برده ربنا هيبارك في الرزق اللي هيجي حتى لو جه الساعة 10 بليل...مش عارف اللي بقوله ده صح ولا غلط بس انا اتعودت على كده ان الصحيان بدري في بركة في كل حاجة بركة في اليوم والرزق والمصالح وكل حاجة تانية وبتلاقى كده الدنيا منورة وكله بيقول استعنى ع الشقى بيك يارب وكله رايح يشوف رزقه... الغريبة اني في نفس اليو م كنت قاعد مع واحد جارنا واشتكالي من الموضوع ده..انه نزل يشتري قطع غيار الساعة 10 الصبح ولقى الناس قافلة وقليل اوي اللي فاتح وقعد بقى يقولي خلاص الناس مبقاش في دماغها حاجة غير السهر والنوم وان مبقاش في حد يراعي رزقه وشغله زي زمان ...والصراحة الراجل عنده حق..انا ايام ماكنت بروح المدرسة وبنزل 7.30 كنت بلاقيه بيفتح المحل بتاعه. المشكلة ان حتى الموضوع ده وصل الريف ومبقاش الفلاح يصحى الفجر ويروح على ارضة زي زمان....بقه برده ينام للضهر
للاسف وللصراحة انا نظام شغلي اوقات كتير ماينفعش الا والناس نايمة عشان كده انا مبطبقش الموضوع ده بنسبة 100% للاسف...وان كنت مؤمن بيه
ياترى انتو ايه رأيكوا هل انا مزودها حبتين وان الناس برده بتبقى سهرانة في الشغل ولا ايه..طيب احنا كشعب كامل لو ابتدينا يومنا الصبح شوية مش دا بردة من ضمن السلوكيات الي لو اتحققت هتفرق كتير في نظام حياتنا كله

Busy

Sorry for being away these days

I'm soooooooooooo busy

having a lot of work and training courses

Will be in touch soon

Mohamed

فزورة

سيدة في الثلاثينيات سايقة عربية

+

العربية تويوتا لاند كروزر دفع رباعي

+

المدام بتتكلم في الموبيل

+

وعلي ايديها التانية شايلة ابنها البيبي

+

ع الكرسي جنبها طفلة بتطنطط ع الكرسي

=

؟؟؟؟؟؟؟؟؟؟؟؟

الحق وبسرعة اتصل على 090005151 وادفع دم قلبك وكل لما تتصل اكتر وتدفع اكتر برده مش هتكسب

واحد سويسرا..الاجرة يافندية

غادر القاهرة وزير الاسكان في طريقه إلي سويسرا عن طريق باريس بعد تعرضه لموقف محرج علي الطيران السويسري الذي رفض انتظاره بعد تأخره عن الموعد المحدد للصعود إلي الطائرة. وكان مندوب وزارة الاسكان قد انهي اجراءات سفر الوزير علي رحلة الخطوط السويسرية رقم 237 إلا ان الوزير تأخر عن موعد الطائرة. ورفضت شركة الطيران انتظاره فتم إلغاء سفر الوزير. وتقرر إعادة الحجز للوزير علي الخطوط الفرنسية والتي غادرت إلي باريس



الخبر اللي فوق ده نشر على موقع مصراوي ولو الخبر ده صحيح يبقى لازمن وحاتمن الحكوممة المصرية تقدم احتجاج رسمي فهمي نظمي الصراحة للحكومة السويسرية بعد التعدي السافر على حرية جناب فخامة سعادة وزير مساكن المحروسة...ايه يعني فخامته اتأخر شوية..ايه يعني لما الركاب ينتظروا سيادته ساعة ولا اتنين ولا عشرة حتى...ده وزييييييييير ياجدعان يعني مش فاضي وكل دقيقة فيها انجاز..لا لا اللي حصل ده لاممكن ابدا يتسكت عليه وبعدين احسن حاجة ان سيادته حجز علي الطيران الفرنسي اهو على الاقل يرتاح يومين في باريس من الاحراج اللي اتحط فيه والمفروض يستصدر قرار ويوقف كل رحلات الشركة السويسرية بعد المصيبة الي عملتها

طبعا لو سيادة الوزير كان تنازل وراح عن طريق مصر للطيران اللي هي بتاعتنا ديه كانوا طبعا استنوه لغاية لما سيادته يخلص كل اللي وراه ومش مهم الركاب يخبطوا دماغهم في اقرب سحابه...انما انا عارف ان مصر للطيران مش قد المقام. يللا حصل خير
انما هو كان رايح سويسرا يعمل ايه؟

أكيد في مصر

من كام يوم الصديقة العزيزة البتاع نشرت بوست لذيذ اوي فيه صور بدون تعليق عن مصرالمحروسة واهلها الرايقين

ان حبيت اكمل المسيرة المباركة وابعت الصور اللي جايه دي

يارب تعجبكوا

التخصص حلو برده ياجماعة

هي دي اصول الجيرة بصحيح

مش تقولوا يا جماعة ان اليوم بقى 25 ساعة

يالطيف اللطف يارب

الشوق والمعالك...التطور الطبيعي للغة العربية

الله يرحمك ياعم عشم كنت طيب وابن حلال

احبك وانت رايق

كبده معامل-هو ده التعليم ولا بلاش

يسلااام-واشمعنى المرسيدس فيها تلاجة يعني

رجل فقد عقله