التلاتة جيم

الجيل الثالث دخل مصر يارجالة
مهما اختلفت وجهات النظر لاشك ان مصر بتشهد انطلاقة قوية في مجال الاتصالات, وبالاخص اتصالات التليفون المحمول والاتصالات اللاسلكية عموما واهمها في الوقت الحالي هو الجيل التالت, ناس كتير شايفين ان الجيل التالت ده مضيعة للوقت والفلوس وفساد للاخلاق وان مالوش لازمة من الاخر, لكن الحقيقة ان ده مش صح وان كون بعض الناس بتستغل التكنلوجيا وخصوصا في الاتصالات استغلال سيء فده عمره ما كان ذنب التكنلوجي ديه ولا ذنب الناس اللي هتستفيد بيها وتستخدمها صح.
لو بصينا على الجيل التالت هنلاقي ان في خدمات جامده جدا احنا كسبناها كالاتي
اولا:- سرعة الداتا كونيكشين (الانترنت) اللي بقى زي الدي اس ال اللي في البيت ان لم يكن اسرع مرتين منه في اماكن كتير ودي انا شايفها اهم ميزة وهتفيد ناس كتير كفاية انك تكون متصل بالانترنت في كل مكان تروحوه وبسرعة ممكن توصل ل 2 ميجا, وان كانت غالية دلوقتي بكرة هترخص (انتوا فاكرين الدي اس ال اول مانزل كان بكام ودلوقتي بكام).
ثانيا:- الفيديو كول:- ودي اكتر واحده الناس بتهاجمها عشان استخدامتها اللي ربما تكون غير نظيفة بس دا مش ذنبي انا – انا واحد مسافر وعايز اشوف بنتي واكلمها او اطمن علي والدي واشوف ضحكته- زي مافي ناس هتستخدمها وحش ناس كتير اوي هتاحتجها
ثالثا:- الموبيل تي في:- التلفزيون ع الموبيل ودي خدمة ترفيهية ومن الاخر هي فرد عضلات-اذا كان السيستم الجديد يسمحلي اني ارسل اشارة التلفزيون ع الموبيل ليه ماعملهاش وخصوصا لو الجودة والستريمينج بتاعها ممتاز- وان كانت سعات بتزنق وتقول يااااه لو كان ممكن اشوف الماتش دلوقتي ( دلوقتي بقة ممكن تشوفه )
رابعا : الداونلود بتاع الاغاني والفيديو من الواب بقى اسرع بمراحل

ده غير تطور كبير في جودة الصوت والتغطية وحاجات تانية فنية كتير اوي (بالمناسبة وكمان ممكن يحدد مكانك بطريقة ادق واحسن لو حب يتقبض عليك يعني او تضرب بصاروخ موجه زي بتوع حماس).
ياجماعة ده شيء جميل اوي اوي...انت فاكر اول مرة الموبيل ظهر..دي الناس قالت القيامة هتقوم..حتة حديدة في جيبك بتكلم فيها وتقول الو..دلوقتي بقت كل المميزات دي فيها في نفس حتة الحديدة...انت متخيل يعني ايه التلفزيون يبقى عالموبيل ولا ان الانترنت يكون بالسرعة العالية ديه..دا كمان الجيل التالت..انا متوقع ان الجيل الرابع يدخل كمان خمس سنين او يمكن اقل وان كان الجيل التالت هو التطور الطبيعي للجيل التاني ف الجيل الرابع هو التطور الفظيع للاتصالات كلها ده سرعة الانترنت فيه هتبقى 14 ميجا يعني اسرع 7 مرات من اسرع انترنت موجود في مصر وايه التغطية بتاعته هتبقى على مساحات شاسعة تتحرك فيها براحتك من غير النت مايلعب ولا يقطع وساعتها سلملي على الدي اس ال وعلى الجيل التالت كمان

انا عارف ان ربما تكون ميزانية البيت المصري ماتقدرش تستحمل الكلام ده بس مش معنى كده ان احنا نهمله او نتجاهله او نقول انه كلام فاضي, لا الحل اننا نستخدمه صح وعلى حسب احتياجنا ليه وقدرتنا عليه وخصوصا لو كان حاجة جميلة اوي كده وابداع في مجال كلنا محتاجينه في عصرنا ده- عصر الاتصالات

وياتري انت ايه رأيك؟ هل الجيل التالت ده كنا محتاجينه ولا مالوش لازمة؟