حلم طالب ثانوي

لما دخلت ثانوية عامة كان لازم اختار اللغة التانية مع الانجليزي...الالماني او الفرنسي او الاسباني...بعد السؤال والاستفسار والمقارنات الكل اجمع على ان الالماني هو الاسهل ككلمات وقواعد ونطق وكمان امتحانات...بس انا كنت بحب برج ايفل !!!! كنت بحب الكلام الفرنسي واللدغة الفرنسي...كنت بحب بونجور و اوروفوار وبونسوار...اخترت دراسة اللغة الفرنسية....وذاكرتها عن حب فعلا وجبت فيها اعلى الدرجات وتطور الامر في تاية ثانوي اني كنت بتكلم مع المدرس بتاعي بالفرنسية ( طبعا مش بطلاقة ) انا اقصد اني مخدتهاش كمادة دراسية انجح فيها لأ انا خدتها كلغة..وفي الصيف التحقت بالمركز الثقافي الفرنسي كنت بروح 4 ايام في الاسبوع بردو لم اكتفي بالحصص..كنت بروح المكتبة الصوتية واشغل شرايط وفيديوهات...جبت كتاب بيتكلم عن فرنسا...كان كتب موجه للطلبة اللي رايحين يدرسوا هناك وكان فيه كل حاجة من سعر ازازة الميه لغاية تأجير الشقق في باريس وضواحيها والمواصلات وتاريخ فرنسا..كل حاجة كل حاجة...كانت العملة ايامها الفرنك وكان الفرنك بخمسين قرش وازداد تعلقي بفرنسا وبزيارتها..حتى الخريطة جبتها عشان ابقى عارف نهر السين ماشي فين وايه المحافظات اللي حوالين باريس وايه وايه...والدي لما شافني كده عمل لي جواز سفر على اساس ان لو جت اي فرصة اني اسافر وانا طالب اكون جاهز..الحقيقة انه لا كان في فرصة ولا بتاع بس هو كان تشجيع من والدي وهو شايف تفكيري بالمنظر ده لغة فرنسي ومركز ثقافي ودراسة في باريس وحاجات كده...ومرت السنين وانشغلت في الهندسة وما ادراك ماهندسة عين شمس...وفاتت السنين وراحت اللغة والفرنك بقا يورو وجواز السفر صلاحيتة انتهت
بعد لما اشتغلت سافرت لدول ناطقة بالفرنسية واسترجعت جزء محترم من اللغة ومن مهارة النطق والتكلم بيها ودا شيء اسعدني جدا....وفي احدى السفريات نزلت ترانزيت في مطار شارل دي جول في باريس..كان الترانزيت لمدة خمس ساعات..انا اتذكر ان المكان اللي انا كنت فيه كان منه جزء بيبص على طريق سريع...انا كانت عينيا الخمس ساعات دول بتبص ع الطريق وع العربيات اللي ماشية وع الشارع..مكنتش متخيل اني موجود على ارض فرنسا حتى ولو كنت محبوس جوا المطار ومش قادر اخرج
السفر لفرنسا كان حلم حلمت بيه من تانية ثانوي..ودلوقتي وبعد 11 سنة يتحقق الحلم ده

غدا ان شاء الله اطير الي باريس