عسلامة اشني احوالكم...صحة لا بأس؟ مرجلين اموركوم؟...زعمة اليوم باهي برشا بش نمشوا نعملوا قهوة ونحوسوا غاديك في الحومة...شوف من المفروظ ثم اشكون نقابلوا غادي علي نصف النهار ودرجين وبش نمشوا للمغازة نشروا الحوايج تبع اشنو هكا الاباريي مي زعمة الريزو تكون مزيانة مشان مش نعمليك ابييل وتخلط علينا غادي....واكهو
الكلام اللي فوق ده كان بلهجة أهل تونس اللي خلتني اقعد اسبوع تقريبا مش فاهم نص اللي بيتقال وكنت بضطر سعات ان حد يترجمهالي بالانجليزي عشان افهم لكن بعد كده فهمتها وحبيتها اوي اوي ويمكن من ساعة مارجعت مصر بحب اتفرج اوي على المحطات التونسية عشان اللهجة دي مانسهاش
تونس العروس الجميلة ذات الرداء الاخضر البلد الجميلة اللي حبيتها اوي اوي اوي...يوم مانزلت مطار قرطاج كان كل معلوماتي عن تونس هي بنك الحظ وخرجت منها وانا متعلق بكل حاجة فيها.
انا هنا بتكلم عن بلد قعدت فيها شوية واتعاملت مع ناسها وعرفتهم وصاحبتهم وحبيتهم بغض النظر عن ظروف السياسة والدين هناك. انا ماسمعتش عبد الحليم وام كلثوم زي ماسمعتهم هناك.."انت مصري؟" كان دايما سؤال بتسأله مصحوب بابتسامة مشرقة ومرحبة بطريقة ماتتوصفش وياه بقه لما حد يصمم يتكلم معاكي بالهجة المصرية..اكنه طفل لسه بيتعلم النطق
تونس بلد جميلة اوي ونظيفة اوي ومنظمة واهلها طيبين وبيحبوا المصريين اوي ماعدا في الكرة...هما كلهم كده على بعض مكملوش 10 ميلون فبالنسبه لي البلد فاضييييييه والشوارع واسعة والدنيا جميلة ...شتاها برد يقرص وحرها نار تلسع وارضها كلها خضرة تفتح النفس وتخلي الروح طايرة في الهوا الممتع حواليك
انا روحت تونس وحبيتها اوي وبجد واتعلقت بيها بطريقة مش معقولة بشوارعها ومطاعمها وكافيهتها وبكارفور وشامبيون وبناسها وحتى اكلها.
انا مش عارف كتبت البوست ده ليه بس يمكن لاني لسه كنت بتفرج على شوية صور وهفني الشوق...ودي صور من هناك..يارب تعجبكوا
الساعة..اشهر ميادين تونس العاصمة عند تقاطع شارع الحبيب بورقيبة مع محمد الخامس
سيدي بوسعيد..اجمل مدن تونس من وجهة نظري ..المدينة كلها مدهونة بالابيض والشبابيك والابواب بالازرق
قهوة سيدي شبعان (ع الشمال) من اشهر القهاوي في سيدس بوسعيد وتونس المنظر منفوق تحفة واحلى حاجة قعده عليها مع كوباية شاي اخضر باللوز
مدينة بنزرت من اجمل الاماكن..المكان ده فيها واسمه الناظور ودي صورتي انا و صديق تونسي اسمه نسيم اللي صداقته كانت اكبرحاجة كسبتها من هناك
لافيات- حي جميل في تونس العاصمة كان دايما يفكرني بمحطة الرمل في اسكندرية
.jpg)
ده يبقى -لبيب للبيئة حبيب- شخصية كارتونية عشان الاطفال تحافظ ع البيئة ولبيب يحبهم
نزل الهنا ونزل افريقيا ...اكبر فندقين ع الحبيب بورقيبة في العاصمة
الابواب المميزة اوي في تونس
القهوة العالية من اشهر الاماكن في سيدي بو سعيد وتونس كلها
الصور من :- تصويري والجوجل ومدونة كريم
14 comments:
السلام عليكم
أول زيارة لمدونتك ..
الله ينور
وخليتنى ابقى عايز اروح تونس ..
لا انت هتنام فيها 3 ايام ربنا يبعد عنك الحساد وحرامية المواضيع للمنتديات
ومش تقولى قبل ماتروح عشان تاخدنى معاك هههههههههههه المرة الجاية خلاص اتفقنا
محمد
اولا انا بفكر اعاقبك ومجيش شوية
عشان تعدل صفحة التعليقات
كبرها
خليها طبيعية زينا
بجد
بالنوسبة بقى لموضوع تونس
انا اصلى مغربى
بس مش بتكلم مغربى :-)
انفع؟؟
بص احنا نتجوز واتعلملك مغربى
وارطن لك طوووووول اليوم
ايه رأيك؟؟؟
هههههههههههههه
اهل تونس من الممكن ان يكونو كويسين زي ما انت بتقول بس عيبهم انهم متعصبين زيادة شوية في الكرة وخاصة المباريات الي بتلعب ضد فريق مصر او منتخب مصر
---ياسر سليم--
ياباشااهلا وسهلا ونورت المدونة يارب بس ماتكونش اخر زيارة
روح تونس وانبسط وادعيلي
نورت
---د.هيما---
ياعم المرة الجاية مش رايح الا لما اقولك...ياسلام انت تأمر يادكتور
تحياتي
---البتاع----
لا لا لا انا مقدرش انك ماتجيش...يانهار ابيض ياباشا امرك علم وينفذ فورا
بيني وبينك انا برده بضايق منها
وبعدين كده تطلعى مغربية وماتقوليش
خلاص اجي اتقدملك امتى؟:) بكرة كويس؟
اسعدتيني بزيارتك
بجد
---عمرو غريب---
باشا..مانا بقولك بيحبوا المصريين اوي بس في الكرة بعيد عنك
هما اصلا متعصبين في الكرة كان في مرة ماتش بين الصفاقسي والنجم الساحلي والشوارع وقتها فكرتني بماتشات الاهلي والزمالك
تحياتي ليك
محمد سمير
حمد الله على السلامة
صور تحفة وواضح ان البلد جميلة
تحياتي
السلام عليكم
شوقتنى ليها بجد
تعرف ان المدينه دى الوحيدة اللى مش حلمت مثلا انى أسافرها
يمكن علشان زى ما انت بتقول اننا كنا عارفينها بس فى بنك الحظ :D
لو ربنا أتاح ليه فرصه السفر هبقى بجد ازورها
بوست جميل كله ذكريات
تسلم ايدك
---احمد باشا الحسيني---
نورت ياباش المدونة وشكرا على كلامك الجميل
تحياتي
---رينا---
اهلا اهلا رينا ازيك
تونس بجد اوي بلد جميلة ولو جاتلك فرصة ماتترديديش..انا لو قعدت اتكلم عنها مش هاخلص كلام
يعني كل يوم بيعدي في حياتنا بيبقى ذكرى ويارب ذكريتنا كلها تبقى حلوة
تحياتي ليكي ونورتي
محمد سمير
الحمد لله أنك كبرت صفحة التعليقات لحسن الصفحة الصغيرة ده كانت بتضايقنى اوى
والصور حلوة واضح أن تونس فعلا حلوة ويمكن أحلى حاجة ذكرتها هى أنك خرجت بالرحلة ده بصديق ، حاول تحافظ على الصداقة ده وتفضلوا على اتصال على طول
---بحبك يامصر---
ياه لما صفحة التعليقات كانت مضيقاكوا كده محدش قال ليه غير البتاع :)
بصراحة فعلا تونس جميلة فعلا واحلى مافيها ناسها وشوارعها وحياتها
تحياتي ليكي
ونورتي
محمد سمير
جميله اوى تونس
نفسي ازورها
بس ممكن لو سمحت تترجم لنا الكلام اللى فوق ده
:D:D
فعلا أنا نفسي أروح تونس وأنت كده شوقتني أكتر ليها
---داليا---
نورتي المدونة
لما تيجي رايحة تونس ابقي بس قوليلي وانا ساعتها هترجملك كل اللي انتي عايزاه
نورتيني
:D
---مكسوفة---
ازيك عاملة ايه وازاي صحتك دلوقتي يامكسوفة
يارب تكوني بخير وترجعي مصر بالسلامة وتطلعي منها على تونس في فسحة جميلة
نورتيني
تحياتي
محمد سمير
Post a Comment