صباح الورد والفل والياسمين والجمال والاشراق...يوم شم النسيم بيكون يوم جميل اوي عندي....بيكون عندي احساس فعلا ان الدنيا ربيع والجو بديع وبشوف الزهور متفتحه والشمس ساطعة وحتلى الاشجار بيكون ليها شكل تاني...طب وليه لأ ماهو اليوم يومها...طبعا الاحساس دا والشعور دا نسبي بيختلف من واحد للتاني وربما من يوم للتاني بس مين قال ان الحياة كلها مش نسبية...كل واحد بيشوف الدنيا بنظرته هو وبيعيشها زي مابيحب يعيشها...المهم نرجع لموضوعنا....اتعودت يوم شم النسيم اصحي بدري وانزل اتفرج ع الشوارع والكورنيش والناس اللي خارجة طمعانة في فسحة وضحكة ولمة حلوة تشيل شوية من هم الدنيا وصعوبتها وخصوصا في ايامنا دي....
بحب اوي اتفرج ع الناس....على طول كورنيش النيل من شبرا ولغاية ميدان التحرير الناس هنا وهناك..مابين مراكب ومراسي وناس فارشة ع الارض تفطر واطفال بيلعبوا بالكرة او نط الحبل....لو قربت شوية تلاقيه واحد وزوجته وولادهم وممكن كمان تلاقي الجدود قاعدين يتكلموا ويحكوا...لو قربت شوية اكتر تشوف الفرحة في العيون بفسحة بسيطة ماتكلفش حاجة بس فرحتها بتبقى كبيرة اوي...مش يمكن الفرحة دي هي اللي بتنعكس ع الشجر والسما والميه وتخلي اليوم دا فعلا مشرق وجميل...والله ممكن
والله اهل مصر دول غلابة اوي...مابين رحى الحياة الناس بتعافر عشان تعيش وبتشقى عشان تعيش والواحد مهما كان في نعمة كبيرة اوي اوي من ربنا لازم يحمد الله عليها في كل وقت وحين
قبل الجواز كانت ماما بتصحينا الصبح انا واخواتي يوم شم النسيم بطرقة غريبة جدا...تبقى نايم بتحلم حلم جميل وتصحى على بصلة محطوطة على وشك...تصحى ع الريحة...ماعرفش ايه المزاج ده بس واضح ان جدتي كانت بتعملهم كده...المهم بعدها كنا ننزل مع بابا ونلف اللفة اللي بحكيلكوا عليها دي....ونرجع سريعا سريعا عشان يجيلنا خالو بقا وعمو واصحابنا وقريبنا ونضرب في الفسيخ والرنجة... وبيكون يوم حلو اوى...
يلا..انا حبيت بس احكي وافضفض شوية...:)
كل سنة وانتم طيبين وكل "شم نسيم" وانتم بخير وفرحانين ومبسوطين وللرنجة جايبين وللفسيخ مش واكلين عشان تبقوا كويسين
7 comments:
كل سنه وانت طيب ويارب كل أيامك تبقى فرح وهنا وسرور
فينك من زماااااااااااااااااااان
تحياتى
انت فين وبتغيب قوى كدة لية
عموما كل شم نسيم وانت بالف خير ومتغبشى تانى
---بسبس---
ازيك يابسمة ليكي وحشة والله
انا موجود الحمد لله
كل سنة وانتي طيبة
---ايوية----
شبرا واهل شبرا
اخبارك ايه؟؟
معليشي بقا الدنيا ومشاغلها
كل سنة وانتي طيبة
ياااه انا مكسوفة اوى داخلة أقول كل سنة و إنت طيب متاخر
:)
صباح الخير
فين الجديد
Post a Comment