Thursday, July 31, 2008

قلة ادب


كنت دايما وانا صغير باسمع شتايم في الشارع...كنت ببقى عايز اعرف معنى الشتايم دي...عمري ماجربت اقولها او انطقها او اني اهين بيها حد...عيب
بس مكانش عيب ابدا اني احاول اعرف معناها وخصوصا ان احنا كمصريين عندنا قدرة غريبة في تلوين الكلام واستنباط الفاظ جديدة وشتايم غريبة
والحقيقة اني لما كبرت وشفت الدنيا واديني ماشي فيها بشوف واتعلم عرفت ان الشتايم والالفاظ دي مش دايما عيب
لأ ساعات بتتقال في موضعها وبتكون مطلوبة جدا لتوصيل معنى واقعي او تفريغ انفعال ووقتها عمرها ماتبقى قلة ادب

يعني لما اتفرج على محامي ممدوح اسماعيل وهو بيتكلم في العاشرة مساء واعلق عليه...دي عمرها ما تبقى قلة ادب
ولما اتفرج على اي مسئول حكومي او وزير بيتكلم عن التنمية ورغد العيش والمواطن المصري واقول رأيي...دي عمرها ماتبقى قلة ادب
ولما الناس كلها ميبقلهاش سيرة غير سبوبة الاسعاف...قصدي شنطة الاسعاف وارد واتكلم...دي عمرها ماتبقى قلة ادب
لما الثانوية العامة يحصل فيها كل اللي حصل والوزير يفضل في مكانه يبقى وقتها الكلام عمره مايبقى قلة ادب
لما الاعلام الحكومي يتكلم عن الطفرة التكنولوجية اللي هتظهر في شوارع مصر بعد تطبيق قانون المرور الجديد يبقى تعليقي وقتها عمره مايكون قلة ادب
لما الحكومة تأكد على توافر بنزين 80 في الاسواق يبقى الرد ساعتها عمره مايكون قلة ادب
لما يطلع احمد الهوان (جمعه الشوان) اليومين اللي فاتوا ويقول انا كنت متجوز سعاد حسني عرفي...يبقى لما اشتم ساعتها متبقاش قلة ادب
وغيرهم كتييير اوي
ياترى انا عندي حق ولا لأ؟

24 comments:

Mercy Devil said...

ومين قال انك لما تعمل كده فى ممدوح اسماعيل ولا حتى الريس نفسه تبقى قلة أدب ؟
قلة الادب بجد انت تشاهد مجلس الشعب وهم بيقولو ا موافقون هههههههه او وهم نايمين اثناء الاجتماع والله الله على اللى بيأزأز لب آه أكيد كان سوبر ومش اى لب
قلة الادب انك تتفرج عليهم وهما نيمين فى المجلس ولا ايه رايك ؟

عروس البحر said...

ايوا طبعا عندك حق في تعبير الرأي
و مش قلة ادب مصر بقت(فوضي) تحياتي
عروس البحر

Nohaz said...

اشمعني صورة فيلم دبور
بتلمح لاية يا سمسم


همم ساعات بتبقي لازم قلة ادب

Mkjwe said...

أبداً ... عندك حق ... والأنسان من طبعه عمره ما كان قليل أدب نفسه ... بس تصدق كلامك صح
تحياتي وأحترماتي

محمد عبد الغفار said...

ناس كتير تتبنى منطقك ولا استسيغه

فكل اناء يضنح بما فيه وكل واحد بقى واللى جواه

aya said...

عندك ميت الف حق

لما تشوف مناظر الولاد والبنات فى الشارع وتعلق متبقاش قلة ادب

لما تسمع كلام ميتقالش من شباب بيقولوه لاى حاجة مؤنثة ماشية فى الشارع وتسمعهم كلمتين متبقاش قلة ادب

لما تركب مواصلات عامة وتشوف فيها اللى عمرك شوفته وتعلق متبقاش قلة ادب

لما تتصور الكليبات كلها فى اوض النوم وتعلق عليها برضه متبقاش قلة ادب

داحنا كده اللى اخترعنا الادب

ادب ايه فى بلاد سياستها قلة ادب

عندك حق
ومهياش قلة ادب

Rania Lelah said...

مش بقله الادب
هنطلع شحنه الحزن الى جوانا
و لا بقله الادب هنرجع حقوق الناس المنهوبه
و لا بقله الادب
هنعرف نرتاح مع حكام و ناس بيمصوا دمنا كل يوم و بيموتوا منا الالوف
مش بقله الادب هنقدر نعمل حاجة

تحياتى

bastokka طهقانة said...

متبقاش قلة ادب
بس اية علاقة الصورة بالموضوع؟
يمكن علشان انا مشفتش الفيلم مش فاهمة


اوروفوار

ماء تشرين said...

لا عادى بس عشان بابا ميزعلش من بابا عارفو طبعا !! بس
تحياتى

البنت الشقيه said...

عندك حق اوووووووووووى
دا الى بيحصل فى مصر دلوقتى لازم تقتل الانسان ده بيتكلم وبرضه هيبقى حلال فيه من كتر المصايب الى احنا فيها يمكن انا المواضيع الى بتحصل مش تخصنى اوى لاكن موضوع الثانويه العامه هيه بجد هيه الى بتهبلنى ومصر والى من بره مصر الى عندو دم شتم يومالامتحان والنتائج يعنى مش حرام لما الواحده تكون جايبه فى 2 ثانوى 98 فى الميه ولماتدخل 3 يكون مجموعها الكلى 85 فى الميه مش حرام

صدقنى الشتايم دى بقت زى الكلام الى بنعبر بيه عن الى جوانا
ولك الف تحيه


البنت الشقيه
لولو

Desert cat said...

ومازال مسلسل قلة الادب مستمتر
بداءا من قطار الصعيد مرورا بمسرح بنى سويف
وعبارة السلام ورغيف العيش
هو انا هعد ايه ولا ايه
ده المدونة كدا مش هتكفى
حقيقى منتهى قلة الادب
تحياتى

AHMED SAMIR said...

انت ممكن تختصر البوست دة يا محمد وتقول للمجتمع على رأي احمد مكي في فيلمه الجديد اتش دبوووور
ايه-سفن-ايه
والحدق او اللي مش حدق يفهم
تحياتي

Anonymous said...

http://ayzaatalaمهما الكلام اليى بيقولوه اصلا عيب يتقال يعنى محامى ممدوح اسماعيل ولاا واحد يقول على واحده ماتت انه كان متجوزها مهى كانت عايشه مع احترامى الشديد لبطولاتك مقولتش ليه ...المهم انا مودى فى النازل والبوست ده خلاه انزل وانزل ..ده عنوان مدونتى ابقى شرفنى بس متخفش مش فيها اى عيب ان شاء الله http://ayzaatalawa.blogspot.com/ فى رعاية الله وامنه..

رينـــــــــــا said...

والله هى حتى لو كانت قله ادب
اللى بيحصل فينا يخلى قله الادب من الادب فى التعبير عن أرائنا

فهمت حاجة؟

Unknown said...

والله عندك حق الى بيحصل دلوقتى يخلى الملاك يشتم فما بالك البشر
تحياتى

Anonymous said...

فينك من زمان مختفى لية

؟؟؟؟؟؟؟؟؟؟؟؟؟؟؟

Unknown said...

كل سنة و أنت طيب يا محمد و أسرتك الكريمة بخير

لا ما تبقاش قلة أدب
بس خليها أنفعال راقي بعيد عن الألفاظ البذيئة

Unknown said...

لكل أحبائي المدونين أرجوا زيارتي للتعرف علي تفاصيل أفطار جماعي

جــوهـــــــري said...

عندك حق فعلا قلت الأدب بقت موجوده بغزاره في مصر بس الفرق إننا مش بنقتدي بقلت الأدب دي خالص الإحترام والأخلاق صفة الأنبياء ونحن بهم نقتدي وشكرا عالموضوع

kafrawy said...

عندك حق يا كبييييييير

ع فكرة

انا فودافون و موبينيل و اتصالات
و اللى نزل و اللى منزلش ...

و رمضان كريم
و كل سنه و انت طيب

hana said...

عندك حق طبعااا
ومين يقدر يقول غير كدة

كل سنه وانت طيب
ورمضاان كريم

Dr. Ibrahim said...

ان محصلش اللى انت عملته ده يبقى هو ده قلة الأأدب :)

د/هيما

Unknown said...

التدوين افتقدك والله يا اخى العزيز

Unknown said...

عندك حق طبعا و عمرها ما حتكون قلة ادب