وانا في الحالة دي قريت الجزء ده من رباعية صلاح جاهين "غمض عينيك وارقص بخفة ودلع...الدنيا هي الشابة وانت الجدع"ء
فسميتها غمض عينيك...وبقيت اغمض عينيا واحلم بحياة احلى واكتب اللي في نفسي
لا محصلش ويوم ماحاولت اخد منها اجازة كانت مسيطرة على تفكيري
اقرأ بدون تعليق....اشارك ولكن مع نفسي...وفي نفس الوقت كنت اوقات بدخل في مناقشات كتير مع اصدقائي وقريابي ...فقلت طب ما انا اعمل مدونة واتجاوب مع ناس تانية واصدقاء جداد واكيد هاستفيد واوسع مداركي وافضفض باللي جوايا....وواحدة واحدة المدونة بقت بتشكل نافذة اجتماعية على الحياة بالنسبة لي
الحقيقة تعليقات كتير شكرت في المدونة وان كنت اعتقد معظمها كان مجاملة
التعليقات بالنسبه لك.. واهميتها ؟
مؤشر قوي جدا على مدى قبول القراء للي انا بكتبة حتى وان كانت فضفضة فاضية
انا بحب اوي بوستات التلاتة جيم والملك هارالد لانه يمكن يكون قدم معلومة جديدة
وبحب اوي بردو بوست عسلامة ياتونس لاني كتبتة في شوق ولهفة
كتيييييييررر اوي اوي, انا اوقات بنفعل مع بوستات رائعة كتير
كتير اوي بردو ما شاء الله
حد قل أدبه فى التعليق وكان أيه رد فعلك ؟
المدونة اللي صاحبها بيخرج عن حدود المقبول وان تحدث في اللا معقول
بعد وفاة شيكو (الله يرحمها) قلت ليه مايكونش في حد ممكن يكمل هو المدونة بعد وفاتي
واهو تفضل الناس فاكرة ولو حتى اسم "غمض عينيك"ء
ء"سمير" والمشهور بيه وسط جيراني واهلي هو "هاني" وجيراني بالذات كتير منهم مايعرفش ان اسمي الحقيقي
دراستك ؟؟ مجالك ؟؟
شخصيتك نوعها ايه؟
راضي ومقبل على الحياة الحمد لله
الخروج يحتل 75% من نسبة وقت فراغي سواء خروج التزامات او فسح
يليه الكمبيوتر والقراءة
يعني بحب الهزار واحب اكبر دماغي
تاني ؟؟؟ صينية فراخ في الفرن تخليني اعمل أي حاجة
الحاج سمير ( ربنا يديله الصحة)ء
ابويا راجل طيب ومتسامح وعقلة كبير وكلمته مسموعة عند الكل ومابيفوتوش واجب سواء فرح او ترح
واسمة جواز مرور بيعديني من مشاكل كتير
اتمنى اني اكون خدت منه نص صفاته بس
الصفات التى أخذتها من ماما ؟
دي بقه صاحبتي واللي بحب انم معاها عن اخبار العيلة
خدت منها الطيبة والعند وبيقولوا اني اشبهها من اخواتي
ربنا يخليهلنا
أكتر ست حاجات بتكرهها ؟
الغباء....اكره اوي اللي يستغبى معايا
استبداد الرأي بدون سند وبدون مناقشة
اللي يستعبطنى.....زي اللي يتكلم عن تراجع الاسعار والقوة الاقتصادية..ماهو دا واحد بيستعبطني
الاستغلال
البن والقهوة بجميع مشتقاتهم
بحب السينما
بحب الضحك والتفاؤل
بحب الابداع والتفرد
بحب تونس
الشغل بالنسبه لك؟
بيتي التاني وشىء مهم جدا في حياتي ومستقبلي
الأنترنت بالنسبه لك ؟
شباك ببص منه على العالم بكل اللي فيه
بتواصل عن طريقه بدنيا تانية
بحافظ بيه على شوية المهارات الاجتماعية اللي قربت انساها
19 comments:
اول واحدة يا جماعة
احم احم
احب اقول سياداتي سادتي
اني فرحانة بوجودي في المقاعد الأولى
ومتشكرة للأخ محمد او هاني مش فارقة الي دايما مفتح عيني ما شاء الله علي
ثانيا متشكرة عشان كنت حتبعتلي التاج
بس معلش خيرها في غيرها سندباد سبقك
واي كمااااااااان
على فكرة سلام للبط هم اخبارهم اي
لسة في مشاكل بينهم؟!؟
وعندي سؤال
هو انت اي قصتك مع تونس يا عم
علم يا فندم وجارى التفيذ
بس الاول مش تروح تحلى عندى فى البيت بيتك فية حفلة انا عزماك
انا دلوقتى بكتب الرد ده يا محمد ومش عارف انا بكتب ايه انا مش قادر امسك دموعى بجد
كلكو مستغربين ليه بس انا بجد يا محمد لما عرفت ان شيكو توفت انا مقدرتش امسك دموعى مع انى معرفهاش وعمرى ما دخلت عندها البلوج انا فى مرة صدفة دخلت مدونة مكتوب فيها ادعو لشيكو
ربنا يرحمها يا رب
بتحب السفر وانا كمان
بالتوفيق يا محمد
أولا بنعتذر عن هذا الإنقطاع، بس أنا دايما متابعة، ومتشكرة جدا على سؤالك
ثانيا التاج جميل بإجباتك وواضح فعلا إنك شخصية مقبلة على الحياة من المدونة كلها مش التاج بس
على فكرة حلوة أوى قصة البطابيط ده ، ربنا يخليك فرح وتفرح بيها يا رب
باين عليك بتحب تونس أووووى
ههههههههه
على فكرة ردودك على الاسئلة وراها شخصية
جذابة ومقبله على الحياة ربنا يوفقك يارب
وميرسى على التاج
دة بقى اول تاج يجى لى
يعنى تاج مش هيتنسى
تحياتى وتقديرى
هناااا
باين عليك بتحب تونس أووووى
ههههههههه
على فكرة ردودك على الاسئلة وراها شخصية
جذابة ومقبله على الحياة ربنا يوفقك يارب
وميرسى على التاج
دة بقى اول تاج يجى لى
يعنى تاج مش هيتنسى
تحياتى وتقديرى
هناااا
--ليموناده---
صباع النعنشة والجاي احلى من الفرفشة
ايه النور ده
دا انا لسه ماكملتش البوست ولاقيتك معلقة عليه
قول اعمل بابلش بسرعة عشان الكمبيوتر كان هيهنج وبعدين ابقى اظبطة لاقيتك معلقه هليه
انا احب كده
سرعة في الاداء ودقة في التنفيذ
دمتم لنا زخرا ونعنشة يافندم
بالنسبة للبط...الحمد لله اتصالحوا وقاعدين يلعبوا مع بعضيهم
تونس بقى انا هاحكي عنها في بوست لوحده...نورتيني بجد يانعنشة
---ايوية----
شكرا يافندم
والله يا ايه عندي مشكلة وع مدونة البيت بيتك..انتي عارفة انا دليما كنت تلاقيني عندك اول ماتبعتي البوست بس مش عارف ليه كل مابفتح اللينك من جوجل ريدر بيهنج الجوجل كله....قلت امسح اللينك واضيفه تاني...من ساعتها مش راضي يضاف خالص عشان كده ماخدتش بالي من البوست الجديد
بس انا جاي
حضري الكولا
---عبده محتاس---
والله ياباشا ومين سمعك
انا اضايقت اوي بردو لما قريت الخبر ده رغم اني فعلا ماعرفهاش وماصدفش اني ازورها او هي تزورني قبل كده
يلا ربنا يرحمها ويرحمنا جميعا
نورتني ياباشا وفي انتظار اجاباتك الجامدة
---قطة الصحراء---
نانا
ايه النور ده
انا فعلا بحب السفر جدا جدا
ربنا يخليكي
---شيماء----
ياااااااااااه
انتي فين ياشيماء
هل هلالاك..ايه ياعم الغيبة دي كلها
ابقى اكسبي فيا ثواب وعدي على المدونة
دا انا بدعيلك
:)
نورتيني
---هنا---
ازيك ياهنونة
تونس فعلا انا بحبها اوي
قضيت فيها ايام جميلة على المستوى الشخصى وعلى مستوى الخبرة العملية
وخصوصا اني قبلها بشهر واحد كنتء هائم في صحراء افريقيا الجرداء
ومبروك ع التاج ياجميل في انتظار اجاباتك
نورتيني
تحياتي
محمد سمير
ماشي يامحمد ليه طيب الفضايح دي يافندم والله بزورك كتير بس الوقت مش بيسعني اني اعلق وبجد تاجك ده عرفني عنك حاجات كتيرة عنك يعني مثلا الدراسة وطبيعة الشخصية وحاجات من هذا القبيل اديني فوت اهو علشان الهيصة اللي انت عملها دي ...وبعدين خد هنا انا لسة مخلصة الكولا الزيرو اهو بتاعت الصبح ولو سمحتي تبعت بتاعت الغداء على المدونة او على الشغل اقولك ابعتها على بريد محيط اللي هو شغلي وهي هتوصل اطمن اديها لعمكمال وقوله اديها لبيبو وهو هيجيبها بعد ما يشرب نصها طبعا يالا سلام صدعتك بس انت اللي جبته لنفسك
احلى صداع والله يابيبو
بس انتي تعالي علطول كده وصدعيني ومالكيش دعوى..انا مبسوط
وبالنسبة للكولا الزيرو ابعتهالك مع عم كمال هي والغدا كمان
تحبي تاكلي ايه؟
نورتيني والله
محمد سمير
ردودك جميلة وتلقائية احلى ما فيها ان مافيهاش تكلف
بس بصراحة مش فاهمة حكاية تونس
تحياتي
سلامي لفرح كتير
يلا تعيش و تدوب
عذرا للتحليق خارج السرب
من اجل رفع الظلم عن المظلومين
ادعوك للمشاركة فى حملة رفع الظلم عن طلاقب الاسكندرية المختطفين
التفاصيل بمدونتى
بصراحة التاج ده احلى كتير من التاج الى فات
التاج الى فات كنت تقريبا متسرع قوى
وكنت عاوز تكروته
بس التاجات جابتلك خبرة أهو
ولحلوة حكاية هانى ومحمد انا برده كده :))
انت من تونس ولا ايه
هي بيقولوا عليها حلوة قوى .. بس ريسها اعوذ بالله من غضب الله
الله يكون فى عونهم بمراحل
ومستنينينك فى أقلام مصرية طالما عجبتك
وياريت تشترك فى الجروب
وعلى امل اللقاء .. لما تضرى عنا :))
تسجيل حضور وبكره اعلق لاني تعبان من السفر
السلام عليكم
ازيك يا محمد
التاج دا خير اللهم اجعله خير اللى انت مررته لقلوب حائرة
بتاع بيتزا بعجر
هههههههههههه
;)
المهم اجابتاك على التاج حلوة كده ومفيدة مفهاش غمموض يعنى
حلوة تونس
وياسيدى لو رحت هنبقى نيجى نصيف عندك كل سنة
غلاسة بقى
:D
وبالنسبة لغمض عنيك ... المقولة دى كانت فى بالى وبحبها اوى وتاهت منى مع الوقت شكرا انك فكرتنى بيها
هندسة اتصالات وبتشتغل فى الموبايلات؟؟
علاقة برده ماهى الموبايلات دى بتاعة الاتصالات برده
عاوزة اقول لانى بموت فى الموبايلات وكل يوم والتانى عاوزة اشترى موبايل
وحيث كده بقى نستغلك
انا عاوزة اشترى موبايل ومحتارة فى اتنين
انا زيك مبحبش البن بس بحب النسكافيه
:)
تحياتى ليك
سلام
---mimi--
نورتيني ياميمي
حكاية تونس دي هبقى اقولها في بوست لوحده ان شاء الله
انت اخبارك ايه؟
---نهى---
يوصل يانهى
عينيا
نورتيني
--مادو---
ياباشا طول العمر ليك
شرفتني بالزيارة
---اسلام رفاعي---
شرفتني بالزيارة ياباشا
هدخل اتابع معاك ان شاء الله
---منذر---
بيني وبينيك التاج ده كان عاجبني اوي ومصدقت حد بعتهولي
هي دي التاجات ياباشا
وبعدين ياباشا انا لا تقلان ولا حاجة قريب اوي هتلاقيني مشاركفي اقلام مصرية على الاقل باذن الله
تونس حلوة اوي..عروسة جميلة...بالنسبة لريسها بقى في كل زي بعضه
نورتني يامنذر
---وحيد---
حمد الله ع السلامة ياباشا
في انتظارك
--حدوتة--
ايه النور ده
حدوتة بذات نفسويتها عندي هنا
دقوا الطبول وقيموا الافراح
التاج دا فعلا اول مرة شوفته كان عندك انتي واجاباتك عليه كانت حدوتة
:):)
بس صحيح ايه حكايه حبك للموبايلات وتغيرها دي
كل اد ايه يعني؟؟؟
انا مش شغال في الموبيلات يعني ..انا شغال في شبكات الموبيل
المهم انتي ممكن تدخلي ع الموقعين دول وتطلعي منهم كل اللي انتي عايزاه
www.gsmarena.com
www.mobile-review.com
التاني دا روسي ف اول ماتدخلي خليه انجليزي وبيقدم تفاصيل التفاصيل عن كل موبايل
والاولاني ممتاز بردو
وانا تحت امرك لو احتجتي تسأليني في حاجة
عينيا
نورتيني والله
تحياتي لكم جميعا
محمد سمير
التاج طويل بس لذيذ فعلا وكمان بنعرف شوية عن الشخصيات اللى بنقرأ لها بجد حلو اوى وححاول اجاوب عليه قريب وسعيدة جدا انى فى اول اللستة وانك فاكرنى وطلعتنى شوية من الزهق يارب دايما .. اشكرك
Post a Comment