غمض عينيك

Coming-Soon

2010-10-22T15:44:00.004+02:00

Blog is Under Maintenance

Stay-Tuned

See You Soon

جايلك ياطاهرة

2009-10-15T16:58:00.003+02:00

غدا ان شاء الله

الي ارض الرجال

الي ارض النضال

الى الارض الطاهرة

لبنان

حد عايز حاجة من هيفا ولا رولا ولا اليسا او نانسي او الناس الكمل دول

انا في الخدمة يعني

Enjoy !

2009-10-09T14:37:00.002+02:00

Life is short, break the rules, forgive sooner, love with true love, laugh without control and always keep smiling. Maybe life is not the party that we were expecting, but in the mean time, we're here and we can still dance.....

لم يكن ليشرفنا

2009-09-28T15:51:00.004+02:00

لم يكن ينتظر مصر شرف كبير بتولي وزير ثقافتها لمنصب مدير عام اليونسكو.... والحق اني كنت اشفق على الوكالة من ان يكون مديرها هو الوزير الفنان....مش متخيلها الصراحة...نكتة.. .... واليونسكو اختصار لأسم "منظمة الامم المتحدة للتربية والعلوم والثقافة" واحنا بالصلاة ع النبي لا تربية ولا علم ولا ثقافة .... احنا نص كلامنا شتايم...والنص التانية الفاظ غير مفهومة...والعلم عندنا لا يكيل بالبتنجان

لم يكن الوزير الفنان خير من يمثلنا....لم يكن الوزير الفنان هو من يمكن ان يرفع شعار الحرية والثقافة وحوار الحضارات....لم يكن الوزير الفنان هو الصورة المثلى للمواطن العربي المسلم الذي
سينتصر للثقافة والتاريخ العربي ويفتح مجال تواصل ثقافي مع الغرب....لم يكن الوزير الفنان هو رمز الشرف الذي يجب ان يؤازره العرب والمصريين من قبلهم

ماذا يعرف عن المصريين؟ ماذا عن ثقافتهم ومستوى انفتاحهم؟

ماذا بعد 22 عاما وزيرا للثقافة ؟؟ ماهي الانجازات التي اتمها...طبعا غير لوحاته العبقرية..... صحيح......22 سنة في الوزارة..... مين حس بأيه؟...حد حس بخطة معينة لتطوير العقلية المصرية؟ او منظومة محددة وضعتها وزارة الثقافة للارتقاء بالذوق العام او التنوير الشعبي؟ حد شاف اي تعاون مثمر...وحط خط تحت كلمة مثمر دي... بين وزارة الثقافة ووزارة التربية والتعليم مثلا..كلها اجتماعات ولقاءات ومصافحات وشاي وقهوة وكل عام وانتم بخير...

اين انجازات وزارة الثقافة ووزير الثقافة في مصر طوال 22 عام؟

الوزير الفنان والذي فور خسارته اطلق تصريحات نارية من عينة...انا اكبر من المنصب...انا ضحية...العالم تأمر عليا....ومش عارف ايه...هما الخسرانين

نظرة سريعة الي موقعة الرسمي تجد استجداء مهين واعتذار صريح عما بدر منه من تصريحات بحرق الكتب الاسرائيلية ان وجدت في مكتبات المحروسة...

الموقع الرسمي لفاروق حسني

افهم ان يعتذر الشخص اقتناعا عن خطأه....افهم ان يعتذر احتراما وليس استجداء....

وليته كان اعتذارا فقط... بل لقد استدعى منه الامر الي التكفير عن خطأه في حق الاسرائيليين بأن يسمح بترجمة بعض الكتب العبرية الي العربية....مرة اخرى ليس من باب معرفة الاخر والحوار معه ولكن من باب الاعتذار وتكفير الذنب

بالاضافة لترميم المعابد اليهوديه و ودعوةقائد الاوركسترا الاسرائيلي لاوبرا القاهرة… دا غير الكلام اللي كان بيتقال عن ثروات اليهود المتروكة في مصر والتي تسعى اسرائيل لاستعادتها او اخذ التعويض عنها

تركيز مستفز على الاعتذار المباشر وغير المباشر والاستجداء للاسرائيلين من اجل المنصب حتى ولو اضطر لتهديد ثقافة شعب بأكمله من اجل تحقيق اهواء شخصية ومن اجل كرسي ومجد شخصي وبغض النظر عن مشاعر الشعب اللي المفروض ان سيادة الوزير موظف عنده

اما عن النسبة المرتفعة من الاصوات التي حاز عليها فأشك في مصدرها….. اشك وبشدة….. ملايين من الدولارات ممكن….اتفاقيات تحت الترابيزة اكيد…. ضمانات ومصالح احتمال كبير

فنحن لسنا بالدولة الصالحة التي تتعامل بشفافية ونضج سياسي واهداف استراتيجية وفي ظل هذة الاجواء لا اؤمن بوجود من يعمل للصالح العام

نظرة سريعة بردو على السيرة الذاتية للسيد ة ايرينا بوكوفا الفائزة وبمقارنتها بالسيرة الذاتية للوزير الفنان سنجد الفرق...الفرق بين قالب متجمد من 22 عاما و نشاط متجدد...وبالقياس على نظام كل دولة سنجد الفرق مفزع

من تكون ايرينا بوكوفا؟

على رأي احمد المسلماني... الوزير الفنان كان امامه المنصب...كانت امامه المصلحة...وكان الشعب من وراء ظهره

واذا ارتضينا الانهيار الثقافي فكفانا...ولنرفع ايدينا عن العالم ومؤسساته

بلا خيبة

واااكمبيوتراااه

2009-09-27T10:05:00.003+02:00

بين جنبات الليل و همس النجوم يجافيني النوم..افيق ليلا من نومي شارد الذهن شاخص البصر متذكرا كمبيوتري العزيز....فبينما انام على فراشي الوثير يرقد هو هناك على مكتب خشبي في ظلمات الاي تي ...يرقد وحيدا بين اكوام الاسلاك والسيديهات والهاردات...يرقد مفككا مفارقا للماوس وللشاحن وربما الهارد ديسك

ارجع بذاكرتي لفترة ليست بالقصيرة...حيث عملنا سويا وجمعتنا النجاحات والاخفاقات والضغوط...كمبيوتري العزيز...احسست به بطيئا في فتراته الاخيرة...احسست به ثقيلا وكأنه يحمل جبالا ولكني لم اقلق....فلقد اثقلت عليه كثيرا في الفترة الماضية ولكني كنت اثق في قدرته على التحمل...ولكن هيهات...لقد كانت شكوي ولكني لم افهم...كان يأن من الالم وكنت انا الجلاد حتى جاء يوم الاربعاء...سكت...همد...جمد

ولم ينطق ...لم اتمالك اعصابي وهرعت سريعا الي الاي تي...اغيثوني اغيثوني..ومن وقتها وهو يرقد هناك

كونسولتو من ثلاثة مهندسين يعمل على عودتة الي حالته الطبيعية....في كل مرة "اطمئن..اطمئن" ولكن دون جدوى فالجهاز يرفض الويندوز تماما...يرفض التحميل...اشك في انها غيبوبة....راحة اجبارية بعد عمل شاق...اخشى ان يتطور الامر الي عملية تغيير هارد ديسك...يقولون انها ليست بالخطيرة ولكنها ستحتاج استشارة خبراء من التوكيل

اخشى ان تكون اعراض انفلونزا الكمبيوتر

زرته اليوم في الاي تي ولكنهم رفضوا دخولي الى المكتب حيث يوجد...نظرت اليه من خلف الزجاج...كان صامتا في مكانه..وحيدا..بين انامل المهندسين مستسلما...احسست بنظرة الم وتعب

جررت قدمي الي مكتبي حيث اعمل على جهازي القديم الذي مازال الي الان يطاردني بنظرات الاتهام...لقد اهملتني حتى صرت قديما متهالكا وبطيئا وبينما اساعدك في اوقاتك العصيبة تتركني لتشتاق الي الجديد...ذلك الراقد هناك

وبين نظرات الالم ونظرات الاتهام اعمل منكبا بلا كلام

ازيكوا ازيكوا

2009-09-24T19:55:00.003+02:00

خدني الحنين بعد السنين جابني هنا

هنا للمكان ده الي تولد فيه حلمنا

وضحكنا فيه من قلبنا

هنا بلقى نفسي وروحي

هنا ببقى انا

راجع ماليني الشوق ولهفة قلبي دايب

ازيكوا ازيكوا

بقالي كتير ماجتش ولا عديت

محتاج اروق وانظم وارتب من جديد حاجات كتير

كل سنة وانتوا طيبيين ومعايا مكملين

صباح الفل..الدنيا ربيع

2009-04-22T15:02:00.001+02:00

صباح الورد والفل والياسمين والجمال والاشراق...يوم شم النسيم بيكون يوم جميل اوي عندي....بيكون عندي احساس فعلا ان الدنيا ربيع والجو بديع وبشوف الزهور متفتحه والشمس ساطعة وحتلى الاشجار بيكون ليها شكل تاني...طب وليه لأ ماهو اليوم يومها...طبعا الاحساس دا والشعور دا نسبي بيختلف من واحد للتاني وربما من يوم للتاني بس مين قال ان الحياة كلها مش نسبية...كل واحد بيشوف الدنيا بنظرته هو وبيعيشها زي مابيحب يعيشها...المهم نرجع لموضوعنا....اتعودت يوم شم النسيم اصحي بدري وانزل اتفرج ع الشوارع والكورنيش والناس اللي خارجة طمعانة في فسحة وضحكة ولمة حلوة تشيل شوية من هم الدنيا وصعوبتها وخصوصا في ايامنا دي....

بحب اوي اتفرج ع الناس....على طول كورنيش النيل من شبرا ولغاية ميدان التحرير الناس هنا وهناك..مابين مراكب ومراسي وناس فارشة ع الارض تفطر واطفال بيلعبوا بالكرة او نط الحبل....لو قربت شوية تلاقيه واحد وزوجته وولادهم وممكن كمان تلاقي الجدود قاعدين يتكلموا ويحكوا...لو قربت شوية اكتر تشوف الفرحة في العيون بفسحة بسيطة ماتكلفش حاجة بس فرحتها بتبقى كبيرة اوي...مش يمكن الفرحة دي هي اللي بتنعكس ع الشجر والسما والميه وتخلي اليوم دا فعلا مشرق وجميل...والله ممكن

والله اهل مصر دول غلابة اوي...مابين رحى الحياة الناس بتعافر عشان تعيش وبتشقى عشان تعيش والواحد مهما كان في نعمة كبيرة اوي اوي من ربنا لازم يحمد الله عليها في كل وقت وحين

قبل الجواز كانت ماما بتصحينا الصبح انا واخواتي يوم شم النسيم بطرقة غريبة جدا...تبقى نايم بتحلم حلم جميل وتصحى على بصلة محطوطة على وشك...تصحى ع الريحة...ماعرفش ايه المزاج ده بس واضح ان جدتي كانت بتعملهم كده...المهم بعدها كنا ننزل مع بابا ونلف اللفة اللي بحكيلكوا عليها دي....ونرجع سريعا سريعا عشان يجيلنا خالو بقا وعمو واصحابنا وقريبنا ونضرب في الفسيخ والرنجة... وبيكون يوم حلو اوى...

يلا..انا حبيت بس احكي وافضفض شوية...:)

كل سنة وانتم طيبين وكل "شم نسيم" وانتم بخير وفرحانين ومبسوطين وللرنجة جايبين وللفسيخ مش واكلين عشان تبقوا كويسين

ليه؟...اشمعنا احنا

2008-12-27T22:13:00.003+02:00

هو ليه العرب والمسلميين هما اكتر ناس مهانين

ليه العرب والمسلمين هما اكتر ناس فاشلين

ليه الفساد في كل صورة مش موجود غير في الدول العربية

ليه غياب الضمير والوصولية والواسطة والاهمال موجودين في اكبر صورهم في بلاد العرب

ليه فعلا الواحد بقا يتكسف لما يتقال عليه عربي

ليه الدنيا كلها بتتقدم وبتتصلح الا بلاد العرب والمسلميين

ليه الضعف بقا هو السمة السائدة على كل ماهو عربي مسلم

ليه بقينا ننضرب على قفانا كتير اوي

ليه احنا اللي بنضحك على نفسنا بنفسنا وبعدين نصدق نفسنا

احنا احسن ناس نشتغل نفسنا

احنا عيشيتنا فل الفل ولا عندنا فقر ولا ازمة ولا مرض ولا اي حاجة

احنا الناس الوحيدة اللي بتفهم والباقي حمير

ليه كده

اشمعنا احنا اللي كده

معلش كأبتكوا

ابو احمد البواب

2008-12-22T14:14:00.002+02:00

جامدة جدا

حاول تستخدم مترجم جوجل لترجمة الجملة دي

"Get well soon"

اضغط على اللينك ده

Google Translator

وشوف النتيجة ايه وقولي رأيك

البوست رقم 100

2008-12-17T14:28:00.000+02:00

هاي عليكم ياشباب…ازيكوا جميعا…واحشني والله….انا بعتذر عن غيابي المستمر…انا بجد مفحوت في الشغل….ومازال النفخ مستمرا لكني قدرت اهرب انهارده واهدي الجو حبتيين.

البوست دا يبقى البوست رقم 100 في مدونتي العزيزة غمض عينيك … وقت ما ابتديت التدوين عمري مافكرت اني هكون مرتبط بيه كده...ولا عمري فكرت في اني ممكن اوصل للبوست ده

جميل اوي انك تكتب وتتكلم وتفضفض باللي جواك وفي نفس الوقت تكون في فرصة للناس انها تشاركك وتديك رأيها

الفضفضة هي كانت اساس التدوين عندي...كنت اوقات كتير ببقا عايز اتكلم او اعلق على موضوع معين ومش كنت باعرف..او كنت تقريبا بكون متوقع ردود الافعال والاراء من خلال معاشرتي للناس حواليا

لكن التدوين فتحلي سكك وطرق كتير اوي ورتني حاجات انا مكنتش اعرف عنها حاجة وعرفني على معلومات وناس ومعاني مانكرش فعلا انها غيرت حاجات كتير جوايا

ومع الوقت بقا التدوين حاجة مهمة اوي في حياتي..حتى وان كنت غبت عنه في الفترة اللي فاتت شوية..بس انا فعلا ارتبطت بمدونتي "غمض عينيك" واوقات كنت (ولازلت) بكتب حاجات لا تصلح للنشر وبحتفظ بيها في الدرافت بتاع المدونة

انا فعلا سعيد جدا بالخطوة اللي خدتها دي وسعيد جدا بالناس اللي اتعرفت عليهم من خلال المدونة سواء على صفحات الانترنت او من تشرفت بمقابلتهم وبقولهم بجد ياجماعة شكرا اوي على الاضافة اللي ضيفتوها في حياتي واتمنى ان علاقتنا الطيبة دي تفضل ممتدة الى مالانهاية

العزيزة "غمض عينيك" مبروك البوست رقم 100 وعقبال الالف

تحياتي

محمد سمير

الاردن وزلاطيمو

2008-11-27T16:55:00.001+02:00

الشهر اللي فات سافرت
الاردن
في زيارة عمل سريعة
قعدت من سافرت الثلاثاء بليل ورجعت السبت الظهر وكان عندي كمية شغل رهيييبة لدرجة اني نزلت من الطيارة ع التاكسي ع الفندق اول حاجة عملتها قعدت ع المكتب اشتغل لغاية الساعة 2 بليل نمت

صحيت تاني يوم بدرى رحت على مكتبنا في عمان وفضلت هناك ل8 بلييل…خد بالك انا كل ده مغيب وتايه في الشغل اللي عندي ومش واخد بالي من اللي حواليا وان كنت في الاردن ولا مصر تالت يوم كان الخميس اشتغلت لغاية نص اليوم كده وقفلت الكمبيوتر وقلت مش هفتحه الا في مصر
كانت سارة وفرح معايا…ظلمتهم بصراحة وكنت مشغول اوي عنهم طول اليومين…بس اعمل ايه انا رايح في شغل مش فسحة
ابتديت بقا اشوف الاردن و اخد بالي منها
الاردن زي مصر اوي…حتى ناسها ماتفرقهمش عن المصريين لا في الشكل ولا في اللهجة
كلها جبال وهضاب وطول مانت ماشي طالع نازل ..نازل طالع
بعد السؤال عن مكان نتعشى فيه قالولنا على شارع اسمه الشيمساني…رحنا واتعيشنا هناك ورجعنا الفندق علطوول ظريفة والله..الاردن عموما شوارعها ومحلاتها قريبة من مصر ولكن بمقياس اصغر بكتير احلى حاجة عجبتني هناك التاكسي…زي اي دولة محترمة…عداد وتعريفة معروفة ولا تتخانق ولا حد يغالطك…بتفرق بس في المشاوير البعيدة بتكون بالاتفاق مش بالعداد ولو سألت كام سواق تاكسي هتعرف تقريبا السعر المعقول

تاني يوم خدنا اليوم من اوله اتفقت مع سواق يعملنا جولة حلوة ع الاماكن السياحية اللي اكتشفت انها كلها برا عمان
رحنا مكان جامد جدا اسمه حمامات ماعين…مياه كبريتية خارجة من قلب الصخر وفي منتهى السخونة ونازلة شديدة جدا تنزل ع الضهر تعمل مساج طبيعي
المكان هناك تحفة..سبحان الله بيقولوا سخن حتى في عز الشتا

وبعدين روحنا البحر الميت يدوبك قبل الغروب بشوية..وسبحان الله اسم على مسمى…البحر فعلا شكله ميت ولا موج ولا صوت ولا اي حاجة…كئيب..للي مايعرفش هو اسمه البحر الميت عشان مياهه مالحة بشكل كبير جدا لدرجة ان مافيش اي كائنات مائية بتعيش فيه ومن كتر ملوحته بيخلي الجسم يطفو..انا نزلت وكل لما اسيب نفسي الميه تشيلني…طفو قهري

بيقولوا ان طين البحر الميت مفيد للبشرة وفي منتجات كتير اوي مصنعة منه..صابون ومسكات وحاجات كده..كان لازم بردوا اجرب واشوف

كان يوم مرهق رجعنا الفندق على الساعة 8 بليل بس مكانش في وقت نريح لأننا كنا مسافرين تاني يوم..نزلنا وسط البلد واتمشينا فيها وسهرنا على قهوة كلاسيك اوي كان فيها عواد بيغني لأم كلثوم
كانت ليلة ظريفة

تاني يوم رحنا الصبح كهف اهل الكهف وسواق التاكسي لففنا فرجنا ع الكوبري المعلق وقصور الملك والامراء والقلعة الامريكية..اقصد السفارة الامريكية
هي كانت قلعة بالظبط…بدون وصف كفاية اقول ان كلل الفيلات اللي قدامها معلقة يافطة للبيع ومافيش حد بيشتري

مواقف ظريفة حصلتلي

سواق تاكسي مصري بقاله 30 سنة في الاردن حلف ما ياخد فلوس مقابل التوصيلة

عامل في المطعم مصري اتوصي بينا اوي في الاوردر

كنا في مخبز بنجيب فطار..اللي شغال هناك كان مصري جاب لينا حاجات على حسابه

القهوة اللي سهرنا فيها كان كل اللي شغال فيها مصريين وغرقونا شاي وميه ببلاش

بس من دردشتي مع سواقين التاكسي عرفت انهم بردو تعبانين اوي…الاسعار غالية والحالة تعبانة والناس مش قادرة تعيش كويس

رحنا شارع الوكالات والسيفوي ومكة موول…كل ده كان في صورة زيارات سريعة خاطفة واجنا راجعين كان لازم نجيب حلويات من عند زلاطيمو اشهر حلواني في الاردن

يعني كانوا يومين متعبين بس حلوين الحمد لله

اشوفكوا على خير

اي حاجة...مش فارقة

2008-11-17T15:26:00.001+02:00

انا مخنوق اوي

من ايه؟ من اللي بيحصل في التكية

انا اكره اللي يستعبطنى اكتر من اللي يسرقني

اكره اللي يعمل فيها عبيط وشايف الدنيا وردية والحياة حلوة والمعدلات عالية وهو عارف الحقيقة

عايز اقل ادبي وماسك نفسي بالعافية

انا بقيت اكره اتفرج ع التلفزيون والبرامج الحوارية

انا عرفت يعني ايه تعمل عبده العبيط اللي فاهم كل حاجة واولها ان الناس كلها حمير ومش فاهمة ومصلحتها ومش عارفة انه بيستعبطها

يانهار اسود ع البروود

يانهار اسود ع التكية المنهوبة اللي ملهاش صاحب

يانهار اسود ع الوشوش المكشوفة اللي لا بتحس ولا بتشعر

الدنيا كلها تقول حالة كساد وازمة واحنا نقول ميت فل وعشرة

كاننا احنا اللي بنفهم وهما اللي بقر

كأن حالتنا الاقتصادية هي اللي معدية والباقيين بيجروا ورانا

ايه ياجدعان في ايه...ايه الاستهبال ده

لا لا لا لا بس على فكرة كله عشان خاطر الشعب والمواطن

والحمد لله اهو موضوع صكوك بيع البلد دي هتفك ع الناس شوية

400 جنيه و 500 جنيه عشان الناس تعيش بقا وتشبرأ نفسها

وبعدين يا اخي من حكم في ماله ماظلم

وزحمة يادنيا زحمة ولا حد واخد باله

واهو مولد وصاحبة نايم

ولا لأ مش نايم

دا داير في الساقية اللي مالهاش نهاية

داير عشان يعيش...يعيش ع الاقل زي البني ادمين

بيقولك البترول بقا ب خمسين دولار

بس عندنا هنا لسه مش متأكدين من الموضوع ده عشان كده البنزين لسه زي ماهو

يلا اهو كله عند العرب صابون

واهو امبارح حظروا النشر وغيروا الحرز وهنقول مبرووك قريب

ومن تاني

زحمة يادنيا زحمة ولا نعرف مين الجاني

المهم

شوفتوا الماتش امبارح؟؟؟

خطاب النصر...مبروك اوباما

2008-11-05T17:06:00.003+02:00

YES WE CAN
بهذة الكلمات هتف الالاف من انصار باراك اوباما امس في شيكاجو
وبكلمات مباشرة وباسلوب غاية في البساطة والصراحة خطب فيهم اوباما خطاب النصر
خطاب كان في بساطته وصراحته اعمق تأثيرا من الرسوم البيانية والارقام الحكومية التي ابتلانا بها الله
كانت ابتسامة اوباما الجذابة اكثر جدية وتأثيرا من عبوس البعض لدينا (بدون ذكر اسماء)ء
كان خطاب مؤثر بحق
كان خطاب النصر...في لحظة تهون عندها كل المتاعب والسهر والتعب والعناء
في لحظة يصير النجاح فيها ذو طعم خاص لا يشعر به احد الا الشخص نفسه
كان خطاب النصر الشريف لا المزور
ابعث بتهنئة حارة لشخص باراك اوباما اهنىء فيه النجاح والمثابرة والاجتهاد والحيوية والاصرار
اهنئه بتمكنه من ادواته وبتحديه للصعوبات
اهنىء فيه طفلا اسود اللون في مجتمع يعتليه البيض ولكن يتملكه الحلم فيحققه
اهنىء شعب اميركا بادارته التى احترمته واعطته الفرصة ليقول مايحب
واخيرا عايز اقولها بالقوي
جتنا نيلة في حظنا الهباب

ياترى مين؟

2008-11-04T12:12:00.000+02:00

ياترى مين؟
اوباما ولا ماكين

باراك اوباما
ء 47 سنة

برنامجه هادىء وواقعى

بصراحة انا معجب جدا بباراك اوباما وبعقلانيته في عرض برنامجه الانتخابي
وكمان كاريزيميته الرائعة
والاكتر من كده وصوله الي مرحلة من النجاح والتفوق وصلته انه ممكن يكون اول رئيس اسود لأمريكا
متخيل
رئيس اسود
بعد لما كان السود بيتنقلوا في اقفاص معدنية في بطن المراكب لأمريكا كعبيد
دلوقتي واحد منهم على عتبة البيت الابيض
سيبك من حكاية مسلم ولا بيتنكر لاسلامة ولا امن اسرائيل اولا
انا بتكلم عن شخص اشتغل وكافح ومشي في طريق صعب انا متأكد انه واجه فيه احباطات كتيرة
لكن مين عارف
هو كان اول رئيس قسم اسود في كلية القانون جامعة هارفارد
وبعد لما بقى واحد من اصغر اعضاء مجلس الشيوخ سنا
وارد اوي يبقى اول رئيس اسود للولايات المتحدة

جون ماكين
ء72 سنة
برنامجه متهور زي قريبه بوش

الباشا دا انا محبتوش كده من اولها
شكلة مايديش على ريس...دا اخره رئيس مصلحة
لما قريت شويه عن برنامجه لقيته جاب من الاخر
مش هنمشي من العراق...هضرب ايران...مافيش كوريا ولا كوبا ولا اعرف شافيز
هقلل الضرايب والحالة هتبقى فل فل
باين اوي انه هيكمل طريق بوش
مش عارف انا محبتوش
وبعدين حتى النائبة بتاعته بقيت حاسس انها العبيطة بتاعة امريكا
لا لا ماينفعش
++++++++++++++++++++++++

يمكن يجي حد يقولي وهي فارقه ايه...كله زي بعضه...السياسة واحد ومابيحطهاش اشخاص
اه انا متفق في كل ده
بس انا حابب اعيش تجربه مش قادر اعيشها في بلدي
وبتعامل مع حلم اوباما على انه حلم بعيد المنال لأنسان ناجح اقترب من انه يكون حقيقة
وهازعل اوي لو مانالهاش
لأنه يستحقها
وفعلا هو عنده حق
CHANGE WE NEED

المشكلة مشكلتي

2008-11-02T15:30:00.000+02:00

لو حكينا ياحبيبي نبتدي منين الحكاية
الحقيقة ان المشكلة مشكلتي
طبيعة شغلي الجديد اني بكون مسئول عن مناقصة
بكل اللي فيها من عروض فنية وعروض مالية واجتماعات ومناقشات واقتراحات
والطبيعي والعادي ان مافيش شغل حلو علطوول
لأ دايما في مشاكل وخناقات وحاجات تخنق الواحد وتخليه مش طايق نفسه
وازيد عليها كمان احباطات وحالة مزاجية زي الزفت
بس بردو زي ماقلت المشكلة مشكلتي
ليه مشكلتي؟
عشان انا مابفصلش
المفروض خلصت شغل وخرجت من باب الشركة يبقى انتهى الموضوع
المفروض عندي يومين اجازة يبقى فعلا اقضيهم اجازة

انما دا مابيحصلش
انا معظم اللي بتعامل معاهم في الشغل اوروبيين ووقت الشغل بيشتغلوا ووقت الراحة والاجازة ولا هما هنا
انما العبد لله طول مافي مشكلة في الشغل مزاجه مش رايق ومكشر ومخنوق وعلى قد ما المشروع بيكون كبير على قد مشاكله مابتكون كتير على قد دمي مابيتحرق ويطلع دخان
ودا غلط...اكبر غلط
المفروض الشغل شغل والاجازة اجازة والراحة راحة
هو دا الصح عشان اقدر اكمل
ودا اللي انا بحاول اعمله فعلا
انا ياجماعة بقيت اوقات اخاف افتح الميل بتاعي في البيت احسن الاقي مشكلة في الشغل واضطر اشتغل في الاجازة
مديري قالي ماتشتغلش في الاجازة مهما حصل ولو اضطريت قولي ونشوف الموضوع يستاهل ولا لأ
لكن انا مابعرفش...مابيجليش قلب اشوف حاجة وما اردش عليها
بقيت اخاف افتح الميل....والموضوع اتطور ومبقتش افتح الكمبيوتر في البيت اساسا
ايدي بتاكلني..لما افتحه ببص ع الميل ولما ببص ع الميل ببقى زي الطالب اللي مستني نتيجته
لازم افصل..لازم
الحياة مش شغل بس وانا بجد اعصابي تعبانة وبجد عايز ارتاح
انا من اول يوليو وانا مفحوت ومطحون
واكيد هظبط التظابيط

الصورة اللي فوق دي من الاردن..كانوا يومين كده الاسبوع اللي فات هحكي عنهم البوست اللي جاي ان شاء الله

مطحون

2008-10-22T12:54:00.000+02:00

ياجماعة انا مطحوووون اوي...فوق الخيال....مطحون ومفحوت وكل الكلام اللي بيوصف الحالة دي

انا جيت بس اقول شكرا للي كل الي بيسأل عني سواء هنا او على الايميل

ومش هتاخر ان شاء الله

ادعولي

محمد سمير

قلة ادب

2008-07-31T12:27:00.001+03:00

كنت دايما وانا صغير باسمع شتايم في الشارع...كنت ببقى عايز اعرف معنى الشتايم دي...عمري ماجربت اقولها او انطقها او اني اهين بيها حد...عيب
بس مكانش عيب ابدا اني احاول اعرف معناها وخصوصا ان احنا كمصريين عندنا قدرة غريبة في تلوين الكلام واستنباط الفاظ جديدة وشتايم غريبة
والحقيقة اني لما كبرت وشفت الدنيا واديني ماشي فيها بشوف واتعلم عرفت ان الشتايم والالفاظ دي مش دايما عيب
لأ ساعات بتتقال في موضعها وبتكون مطلوبة جدا لتوصيل معنى واقعي او تفريغ انفعال ووقتها عمرها ماتبقى قلة ادب

يعني لما اتفرج على محامي ممدوح اسماعيل وهو بيتكلم في العاشرة مساء واعلق عليه...دي عمرها ما تبقى قلة ادب
ولما اتفرج على اي مسئول حكومي او وزير بيتكلم عن التنمية ورغد العيش والمواطن المصري واقول رأيي...دي عمرها ماتبقى قلة ادب
ولما الناس كلها ميبقلهاش سيرة غير سبوبة الاسعاف...قصدي شنطة الاسعاف وارد واتكلم...دي عمرها ماتبقى قلة ادب
لما الثانوية العامة يحصل فيها كل اللي حصل والوزير يفضل في مكانه يبقى وقتها الكلام عمره مايبقى قلة ادب
لما الاعلام الحكومي يتكلم عن الطفرة التكنولوجية اللي هتظهر في شوارع مصر بعد تطبيق قانون المرور الجديد يبقى تعليقي وقتها عمره مايكون قلة ادب
لما الحكومة تأكد على توافر بنزين 80 في الاسواق يبقى الرد ساعتها عمره مايكون قلة ادب
لما يطلع احمد الهوان (جمعه الشوان) اليومين اللي فاتوا ويقول انا كنت متجوز سعاد حسني عرفي...يبقى لما اشتم ساعتها متبقاش قلة ادب
وغيرهم كتييير اوي
ياترى انا عندي حق ولا لأ؟

رحل جو

2008-07-27T14:31:00.001+03:00

رحل جو
يوسف شاهين
احدى علامات السينما المصرية
ومرة اخرى تختفى احدى نقاط التفوق المصرية
وياترى كم بقيت من نقاط لتميزنا!
مهما كان الاختلاف ومهما كان الرفض من قبل بعض الناس لهذا الرجل
فلا شك ان لا احد يختلف على ابداعه وفنه وتفوقه وتألقه
يوسف شاهين كان صاحب رأي ورؤية وفن أثار به غضب كثير من الناس ولكنه لم يتراجع ولم يتلون كما ارادوا له ان يتلون
لم اكن مهووسا بيوسف شاهين الانسان
ولكني كنت مهووسا بيوسف شاهين المخرج العالمي المتألق والمتفوق
رحل جو من دنيانا
فلنتركه لاخرته وليحاسبه الله على افعاله خيرا كانت او شرا فلا مكان لنا هنا لنحكم
ولكن عسى ان نأخذ من تفوقه وابداعه وايمانه برأيه وعمله مثال نحتذي به
رحل يوسف شاهين وله كل الاحترام

تم الشحن - كل سنة وانتوا طيبين

2008-07-01T15:53:00.000+03:00

احسن سلام لاحسن ناس
بقالي كتير مقعدتش اكتب وادردش...بقالي كتير اوي وزي ماقلت البوست اللي فات مش عارف ليه
ماعلينا...يعني هو الواحد بيحب يفصل من وقت للتاني كده...يفصل شحن حتى لو فصل عن حاجة بيحبها بس يفصل شوية بردو
لكن اللي ضايقني اني في عيد ميلاد "غمض عينيك" مكنتش بردو موجود
ارشيف المدونة بيبتدي من اكتوبر 2006 والحقيقة اني في الفترة دي كنت متابع صامت لكتير من المدونات...بدون اي تعليق
لما قررت اعمل مدونة..ابتديت انشر صور بس بدون كلام وطبعا مكانش فيه اي مشاركة او تعليق من اي حد..انا نفسي مكنتش بعلق عند حد
كانت المدونة اسمها " لو بطلنا نحلم" وفييين من اكتوبر2006 لغاية مايو 2007 لما رجعت من تاني باسلوب اكتر نشاط وغيرت اسم المدونة من "لو بطلنا نحلم" ل "غمض عينيك"ء
اسم مختلف وان كان له نفس المعنى عندي وخصوصا لو كملت الرباعية
غمض عينيك واحدة واحدة بقت تشغل حيز مهم في حياتي...وانتقلت من حيز الهوايات الي حيز الواجبات ويمكن دا هو اللي خلاني افصل خالص الفترة اللي فاتت
انا كنت وصلت لمرحلة ان المدونة بقت شىء اساسي لازم اتابعه يوميا مهما كنت مشغول او مش فاضى او عندي مشاكل في الشغل اوو غيره بالاضافة طبعا اني بقيت متابع لمدونات كتيرة مش عارف لغاية دلوقتي احط اللينكات بتاعتها في المدونة واكتفيت بمتابعتها عن طريق البرنامج الرائع "جوجل ريدر" اللي مديني دلوقتي رسالة ان عدد البويتات الجديدة اللي لسه مقريتهاش 543 بوست
ولو ضفنا لده شغلي الجديد اللي اعدت فترة بردو اركز فيه عشان اعرف جوانبه كلها واتعلم صح بالاضافة لبعض الاحباط اللي حسيت بيه بعد سفرية فرنسا وخصوصا ان حالنا هنا في مصر لايفرح عدو ولا حبيب
يمكن كل ده هو اللي خلاني عايز افصل بس انا حاسس ان انا دلوقتي احسن وان شوقى غلبني وبجد بجد قد ايه كان شوقى للمدونة ولزوار المدونة ولعالم التدوين كله
حتى وان كانت متأخرة
كل سنة وانتوا طيبيين
وكل سنة وانتي طيبة يا مدونتي العزيزة

مش عارف

2008-05-20T16:29:00.000+03:00

مش عارف ليه ماليش نفس اكتب حاجة
بقالي شهر ويمكن اكتر مادخلتش ع المدونة ومش عارف ليه بجد
في وقت؟ اه عندي وقت...ممكن اكون مشغول اوقات لكن الاكيد ان اوقات تانية بيكون عندي وقت
طب في ايه؟ مش عارف
انا لا كنت بفتح المدونة ولا ابص عليها اصلا
ولا كنت بزور اي مدونات تانية
مع اني عندي مواضيع كتيير اوي اتكلم فيها
فعلا عايز اتكلم فيها بس مش عارف ايه اللي مفرملني
انا مش لاقي كلام اقوله فعلا
هحاول قدر الامكان اخرج من الحالة اللي انا فيها دي
وان شاء الله هانتظم اكتر من كده

حد قال هات

2008-04-12T22:27:00.001+02:00

من باريس

بلد الازياء والموضة

التقطت هذة الصور وتركت لكم التعليق

جزمة (لامؤاخذة)2500 يورو للي مش شايف الرقم

طاقية او بيسموها شابوه ب 200 يورو

دي بقى لسته الاسعار بتاعت الاخت المانيكان اللي فوق

البرمودا 2550 يورو

المايوه (مش باين في الصورة) ب 450 يورو

الجاكيت الزينز الحلو دا ب2190 يورو

الدزمة (لا مؤاخذة يعني) ب460 يورو

البروش واحد ب 355 والتاني 415 يورو

اللفة اللي حولين الرقبة دي (الكولير) ب 960 يورو

الجينز ب 320 يورو

الحزام..الحزام..ايوة الحزام ب 490 يورو

الشنطة الامورة دي ب790 يورو

حد قال هات...يامدام يا انسه يا بيه

حد شاري

؟؟؟؟؟

خلص الكلام

2008-04-08T14:09:00.001+02:00

خلص الكلام

ديزني لاند- باريس

برج ايفل

لوحة الموناليزا -متحف اللوفر

تحت التلج- وسط باريس

الكونكورد ولاديفانس

2008-04-02T15:36:00.003+02:00

دا تاكسي يااخوانا

المباني في "لا ديفانس"ء

القوس الكبير اللي بحكي عنه

انا في الشانزليزية

قدام محلات ديزني

مقهى في الشارع قدام الاوتيل -الله يمسيها بالخير قهوة غرام عمار اللي بقعد عليها في مصر

كشك جرايد ولا مؤاخذة

المسلة المصرية في ساحة الكونكورد
برج ايفل من على نهر السين
على نهر السين وورايا برج ايفل

اول يوم- الشانزليزية

2008-03-31T15:34:00.002+02:00

واخيرا في الشانزليزية

والحكاية ابتدت الساعة 6 صباحا وانا في طريقي للمطار..الكاوتش ضرب واتأخرت شوية..لكن كنت عامل حسابي اصلا في المواعيد فوصلت المطار قبل معاد الطيارة بساعتين ونص...وماادراك ما المطار..زحمة زحمة...والناس واقفة طوابير بطريقة غريبة...المهم ان كل شوية يطلع واحد من بتوع المطار ويقول "حد رايح مدريد...مدريد "...."حد هنا رايح روما...روما" كنت حاسس اني في موقف احمد حلمي...المهم خدت البوردينج وعديت من الجوزات ودخلت صالة الانتظار...المهم وانا بعدي من بوابة الامن نسيت ازازة المية بتاعتي...امين الشرطة راح واخدها ومديها لواحدة فرنسية كانت دخلت بعدي علطول..الست الارشانة مش تقولة لأ دي مش بتاعتي..دي راحت واخداها في شنطتها علطول النصابة...انا اتنططت ورحت جبته ورحتلها قولتلها الازازة دي بتاعتي انا وخدتها منها
الرحلة كانت لمدة خمس ساعات بس الطيارة مكانتش عجباني رغم اني كنت فقاعد في مكان كويس اوي...الفرش بتاع الطيارة في كتير حتت مقطعة والاستاند بتاع الكرسي بايظ ومبينزلش وكونترولر بتاع الاغاني والحاجات دي مش شغال مش عارف مانبسطش منها رغم اني لمست تغيير فعلا في اسلوبالضيافة ع الطيارة...زمان الضيافة كانت سمجة ..وكان يجي المضيف يقولي "عايز مية؟؟؟" انا كنت بخاف منه وبقولة لأ مش عايز...دلوقتي في ابتسامة في اسلوب كويس في عرض الخدمات

مصر المحروسة من بين السحاب

سواحل ايطاليا في الطريق

السواحل الايطالية مرة تانية

مش عارف جبال ايه دي بس عجبني شكل التلج عليها

احدى ضواحي باريس بالقرب من المطار
الصدمة الاولى ان لما وصلنا باريس كانت درجة الحرارة 8 مئوية والدنيا بتمطر بشكل مستمر والشمس مش طالعة اصلا...من كتر الغيوم والضباب انا مشفتش من باريس غير ضواحيها وانا في الطيارة...كابتن الطيارة عمل هبوط بحرفية يحسد عليها ونزلنا مطار شارل ديجول...وبالمناسبة دي كانت اول رحلة لمصر للطيران تنزل شارل ديجول مش اورلي...انا قلت يمكن يدونا هدايا بلالاين ولا حاجة...المطار ضخم التنين...كبير اوي..بس منظم بطريقة تخض وتجيب حسرة على حالنا..انا مسألتش حد ..الطريق ماشي وانت ماشي فيه هيوصلك مكان من انت عايز..تلاقي بابين في الممر..اقف قدامهم اللي هيتفتح اوتوماتيك هو دا اللي تمشي فيه...تحفة..من سرعة الاجراءات خلصتها كلها قبل ما الشنط تنزل من الطيارة...كنت قابلت واحد زميلي بالصدفة في الطيارة كان في طريقة للكسمبورج عن طريق باريس وافترقنا عند الجوزات...وشفت انا طريقي برا المطار....طبعا عايز اقولك انت مش ماشي على رجلك..لأ معظم الاماكن فيها سير بيتحرك وانت واقف عليه ولو هتعدي في مكان منه للسما السير دا بيبقى متغطي ولوبصيت تحتيك او فوقيك هتلاقي سيور تاني رايحة من دور لدور ومن مكان لمكان لكنك في ملاهي
خرجت برا المطار وركبت تاكسي...وكنت محتار..اركب التاكسي المرسيدس الاي كلاس ولا الفولكس فاجن باسات ولا البيجو ولا الرينو...الدور حكم وركبت الرينو...انا مقلتش غير اسم الاوتيل بس...راح الباشا السولق كلتبه على جهاز قدامه ظهرله ع الشاشة وظهرت الخريطة...اتاري ايه بقا في جي بس اس واقمار صناعية وحركات ..دي صورة كابينة التاكسي ومش هتكلم كتير عنها ولا عن الطريق اللي ماشين فيه ولا على الزحمة المنظمة...محدش بيسيب الحارة بتاعته...انا كنت عايز اقوله ياعم وسع انت وانا هعديلك من العربيات دي كلها..في حارات كانت ماشية كويس ودا مش راضي يعدي

وصلنا الاوتيل يامعلم...ودفعنا اربعين يورو للتاكسي..اربعين يورو يعني 340 جنيه لما انا كنت هعيط وانا بدفعهم...الاوتيل حلو مش وحش..هو متواضع شوية...بس سعرة ممتاز بالنسبة لمكانه..انا بيني وبين الشانزليزية وقوس النصر شارع يعني 3 دقايق مش...وطوالي في نفس الشارع اوصل برج ايفل ولو دخلت يمين اوصل متحف اللوفر ... بصراحة معجب جدا بمكانة...المهم طلعت الاوضة وضبت حاجتي ورتبتها وريحت شوية ونزلت...اتمشيتظ...بقيت مش مصدق...محمد سمير في قلب باريس...في فرنسا...فعلا كان حلم بحلمه ومش تاعبني الا بعد زوجتي وبنتي عني اللي بجد تاعبني اوي وان كنت بحاول اتغلب ع الموضوع واقول لنفسي اهو اعادة تجديد للاشواق والمشاعر ...ماعلينا...طبعا مش هتكلم على النظام وتعديه الشارع اللي بعديه وانا مغمض طول ما الاشارة اللي موجودة في كل مكان خضرا....التقاطع الاربع محاور فيه 12 اشارة 3 في كل اتجاه..ع الرصيف اليمين والشمال والجزيرة الوسطى...المهم كان موضوع الاتصال بمصر شاغل بالي..انا عايز وسيلة كويسة وفي نفس الوقت معقولة بالنسبة للتكلفة...انا عامل تجوال بس دا خراب بيوت 4 جنية استقبال الدقيقة وعشرة جنية ارسال...وفي نفس الوقت معايا خط فرنسي (اس اف ار- بالمناسبة فودافون شريك رئيسي في الشركة دي) بس مش عارف اشحنه ولا عارف اوصل لسعر التكلفة بتاعت المكالمات كله بالفرنساوي يامعلم..والعالم هنا بتتكلم فرنساوي بطلاقة...المهم لاقيت كباين في الشارع ولاقيت كلام كتير ع التليفون فهمت منه ان بيقبل 30 نوع كارت حتى الفيزا بيقبل الدفع بيها ( نسيت اقول ان التاكسي كان بيقبل فيزا)..احترت والله..نقيت كارت منهم كده ورحت رايح على كشك جرايد – طبعا عيب اسمي الشياكة دي كشك- هبقى ابعت صورته...بسئل ع الكارت لاقيت صاحب الكشك لبناني...تحكي عربي....اه احكي عربي ...من مصر..من لبنان..وقعد يرغي معايا ودخل في موضوع القمة العربية وسوريا وازمة الخبز في مصر وان مصر والنيل وام الدنيا ومش عارف ايه ولحرامية اللي في البلد ومافيش عيش ولا بتاع...انا مبحبش اتكلم في السياسة برا البلد...من الاخر طول ما انا برا مصر بتعامل مع اي حد بحرص زيادة عن اللزوم شوية...فقفلت معاه بالذوق ومشيت...بس خدت منه كارت تليفون حلو اوي ب 15 يورو وبيعمل مكالمات كويسة....نزلت محطة المترو اعمل الاشتراك...المترو هنا 14 خط وفي قطار داخلي اسمه (ار او ار) 6 خطوط يعني عندك عشرين خط غير الاوتوبيسات....يعني البلد كلها متاحه...نزلت اعمل اشترا الميترو...الاسبوع بعشرين يورو...عدد غير محدود من استخدام كل حاجة ميترو او قطار او اتوبيس..والاسبوع الجاية تجدده...يابلاش والله...مكدبتش خبر..طلعت الخريطة واخترت محطة في اخر الشانزليزة انزلها وارجع الاوتيل مشي...المترو واضح او انه قديم سواء القطر نفسه او المحطة...بل بالعكس دا في شخبطة وناس كاتبه عالحيطان وابواب المترو...بس في نظام رهيب..نظام يعقد مافيش تكدس ع البيبان اللي نازل ينزل واللي عايز يطلع يطلع...مافيش روايح ولا عرق ولا قرف...التاس كلها هنا بيستحموا وريحيتهم فل وياسمين....باريس يامعلم بلد الشانيل ولا كوست...نزلت من المترو وطلعت الشانزليزية....اخيرا انا في الشانزليزية...وقفت لحظات عشان اعيش اللحظة دي في عمري...بجد حلم كان نفسي فيه من زمان..انا ماشي بأكل البلد اكل بعنيا...ايه المحلات دي...جاب..ديور...برومود...بيجو...وايه الاسعار دي...طقم بناتي يعمل كله على بعضه حاجة بتاعت 5 او 6 لالاف جنيه...الصلاة ع النبي....دخلت ماكدونالدز ضربتلي فيليه سمك كومبو...واتفرجت ع الشارع من ورا الازاز شوية...ورجعت تاني اتمشى واتفرج...الحقيقة كنت تعبان ونفسي انام بس كنت بأواح مع نفسي...وصلت عند قوس النصر وبردو بقيت مبسوط جدا صورت واتصورت وروحت الفندق نمت

خليكوا معايا يوم بيوم
تابعوني

حلم طالب ثانوي

2008-03-29T12:37:00.000+02:00

لما دخلت ثانوية عامة كان لازم اختار اللغة التانية مع الانجليزي...الالماني او الفرنسي او الاسباني...بعد السؤال والاستفسار والمقارنات الكل اجمع على ان الالماني هو الاسهل ككلمات وقواعد ونطق وكمان امتحانات...بس انا كنت بحب برج ايفل !!!! كنت بحب الكلام الفرنسي واللدغة الفرنسي...كنت بحب بونجور و اوروفوار وبونسوار...اخترت دراسة اللغة الفرنسية....وذاكرتها عن حب فعلا وجبت فيها اعلى الدرجات وتطور الامر في تاية ثانوي اني كنت بتكلم مع المدرس بتاعي بالفرنسية ( طبعا مش بطلاقة ) انا اقصد اني مخدتهاش كمادة دراسية انجح فيها لأ انا خدتها كلغة..وفي الصيف التحقت بالمركز الثقافي الفرنسي كنت بروح 4 ايام في الاسبوع بردو لم اكتفي بالحصص..كنت بروح المكتبة الصوتية واشغل شرايط وفيديوهات...جبت كتاب بيتكلم عن فرنسا...كان كتب موجه للطلبة اللي رايحين يدرسوا هناك وكان فيه كل حاجة من سعر ازازة الميه لغاية تأجير الشقق في باريس وضواحيها والمواصلات وتاريخ فرنسا..كل حاجة كل حاجة...كانت العملة ايامها الفرنك وكان الفرنك بخمسين قرش وازداد تعلقي بفرنسا وبزيارتها..حتى الخريطة جبتها عشان ابقى عارف نهر السين ماشي فين وايه المحافظات اللي حوالين باريس وايه وايه...والدي لما شافني كده عمل لي جواز سفر على اساس ان لو جت اي فرصة اني اسافر وانا طالب اكون جاهز..الحقيقة انه لا كان في فرصة ولا بتاع بس هو كان تشجيع من والدي وهو شايف تفكيري بالمنظر ده لغة فرنسي ومركز ثقافي ودراسة في باريس وحاجات كده...ومرت السنين وانشغلت في الهندسة وما ادراك ماهندسة عين شمس...وفاتت السنين وراحت اللغة والفرنك بقا يورو وجواز السفر صلاحيتة انتهت
بعد لما اشتغلت سافرت لدول ناطقة بالفرنسية واسترجعت جزء محترم من اللغة ومن مهارة النطق والتكلم بيها ودا شيء اسعدني جدا....وفي احدى السفريات نزلت ترانزيت في مطار شارل دي جول في باريس..كان الترانزيت لمدة خمس ساعات..انا اتذكر ان المكان اللي انا كنت فيه كان منه جزء بيبص على طريق سريع...انا كانت عينيا الخمس ساعات دول بتبص ع الطريق وع العربيات اللي ماشية وع الشارع..مكنتش متخيل اني موجود على ارض فرنسا حتى ولو كنت محبوس جوا المطار ومش قادر اخرج
السفر لفرنسا كان حلم حلمت بيه من تانية ثانوي..ودلوقتي وبعد 11 سنة يتحقق الحلم ده

غدا ان شاء الله اطير الي باريس

انا والمحور ...وهواك

2008-03-26T16:59:00.001+02:00

لو قسمنا 3.9 كم على 43 دقيقة وضربنا الناتج في 60 دقيقة هيطلع اني كنت سايق بسرعة 5.5 كمساعة لمدة ساعة الا ربع عشان اقطع مسافة 4 كم تقريبا ودا الطبيعي لكل مستخدمي محور 26 يوليو...وانا كواحد من فلاحين القرية الذكية حيث يقع مقر عملي بتعرض كل يوم لمأساة المحور...ايوه هي مأساة مش مجرد زحمة زي ما بيسميها بعض المتفائلين...لما تقضي ساعتين او ساعتين ونص في الطريق من البيت للشغل وزيهم وانت مروح يعني اربع او خمس ساعات في الطريق تبقى مأساة....وتبدأ فصول هذة المأساة وانت نازل متشيك الصبح ورايح الشغل..طبعا وكالعادة البلد زحمة وواقفة وخصوصا فترة الصبحية ..فبيكون اسلم طريق اني اخد الطريق الدائري ومنه على المحور وانزل في اتجاه بوابات مصر اسكندرية الصحراوي لغاية القرية الذكية لكن الحياة مش بتمشي سهلة كده... اولا الطريق زحمة لغاية ما تطلع الدائري وبعد ماتطلع يقابلك الرادار يعني تمشي واحدة واحدة حتى لو الطريق ماشي...[س تقول ايه...حتى لو ماشي هعطلك هعطلك..وتبدأ بقا خبرات الحياة من بين ميكروباصات تقف في اي مكان وعربيات نقل ومقطورة سايقة على 100 و 120 وساعات اكتر ويا سلام لو في حادثة ع الطريق او عربية نقل حمولتها مقلوبة والدنيا كلها تقف وراها مستنية الفرج بالساعات..وممكن تبقى الحياة ظريفة والطريق ماشي ويجي ظابط في كمين ومزاجه يوقف الطريق شوية ويتسلى على بتوع النقل والميكروباصات وطظ في الناس اللي واقفة ورا ومتعطله...المهم عديت من دا كله تعالى بقا قبل نزلة المحور بشويه يبدأ الطريق يقف بتكون نزلة المحور مقفولة تماما من الدائري وبتكون العربيات ع المحور في اتجاه 6 اكتوبر مترصصة جنب بعضها على مدد الشوف ومع ذلك الناس واقفة مصممة تنزل المحور وبالتالي تقفل الدائري فبيكون الحل الوحيد انك تمسك اقصي الشمال وتكمل الى نزلة مصر اسكندرية الصحراوي يعني حوالي 12-15 كم زيادة وهنا تقابلك 3 مشاكل...اولا نزلة المريوطية بتكون زحمة ع الاخر وبتوقف الطريق وراها بتاع 2-3 كم وعيش بقا...المشكلة التانية بتبقى قبل نزلة الصحراوي بحوالي كيلو او اتنين...هناك الدائري بينكمش من اربع حارات لاتنين بس والدنيا بتقف شوية ..اما تالت مشكلة هي ان في مطب قبل نزلة الصحراوي علطول بس مطب غبي الكل بيهدي عنده وتلاقي الدنيا وقفت من جديد.....عديت دا كله؟؟ حلو اوي...تعالى بقا انزل الصحراوي تفاجىء ان العربيات مترصصة تحت وبردو على مدد الشوف والطريق واقف لغاية الكوبري....كده يبقى قدامك اخر حل وهو انك تكمل طوالي لأخر الدائري وتنزل طريق الواحات وهنا تقابلك مشكلة..نزلة الرماية من الدائري على الشمال مش اليمين وبالتالي الناس كلها عشان تنزل بتكسر بعرض الطريق وتزحم الدنيا...عديت منها الطريق بيبقى سالك وماشي بقا خلاص...مفيش عربيات كتير...طريق واحات بقا....تبدأ تجري عشان تعوض التأخير يقابلك الرادار..تضطر تمشي تاتا تاتا ....وامشي بقا لغاية ماتوصل لدريم لاند ومنها يمين لغاية كمبوند مش فاكر اسمه وبعدين يمين لغاية ميدان جهينة ثم يمين كمان لغاية المحور من نهايته وكل يمين منهم بتاع 5 او 6 كم زيادة (كده انا لفيت حوالين المحور) وبعد كده تلف وتكمل طوالى ع القرية الذكية ..وتيجي تدخل القرية تلاقي البوابات مقفولة وظباط ورتب واقفة وواحد منهم يجي يقولك "معليشي مفيش دخول ولا خروج دلوقتي عشان مرات الريس جوا".....طب انا اعمل ايه ارد عليه واقول ايه...."طب انا ورايا شغل جوا" .."معلش لفلك ساعة كده وتعالى"...مكانش ينفع اتكلم ولا ارد..الصراحة الراجل كان عقيد وفي نفس الوقت كان بيكلمني بكل ذوق وادب وبيبتسم ابتسامة احراج....مكانش ينفع اعمل حاجة غير اني قلتله شكرا ومشيت...مكالمة اعتذار عن التأخير بسبب رئاسي...كوباية شيكولاتة ساخنة من سلينترو العزيز مع بعض الاسترخاء ممكن يخلوا الواحد يحس انه بني ادم ....ياتري المؤتمر اللي ماما سوزان كانت بتفتتحه حد يعرف عنه حاجة...اصل اسمة "حماية وتمكين الشباب في عصر الانترنت"...انا مفهمتش الصراحة وخصوصا ان الشباب مش عارفة عنه حاجة....ونفسي اعرف مين صاحب الدماغ العالية اللي طلع بفكرة المؤتمر دا وياترى ايه توصياته او نتايجه اللي تساوي تعطبل مصالح الشباب اللي ماتمكنش اصلا انه يوصل شغله اليوم ده رغم انه مؤتمر تمكين...وياتري الهليكوبتر العسكرية بتاخد المسافة من مصر الجديدة للقرية الذكية في قد ايه وسط الزحمة دي؟؟؟

الاوائل

2008-02-28T16:26:00.001+02:00

ياتري مين هيحكم امريكا؟؟؟

باراك اوباما ؟؟ وسيكون اول رئيس ذو اصول افريقية اسلامية في تاريخ الولايات المتحدة
ام
هيلاري كلينتون ؟؟ وستكون اول سيدة تشغل منصب رئيس الجمهورية في تاريخ الولايات المتحدة

لم اسمع اي صوت لمرشح الحزب الجمهوري جون ماكين رغم ان الطريق امامه اصبح ممهد للترشيح خصوصا بعد انسحاب مايك هوكابي لكن عموما اجد ان فرصة الجمهوريين في اقتناص منصب رئيس الجمهورية هي فرصة ضئيلة بالاخص بعد التدهور الاقتصادي والاجتماعي وسوء العلاقات السياسية الذي شهدته الولايات المتحدة خلال حكم جورج بوش الابن مثل مشكلة العراق والاموال الضخمة التي يتم استنزافها لصالح القوات الامريكية هناك بالاضافة لغضب اهالي الجنود الامريكين الذين قتلوا في الهجمات وعدم اقتناعهم بمبررات الحرب وايضا تدهور الاقتصاد وانخفاض قيمة الدولار امام عدة عملات ابرزهم اليورو الذي سجل امس 1.5 دولار دا طبعا بالاضافة لفضيحة القروض العقارية التي كانت منذ بضعة شهور حيث كانت المرة الاولى التى ارى فيها مواطنين امريكيين في مخيمات ايواء !!!!!ء
اعتقد ان ماسبق سيدعو الامريكيين الي التصويت لصالح مرشح الحزب الديموقراطي ويبقى السؤال: من سيكون؟ اوباما ام هيلاري؟

الحقيقة انها حيرة كبيرة واختبار لمعاني الحرية والمساواة في الولايات المتحدة الامريكية فالمرشحين اما امريكي من اصول افريقية واسلامية واما سيدة حتى وان كانت مخضرمة سياسيا...لمن ستكون الغلبة؟؟
من الطبيعى ان تجد معظم العرب والمسلمين يميلون الي اختيار اوباما لأصولة الاسلامية واعتقادا انه سيساند المسلمين او على الاقل سيكون اكثر رحمة بهم ولكني اخالفهم الرأي فالسياسة في امريكا تسير على نهج واحد وطريق محدد وواضح المعالم وان اختلفت طريقة تنفيذه من رئيس لأخر...هناك خطوط عريضة وسياسات صارمة لن يتعداها اي رئيس ومن احدى هذة السياسات علاقة امريكا بأسرائيل..بالاضافة ان ضغوط اللوبي اليهودي- القوي- في امريكا لن تعطي الرئيس اي فرصة لتعدي هذه الحدود
في البلاد العربية تخط قرارات الرئيس سياسة الدولة اما في البلاد الغربية تخط سياسة الدولة قرارات الرئيس...ولهذا لا اعقد كثير من الامل على باراك اوباما
اما عن هيلاري كلينتون فانا بحق معجب بهذة السيدة فالهدف نصب عينيها منذ خرجت من البيت الابيض مع زوجها الرئيس السابق بيل كلينتون وها هي قد اقتربت من تحقيقه فبداية من سيدة امريكا الاولى الي لقب السيناتور الى رئيس جمهورية اعتقد انه لو حدث فستكون قصة نجاح ممتازة ومتميزة وتستحق اروع اشادة وتقدير

عن قناعاتي الشخصية وكما ذكرت اؤمن بان السياسات الامريكية لن تتغير وان لم يحدث الاسوأ فعلى الاقل ستبقى الامور كما هي...الاختيار الحقيقي سيكون للشعب الامريكي والفوارق ستكون في مصالحه هو بين التأمين الصحي وقضايا الامن الداخلي والقضايا الاجتماعية وما يهتم به المواطن الامريكي العادي فلا مكان للعرب هناك ولنأخذ مقاعدنا بين المتفرجين والمنتظرين لما ستؤول اليه الاحداث خاصة وان المنافسة قوية جدا والتفاوت في الاصوات ضئيل الي حد كبير

وليبقى السؤال قائما
من سيحكم امريكا؟ من سيحكم العالم؟

كلمتين على جنب

كنت خلال دراستي الثانوية كنت معجب جدا بهيلاري كلينتون كسيدة امريكا الاولى لدرجة اني كنت محتفظ بصورة لها في محفظتي الخاصة...انيقة .. شيك .. جذابة.. وابتسامتها تجنن والحق انها وبعد اكثر من عشر سنوات مازالت محتفظة بنفس الجاذبية والتألق الاعلامي رغم كبر سنها...ولاعجابي بها كنت ناوي اديها صوتي وارشحها لمنصب الرئيس لكن ظهور باراك اوباما في الصورة حيث السن الصغير نسبيا- 47 سنة- بالاضافة لاصولة الافريقية والاسلامية اثار اعجابي لهذا التحدي والمثابرة وسط مجتمع جزء كبير منه مازال يتسم بالعنصرية ومازالت في حيرة من امري
لمن اعطي صوتي لصديقتي العزيزة هيلاري كلينتون ام للشاب الناجح باراك اوباما؟؟؟

الرقصة الاخيرة

2008-02-23T01:18:00.001+02:00

ارقص ياحضري

ياليالي ياليالي ... الحضري السد العالي

ياترى مين هيقولهم من تاني

مش بالطريقة دي ابدا ياحضري...اكيد مش كده

عشان احنا مصريين

2008-02-12T10:47:00.000+02:00

ء"عشان احنا مصريين كان لازم نكسب"..دي كانت كلمة واحد من المشجعيين اللي نزلوا الشارع بعد فوز المنتخب بكأس الامم الافريقية....تأمل الكلمة كويس كده...انا شايف من وراها فرحة وفخر الناس كانت قربت تنساه..."عشان احنا مصريين" كان بيقولها بقوة وبصوت عالي...اخيرا بقا في حاجة تميزنا كمصريين...حاجة ترفع راسنا وتخلينا فخوريين وناجحين..."كان لازم نكسب"...تفتكروا كان قصده على الكاس بس...بيتهيألي ان من جواه كان بيصرخ اننا لازم نكسب في كل حاجة مش بس الكرة...الناس فعلا كانت نسيت الفرح...مصر كلها مفرحتش كده الا بردوا في الدورة اللي فاتت من سنتين....واضح ان مبقاش غير الكرة اللي نفلح فيها..."عشان احنا مصريين كان لازم نكسب...مصر مصر مصر" بجد بجد الكلمتين دول وراهم معاني كتير اوي...وراهم ناس قلبها وعقلها وتفكيرها كله بيقول ارحمونا بقا ...نجحونا بقا...اكرمونا وشرفونا بقا دا احنا المصريين.....يارب نلحق نفسنا قبل ما نضيع..نلحق نفسنا قبل ما نبقى مكسوفين...يارب نلحق نفسنا عشان ننجح ونتميز وبكل فخر نقول

"عشان احنا مصريين"

مبروك الفرحة..مبروك النجاح..مبروك لمصر

2008-02-11T11:11:00.000+02:00

النجاح

فرحة لا تعادلها اي فرحة

هي فرحة الدنيا بأكملها

ان الله لايضيع اجر من احسن عملا

ولقد احسن الفريق المصري العمل واتقنه وتفانى فيه

بكل الجد والجهد والتفاني والاخلاص والعزيمة والاصرار حصدوا الفرحة

وجزاهم الله كل خير على فرحة الملايين

فرحة من لا يفرحون كثيرا

الف الف مبروك لمصر الفرحة

الف مبروك النصر

الف مبروك الشرف والانتصار

الف مبروك النجاح

ميسدات 4

2008-02-04T18:13:00.000+02:00

انا جييييت...اخيرا وبعد معاناة....اعمل ايه بس .... مادفعتش اشتراك الانترنت وقطعوا عني الخدمة وفعلا مش لقيت

اي وقت اروح ادفع الاشتراك ويوم جاب اسبوع ف عشرة ايام رحت متصل بخدمة العملاء قلتلهم انا مش فاضي اروح اجدد الاشتراك وعايز الخدمة ترجع..بكل بساطة قالولي ساعة واحدة والخدمة ترجع يافندم وفي خلال خمسة ايام هنتصل بيك ونبعتلك حد يحصل منك الاشتراك في اي مكان تحبه....وجت الخدمة ولسه هفرح بيها هوووب الكابل البحري اتقطع تقولشي ان انا لما دخلت ع النت زودت الحمل الكابل اتقطع؟؟؟!!!!! دي حاجة بايخة اوي....بس يلا ادينا لسه عايشيين وبنحاول

انا بشكر كل الناس اللي ساندتني بدعوة او بكلمة ردا على قراري السابق..انك تغير شغلك دا قرار صعب وانك تسيب فودافون دا قرار اكثر صعوبة وخصوصا اني كنت –ومازلت- مرتبط بيها اوي...بس قدر الله وماشاء فعل...بس انا استغربت من بعض الاصدقاء اللي ظنوا اني سبت الشغل كده بلا هدف وبلا وجهة اخري...انا مسئول عن اسرة وماينفعش اتخذ قرارات هوجاء وخصوصا ان سبب تركي لفودافون كان مجرد تغيير طبيعة العمل مش اكتر...ع العموم ادعولي بس في شغلي الجديد عشان محتاج مجهود كبير ومهارات كتير

بعد رجوعه بسلامة الله من الاراضي الفنلندية قرر صديقي اللدود احمد رشدي الملقب برشدي افتتاح المدونة الخاصة به وهي مدونة "الشفتجي" ورشدي من الاشخاص اللي بعزهم جدا بجد..مش عارف اوصفه ولو عارف بردوا مش هوصفه لاني مفكرتش كتير في الاسباب اللي بتخليني مبسوط وانا قاعد معاه...يعني هو شخصية حبوبه..المهم الشفتجي هي مدونة متوقع ان دمها هيكون خفيف ومتوقع بردو بمواضيع ممتازة وعالية القيمة ...والشفتجي هو الشخص اللي شغل بيخليه يشتغل شفتات او بالعربي ورديات وهو الشغل اللي بيقولوا عليه 7\24 حيث لا اجازات ولا اعياد ولا اي حاجات
ويلكم تو ذا بلوجسفير يارشدي

ومن تاني ارجع معاكوا..الحمد لله الدنيا اتظبطت معايا الي حد كبير

ولنا لقاء قريبا جدا جدا ان شاء الله

بالمناسبة بكره ان شاء الله هارد على كل التعليقات اللي جاتلي

القرار الصعب

2008-01-21T08:36:00.000+02:00

مازلت افكر
كيف ولدت الفكرة
كنت نسيتها
او ربما
تناسيتها
ولكنه القدر
وانا احد البشر
عقل وقلب ..فأين المفر؟
اهو العقل
ام
هي عاطفة القلب؟
في حيرة انا
ومعي افكاري هائمة
منطق يجعلها تنمو
وعاطفة تجعلها تحتضر
وابقى هكذا
بين احلامي الحاضرة
بين امانيا الغائبة
بين عاطفة تملكني
وعقل يصارعني
بين منطق يقتلني
وواقع يجذبني
ولكن حسنا
انه القدر
ارادة رب البشر
ولابد من القرار
ولا مفر
الهم ربي
انك تعلم ولا اعلم
وتقدر ولا اقدر
وانت علام الغيوب
متوكلا على الله
ومستعينا به
مستخيرا ومستبشرا
بين عقل اجهده الانتصار
وقلب المته الهزيمة
وعين ترقرق الدمع فيها

غدا
اقدم استقالتي من فودافون

Gongratulations Xi

2008-01-18T15:37:00.000+02:00

I want to send my congratulations to my dear friend Shi Xi for getting married early in 2007
ShiXi was and still one of my best friends who shared my a very tough time in West Africa
We were workmates and then turned into friends; actually she enriched my mind through our discussions in all fields
Telecommunications, politics, religion, languages and many more

Shi Xi was on of the persons who changed my mind and affected my lifestyle..really.
She’s a talented engineer who likes to travel and to gain experience anytime and anywhere
Again my congratulations Ms.Busy :P and wishing you the best with your husband
Wishing you the success, happiness and the love
Work Hard…Have Fun…Enjoy your life

Mohamed

*************************************

مدونة انا فودافون تعود من جديد

رجاء الزيارة وابداء الرأي

**************************************

البوست القادم

مفاجأة

انتظروني

الي مكسوفة

2008-01-13T17:56:00.000+02:00

كنت بصدد اعادة نشر بوست قديم لي متعللا بانشغالي هذا الاسبوع عن كتابة بوست جديد رغم وفرة الافكار والاحداث في حياتي هذة الايام وكنت ايضا في طريقي للاعلان عن اعادة افتتاح مدونتي الاخرى "انا فودافون" حتى فوجئت بقرار المدونة العزيزة والصديقة "مكسوفة" بأغلاق مدونتها والمسماه بنفس الاسم
القرار كان مفاجىء لي وخصوصا بعد قراءة التدوينة المعنونة ب "انتحار مكسوفة" او بمعنى ادق...فضفضة مكسوفة.... ويا لها من فضفضة ان نمت على شىء فانها تنم عن مدى صبر وشجاعة وجلد وقوة احتمال انسانة صار تحمل من المسؤوليات ملا يحتمله كثير من الرجال...لكل حياة مصاعبها وماسيها و.....ظلمها. ولكل انسان قدر ونصيب وكل خلق لما قدر له....وان قدر لك يا مكسوفة ان تعيشي اجواء من الظلم والمسؤولية المفرطة احيانا فهو قدرك وقد احتملتيه بجلد وصبر وتفاني ولا اجد لك بعدها الا الفخر والسعادة لا الاحباط والاكتئاب...فقد اديت رسالتك ومازلت تؤديها...اعتنيت ببيتك واسرتك وارضيت والديك وحافظتي على صلة الرحم رغم الاساءة ...افلا تجدي ما يستحق الاشادة والاحترام؟!! حتى وان قابلتك الاساءة اينما ذهبتي...فثم رضا الله ورضا النفس
ورب ضارة نافعة...اعنقد ان ماقابلتيه من صعوبات في حياتك جعل منك ذات شخصية قوية ومتحدية ومثابرة خبرت الحياة بمشاكلها والناس على الوانهم والاخلاق على حقيقتها... مكسوفة العزيزة...ظللت متابع لتدويناتك شهور عديدة قبل ان انتوي التدوين..اعجبت بموضوعاتك وتدويناتك وجرأتك في طرح مواضيع قوية ومهمة...اهتم للغاية بتعليقاتك واهتم اكثر بمدونتك فقد ابتديت التدوين عندها ولا ارجو لها نهاية

سعدت بفضفضتك جدا ...ولا اجدها بداية انتحار مكسوفة..بل احسبها القاء عبء نفسي طالما حملتيه وحدك...واطلب منك ان تستمري...فان هجرك الاصدقاء فنحن اصدقاءك..وان عاداك الاخ فنحن اهلك..وان اساء اليك الزوج فنحن اسرتك..وسنكون دائما في انتظارك

واتمنى من كل من قرأ لها كلمة واعجبته ان يذهب اليها ويطلب منها البقاء

اذهب من هنا

البتاع..من جديد

2008-01-09T07:34:00.000+02:00

اصدقائي الاعزاء

بعد غياب اكثر من 6 اشهر

الصديقة المدونة

البتاع

تعود من جديد

حمد لله ع السلامة ياجميل

اه من البحر

2008-01-07T08:46:00.000+02:00

البحر بيضحك لييه

وانا نازلة ادلع املا القلل

وهنا

يطرح السؤال نفسه

هي ليه اصلا كانت بتدلع؟
ونازلة تملى القلل لمين؟
طب هل كانت لوحدها ولا كان في حد معاها؟

وليه مش بتملى القلل من الحنفية؟
هل الامر له علاقة بازمة نقص مياة الشرب؟

هل استخدام القلل دي شخصي ولا بغرض التجارة؟

ياتري ايه تعليق وزارة البيئة والاسكان على هذا الموضوع؟

اسئلة مطروحة للنقاش

تاج العيد

2008-01-05T03:41:00.000+02:00

الاصدقاء الاعزاء
ازيكوا وعاملين ايه
على مشارف عام هجري جديد اقولكم كل سنة وانتم طيبين وبالف خير
ولاخوتي المسيحيين
كل سنة وانت طيبين بمناسبة عيد الميلاد المجيد
ما شاء الله الاعياد والمواسم هلت كلها مع بعض
وكعادة المصريين احب اقول
اللهم ما اجعله خير
وصلني تاج لذيذ جدا من ايوية...يعني ‏ اجدع بنات شبرا
وطالما قلنا شبرا يبقى لازم نجاوب في الحال
بسم الله نبتدي

لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
بفرض حسن النية كنت اكيد هحس بالحسرة والحزن على بلد كانت في يوم من الايام اسمها مصر

لوكنت أوروبي أو غير مسلم هتبقي إيه نظرتك للعرب والمسلمين؟
همج..متخلفين..دينهم يأمرهم بسفك الدماء وقتل الابرياء لدخول الجنة

لوقالولك إنت بقيت رئيس جمهورية هتعمل إيه؟
هاروح اشوف الجناح الرئاسي في فندق برج العرب والفور سيزونز

لوسمح لك برؤية الرسول عليه الصلاة والسلام وإنك تقوله كلمة واحدة ؟
الشفاعة

لو كنا في عصر ازدهار الأندلس كنت تتخيل نفسك إزاي؟
كانت كل حاجة اتعكست
كنت هاحس بشعور واحد الماني بيركب عربية مرسيدس في مصر
او ياباني راكب تويوتا في الخليج
اوحتى صيني بيشتري عباية من السعودية
كنت هارفع راسي واقول انا عربي صاحب العلم ورائد التقدم

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
طالما ارتبط بيها يبقى اكيد بحبها
وطالما بحبها يبقى اكيد هتكون عندي اغلى من أي شىء
وف الاول والاخر دي ارادة ربنا ولازم يكون الرضا بيها موجود

لو طلعت القمر هتكتب عليه ايه؟
فرح وسارة

لو مررت التاج لحد وماجاوبش هتعمل ايه؟
التمس لاخيك سبعين عذرا

تمرر التاج لمين؟

بوسي كات صاحبة مدونة حنين

بوس بوس صاحبة مدونة الروح

ضاكتورة لماضة

عام سعيد

2008-01-01T16:10:00.000+02:00

في بداية عام جديد

الحمد لله

اشعر براحة نفسية

لقد اتخذت القرار الاصعب حتى الان

ولكني احتكمت للعقل وللمنطق

واشعر براحة نفسية

قريبا ساخبركم بكل شىء

كل سنة وانتم طيبين

كل سنة وانتم بألف خير وسلام

يارب 2008 تكون احلى واجمل من 2007

وكل اللي عنده هدف يحققه

ويارب سنة كلها خير وسعادة ونجاح وبركة

تحياتي

محمد سمير

ادعولي بالخير

2007-12-22T14:09:00.000+02:00

كل سنة وانتم طيبين
ويارب العيد كان عليكوا سعيد
ويارب سنة جديدة وجميلة عليكوا ان شاء الله
اعتذر عن تقصيري الشديد في متابعة مدوناتكم وفي الرد على التعليقات
وان كنت استرق النظر لحظات من بين فرجات افكاري المتشابكة
واتجول بين المدونات في زيارات سريعة وخاطفة ولكن بدون تفاعل او مشاركة
فمن بين تشابك الافكار وتداخل الظروف لا اجد في عقلي القدرة على المداخلة والنقاش والتعليق
فانا على مشارف اتخاذ قرار يؤرقني من فترة ليست بالقصيرة ويملك على تفكيري
شارفت على اتخاذه بين القلق والخوف والترقب
لا املك الا الدعاء والاستخارة
ادعولي بالخيرفان في حاجة للدعوات

العيدية

2007-12-18T20:25:00.000+02:00

كل سنة وانتوا طيبين

عيد اضحى عليكوا سعيد

ويارب كل ايامكوا تبقى عيد

العيدية اهي

عشان ماحدش يقول اني حارمكوا من حاجة

وبالعملة الصعبة كمان

وعلى رأي المثل

اللي مالوش خير في سمير..مالوش خير في البلوجسفير

الحكواتي

2007-12-08T18:01:00.000+02:00

واحكي ياحكواتي
والحكواتي هو انا..والحكايات هي حكاياتي....طب هاحكيها ليه...هاحكيها عشان قربت انساها...والمفروض انها ماتتنساش....رغم ان اللي فيها مايتنسيش
قدر لي بعد التخرج ان اعمل في مجال شبكات الميكروويف..واحترفت المجال ده وحبيته بالرغم من انه مكانش محبب ليا ايام الدراسه في الكلية...والمجال دا بالذات مرتبط الي حد كبير اوي بالدراسة بتاعته...بس دا اللي حصل اني اشتغلت فيه ومع الوقت حبيته وبقيت بدي كورسات فيه كمان
كان محور شغلي هو تصميم وتركيب وتشغيل شبكات الميكروويف بما تحمله من اشارات...اشارات تليفون محمول...اشارات تلفزيون..اذاعة...شبكات...اي داتا او بيانات...وعن طريق شغلي روحت وجيت وسافرت ولفيت واتعاملت مع جنسيات مختلفة يابانيين وصينيين وروس وانجليز وطاجيك وفرنسيين حتى التتار قابلت منهم ناس كتير....ومابين صحارى النيجر وثلوج سيبيريا مرت عليا ذكريات كتير وحكاوي ومواقف اقدر اقول وبكل ثقة انها غيرت شخصيتي كتير اوي وعلمتني حاجات اكتر
انا فعلا قربت انسى...وعشان كده قررت احكي عشان مش لازم الذكريات دي تتنسي...هحكيها في سلسلة غير دورية وغير منتظمة وملهاش أي قانون...سلسلة الحكواتي....هحكي فيها كل اللي مر عليا من مواقف وحكايات وناس قابلتهم وبلاد زرتها وعادات وتقاليد شفتها منها الغريب ومنها الطريف....هحكي بالتفصيل..ممكن كمان بملل....اصلي هفتكر وانا بكتب وهنقل مشاعري بدون مواربة وبدون تنقية...زي ماهي وزي ما الكلام يتكتب وزي ماقلت من غير قوانين...هحكي عن غابات كينيا وقبائل الماساي وعن بنات روسيا وسحر تونس ورعب الكونجو ..هحكي عن الملاريا والابراج والحراسة...هحكي عني وانا فوق البرج بشتغل بايديا وهاحكي وانا مدير على مكتبي...هحكي عن التتار اللي فوجئت بانهم تتار...هاحكي في الحكواتي....هاخلص امتى؟؟؟ مش عارف...ممكن شهرين او تلاتة...ممكن 6 شهور او سنة...مش عارف...انا هحكي براحتي...هحكي بشوق لايام جميلة عشتها..ايام السفر والتنطيط والبهدلة

خليكوا معايا يمكن تعجبكوا حكاياتي

مع الحكواتي

لمونة

2007-12-06T20:57:00.000+02:00

حاسس

ان

انا

لمونة

في

خلاط

اخيرا قررت

2007-11-29T14:41:00.000+02:00

انا اسمي محمد

معايا موبايل نوكيا

هتساعدني؟

دا كان ملخص الحالة اللي وصلتلها من شهر

من يوم ماقلت يا موبايل وانا نوكياوي

نوكياوي متحمس

غيرت خمس موبايلات نوكيا

وكمان جربت سامسونج

الوان بقا وحركات

بس رجعت للطريق القويم

سامسونج دا مش بتاع رجالة ياعم

دا عايز شنطة بناتي يتشال فيها

الحقيقة انا عمري ما اشتكيت من نوكيا قبل كده

رغم اني بفحت التليفون اللي معايا

بحب استخدم كل امكانياته

كل حاجة

مكالمات..كاميرا..انترنت

كالندر..شات...برامج خاصة بشبكة المحمول

بص كل حاجة في الموبايل

لغاية ما اشتغل الجيل التالت

من ساعتها وانا بعاني

الموبايل اللي معايا بقا بطيييييييييء

وبيهنج وبيوقع شبكة وبيعمل ريستارت كده مع نفسه

ومبقاش يسعفني

اصل انا اوقات كتير بتوحد مع الموبايل وبعيش انا وهو وبس

سعات بحس انه كائن حي عايش معايا وبيني وبينه اسرار محدش يعرفها

بس اخر واحد ده تعبني نفسيا

بقيت عايز اكسره وهو لسه مكملش 3 شهور معايا

وسألت اصحابي وزمايلي وبجد كله اشتكى

ومن هنا بدأت الفكرة

وكبرت وتشعبت وانتشرت

وبعد تردد كتير اخدت القرار اخيرا

لازم اكسر القيود النوكياوية

وفعلا بعد بحث وسؤال وتجربة ولف ودوران

قررت اجيب سوني اريكسون

والحقيقة اني بحمد ربنا ع الاختيار ده

بقاله معايا شهر دلوقتي تقريبا

مش فاضي استكشفه كله وان كنت بدعبس فيه كل لما افضى

بس كل يوم بكتشف فيه حاجة جديدة تبهرني

التليفون ما شاء الله سمارت اوي

لما بفكر في حاجة بلاقيها

وساعات الاقي حاجة تخليني ممتن جدا للي صمم الموبايل ده

سريع الي حد كبير..الكاميرا بتاعته تحفة

very very very SMART

والغريب ان في هجرة غريبة شفتها لتليفونات سوني اريكسون

كله فعلا بيشتكي من نوكيا

او قطاع كبير من الناس...ملحوظ اوي

وكل ده بعد دخول الجيل التالت

نوكيا شركة محترمة وضخمة واسمها ليه وزن

واعتقد انها هتتلافى الموضوع ده في الاجهزة الجديدة

ومع ذلك انا ممتن جدا للفترة اللي قضيتها كعميل لنوكيا

التليفونات كلها -عدا اخر واحد- عمرها ماخذلتني

بالعكس يمكن اقول انها ساعات كانت بتحس بيا

انا قضيت فترات كبيرة ياجماعة لوحدي في بلاد غريبة وفي اماكن اغرب

كان الموبايل هو سلوتي بجد

ولكن هكذا الدنيا

C'EST LA VIE

من نوكياوي قديم

اهلا وسهلا سوني اريكسون

عن الاستفزاز نتحدث

2007-11-24T12:29:00.000+02:00

عمرك حسيت ان الاخبار بتطلعلك لسانها...عمرك حسيت انك وانت بتقرا الجرايد ان اللي كاتب الخبر ده قاصد ينرفزك....او ان اللي قال التصريح ده انسان مستفز بجد وبيستعبطك....الحقيقة اني حسيت بده كله...وبحسه كل يوم وانا بشوف الاخبار واقرا الجرايد سواء الورقية او الالكترونية....وعلى رأس الاخبار او التصريحات اللي من النوعية دي تصريح رئيس الوزراء بانه لا داعي للقلق ع المستقبل السياسي بمصر لوجود نظام لتداول السلطة يراعي الدستور والقانون...لا والله...كما ان اجندة الاصلاح السياسي والاقتصادي تسير بمعدلات غير مسبوقة....هو في ايه؟ هو احنا مش بني ادميين بردوا عايشين في البلد دي وعندنا عيون وودان ومخ المفروض انه بيشتغل....اصلاح سياسي ايه واقتصادي فين ودستور ايه دا اللي بيتكلم عنه...دستور يااخوانا...هي الناس لاقيه تاكل؟!!!!.....اه ولا موضوع الشهادات الدولية والتقارير الاقتصادية دي....لو منظمة من بتوع حقوق الانسان قالت كلمة وحشة في حق الحكومة يبقى تدخل سافر في شئون الدولة و مؤامرة بتحاك ضدنا انما لو أي بنك صغير في اوروبا او جريدة اقتصادية بتوزع 500 نسخة قالت ان مصر تسير بقوة ناحية مش عارف ايه وان السياسات الاستثمارية من انجح السياسات يووووووه دقوا الدفوف وعلقوا الزينات وتعالى اتفرج وشوف فرح ابن العمدة اللي بيبقى في كل وسائل الاعلام عشان الشعب المتخلف يعرف ان هو اللي مش فاهم حاجة وان الناس بتوع بره اللي بيفهموا بيقولوا كلام فل الفل.....حد اتفرج على مؤتمر الحزب الوطني وشاف الكلام اللى اتقال من نوعية " احنا لينا منافسين كتير في العالم ومش سهل اننا نحافظ ع المركز اللي وصلنا ليه" اظن كفاية الكلمتين الجامدين دول يخلوك تقفل التلفزيون.....الناس كلها انبرت في حرب كلامية ان كان الغرقى على السواحل الايطالية شهداء ولا لأ...ياعم الحاج سيبهم لربنا وهو يحاسبهم برحمته وركز انت بس في الاسباب المهببة اللي خلت واحد يركب البحر في عز الليل على مركب مستهلكة وهو عارف انه رايح للموت قبل مايروح ايطاليا..متخيل الوضع فعلا عامل ازاي.. والظروف اللي خلته يعمل كده؟؟!!! ولا صحيح هتتخيل ازاي وانت في برجك العاجي ومش حاسس بحد... هترجع بعد كده تتكلم عن العدالة الاجتماعية وتكافؤ المش عارف ايه ومحدودي الدخل ومصالح الناس وكون الحاجات دي من اولويات الحكومة...اولويات ايه وحكومة ايه اللي مش حاسة بحد...ويجي ابراهيم كامل يقولك في "في الممنوع" ان ديون البنوك والمسجلة بالمعدومة..هي معدومة كده وكده انما البنك بيعرف يرجعها ازاي...فين ياباشا الكلام ده في مصر؟؟؟؟

ومن اكتر الحاجات اللي استفزتني بجد بجد او بمعنى ادق خلتني احس بالحسرة على حال بلدنا هو خبر زيادة رواتب العاملين في المصالح الحكومية الامارتية سواء مدنيين او عسكريين بنسبة كام بقا...سبعييييييييين في المية....سبعييين في المية.....كتير ياجدعان حرام....كتير اللي بيحصل...طب اللي نشر الخبر ده قصده ايه؟؟؟؟ يحرق دمنا ولا يخنق ع الناس ولا بيخنق على نفسه...دا المرتبات بتزيد عندنا 20 جنيه و30 جنيه ساعات لأ وبيذلونا بيها وبيتكلموا كأن خلاص المشاكل اتحلت ويلا ياجماعة روحوا بقا اشتروا وصيفوا وسافروا وغنوا وارقصوا دا طبعا غير ان وقتها الاسعار بتزيد بجنون.......وياريتها ع التجار بس لأ دي الحكومة كمان زودت اسعار الكهرباء يوم الاحد اللي فات والخبر من مصراوي...واخر زيادة ويافرحتي زيادة بدلات الصحفيين ب200 جنيه في الشهر...ويبقى السؤال الهام هيخدوهم ورقة واحدة ولا ورق بعشرة جنية – على رأي عشرينات- بلا وكسة

اما عن الحكومة الالكترونية...فحدث ولا حرج...تطور مش عارف في ايه ودخول عصر التكنولوجيا والمعلوماتيه وبضغطة زر تصل الى ماتريد....حد شاف المرور شكله عامل ازاي؟؟ حد جرب يروح شركة الكهرباء ولا الميه...طب حد شاف موقع حكومة دبي الالكترونية شكله عامل ازاي والخدمات والنصايح اللي بيقدمها حتى للخدمات اللي مش هينفع تعملها اونلاين؟؟؟ ادخل هنا وشوف وقولي رأيك

ومش تصريحات الحكومة بس المستفزة..لا لا دا في ناس كمان مستفزة...خبر عن ان استراليا مش هتصدر لنا الخراف الحية الا بعد لما تتأكد ان المجازر هتعاملها بطريقة رحيمة....ناس محترمة والله وقرار اكثر احتراما...بس هوب تلاقي واحد كده مش عارف طلع منين ويعلق ع الخبر ويقول "دي تلاكيك عشان الخراف تيجي بعد العيد ويعطلوا المسلمين عن اداء شعائرهم"...في ايه ياعم؟؟؟ ماهو هما المسلمين دول بردو اللي بيبهدلوا الحيوانات ويعدبوهوم ولا خلاص احنا عشان خدنا على كده يبقى احنا اللي صح والباقي هما اللي بيتلككوا....و ع الفيس بووك مجرد ما عمرو دياب خد الميوززك اوورد اتعملت مجموعات وجروبات مش عارف الديابينز والكنج عمرو ومش عارف ايه بدون أي لازمة ولا فايدة اهو واحد يعمل جروب ويحطلوا كام صورة ويدعوا الناس تشترك والناس تشترك وخلاص...طب ايه فايدة الجروب؟ محدش عارف؟ طب انت بتشترك فيه..بتشوف اخباره...بتعملوا نشاط معين؟؟؟ ماحدش شايف...طب انت تعرف اللي معاك؟ ولا حتى صاحب الجروب...اللي يغيظ بقا اني الاقي واحد عامل جروب اسمه "اللي بيحب الرسول عليه الصلاة والسلام يدخل يشترك وعايزين نشوف هما اكتر من احباب عمرو دياب ولا لأ" طب بالذمة دا كلام؟؟؟ طب يعني انا لما اشترك هاعلن حبي للرسول؟؟؟ طب يعني الجروب فيه ايه؟؟؟ ادخل الاقي اذكر الله وسجل حضورك بذكر الله....ونعم بالله ياسيدي...بس يعني هو انا كده اثبت ان الرسول محبوب اكتر من عمرو دياب...وهل المقارنة تجوز اصلا؟؟؟؟!!!!ء

ومابين عباس واولمرت وبوش يطلع لنا في المقدر جديد الحاج ساركوزي اللي جاي يطبلها ويخنق على نفسه قبل مايخنق على فرنسا قبل مايخنق على بقية الدول...ياساتر...الله يرحم ايام جاك شيراك كان محترم وعارف هو بيقول ايه وكان مدي فرنسا استقلالية...ساركوزي اول ما مسك الحكم طلق مراته وراح اتقدم لأمريكا...وبكره تلاقي فرنسا رابطة المنديل على راسها وماسكة السبت وماشية ورا امريكا فين ماتروح ونرجع لايامك ياتوني بلير....واستكمالا للاستفزاز نجد الحكم المغربي....العرجون....واللي شتم وغلط وكللها بقوله " هو انتوا عايزين تاخدوا كل حاجة" الله طب وانت مال اهلك..انت ليك تحكم بما يرضى الله وخلاص...وبغض النظر عن الماتش وان كان الاهلي اتظلم ولا لأ لفت نظري خبر انكسار كاس افريقيا اثناء احتفال النجم الساحلي في تونس...الكاس انكسر..ياترى دا معناه ايه؟

فتوكم بعافية

الا شبرا

2007-11-23T14:55:00.000+02:00

لا لا لا حاسب عندك هنا....كده انت هتغلط بجد....شد فرامل واركن على جنب واوعى تدوس ع الخط....ماهو دا كده اخرك....ودا الخط الاحمر....وبلاش تتهور عشان ما تتعور....الا دي...دي لا فلسطين ولا العراق ولا ايران....كله كوم ودي كوم

الا شبرا

قال ايه انا صحيت بدري شوية عن ميعاد الشغل وقولت ياواد اضرب بعينك كده على مصراوي وشوف الدنيا فيها ايه...وهوب الاقيلك الخبر ده...."القاهرة وطنطا وشبرا مستهدفين نوويا في اي حرب قادمة".....قال ايه شبرا من ضمن المناطق المستهدفة نوويا لو قامت حرب بين اسرائيل وايران....شبرا مين ياعم...انت عارف انت بتتكلم عن ايه اساسا....انت بتتكلم عن شبرا ...شبرا دي يعني الساحل يعني روض الفرج وخلوصي يعني جزيرة بدران وشارع الترعة يعني الدوران والخلفاوي والمظلات وعرابي وكريستال عصفور واحمد حلمي ومعمل الالبان وابو وافيه يعني مدرسة التوفيقية يعني الراعي الصالح يعني شيكولاني وسانت تريزا يعني مسره وعمر افندي والشربيني يعني فيكتوريا وايديال ونادي الكهربا يعني روض الفرج والخازنداره..يعني جسر البحر وكشري عرفة ومطار المنوفية...يعني اجدع شباب وبردو اجدع بنات...من الاخر...شبرا يعني شبرا..من غير كتر كلام...حدوته ملهاش مثيل ولا ينفع معاها امريكا ولا اسرائيل....ولغز لا يحله ولا يفهمه الا الشبراوي...ولا يهمنا قنبلة نووية ولا حتى ارتجاجية...طب بس خلي حد يجرب...يفكر....بس يهوب من شبرا....وهو يشوف اللي عمره ماشافه ولا هيشوفه..دا لو فضل واتبقى منه حاجة
وبعدين يعني هو خلاص...بقت شبرا مستهدفة في الحرب بين اسرائيل وايران.....شبرا.....لأ وايه بيقولك ان شبرا تقع في مدى الصواريخ الاسرائيلية...ياراجل قول كلام غير ده...دا سكان شبرا اكتر من سكان اسرائيل كلها
الناس اتجننت باين ولا ايه

لو عايز تعرف عن شبرا دووس هنا

وعدى النهار

2007-11-19T17:27:00.000+02:00

خلال الفترة اللي فاتت كنت ذكرت ان الوقت بيضيع مني واني مش قادر اتحكم فيه وقلت اني عايز اركز يومين عشان اشوف انا ممكن انظم حياتي ازاي…والحقيقة اني كنت على مشارف اجازة طويلة من الشغل حوالي 10 ايام وكنت معتمد ان خلال الاجازة دي هظبط كل المسائل ولكن حدث مالم يكن في الحسبان…قبل الاجازة علطول وانا قاعد في الشغل اطلق الكمبيوتر صفيره ليعلن عن وصول ايميل جديد…وكانت المفاجأه…اعلان عن وظيفة شاغرة في احد اقسام الشركة…بالمسطرة زي ما انا عايز…بالمللي…الوظيفة..القسم..التخصص اللي انا عندي خبرة فيه…المواعيد المنضبطة…الاستقلالية في اسلوب العمل…الاحتكاك بشركات اخرى في السوق….تحفة تحفة تحفة وجاتلي في ميعادها ورغم كونها اقل ماديا من الوظيفة الحالية اللي انا فيها الا انها فيها كل طلباتي بالاضافة ان نوعية الشغل دي انا بحبها اوي…..ومكدبتش خبر وبلغت المدير بتاعي اني هقدم ع الوظيفة دي ورغم استياءة الا انه امام تصميمي لم يجد الا الموافقة وقدمت بالفعل وبدأت الاجازة متجاهلا كل مارتبت له من خطط ونوايا وصارت الوظيفة الجديدة هي محور تركيزي....وقضيت الاجازة بين الاوراق والكتب والكمبيوتر مستذكرا ومتذكرا شغلى السابق وما اكتسبته من خبرة اثق في انها لم تتاح لكثير من الناس في مثل سني....وبين الترقب والامل ذهبت لحضور المقابلة الشخصية...مدير ومهندس وانسه مختصة بالموارد البشرية (الاتش ار)...ساعة الا ربع...مناقشات بالانجليزية...اسئلة فنية...اسئلة اجتماعية ونفسية...ايه مميزاتك...ايه عيوبك....ايه اللي يخلينا نختارك؟...لوحصل كذا هتعمل ايه؟....لو جرى كذا هتتصرف ازاي؟....ايه الانجازات اللي حققتها في حياتك؟....اتكلم عن نفسك....وغيرها اسئلة تقنية كتير...وخرجت من المقابلة راضى عن نفسي ومتعلقا اكثر واكثر واكثر بأمل ارى انه خطوة جديدة في حياتي وتغيير هام في التدرج المهني بتاعي مش على مستوى الشركة بس لأ دا على مستوى الخبرات المكتسبة كمان...وبقيت منتظرا للنتيجة ومسترجعا ماحدث.....من بين 16 يوم مكنش يناسبني غير يوم واحد بس للمقابلة وبالصدفة تم تحديد المقابلة في اليوم ده فاستبشرت خيرا...زملائي كانت مقابلتهم بين 20 و25 دقيقة وانا 45 دقيقة فاستبشرت خيرا....ظروف كثيرة محيطة بالعمل حصلت في توقيتات معينة وغريبة ومتتابعة فاستبشرت خيرا....وفضلت منتظر على اعصابي...وبعد ماكنت بشتكي ان اليوم بيهرب مني وفي تطبيق رهيب لنظرية النسبية اصبح اليوم طويييييييييييييل ومابينتهيش....و قضيت الوقت اتشمم الاخبار التي تحاط بسرية مبالغ فيها في بعض الاحيان....واذا بالموبيل يعلن عن وصول رسالة جديدة استقبلتها بلهفة فاذا بكلمة واحدة.....بنا...وأحمد البنا هو زميل وصديق عزيز عليا اشتغلنا مع بعض اكثر من سنة في مكتبين متجاورين وهو اللي وقع عليه الاختيار
الحمد لله... والله اعلم بالخير فين....وربنا يوفق البنا ان شاء الله في مكانه الجديد ...بس يمكن اكون انا محبط الي حد كبير ويمكن دي غلطتي اني اتعلقت بالوظيفة دي بشدة..بس الحمد لله على كل شىء

خالو ميمي حبيبي

2007-11-02T13:27:00.000+02:00

عفوا كانت هناك مشكلة في تشغيل ملف الفيديو وتم حلها الحمد لله

اسمه محمود..يبقى خالي العزيز...جدتي – الله يرحمها- كانت بتدلعه ب"ميمي" زي أي أم مابتدلع ولادها..واحنا

عيلتنا ماشاء الله فيها ميمي وتوتو وناني ولولا عيلة دلع من الاخر..المهم نرجع مرجوعنا تاني لخالي محمود
زي ماقلت جدتي كانت بتقوله ياميمي...ورغم ان الواحد لما بيكبر بيستعيد اسمه الحقيقي تاني الا ان خالي كبر وكبر اسم الدلع ده معاه واصبح بينافس اسمه الحقيقي وبقوة...حتى في الشغل ورغم تعامله باسمه الحقيقي الا ان ماحدش بيستغرب لما اسأل عن "خالو ميمي" ..الاسم ماحدش بقا يستغربه ولا يستنكره حتى بالرغم من الشعيرات البيضاء التى ظهرت على رأسه وبالرغم من علامة السجود الواضحة على جبينه...والاعجب من كده ان نتيجة للتعاملات الاجتماعية ظهر لقب جديد بيستخدمه بعض الناس وهو " أستاذ ميمي" لأ وكمان "حاج ميمي"....غريبة صح؟؟؟..انا بقا مش مستغربها خالص..مش لأنه خالي..لأ..لأني اتعاملت معاه كأنسان وعارفه كويس وعاشرته وعارف انه ماينفعش غير انه يكون "خالو ميمي"...ايوه..مبقاش مجرد اسم او لقب عائلي بيتنادى بيه.."خالو ميمي" بقت كلمة وصفة لشخصية متميزة جدا ماتنفعش غير انها تكون "خالو ميمي"...انا اصحابي اللي يعرفوه بيقلوله " خالو ميمي" ...زوجتي وخطيبة اخويا بيقلوله "خالو ميمي"...جيراني الشباب بيقلولوا " خالو ميمي"...متخيل؟
خالو ميمي فيه شبه كبير من محمد صبحي في " يوميات ونيس" نفس الشخصية تقريبا مع بعض الاختلافات...كان زمان واحنا صغيرين اللي يلاعبنا كان هو "خالو ميمي" اللي يفسحنا كان هو "خالو ميمي" كان ياخد شباب العيلة كلها ونخرج خروجة شبابي...صياعة كده..من غير ظبط ولا ربط..نسافراسكندرية مع بعض..ومرة حصلنا هو على اسكندرية...شباب في شباب ومعانا "خالو ميمي"...كنا لما نتجمع في بيت جدي –ايام الخير والبركة- كانت ماما تقعد في وسط الصالة ع الارض ومعاها كل البمب والبلالين والصواريخ وتبدأ توزعها على عيال العيلة كلهم...ويجي بعدها دور "خالو ميمي"...نعمل قنابل بالبمب.. صواريخ ماشي....بلالين مليانة ميه.. نلعب استغماية اوكي..كورة مافيش مانع... كان دايس معانا في اي حاجة ..."خالو ميمي" احسن واحد يعمل طيارة بالبوص والدوبارة وورق الجلاد ونطيرها من فوق السطح...وكمان نبعت مع الطيارة جوابات...كانت الجوابات عبارة عن ورق مربع نعمل فيه فتحه

وندخل فيها الحبل ف الورقة تطير فوووق لغاية ماتوصل للطيارة نفسها...ء
ء"خالو ميمي" لما نقل شقته الجديدة –الكلام ده من كتير اوي مش عارف كام سنة- قالي انا خليت الصالة مفتوحة ع الصالون عشان يبقى في مساحة كبيرة نلعب فيها و نعمل فيها اللي احنا عاوزينه....حد فكر كده قبل كده؟؟؟؟ حتى ولو كان مجرد كلام؟؟؟؟

ء"خالو ميمي" الكل بيحبه..الكبير والصغير..ومن اول نظرة ومن اول مقابلة...خالي طيب اوي بجد...ساعات عصبي..بس الاغلب طيب...شايل هموم ناس كتير ومع ذلك بيضحك ويهزر ويبسط المواضيع...خالي مش ملاك....بس هو تركيبة جميلة من صفات واخلاق واسلوب معاملات تخلى روح الملاك مغلفة لصفاته...مجرد ماتقابله او تقعد معاه تحس انه صاحبك وتعرفه من زمان...يحكيلك عن شبابه وجوازه وحكاياته وماتحس معاه بالوقت ابدا...مابين التعب والالم تلاقيه بيبتسم...كتير بردو بيزعل ويشيل الهم ويقفل الموبايل ويشد سلك التليفون وينعزل...بس انا مش بقلق اوي من الموضوع ده...بسميه فترة شحن...يشحن عواطفه فيها...او يفرغها...ممكن؟ مش عارف...بس بيرجع تاني زي ماكان ومهما كان اللي جواه بيرجع تاني "خالو ميمي"ء
وهو نفسه اللي كان بيلعب معاك وانت صغير..تلاقيه بردو "خالو ميمي" معاك وانت بتجهز شقتك..وانت بتشتري شبكتك...وانت بتجهز لفرحك...وانت بتستقبل ابنك او بنتك اللي مش هيقوله ياجدو....لأ هيقوله بردو يا "خالو ميمي"ء
ء"خالو ميمي" عنده في البلكونة جنينة صغنتوته ومحندقة اوي..بيهتم بيها ع الاخر...اخر مرة كنت هناك اداني شتلة صبار صغيرة...وكمان مزاج عنده يغسل العربية يوم الاجازة.. طبعا العرية الجديدة...لكن القديمة بقا كان مزاج عنده كل يوم الاجازة يروح ورشة شكل..مرة الميكانيكي..مرة الكهربائي...مرة ينزل الوكالة...العربية اللي قبلها بقا كان بيفككها ويركبها كل اسبوع..كانت 126 بس كانت ايه...ماحكيلكش

خالو ميمي بقا دا حكاية
قصة حلوة وغنواية
حنانه بيخلق حنين

لذكرى ايام وسنين
ايام جميلة شوفناها
ولسه عايشه جوانا
نسرح تيجي ف خيالنا
نرمح تجري ويانا

حوادبت وحكاوي

2007-10-30T06:32:00.000+02:00

بداية انا بعتذر عن تأخري في الرد ع التعليقات ومتابعة المدونات
بس الحقيقة انا كنت محتاج –ولازلت- فترة من الوقت اركز فيها
محتاج فترة من التركيز لترتيب اولوياتي وتنظيم حياتي بكل مافيها
شغل واسرة والتزامات وهوايات من ضمنها المدونات
محتاج اركز عشان اعرف امشي
اليوم مبقاش مكفيني…اليوم بقى مجنون
انا بصحى الاقي اليوم خلص
مجرد ما اعمل حاجة او اتنين اليوم يخلص
مجرد ما اسرح لحظات اليوم بيخلص
مش عارف العيب في مين؟؟
في انا اللي مش عارف انظم وقتي؟
ولا في مواعيد شغلي الغير ثابتة؟
ولا فعلا الوقت مبقاش فيه بركة للدرجة دي؟
طب ايه الحل؟؟؟
هو دا اللي انا عايز اركز فيه الفترة دي
لازم الاقي حل ان شاء الله
لازم اظبط يومي
وهو دا اللي انا محتاج اركز فيه
يومين او تلاتة كمان بالكتير
وبالرغم من كده
كان لازم اكتب البوست ده
عشان ارحب بمدونة جديدة ع البلوجسفير
حواديت وحكاوي
مدونة ابن خالي العزيز مصطفى
في خطوة ايجابية وجامدة جدا لمتابعته المدونات
وفي سابقة تعد الاولى من نوعها في عائلتنا الكريمة
المليئة بالمشاكل والمهاترات
حبيت اقوله الف مبرووك
وهنستني منك الكثير ان شاء الله
وبذكر ابن خالي لازم اتذكر خالي نفسه
خالي محمود
اللي ماينفعوش كلمتين في بوست
لازم يكون له بوست كامل لوحده
انتظروني ان شاء الله في البوست الجاي
في مناجاة شخصية و في كلام من القلب
في احساس هنقله …زي ماهو من داخل قلبي
بدون تشكيل ولا ضمة ولا فتحه
انتظروني البوست القادم
مع
خالو ميمي حبيبي

خمسة فرفشة وبوست جديد

2007-10-23T22:58:00.000+02:00

ازيكوا ياجماعة
يارب تكونوا بخير
انا عجبني الفيديو دا
وضحكت عليه
وحبيت اشارككوا معايا
يارب يعجبكوا

********************************

Visit Me!

فودافون والعمل الخيري
بوست جديد
على مدونة
انا فودافون

شيكاجو

2007-10-18T16:50:00.000+02:00

لعنة شيكاجو...وكأنها تعويذة سحرية تلقى على من يعبر الى بلاد العم سام قادما من ارض الاهرامات وبين الهروب من الواقع والرغبة في النجاح تتأرجح رغبات ابطال رواية شيكاجو لعلاء الاسواني والتي اقتحمت دور النشر والمكتبات بعد نجاح روايته الاولى عمارة يعقوبيان فضلا عن تحويلها الى فيلم سينمائي ضخم

لعنة شيكاجو هي الكلمة التي طرأت الي تفكيري لحظة الانتهاء من قراءة الرواية حيث انتهت الى نهاية مأساوية وحزينة لجميع ابطال العمل وبصورة نسبية,كل حسب حياته و ثقافته وبين ذكريات الماضى ويقظة الحاضر وغموض المستقبل امتدت خيوط الرواية لتجمع بين شخوص مختلفة فبين استاذ معتز بمصريته واخر منكر لها وبين طالب علم واخر يدعيه اكتمل نسيج الرواية وخرجت في ابهى حلتها لتمتعنا بسرد التشويق اساسه والامتاع هدفه والاحتراف سبيله

تدور احداث الرواية في ولاية شيكاجو الامريكية وتحديدا في جامعة الينوي والتي تحتتوى على اكبر قسم لدراسة علم الانسجة في العالم حيث تتلاقى الازمنة وتتصادم بعض الاحيان بين جيلين من المصريين, الجيل الاول وهو الطلبة المبعوثين للحصول على درجة الدكتوراه بما في حياتهم من مشكلات وهموم وعادات وتقاليد حملوها معهم من مصر بغض النظر عن ان كانت تلائم الواقع الجديد ام لا, ذلك الواقع الامريكي الذي ارتبط بكل شخص بما يتناسب مع اهوائه واهتماماته فنرى ناجي عبد الصمد الطالب ذو النشاط السياسي والمناهض للحكم في مصر يفكر اول مايفكر في ممارسة الجنس بمجرد وصوله الي شيكاجو ورغم دفاعه عن الاسلام وقيمه الا ان ذلك لايمنعه من شرب الخمر ونرى شيماء المحمدي الطالبة الملتزمة تبدا في كسر القيود والضعف امام الهوى والاغراءات وتتنازل

عن التزامها مقابل سويعات من اللذة تقضيها مع من نصبته زوجا مستقبليا لها دون حق وهو طارق حسيب الطالب المجتهد والمنزوي في غرفته والمتفوق في دراسته التي لم يلبث ان اهملها بغرقه في بحور اللذه مع شيماء وعلى الجانب الاخر حيث نرى الخسة والنذالة والخيانة والاستغلال في شخصية احمد دنانة ذلك الرجل المتظاهر بالتدين الباحث عن المصلحة بشتى الطرق واولها كتابة التقارير عن زملاءه واستغلال علاقاته في بسط نفوذه عليهم والتحكم في مقاديرهم لينال في النهاية المناصب والاموال ومن قبلها الرضى السامي ...ومن بين صراعات هذا الجيل ومحاولة كل من فيه رسم مستقبله كيفما اراد نرى الجيل الاخر يتقلب بين ذكريات ماضيه وواقع حاضره وهو جيل الاساتذه المصريين الذين قرروا الهجرة من مصر في وقت بلغ الظلم والتخلف والفقر مداه-او هكذا ظنوا-حيث نري الدكتور رأفت ثابت المصري المتأمرك حتى النخاع فهو يكره مصريته ويكره كل ماهو مصري مذكرا اياه بالتخلف والهمجية والواسطة والمحسوبية ولكن هذا النكران طال الاخلاق والقيم والتقاليد المحمودة فتأمركت معه وان ظلت بقلبه لترسم نهاية حياته صريعا تحت سيفها وعلى النقيض منه نرى الدكتور محمد صلاح المتمسك بمصريته وان هجرها في الملبس والحياه الا انها بقت في قلبه يشعلها حبه القديم –زينب- الثائرة على الاوضاع والتي دائما ما كانت تتهمه بالجبن والسلبية فقرر الهجرة ليبتدي حياة اخري او ربما هروبا من حياة سابقة, وهربا من اضطهاد استاذه يقرر الدكتور كرم دوس القبطي الهجرة الي الولايات المتحدة ليحقق حلمه في ان يصبح استاذا في جراحة القلب ليرسم بكفاحه ملحمة مشرفة تجعله يقول وهو يستمع لام كلثوم " لقد عملت على مدار ثلاثين عاما لاستمع الي ما احب في غرفة العمليات" وتدور الايام ويرقد الاستاذ تحت يد تلميذه استاذ جراحة القلب في مشهد مؤثر تملؤه الدموع ومشاعر الاعتذار

انطلقت هذه الشخصيات بين جنبات الرواية في احداث مثيرة وشيقة ابتدعها باقتدار قلم علاء الاسواني ومعها رسم ملامح اخري للمجتمع الامريكي عن طريق شخصية جون جراهام الدكتور الامريكي المناضل السابق والثائر على السياسات الامريكية وصديقته كريس السوداء والتي تعاني التفرقة العنصرية الغير معلنة بسبب لونها مما يؤدي بها الى طريق مظلم اسجداء للعمل وهناك دينس بيكر الاستاذ الجامعي المتألق بعلمه وخبرته ونظام حياته ولم ينسى الكاتب رسم يد المخابرات المصرية في صورة الضابط صفوت شاكر والذي بجسد مبدأ الغاية تبرر الوسيلة...اي وسيلة. وكانت النهايات المأساوية من نصيب ابطال الرواية كلهم بين الانتحار والفشل والاجهاض والسجن وايضا السقوط في براثن السلطة كما حدث لاحمد دنانة

الرواية كانت من الروعة والتشويق ما مكن الكاتب من الامساك بتلابيب القارئ من بداية الرواية الي نهايتها وايضا الحرفية العالية في رسم الاشخاص والاماكن وترابط الاحداث ولكن لم استسغ قط كمية المشاهد الجنسية في الرواية حيث يشترك جميع الابطال في مشاهد جنسية مفصلة في بعض الاحيان فبين ممارسة العادة السرية والافلام البورنو الي بائعات الهوى الي زوجة قتلها الشبق ففضلت امتاع نفسها وصديقين حلقا في سماوات المخدرات واستمتعا كل بالاخر..مشاهد كثيرة اغلبها لم اجد له وظيفة في سياق الرواية وان وجد فلا اجد داع لسرد تفاصيل جنسية لا تقدم لي أي افادة
شيكاجو كانت الرواية الثانية لعلاء الاسواني عن دار الشروق...فهل من مزيد؟

خالص تحياتي
محمد سمير

عزو ولقاء المدونين

2007-10-15T23:39:00.000+02:00

من موائد الافطار العامرة الي ليالي العيد الساهرة..دارت بينا الايام ومرت الساعات علينا ثواني ونرجع تاني وبعودة الايام...رمضان اهو خلص والعيد اهو عدى وكله رجع من تاني..اللي رجع لشغله 8 ساعات من تاني واللي رجع لدراسته واكتشف ان امتحانات الميد تيرم ع الابواب وهو مفتحش كتاب واللي رجع من تاني يفتح مدونته وينضف التراب اللي ع الابواب..كل سنة وانتوا طيبين ويارب كل ايامكوا تكون جميلة وسعيدة وكلها خير وبركة

تحية خاصة للفنان يحي الفخراني على نجاح مسلسل يتربى في عزو واللي كان رائع الي ابعد الحدود....حماده عزو موجود كتير اوي في حياتنا ويمكن يكون صورة مصغرة لشعبنا عايشين ع السمعة والحضارات...يعني بدون الدخول في تشبيهات وتفسيرات...المسلسل كان ممتع جدا جدا واداء يحي الفخراني في الحلقة الاخيرة المفروض يدرس...انا بيتهيالي الراجل خرج خلاصة خبرته في التمثيل في الكام مشهد اللي كانوا بعد موت ماما نونا...تحية خاصة جدا جدا لكل المبدعين في المسلسل ده
*************************

قبل العيد بيومين وتحديدا في 29 رمضان اتشرفت بلقاء مجموعة جميلة من المدونين اللي بجد سعدت جدا بوجودي معاهم اليوم ده...فطرنا مع بعض وجلسنا نتجاذب اطراف الحديث بعد الفطار مابين السياسة والموضوعات العامة
كان الجندي المجهول في هذا الحدث هي العزيزة عاليا حليم واللي كانت حريصة على ارضاء كل الحضور بنشاط تحسد عليه وصبر جميل...كل سنة وهي طيبة ودايما مجمعانا
وكان ضيف الشرف هو الاستاذ خالد الصاوي الفنان والمدون المحترم واللي اسر عيون الحاضرين واذانهم ببساطته اسلوبه ورشاقة كلامه ووضوح افكاره...راجل محترم م الاخر
وكمان حالفني الحظ الجميل بلقاء المدون الممتاز مصطفي الحسيني صاحب البوابة المتألق واللي اكتشفت فيه كاريزما جميلة جدا بتجذب كل من يجاذبه اطراف الحديث بالاضافة لثقافته وقوة اسلوبه وانتقاءه لمفردات الكلام وروحه المرحة والجميلة..بجد بجد ربنا يبارك له في حياته ونشاطه ويوفقه
واذا ذكرنا الكاريزما العالية ذكرنا مها صاحبة مدونة سكوت هنصوت واللي تخطف تركيزك من اول لقاء وتحس انها اختك او بنت خالك او قريبتك وانكوا اتربيتوا سوا...بجد شخصية جمبلة اوي ومحترمة جدا واجتماعية بشكل رشيق تنقل به من موضوع للتاني ومن جماعة لاخري....سعدت بلقائها جدا
وعن الرقة نتحدث...منى صاحبة مدونة نبضات...رقة الاسلوب وهدوء الكلمات والبسمة التي لاتفارق محياها لم اتشرف بالكلام معاها كتير وان كانت التحية تكفي...سعدت بوجودها الهادىء جدا
وفي القلب كانت هناك رشا صاحبة مدونة مكان في القلب..رشا كانت ديناميكية بطريقة رائعة واحتلت باسلوبها مكان في قلب الحضور وكان لها نصيب من اسم مدونتها وصاحبها في حفل الافطار ولدين كوماندوز وياسمين مسؤول مخابرات هادية طول الوقت ولكنها تراقب الموقف بعين صقر...ربنا يخليهملها ويبارك فيهم ولها
وينكي...كنت دايما متخيلها انسانة هايبراكتيف والحقيقة اني لما شوفتها انطباعي ما اختلفش كتير..فعلا انسانة نشيطة وكلها حركة ومرح وابتسامتها دايما منوره لكنها جت على اخر اليوم وكانت خلاص نفسها في جرعة الشيكولاتة...معلش ياوينكي كان في نيتي اجيبلك شيكولاتة بس الوقت سرقني
وكان ضمن الحضور اللي للاسف لم اسعد بالكلام معاهم زي د.اشرف حمدي صاحب مدونة كاريكاطظ ومندهش صاحب رسالة من تحت الماء وحورس صاحب مدونة جيفارا مات (الله يرحمه) وايمي صاحبة مدونة ايميز وكمان فاطمة واحمد وغادة من غير المدونين
سعدت جدا في اليوم ده وفرحت اوي بمعرفتي لناس جميلة جدا يمكن مايعرفوش حياتي اتشكلت ازاي بعد لما دخلت عالمهم....وخصوصا لما قابلتهم وعرفتهم
لفته جميلة حصلت من زوجتي العزيزة سارة وهي ان اليوم دا كان موافق لعيد ميلادي وفاجأتني بانها جابت كانز بيبسي
لكل الحضور في حركة شيك بجد بجد باشكرها عليها وخصوصا ان قبلها كانت جابتلي ميدالية فضة قيمة للغاية وبرفان
ممتاز... المشكلة اني باشعر ببعض الاحراج من الاحتفال بعيد ميلادي وبحاول قدر الامكان اني اكون في الشغل في اليوم ده ولك ان تتخيل كمية الاحراج اللي بكون فيها لما حد يديني هدية ببقى عايز اختفى في لحظتها...ومحدش يسالني ليه لأني ماعرفش
اليوم كان جميل اوي اوي واتمنى ان شاء الله انه يتكرر من وقت للتاني وبمجموعة اكتر من المدونين
ء*عذرا ياجماعة..اللينكات هاضيفها لاحقا لاسامي المدونات
ء**صورة خالد الصاوي من مدونة مها-سكوت هنصوت
************************

Visit Me!

ليلة العيد
بوست جديد
على
انا فودافون

العيد فرحة

2007-10-09T12:09:00.000+02:00

كل عام وانتم بخير
يعني
كل سنة وانتوا طيبين
وراضيين
وفرحانين
ومبسوطين
وناجحين
كل سنة وكل حاجة حلوة في حياتنا دايمة
واي حاجة وحشة من حياتنا زايلة
واحتفالا بالعيد السعيد
وبغسيل السجاجيد
وتحضير الكحك
واللبس الجديد
المدون في اجازة
والمدونة تحت التجديد
وبعد العيد
نقعد مع الحكواتي
يحكي احلى ذكرايتي
على مجموعة حلقات
افتكر كينيا والغابات
وروسيا واحلى البنات
وف الكونغو حراسة العسكر
وتوهتنا ف صحرا النيجر
تونس بقى دي حكاية
حلوة وخضرا وغنواية
وعسلامة ياتونس غنيتها
من جوا قلبي حبيتها
وف بوركينا يامين يدارينا
والله روحنا ولفينا
وكل عيد يكون سعيد
ويارب ليكوا العمر المديد
وكل سنة وانتوا واحنا
طيبين واحلى ما احنا
والسنة اللي جايه احلى
م انهاره وامبارحنا

موقف طريف وبوست جديد

2007-10-06T12:19:00.000+02:00

موقف طريف اتحكالي
بيقولك ان واحد راح يشتري كارت شحن موبينيل بعشرة جنيه
جه بيدي الراجل عشرة جنيه الراجل قاله لا يا استاذ الكارت بحداشر ونص
قاله ازاي دا القرد قال بعشرة بس
قاله روح اشتري من القرد
: )))))))))))
الموقف ده ضحكني مووووت
واضح ان الكروت كانت من اللي لتوزعت في السوق قبل العرض ماينزل
وكان الحل ان العميل يدفع الضريبة وتنزله زياده في الرصيد لغاية ماكمية الكروت القديمة تخلص

المهم
كلمنى شكرا
بوست جديد على مدونة
انا فودافون
هستناكوا هناك

دووووس هنا

ميسدات 3

2007-10-02T19:41:00.000+02:00

اكتشفت ان انا مدمن مدونات
حد يوصفلي علاج

87%

100% Free Personals from JustSayHi

فعلا التدوين والمدونات بقوا يخدوا حيز كبير من تفكيري ووقتي
لكني الفترة دي بحاول بكل الطرق وبجدية شديدة اني اخرج كل اللي عندي في اقل وقت ممكن عشان اعرف انجز في حاجة تانية
وخصوصا اني ملتزم بكذا حاجة تانية
يعني
للحديث بقية

*********************************

كنت واقف مع واحد صاحبي من كام يوم بنتكلم
يعني بناخد وندي في الكلام
وفحأه صاحبي عطس
هو:الحمد لله
انا:يرحمكم الله
هو:اشطه
!!!!!!

*********************************

انتهيت في الشغل من عمل سكريبت(برنامج) ممتاز اوي
البرنامج ده بيراقب اللينكات اللي بتربط شبكة الموبيل ببعضها وبتربطها بالشبكات التانية زي موبينيل كده
ولو في لينك معين عليه مشكلة بيبدأ البرنامج يحل المشكلة دي اوتوماتيك
وفي الاخر خالص بيبعت تقرير مفصل عن كل المشكلة والتوقيت بتاعها وخطوات حلها ونتيجة الحل
والحمد لله القسم كله بيشتغل بالبرنامج ده دلوقتي وخصوصا انه خلى المهمة دي سهلة
انا مبسوط جدا من الموضوع ده لأني اتعلمت لغة البرمجة دي مع نفسي كده وخصوصا انها لغة مش منتشرة وخاصة بالاجهزة دي بس وكمان البرنامج معقد اوي وفيه اختبارات كتير ...الكود مكتوب في اكتر من 15 صفحة
الظريف في الموضوع بقا اني استخدمت في البرنامج متغيرات (رموز لمن لا يعرف البرمجة) زي

LEMONADA
WINKY
SHOKIER
BOCYCAT
ENSANA
ALIAHALIM
MAKSOFA
DESERTCAT

يعني من الاخر التدوين بردو كل دماغي حتى في الشغل
اللي خلاني اكتب عن الموضوع...ان انهارده طلعتلي الرسالة دي
ERROR: UNKNOWN VARIABLE “WINKY”, RUN STOPPED

*********************************

بشري سعيدة
اخيرا...وبعد انتظار
جوجل في القاهرة

الصورة والتعليق من مدونة سامو

*********************************

Join me in Facebook
If you like

I've requested to add you as a friend on Facebook. You can use Facebook to see the profiles of the people around you, share photos, and connect with friends.Thanks,

Mohamed Samir

Here's the link:
http://www.facebook.com/p.php?i=809650176&k=42M34WPZR4T1XJMCUK4U&r&v=2

تحياتي

خط احمر

2007-09-30T16:50:00.000+02:00

استقبلت انهارده تعليق جديد على بوست ميال
الحقيقة التعليق كان يحتوي على الفاظ ان نمت على شىء فانها تنم عن
عقل غير سوي
سوء اخلاق
دناءة نفس
قذارة لسان
تفاهة تفكير
والغريب انه كان من بنت
في نهار رمضان
نصرة لتامر حسني
هيافة وتفاهة‏ وفراغة عقل غير محدودة
طظ في تامر حسني على عمرو دياب على صاحبة التعليق
راعي حرمة رمضان ع الاقل
وبما ان التعليق كان سافل
وبما انه طالني وطال اصحاب باقي التعليقات
للاسف ليس لدي الاختيار

COMMENTS WILL BE MODERATED

صبح صبح ياعم الحاج

2007-09-28T21:32:00.000+02:00

كالعادة خبر جديد من مصراوي والحقيقة انه خبر طريف وعلى شاكله شر البلية مايضحك والخبر كان بعنوان البوحية..ديانه جديدة... بيقولك ايه بقا..خير الله ما اجعله خير شخص اسمه مجدي وديع مهنا في الستينات من عمره خد بعضه وطلع على مكتب السجل المدني في الاسكندرية عشان يطلع بطاقة شخصية وكتب في خانه الديانة بوحي...بوحي....بوحي ايه ياعم الحاج؟ قالك بوحي دي ديانة منشقة عن الطائفة المارونية وترجع الى القرن الرابع الميلادي في لبنان واسسها يوسف شميس البوحي اللي يعتقد انه نبي والاب الروحي لهذة الديانة وكمان يعتقد ان بوحه ده...اقصد يوسف البوحي هو نفسه بذات نفسيته النور والحياه والهواء بالصلاة ع النبي...وصرح بان هدفهم الاساسي هو الغاء الماده التانية من الدستور المصري وان ديانتهم بتسمح بالزواج بدون اوراق او مستندات او حتى اجراءات وان قبلتهم هي لبنان حيث دفن نبيهم بوحه...يووووه اقصد بوحي

هي ناقصة بوحيين كمان...يعني انت ياعم الحاج جاي بعد ستين سنة وتفتكر انك لسه ماطلعتش بطاقة وكمان جي تكتب بوحي...بوحي ايه بس..دا كلام..وبعدين قرن رابع ميلادي ايه..دا بوحه لسه كان من سنتين انتاج السبكي فيلم...وحتى لو كده حد يعمل قبله صلاته لبنان؟؟؟؟ لبنان ياراجل..مش راكبه خالص الصراحة...يانهار ابيض لبنان حيث الاخت الفاضلة هيفاء وهبي والست اليسا والاخت رولا سعد والناس الكمل دول وما خفي كان اعظم...ودا الواحد يحج عندهم ازاي دول
لا وكمان هدفهم الاساسي المادة التانية من الدستور اللي واكلة دماغ الناس كلها مش عارف ليه رغم ان اكتر ناس بتاخد على دماغهم في البلد هما المسلمين..ما علينا مش موضوعنا

واضح ان محمد سعد كان ليه تاثير كبير على الناس وبكره تلاقي الديانه اللمبية والكركرية ويظهر اسم النبي كركر...حلوه لما يكون في نبي اسمه كركر
انا مش عارف بس حسيت ان الخبر ده متفبرك ومش حقيقي لأنه لو حقيقي يبقى الناس دماغها ضربت ويبقى بجد صبح صبح ياعم الحاج
وسمعني سلام بوم بوحه بوم

علامة استفهام

2007-09-27T09:02:00.000+02:00

ردا على دينا

بوست جديد على مدونة

انا فودافون

طويل شوية

بس محتاج رأيكوا

انا صح ولا غلط

؟؟؟؟

دووووووووووس هنا

تاج جامد جدا

2007-09-24T01:30:00.000+02:00

التاج الجامد ده جالى من العزيزة ماعلينا وكمان من منى صاحبة مدونة ماي هوب

ومش بس كده دا كمان جي معاه مائدة رحمن كاملة من ماعلينا
يلا ياجماعة كلوا واشربوا واقروا التاج وقولوا رأيكوا
بسم الله نبدأ

لو قالولك اختار عصر من عصور مصرعلشان تعيش فيه تختار اى ‏عصر و فى عهد اى حاكم .. واشمعنى؟
يعني بغض النظر عن الحكام..انا كنت اتمنى اعيش في الاربعينيات والخمسينيات
ايام الابيض واسود والحياه اللي كان كلها بركة وطيبة وهدوء وشوارع فاضية
والتمشيه ساعة المغربية على كورنيش النيل والمراكب الشراعية وناي بيعزف لحن الوفاء
كانت الناس عايشة كويس رغم الاحتلال والمظاهرات والقلق
احب اعيش ايام حليم وفريد الاطرش
كانت ايام جميلة على ما اتصور وعلى رغم اللي بنقراه عنها

اول ‏اولويه فى حياتك عيلتك ولا شغلك ولا اصحابك؟
اول اولوية في حياتي عيلتي طبعا

ايه اكتر ‏حاجه بتحبها فى رمضان؟
ساعة قبل الفطار
والناس رايحة بيوتها وبتشتري التمر والسوبيا والطرشي
ومنظر موائد الحمن والناس مستنيه ساعة المدفع وكلمة الله اكبر
ساعتها بحس ان فعلا رمضان جانا

اوصف ليا ‏اجمل فطار ممكن تفطره
كان زمان..لما كانت عيليتنا كلها بتتلم من شرقها لغربها
كان بيبقى فطار جمييييل اوي
بس خلاص بقا الدنيا بقت مشاغل والناس انشغلت عن بعضها
والتليفون بقى بيقرب المسافات وبيبعد الناس
بجد حزين اوي ع الايام دي

لو انت ‏حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم ‏عادل؟
هحاول قدر الامكان اني اكون عادل في كل شىء معاهم
وهطلب دايما بصفة دورية تقييم لنفسي من كل واحد فيهم عشان فعلا كل واحد يقول رأيه واقدر اصلح من نفسي
الحاكم ما هو الا منسق للعمل مش اكتر (المفروض يعني)ء

اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟
اللي بيبوظ الحكام الحاشية بتاعته...من نفاق وتملق واظهار للباطل واخفاء للحق
حتى لو الحاكم كويس ممكن يشوف بعيون حاشيته اللي يخليه شيطان

مين ‏أكتر اعلامي مصري بتحترمه؟
محمود سعد...بحترمه لصراحته

قريت ديوان عمر مصطفى صاحب بلوج تجربه " اسباب وجيهه للفرح" ‏عن دار ملامح و لا لسه ؟؟
لا.. ما قريتوش

لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟
دبلوماسي

ايه تانى بلد تتمنى تعيش فيها بعد ‏مصر؟
تونس

اوصف ليا ‏ترتيبات اجمل فرح ممكن تحضره
اجمل فرح ممكن احضره اللي البوفيه بتاعه يكون بوفيه مفتوح ومملوء بما لذ وطاب
وقتها بس يبقى العريس صحبى وحبيبي وكفاءه

بتراعي ‏كلام الناس والقيل والقال؟ لو اه او لو لا قول لى ‏ليه؟
مقدرش اقول اني بتجاهل اراء الناس والقيل والقال
لكن بردو اقدر اقول وبكل ثقة اني كتير اوي بطنش واقول كلمتي المشهورة
طظ في أي حد مش عاجبه..انا مبعملش حاجة غلط ولا عيب
انا طالما براعي ربنا وبراعي احترامي لنفسي يبقى خلاص

صحيت من النوم ما لقيتش الموبايل ولا الكمبيوتر ولا ‏الكاميرا الديجيتال
ولقيتنا ‏رجعنا لعصر الحمام الزاجل والحصنه هتكون سعيد؟
اه بس بشرط يكون عندي قصر واسطبل خيل وخدم بقى وجواري
خلينا بقا نعيش يومين

السعاده ‏هى؟
السعادة هي الرضا
هي الحاجة اللي بتحس بيها لما تاخد نفس عمييييق وتقول
الحمد لله

عندك أمل ‏؟؟ أسبابك ؟
الحمد لله
عندي امل لان ربنا رحمته واسعة واسمه الرحمن

لما تحب ‏تهرب من كل شئ بتروح فين؟
باكل او بنااااااام

امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟
ربنا يخليك ياباشا بلاش السؤال ده
احسن دا تاعبني نفسيا ومأزمنى عصبيا
الظاهر الواحد كبر فعلا
للاسف

لما ‏بتعمل عمل خيرى بيكون ايه هو دافعك الاول؟
رضا ربنا سبحانه وتعالى عني وطمعا في ان الحاجة دي تشفعلى الذنوب الكتير اللي بعملها
وكمان بحس بعدها اني مرتاااااااح وان نفسي اتطهرت من حاجات كتير

بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟
لا مش بشرب سجاير
ومش بتفرق معايا اوي ان كان اللي بيشرب السجاير ولد ولا بنت
بس البنات سنانها وصوتها بيبوظ من السجاير
ودا بضايق منه مووووت

بتعرف ‏ايدك اليمين من الشمال ازاي؟
هما اللي بيعرفوني حضرتك

ايه اكتر ‏اله موسيقيه بتحبها ؟ ؟
الكمان والناي

فى رأيك ليه الذوق والنخوه ‏اتعدموا؟
عشان هموم الناس كترت

ايه ‏الحاجه اللى لو حصلتلك تبقى سعيد قوى؟؟؟
حاجات كتير نفسي فيها

تختار ‏يبقى عندك...ارض زراعيه ولا اجنس عربيات و لا كام عماره و لا فلوس فى ‏البنك؟؟؟؟
اختار يبقى عندي فلوس في البنك
اشتري بيها المزرعة
وابني العمارات
واشتري العربيات

البحر و ‏لا النيل؟؟؟
البحر شباب وحرية وقوة وانطلاق
النيل طيبة وكرم وحنية وتاريخ
الاتنين بيكملوا بعض

مركب و ‏لا طياره؟؟
طيارة....عشان ياننجز يا نخلص

مجنون و لا ‏عاقل؟؟
مجنون بس بعقل

تقرأ ‏كتاب و لا تتفرج عليه فيلم؟
الكتاب اكيد....لان وقتها خيالك هيكون احسن من مليون مخرج وممثل

بتمرر ‏التاج لمين؟؟؟
لا مش كتير

بوسي كات
بيبو –قلوب حائرة
ليموناده
هنا
ايوية
عبده محتاس
قطة الصحراء
ياحلاوة يا عيال
عاليا حليم
عصفور بلا اجنحة
مش قادرة
Rack-your minds
Rania-Feelings

انا كمان هابعت مع التاج قمر الدين بالمكسرات عشان الكل يحلي

NEW POST ON ANA VODAFONE- CLICK HERE

انا فودافون - مدونة جديدة

2007-09-22T21:31:00.000+02:00

انا فودافون

مدونة جديدة

من

غمض عينيك

زورزنا تجدوا مايسركم

دووووووس هنا

عبد الحليم حافظ

2007-09-20T08:02:00.000+02:00

وانا ع اليوتيوب لقيت فيديوهات جميلة اوي للعبد الحليم حافظ وعلى طول افتكرت عاليا حليم صاحبة مدونة عندليبيات
وحبيت اعمل الوست ده اهداء خاص

عبد الحليم حافظ - عبقرية الاحساس

عبد الحليم حافظ- حفلة في الجامعة

عبد الحليم حافظ-اخر اتصال تليفوني

عبد الحليم حافظ يتحدث عن ام كلثوم

عبد الحليم حافظ مع فريد الاطرش- حوار رائع

الله برحمك ياحليم

الاهلي ودجاج كنتاكي

2007-09-17T23:53:00.000+02:00

بعد لما الدوري الموسم اللي فات خلص

وبعد لما الكاس كمان حصله

كان في ماتشين جامدين اوي

الاهلي والزمالك

والاهلي والاسماعيلي

وطبعا الاهلي روقهم بالادب وبالذوق

وطلعت الجماهير تقول ع الاسماعيلي الكتاكيت الصفرا وع الزمالك الفراخ البيضة

اوم ايه

بعدها علىطول الاقيلك الزمالك حاطط صورة اخونا كنتاكي علي صدر التي شيرت وضهره

يعني ختم ولا مؤاخذة

وبكده بقت رسمي وبقا الاهلي بيلعب مع دجاج كنتاكي

الدجاج فط ونط وقعد يجري في الملعب

كاك كاك كاك

الاهلي حلق عليه

دبحه

مبروك للاهلي

ولا عزاء للدجاج ولا الكتاكيت

الحب دنيا

2007-09-17T00:47:00.000+02:00

هذة الكلمات ليست بشعر ولا بزجل ولا كقطعة ادبية ولكنها مجرد خاطرة بين طياتها...رسالة

غمض عينيك

وارقص

وغني

الدنيا حلوة

والحب فرحة

وبين الحب والدنيا

خطوة

لا

دا الحب دنيا

مش بس همسة وكلمة

ولا حتى ورده حمرا

ولا لمسة شوق بين احبه

الحب دنيا

فيها شوق وحنيه

فيها شكوى وعصبية

فيها رسمة واغنية

فيها دمعة وامنية

وممكن غلطة فنية

الحب دنيا

فيها قلبين عاشقين

وبنبض واحد عايشيين

ربطهم الشوق واللهفة

وحفظهم حارس امين

طب ليه بالحزن راضيين

دا حتى

الحب دنيا

والدنيا حلوة

غمض عينيك

وارقص

وغني

دي الدنيا غنوة

تلاتة رمضان

2007-09-16T01:52:00.000+02:00

النهار ده 3 رمضان...رمضان كريم...والنهارده خلص خلاص والناس شوية وهاتتسحر عشان صيام بكره
رمضان اللي لسه كنا بنقول هالل علينا...وكلها يومين ونغني كمل بدري بدري
الوقت بيجري بسرعة اوي...بنتسرق من غير مانحس وياتري بنعمل ايه
الحياة قصيرة اوي..ولا ياتري احنا اللي ايامنا بقت زحمة اوي واليوم مبقاش مكفينا؟
اليوم بقا ساعتين مبقاش 24 ساعة زي زمان
زمان لما كان واحد يديك ميعاد بعد ساعة كنت بتقول يااااه ساااعة...دلوقتي الساعة بقت زي ال 5 دقايق
مين فينا اصلا نسي رمضان اللي فات؟؟؟...انا فاكره زي امبارح
لما والدتي قالتلي...خلاص يابني رمضان نص تسعة...قلتلها نعم..هو لحق؟ مش لسه مخلصين صيام
سبحان الله السنة بقت زي الشهر والشهر بقا زي اليوم واليوم بقا زي الساعة حتى الساعة بقت زي الدقيقة
هي البركة اتشالت ولا ايه؟
ومش في الوقت بس
لا
في الفلوس وفي النفوس كمان
مبقاش في بركه في اي حاجة
ونغني ونقول
يابركة رمضان خليكي...خليكي في الدار