مشاكل في الشغل
سبعة عيادات لدكاترة
ثلاثة معامل تحاليل
مركز اشعة مقطعية
يوم صيام
دخول زوجتي غرفة العمليات
انهاك جسدي غير محدود
الخلاصة
الحمد لله
*****************************************************************
سيداتي انساتي سادتي
اليكم هذا النبأ الهام جدا
اخيرا
وبعد عناء
وطول انتظار
ودعوات وابتهالات
خدنا الاجازة
اه هما 3 ايام بس...بس اجازة
اه مش هالحق اعمل فيهم حاجة...بس اجازة
اه يدوبك اسافر والف شوية وارجع تاني....بس اجازة
اجازة وكنت بجد محتاجها اوي اوي اوي
شعاري فيها هيكون
اصحى الساعة واحده ولا اتنين ونص
البس قميص بكم ولا البس بنص
اتعشى انهارده ولا انام خفيف
هدفي الاول هيكون النوم والاسترخاء
النوم بدون تحديد عدد الساعات ولا الداونلود بتاع الاحلام
هاحاول الفترة دي اتابع المنشورات الهامة
مجلة نص الدنيا
مجلة ميكي ماوس
مجلة اخبار النجوم
مجلة فلاش
مجلة الشبكة
مجلة نادين
وطبعا
مجلة روتانا
وطبعا هارفع شعارات من قبيل
لا للقميص
لا للكلاسيك
لا لتشغيل الدماغ ( هاركنها اليومين دول)ء
لا للجزيرة
لا للجرايد الرسمية والمعارضة والمطبوعة والمقرؤة والالكترونية والمفرودة والمبطوحة
ولا ولا ولا ولا ولا ولا ولا ولا ولا
انها الحياااااااااااااااااااااااااااااااااااااااااااااااااااااااااااااااااااااااااااااه
*************************
مش هتاخر ان شاء الله واول هارجع هابعت بوست "اميرات الاحلام" اللي قلت عليه البوست اللي فات ومسمحتش الظروف اني اخلصه
*************************
ياترى هنقضي الاجازة فين؟
كل سنة كنت متعود اسافر مع اهلي و مجموعة كبيرة من اصحابنا بس السنة دي ظروف الشغل منعتني
دلوقتي اسافر فييييييييين؟؟
قعدت انا وسمسمة (زوجتي العزيزة) نفكر ونفتكس في الموضوع ده
ماهو اسكندرية زحمة اوي ...والساحل بعيد وهما يدوبك 3 ايام وماليش خبرة فيه
طب شرم ولا الغردقة...لا ماليش مزاج دلوقتي وبعدين اصل سمسمة بتبقى عايزة الاجانب يلبسوا حجاب باين
وقعدنا نفكر ثم نفكر ثم نفكر
وفجأه
وجدتها وجدتها وجدتها
لاقيت سمسمة بتقولي بنظرة استغراب
هي ايه دي اللي كانت تايهة منك يا ارشميدس
قلتلها المكان اللي هنقضي فيه ال 3 ايام دول
قلتلي
فين يابو سمرة؟
......
مروحتهاش قبل كده
ومافكرتش اني اروحها
لما دخلت عالم التدوين وقابلت مدونين منها
اتكلموا عنها كلام جميل
وحبيتها منهم
وحبيت ازورها واشوفها
وقررت اسافرها
بلد ابو العربي والبمبوطية
طرح البحر والجمهورية
الجامع الكبير والمينا
وميدان ديليسيبس ينادينا
انا مسافر ياجماعة على هناك
على
بورسعيييييييييييييد
13 comments:
كل اجازة وانت طيب
ونام وارتاح قوى محدش عارف هياخد اجازة امت تانى
كل سنة وانت طيب ومنتظرين عودتك بموضوع كبير قوى
محمد انا مش فاهمة حاجة ايه الهندي ده يامنوفي
----ايوية---
وانتي طيبة يا ايوية
على رايك محدش عارف هياخد اجازة تاني امتى
نورتيني
---قلوب حائرة--
ايه ياعم بيبو مش فاهم ايه بس
العشرة ايام اللي فاتوا كنا تعبانين انا وزوجتي وبنتي والموضوع كبر حبتين وزوجتي دخلت المستشفى وعملت عملية
كان عشر ايام صعبين الصراحة بس الحمد لله عدوا
ودلوقتي انا على مشارف الاجازة اللي جت في وقتها بالظبط الحمد لله
بس كده
شوفتي بسيطة ازاي
:):)
وبعدين هو منوفي دا بقا اسم الدلع بتاعي
لا ياعم انا مش من المنوفيه خالص
نورتيني بجد
محمد سمير
أجازة سعيدة ان شاء الله و على رايك ثلاث ايام بس اجازة و ريح دماغك يا عم من التفكير
الف حمد الله على سلامة المدام
بس ما قولتش حتروح فين يعنى ؟
ياعم انا افتكرت خدت اجازه شهر او شهرين هههههه
دول كلهم تلات ايام
بقي حرام عليك كل ده هتقراه في تلات ايام
علي العموم اجازه سعيده بس متنمش للساعه واحده الظهر هههه ده يبقي كسل كتييييييير
تحاتي لك
سلامتك يامحمد
وسلامة زوجتك وسلامة فروحة
ياربى وانا باقول انت فين مش باين
يالله معلش بقى
وان شاء الله الاجازة تبقى حلوة وترتااح فيها
هو انت رايح فين قول بسرعة
هههههه
باى باااى
---عاليا حليم---
ايوه الله يا عاليا الواحد عايز يريح دماغة من التفكير احسن خلاص
دي صلاحيتها قربت تنتهي
والله يسلمك يا عاليا
نورتيني
----وحيد---
ياباشا احنا قولنا نوم غير محدود الساعات
وبعدين كسل كسل طب مانا رايح اكسل اساسا
وبعدين دول 3 ايام بس انا مستني موسم الاجازات والاعياد يعدي وهظبط 15 يوم اجازة
نورتني ياكبير
---هنونة----
ربنا يخليكي يا هنونة ودايما كده تنوريني علطول
تحياتي
محمد سمير
كان الله في عونك
وشفى الله زوجتك
تحياتي
ازيك يا ابو سمرة اخبارك ايه
انا قلت طالما مش بتسأل أسأل انا بقى وخلاص
اخبارك عامل ايه يا رب تكون تمام
أولا
بالنسبة للمشاكل قول الحمد الله انها عدت على خير وألف سلامة للمدام
ثانيا
هتقولى بقى ان دى الفيلا بتاعتك اللى فى الغردقة آه انا عارفها
وبعدين ايه حكاية مجلة الشبكة دى انت لسه مراهق ولا ايه
;)
ثالثا
بورسعيد
حبيبي يا ابو أحمد والله
البلد دى جامده بجد وجوها تمام اوى
مش عراف اتكلم لانى مش
مش مهم
إسأل علينا
من دلوقتي
لو سمحت
حضرتك مطالب من جميل شجرات الليمون وازهارها انك تديني تفصيل عن الاماكن الي حتزورها او مازرتحاش عشان ضيق الوقت
اصلي كمان نفسي اروح هناك من المدونات
بس اصدقائي بيقولو حتروحي تعملي اي مفيهاش حاجة
وانا مصرة اروح هناك
هم عاوزين يروحو اسوان والأقصر
عاوز مساعدتك في اقناعهم اننا نروح بورسعيد
تحياتي واتمنى لك و لزوجتك الاستمتاع في الأجازة
وعلى فكرة كل البولجرية البورسعيدية سلام جامد ليهم
اجازة سعيدة يا باشا
وفعلا يازين ما اخترت مكان
بورسعيد بلد جميلة
بس امانة عليك سلم لى على النورس البحر والسينما اقولك سلامى لو سعيد كلها
اجازة سعيدة ان شاء الله
انا في الاجازة ببقى سعيدة اني مش هظبط المنبه وهصحى لما احس اني عايزة اصحى
الاجازات جميلة بس بعد ما نتعب ونجتهد في الشغل علشان نحس ان الراحة ليها طعم
تحياتي
اجازة سعيدة
منور المينا و طرح البحــر والجمهوريــة
والنورس
اتمشى على دليسبس بقى
ومتنساش الايس كريم
هههههه
اختيار حلو والله بورسعيد دى عسل
Post a Comment