انا اسمي محمد
معايا موبايل نوكيا
هتساعدني؟
ء
دا كان ملخص الحالة اللي وصلتلها من شهر
من يوم ماقلت يا موبايل وانا نوكياوي
نوكياوي متحمس
غيرت خمس موبايلات نوكيا
وكمان جربت سامسونج
الوان بقا وحركات
بس رجعت للطريق القويم
سامسونج دا مش بتاع رجالة ياعم
دا عايز شنطة بناتي يتشال فيها
الحقيقة انا عمري ما اشتكيت من نوكيا قبل كده
رغم اني بفحت التليفون اللي معايا
بحب استخدم كل امكانياته
كل حاجة
مكالمات..كاميرا..انترنت
كالندر..شات...برامج خاصة بشبكة المحمول
بص كل حاجة في الموبايل
لغاية ما اشتغل الجيل التالت
من ساعتها وانا بعاني
الموبايل اللي معايا بقا بطيييييييييء
وبيهنج وبيوقع شبكة وبيعمل ريستارت كده مع نفسه
ومبقاش يسعفني
اصل انا اوقات كتير بتوحد مع الموبايل وبعيش انا وهو وبس
سعات بحس انه كائن حي عايش معايا وبيني وبينه اسرار محدش يعرفها
بس اخر واحد ده تعبني نفسيا
بقيت عايز اكسره وهو لسه مكملش 3 شهور معايا
وسألت اصحابي وزمايلي وبجد كله اشتكى
ومن هنا بدأت الفكرة
وكبرت وتشعبت وانتشرت
وبعد تردد كتير اخدت القرار اخيرا
لازم اكسر القيود النوكياوية
وفعلا بعد بحث وسؤال وتجربة ولف ودوران
قررت اجيب سوني اريكسون
والحقيقة اني بحمد ربنا ع الاختيار ده
بقاله معايا شهر دلوقتي تقريبا
مش فاضي استكشفه كله وان كنت بدعبس فيه كل لما افضى
بس كل يوم بكتشف فيه حاجة جديدة تبهرني
التليفون ما شاء الله سمارت اوي
لما بفكر في حاجة بلاقيها
وساعات الاقي حاجة تخليني ممتن جدا للي صمم الموبايل ده
سريع الي حد كبير..الكاميرا بتاعته تحفة
very very very SMART
والغريب ان في هجرة غريبة شفتها لتليفونات سوني اريكسون
كله فعلا بيشتكي من نوكيا
او قطاع كبير من الناس...ملحوظ اوي
وكل ده بعد دخول الجيل التالت
نوكيا شركة محترمة وضخمة واسمها ليه وزن
واعتقد انها هتتلافى الموضوع ده في الاجهزة الجديدة
ومع ذلك انا ممتن جدا للفترة اللي قضيتها كعميل لنوكيا
التليفونات كلها -عدا اخر واحد- عمرها ماخذلتني
بالعكس يمكن اقول انها ساعات كانت بتحس بيا
انا قضيت فترات كبيرة ياجماعة لوحدي في بلاد غريبة وفي اماكن اغرب
كان الموبايل هو سلوتي بجد
ولكن هكذا الدنيا
C'EST LA VIE
من نوكياوي قديم
اهلا وسهلا سوني اريكسون
29 comments:
محمد
إزيك ؟؟؟
أنا نوكياوية
زي فودافونية
زي بالظبط كده أهلاوية
never ever
أفكر أغير نوكيا
مع إنها مش مسعفة فعلا
بس أ،ا أصلي بحب الانتماء
و فعلا موبايلي ده صديقي الصدوق
الوحيد اللي بيستحملني
تحياتي على قرارك المصيري
و الحاسم
منى المحمودي
يا دماغك العالية
بس فعلا بحييك علي اختيارك الجديد
:))
انا متعملتش مع الايريكسون الا زماااااااااااان ايام مكان 688 ده عجبه
و من يومها و انا بستعمل نوكيا و كان معايا جهاز نوكيا من كام شهر
6630
قعد معايا سنه جبلي شلل نصفي
و غيرته و جبت نوكيا برو بس الحمدلله كويس اهه ربنا يهديه
بس فعلا السوفت وير بتاع التليفونات النوكيا لطيف جدا
مفيش احسن حاليا من سوني اريكسون انا بكره النوكيا من زمان بس فعلا السوني اريكسون بقى من افضلب الموبايلات حاليا
لا انا انا باه نوكياوية متعصبة
أنا شاكه فيك أنت بتشتغل في التسويق
انا بقى نوكياويةقديمة ههههههههههههه
بصراحة نوكيا دى مستحملانى
ومافكرتش اغير موبايلى عارف ليه
باحس انه ذى صديقى حاجة كدة منى
مش عارفة ليه ما بقدرش اغير او ابدل
حاجتى بسهولة باحس بانتماء
غريب ليها اوى ولو اضطريت اغير تليفونى مثلا
تلاقيه واحشنى وحاسة بغربة فظيعة
مع موبايلى الجديد
بس سونى اريكسون برضوا من افضل الموديلات جميل
بس اوعى تكون بتعمل اعلان عنه
محمد دى دعاية ولا ايه
اعترف
ههههههه
عارف كنت زيك
وكنت مش سايبة موبايل بحالو لازم اعرف اخر حاجة نزلت وفي كل الانواع
مش معقولة تكون في شركة موبيلات وماتعرفش الابوشنز الي في
وتصور حد يسئلك وتقولو لاء مش بعرف الا على نوع واحد
بس بعد ماسيبت الشركة حسيت الموضوع ولا بهميني
المهم موبايل بيشتغل وبيقول اللللللللللو ويقفل وبس
مش اكثر
ماعلينا بس على موضوع نوكيا
مرة واحد مصري عندنا في الاردن كلم شركة الموبايلات وسئل زميلتي عندي مشكلة في الموبايل
فسئلنا طب هو موبايلك نوع اي
قام قال مش عارف
طب ممكن لو سمحت توصفهولي
المهم طال الموضوع في الاخير طلبنا منو يحاول ان يقرئ الاسم المكتوب على الجهاز
قام قال نوجا
اي قلت اي
قال مكتوب على الموبايل نوجا
هههههههههههههههههههههههه
يقصد نوكيا
:)
عمرى مفكرت كده
مش مهم نوع الموبايل ايه
المهم انك تستريح وانت بين اديه
:D
السلام عليكم
ازيك يا محمد عامل ايه
بصراحة انا بحييك على تغييرك لموبايلك
دا لاني مقتنع ان نوكيا اصبحت شركة فاشلة
تستسهل وبس
انا بقالي سنتين وشوية لم اشتري جهاز نوكيا واحد
استعملت سامسنج شوية وسوني اريكسون حبة وعلى فكرة
دا جهاز ممتاز وقوي جدا
وبعدين نقلت على البوكت بي سي
ومن ساعتها وانا معاهم لاهم سابوني ولا انا سبتهم
ومريحني على الاخر والحمد لله
مبروك على الجاهز واتمنى الكل يغير بجد
في اجهزة كتير احلى من نوكيا وبامكانيات اكتر
تحياتي
بس السونى اريكسون مشكلته فى الصيانه
ونفسى نصنع موبايل مصرى هيبقى تحفه وهنستحمله والله
بس بجد قرار التغيير من نوكيا صعب جدااا انا مش عارف ابطل سجاير ولا ابطل نوكيا
تحياتى
السلام عليكم
انت كده خرجت من الملة ويقام عليك الحد
وياخذ بهاتفك السوني اريكسون ويكسر
عبرة لمن بعدك
:)
يا عم الحكاية مش مستاهلة
التجريب حلو برده
وسونى اريكسون مش وحش بالعكس كويس جدا
وبعدين انت كده ممكن لو عجبتك العدة دى مش ترجع اتنى لنوكيا
صح ولا ايه
يالله ياعم مبروك على اريكسون على الرغم انا لا احب الموبايل وانا لغاية اليوم لا استعمله مش عارف ليه
تحياتى
والله شجعتنى انى اغير انا كمان لسونى اريكسون
رغم انى مبعرفش اتعامل الا مع نوكيا لانى مشلتش غيره
بس اهى تجربه
انا اعرف ان سونى اريكسون ده معقد شوية وبعدين الغربال الجديد له شدة او كل حاجة فى اولها حلوة يمكن اما تدخل جواه اكتر تكتشف حاجات تانية وتغير رأيك انا شخصيامعايا نوكيا ومش بحب اغير النوع هو سهل وسلس وتحس انه قريب ومش غريب ... تحياتى
---وحدانية---
منوراني يامنى بعد طول غياب
ولو اني عارف اني انا اللي غايب عنك ومازرتكيش بقالي كتير
انا كمان كنت نوكياوي جامد..ومنكرش ان نوكيا فعلا جامدة جدا وليها ذكريات حلوة معايا
بس التغيير حلو بردو
ع العموم هنشوف بكره في ايه
نورتيني يا منى
---مندهش---
يامزاجك العالي ياباشا
نورتني
: ) : )
---كوكو---
ماهو ايكسون ماتعدلش الا لما عمل ميرج مع سوني وبقا سوني اريكسون
وفعلا كل لاصدارات بعد الجيل التالت بقت فعلا جامدة جدا وكمان السوفت وير بقا منافس لنوكيا
جربي كده
---محمد صبحي----
متفق معاك الى حد كبير ياباشا
---عاليا حليم---
معلش ياعم
السماح والنبي
: ): )
منوراني دايما ياعاليا
---مكسوفة---
من احلامي والله يامكسوفة احتراف التسويق
---هنا----
انا بردو كنت كده ياهنا
لقرار كان صعب بصراحة اني اغير من نوكيا لسوني اريكسون
على الرغم من تغيري للموبايل كذا مرة قبل كده الا ان نوكيا مع اختلاف اصداراتها تحس انها هي هي
س انا مبسوط بالتغيير صراحة
نورتيني
---ليموناده----
انا بصراحة مش كده خالص ياليمو
ولا عمري كنت بجري ورا الموديلات المختلفة واوقات كتير مبعرفش التليفونات موديلاتها ايه
بس لما كنت احب اغير التليفون..وقتها كنت بركز في اللي موجود في السوق وبما يتوافق مع امكانياتي
انما جنان الموبايل والتغيير دا مش عندي الصراحة
نورتيني ياليمو ونعنشتيني بالزيارة الجامدة دي
----محمد عبد الغفار----
جرب المرة دي
---الام وامال----
حكمة بردو
: ): )
---احمد الحسيني----
باشا نورتني والله
بقالك كتير مش بتزورني
بس انت جبت من الاخر
نوكيا بقت بتستسهل فعلا...كل الموديلات بقت نفس السوفت وير والانترفيس
بصراحة انا سوني اركسون عجبني اوي واكتر حاجة عجباني فيه انه فعلا سمارت جدا
وياسيدي الله يبارك فيك
نورتني
---ضد الظلم---
ياباشا ربنا مايحوجنا للصيانة ابدا
اما بخصوص الموبايل المصري...فانا ابشرك ان احنا الحمد لله قربنا
لسه مصنعين اول استيكة مصرية قريب
----ناني----
بيقولك المصريين بياكلوا ويشربوا ويشيلوا نوكيا
خرجنا عن العادت والتقاليد اهوه
---شاب مصري مفروس---
ياباشا اهلا وسهلا في اول زيارة
كلامك تمام التمام
بس زي ماقلت انا برتبط بالموبايل شويه عشان كده حته التغيير دي كانت صعبة بالنسبة لي
نورني ياباشا
---د.هيما---
معقولة
طب دا كلام
لا شك انه بقا ضرورة
الواقع فرض ان الموبايل يبقى ضرورة
بس احييك على صمودك
---رينا----
ياااااااااااااااااااااااااااااااه
فينك من زمان يارينا\اخبارك ايه
يارب تكوني كبسوطة
السوفت وير بتاع سوني اريكسون حلو اوي
جربي ومش هتندمي
نورتيني
---بوسي كات---
منوراني يابوس
والله سه كنت بقول هي فين انا هاروح اسأل عليها
والله انا كنت فاكر زيك كده بس زي مابقول اصدارات السوني اريكسون بعد الجيل التالت بقت تحفه اوي وفعلا السوفت وير بقى سمارت جدا
جربي كده قولي رأيك
نورتيني يابوسي
تحياتي
محمد سمير
هو احنا ممكن نبقى اصحاب
هو التغيير عموما بشكل عام حلو
اوزيك يا محمد
فينك؟
مبروك على النوبيل الجديد
تحياتى
ميت مرة انا اقولك يا ابوسمير راعي اخواتك الغلابة وبلاش تتعمق في التكنولوجيا الحديثة قاعدة بقرا البوست وانا متنحة اقولك ايه يعني يالا روح ربنا يخليك فروحة ويكرمك فيها
محمد يا صديقي
بالفعل كلماتك تكاد تجد صدى في عقلي
اعاني ايضا مع نوكيا من عدة مشاكل ثقيلة الظل
اتمنى ان الحق بك يوما في ركاب السوني اريكسون
تحياتي
الموضوع كلة حاسس انة اعلان
هههههههههههههه
شكلك كدة بتروج للمنتج يا معلم
عموما انا بحب جدااا الاي ميت
i-mate pda2k
جرب دة يا عم وانت هتنسي السوني والنوكيا
وهتبقي اي ميتاوي
شئ رهيب بقالي اربع سنين معاه ومتناسب جداا مع اللاب توب احطة علي القاعدة يشحن وياخد البيانات ويعمل كل حاجة لوحدة
ولما افرمتة بيرجع كل حاجة من الكمبيوتر زي ما كانت
هحكيلك اية ولا ااية
اكتب الموديل علي جوجل وشوف
----السيد شبل---
ليا الشرف ياباشا
بس مش نتعرف الاول
---هنا--
اكيد
--رانيا--
الله يبارك فيكي يارانيا
غقبى لك
---قلوب حائرة----
غلابة ايه بس يابيبو
واحنا هنيجي جنبك فين بس
وتكنولوجيا ايه بس..انا بقولك الموبيل بطىء
صباح الفل
---صاحب البوابة---
العزيز مصطفى
منورني
توكل على الله وجرب سوني اريكسون
مش هتندم
---كراكيب عادل---
فنانا العزيز
لا ياباشا مش اعلان ولا حاجة
هو انا فاهم وجهة نظرك ياباشا
وخصوصا ان السوني اريكسون اللي جبته فيه كتير من ال اي مييت مع اختلاف نظام التشغيل من ويندوز لسيمبيان
انا الموديل اللي جايبه
P1
شوفه وقولي رأيك
تحياتي
محمد سمير
انا كمان يا سمسم فاضل يومين بالعدد و ابقي من مقتني سوني ايريكسون
علي فكرة هو الي خلاه سبق ان عدي بفترة المشاكل و البجز
errors we bugs
كلها عدت عليه في الفترة الي كان نوكيا فيها مكتسح و طور نفسه و تلافي كتير من مشاكله
تقدر نقول انها فترات ازدهار و اندثار وصعود و هبوط
ولو مفيش منافسه مش هيتطوروا
كمان نوكيا ايقاعها في اصدار موديلات سريع اما سوني ايريكسون بتتحرك بمعدل سرعة اقل
ممكن يكون السبب ده يخلي نوكيا مش بتدرس الموديلات كما ينبغي
نهاز
it is true , samsung is soo femina : ), 4 ladies like me : )
nokia "freindly use 4 ediates "
sony ericson is the best of the best cream de la cream, it is very suficated and truely still simple
i was sony ericson when it started the mirge : ) tell the last year , 3shan someone brought me samsoung as a gift and i ma sentemental fool so i kept samsoung :)
nice blog , nice dude blogin
---نهاز---
مبروك عليك ياباشا ولو انها جت متاخرة شوية
السوني اريكسون هو اللي بقا ممتاز دلوقتي اكتر من النوكيا
نورتني
---ايمان---
الساميونج بناتي اوي يا ايمان على رأيك
انا عاجبني بس مايمشيش معاي للاسف
بس بجد بقيت معجب جدا بالسوني اريكسون...سمارت اوي وحتى ال
state of art
بتاعه حلو
نورتيني
محمد سمير
يا استاذ نوكياوى ..هو الموبايل ال سونى اريكسسون اللى انت جبته نوعه ايه ؟ لان أنا معايا سامسونج e250( وبقالى 4 سنين ماشيه مع السامسونج) و وجدت أن اللى معايا ده خانقنى لأنه مافيهوش ويب وما بدخلهوش برامج ونفسى أجرب نوكيا ووجدت الناس بتشتكى منه لأنه بيهنج وبيفصل.....فيا ريت تقولولى ايه أفضل نوع أجيبه و يكون فى حدود 1000 جنية مصرى.......
و تحيا مصر
Post a Comment