اخيرا قررت

انا اسمي محمد

معايا موبايل نوكيا

هتساعدني؟

ء

دا كان ملخص الحالة اللي وصلتلها من شهر

من يوم ماقلت يا موبايل وانا نوكياوي

نوكياوي متحمس

غيرت خمس موبايلات نوكيا

وكمان جربت سامسونج

الوان بقا وحركات

بس رجعت للطريق القويم

سامسونج دا مش بتاع رجالة ياعم

دا عايز شنطة بناتي يتشال فيها

الحقيقة انا عمري ما اشتكيت من نوكيا قبل كده

رغم اني بفحت التليفون اللي معايا

بحب استخدم كل امكانياته

كل حاجة

مكالمات..كاميرا..انترنت

كالندر..شات...برامج خاصة بشبكة المحمول

بص كل حاجة في الموبايل

لغاية ما اشتغل الجيل التالت

من ساعتها وانا بعاني

الموبايل اللي معايا بقا بطيييييييييء

وبيهنج وبيوقع شبكة وبيعمل ريستارت كده مع نفسه

ومبقاش يسعفني

اصل انا اوقات كتير بتوحد مع الموبايل وبعيش انا وهو وبس

سعات بحس انه كائن حي عايش معايا وبيني وبينه اسرار محدش يعرفها

بس اخر واحد ده تعبني نفسيا

بقيت عايز اكسره وهو لسه مكملش 3 شهور معايا

وسألت اصحابي وزمايلي وبجد كله اشتكى

ومن هنا بدأت الفكرة

وكبرت وتشعبت وانتشرت

وبعد تردد كتير اخدت القرار اخيرا

لازم اكسر القيود النوكياوية

وفعلا بعد بحث وسؤال وتجربة ولف ودوران

قررت اجيب سوني اريكسون

والحقيقة اني بحمد ربنا ع الاختيار ده

بقاله معايا شهر دلوقتي تقريبا

مش فاضي استكشفه كله وان كنت بدعبس فيه كل لما افضى

بس كل يوم بكتشف فيه حاجة جديدة تبهرني

التليفون ما شاء الله سمارت اوي

لما بفكر في حاجة بلاقيها

وساعات الاقي حاجة تخليني ممتن جدا للي صمم الموبايل ده

سريع الي حد كبير..الكاميرا بتاعته تحفة

very very very SMART

والغريب ان في هجرة غريبة شفتها لتليفونات سوني اريكسون

كله فعلا بيشتكي من نوكيا

او قطاع كبير من الناس...ملحوظ اوي

وكل ده بعد دخول الجيل التالت

نوكيا شركة محترمة وضخمة واسمها ليه وزن

واعتقد انها هتتلافى الموضوع ده في الاجهزة الجديدة

ومع ذلك انا ممتن جدا للفترة اللي قضيتها كعميل لنوكيا

التليفونات كلها -عدا اخر واحد- عمرها ماخذلتني

بالعكس يمكن اقول انها ساعات كانت بتحس بيا

انا قضيت فترات كبيرة ياجماعة لوحدي في بلاد غريبة وفي اماكن اغرب

كان الموبايل هو سلوتي بجد

ولكن هكذا الدنيا

C'EST LA VIE

من نوكياوي قديم

اهلا وسهلا سوني اريكسون

عن الاستفزاز نتحدث

عمرك حسيت ان الاخبار بتطلعلك لسانها...عمرك حسيت انك وانت بتقرا الجرايد ان اللي كاتب الخبر ده قاصد ينرفزك....او ان اللي قال التصريح ده انسان مستفز بجد وبيستعبطك....الحقيقة اني حسيت بده كله...وبحسه كل يوم وانا بشوف الاخبار واقرا الجرايد سواء الورقية او الالكترونية....وعلى رأس الاخبار او التصريحات اللي من النوعية دي تصريح رئيس الوزراء بانه لا داعي للقلق ع المستقبل السياسي بمصر لوجود نظام لتداول السلطة يراعي الدستور والقانون...لا والله...كما ان اجندة الاصلاح السياسي والاقتصادي تسير بمعدلات غير مسبوقة....هو في ايه؟ هو احنا مش بني ادميين بردوا عايشين في البلد دي وعندنا عيون وودان ومخ المفروض انه بيشتغل....اصلاح سياسي ايه واقتصادي فين ودستور ايه دا اللي بيتكلم عنه...دستور يااخوانا...هي الناس لاقيه تاكل؟!!!!.....اه ولا موضوع الشهادات الدولية والتقارير الاقتصادية دي....لو منظمة من بتوع حقوق الانسان قالت كلمة وحشة في حق الحكومة يبقى تدخل سافر في شئون الدولة و مؤامرة بتحاك ضدنا انما لو أي بنك صغير في اوروبا او جريدة اقتصادية بتوزع 500 نسخة قالت ان مصر تسير بقوة ناحية مش عارف ايه وان السياسات الاستثمارية من انجح السياسات يووووووه دقوا الدفوف وعلقوا الزينات وتعالى اتفرج وشوف فرح ابن العمدة اللي بيبقى في كل وسائل الاعلام عشان الشعب المتخلف يعرف ان هو اللي مش فاهم حاجة وان الناس بتوع بره اللي بيفهموا بيقولوا كلام فل الفل.....حد اتفرج على مؤتمر الحزب الوطني وشاف الكلام اللى اتقال من نوعية " احنا لينا منافسين كتير في العالم ومش سهل اننا نحافظ ع المركز اللي وصلنا ليه" اظن كفاية الكلمتين الجامدين دول يخلوك تقفل التلفزيون.....الناس كلها انبرت في حرب كلامية ان كان الغرقى على السواحل الايطالية شهداء ولا لأ...ياعم الحاج سيبهم لربنا وهو يحاسبهم برحمته وركز انت بس في الاسباب المهببة اللي خلت واحد يركب البحر في عز الليل على مركب مستهلكة وهو عارف انه رايح للموت قبل مايروح ايطاليا..متخيل الوضع فعلا عامل ازاي.. والظروف اللي خلته يعمل كده؟؟!!! ولا صحيح هتتخيل ازاي وانت في برجك العاجي ومش حاسس بحد... هترجع بعد كده تتكلم عن العدالة الاجتماعية وتكافؤ المش عارف ايه ومحدودي الدخل ومصالح الناس وكون الحاجات دي من اولويات الحكومة...اولويات ايه وحكومة ايه اللي مش حاسة بحد...ويجي ابراهيم كامل يقولك في "في الممنوع" ان ديون البنوك والمسجلة بالمعدومة..هي معدومة كده وكده انما البنك بيعرف يرجعها ازاي...فين ياباشا الكلام ده في مصر؟؟؟؟

ومن اكتر الحاجات اللي استفزتني بجد بجد او بمعنى ادق خلتني احس بالحسرة على حال بلدنا هو خبر زيادة رواتب العاملين في المصالح الحكومية الامارتية سواء مدنيين او عسكريين بنسبة كام بقا...سبعييييييييين في المية....سبعييين في المية.....كتير ياجدعان حرام....كتير اللي بيحصل...طب اللي نشر الخبر ده قصده ايه؟؟؟؟ يحرق دمنا ولا يخنق ع الناس ولا بيخنق على نفسه...دا المرتبات بتزيد عندنا 20 جنيه و30 جنيه ساعات لأ وبيذلونا بيها وبيتكلموا كأن خلاص المشاكل اتحلت ويلا ياجماعة روحوا بقا اشتروا وصيفوا وسافروا وغنوا وارقصوا دا طبعا غير ان وقتها الاسعار بتزيد بجنون.......وياريتها ع التجار بس لأ دي الحكومة كمان زودت اسعار الكهرباء يوم الاحد اللي فات والخبر من مصراوي...واخر زيادة ويافرحتي زيادة بدلات الصحفيين ب200 جنيه في الشهر...ويبقى السؤال الهام هيخدوهم ورقة واحدة ولا ورق بعشرة جنية – على رأي عشرينات- بلا وكسة

اما عن الحكومة الالكترونية...فحدث ولا حرج...تطور مش عارف في ايه ودخول عصر التكنولوجيا والمعلوماتيه وبضغطة زر تصل الى ماتريد....حد شاف المرور شكله عامل ازاي؟؟ حد جرب يروح شركة الكهرباء ولا الميه...طب حد شاف موقع حكومة دبي الالكترونية شكله عامل ازاي والخدمات والنصايح اللي بيقدمها حتى للخدمات اللي مش هينفع تعملها اونلاين؟؟؟ ادخل هنا وشوف وقولي رأيك

ومش تصريحات الحكومة بس المستفزة..لا لا دا في ناس كمان مستفزة...خبر عن ان استراليا مش هتصدر لنا الخراف الحية الا بعد لما تتأكد ان المجازر هتعاملها بطريقة رحيمة....ناس محترمة والله وقرار اكثر احتراما...بس هوب تلاقي واحد كده مش عارف طلع منين ويعلق ع الخبر ويقول "دي تلاكيك عشان الخراف تيجي بعد العيد ويعطلوا المسلمين عن اداء شعائرهم"...في ايه ياعم؟؟؟ ماهو هما المسلمين دول بردو اللي بيبهدلوا الحيوانات ويعدبوهوم ولا خلاص احنا عشان خدنا على كده يبقى احنا اللي صح والباقي هما اللي بيتلككوا....و ع الفيس بووك مجرد ما عمرو دياب خد الميوززك اوورد اتعملت مجموعات وجروبات مش عارف الديابينز والكنج عمرو ومش عارف ايه بدون أي لازمة ولا فايدة اهو واحد يعمل جروب ويحطلوا كام صورة ويدعوا الناس تشترك والناس تشترك وخلاص...طب ايه فايدة الجروب؟ محدش عارف؟ طب انت بتشترك فيه..بتشوف اخباره...بتعملوا نشاط معين؟؟؟ ماحدش شايف...طب انت تعرف اللي معاك؟ ولا حتى صاحب الجروب...اللي يغيظ بقا اني الاقي واحد عامل جروب اسمه "اللي بيحب الرسول عليه الصلاة والسلام يدخل يشترك وعايزين نشوف هما اكتر من احباب عمرو دياب ولا لأ" طب بالذمة دا كلام؟؟؟ طب يعني انا لما اشترك هاعلن حبي للرسول؟؟؟ طب يعني الجروب فيه ايه؟؟؟ ادخل الاقي اذكر الله وسجل حضورك بذكر الله....ونعم بالله ياسيدي...بس يعني هو انا كده اثبت ان الرسول محبوب اكتر من عمرو دياب...وهل المقارنة تجوز اصلا؟؟؟؟!!!!ء

ومابين عباس واولمرت وبوش يطلع لنا في المقدر جديد الحاج ساركوزي اللي جاي يطبلها ويخنق على نفسه قبل مايخنق على فرنسا قبل مايخنق على بقية الدول...ياساتر...الله يرحم ايام جاك شيراك كان محترم وعارف هو بيقول ايه وكان مدي فرنسا استقلالية...ساركوزي اول ما مسك الحكم طلق مراته وراح اتقدم لأمريكا...وبكره تلاقي فرنسا رابطة المنديل على راسها وماسكة السبت وماشية ورا امريكا فين ماتروح ونرجع لايامك ياتوني بلير....واستكمالا للاستفزاز نجد الحكم المغربي....العرجون....واللي شتم وغلط وكللها بقوله " هو انتوا عايزين تاخدوا كل حاجة" الله طب وانت مال اهلك..انت ليك تحكم بما يرضى الله وخلاص...وبغض النظر عن الماتش وان كان الاهلي اتظلم ولا لأ لفت نظري خبر انكسار كاس افريقيا اثناء احتفال النجم الساحلي في تونس...الكاس انكسر..ياترى دا معناه ايه؟

فتوكم بعافية

الا شبرا

لا لا لا حاسب عندك هنا....كده انت هتغلط بجد....شد فرامل واركن على جنب واوعى تدوس ع الخط....ماهو دا كده اخرك....ودا الخط الاحمر....وبلاش تتهور عشان ما تتعور....الا دي...دي لا فلسطين ولا العراق ولا ايران....كله كوم ودي كوم

الا شبرا

قال ايه انا صحيت بدري شوية عن ميعاد الشغل وقولت ياواد اضرب بعينك كده على مصراوي وشوف الدنيا فيها ايه...وهوب الاقيلك الخبر ده...."القاهرة وطنطا وشبرا مستهدفين نوويا في اي حرب قادمة".....قال ايه شبرا من ضمن المناطق المستهدفة نوويا لو قامت حرب بين اسرائيل وايران....شبرا مين ياعم...انت عارف انت بتتكلم عن ايه اساسا....انت بتتكلم عن شبرا ...شبرا دي يعني الساحل يعني روض الفرج وخلوصي يعني جزيرة بدران وشارع الترعة يعني الدوران والخلفاوي والمظلات وعرابي وكريستال عصفور واحمد حلمي ومعمل الالبان وابو وافيه يعني مدرسة التوفيقية يعني الراعي الصالح يعني شيكولاني وسانت تريزا يعني مسره وعمر افندي والشربيني يعني فيكتوريا وايديال ونادي الكهربا يعني روض الفرج والخازنداره..يعني جسر البحر وكشري عرفة ومطار المنوفية...يعني اجدع شباب وبردو اجدع بنات...من الاخر...شبرا يعني شبرا..من غير كتر كلام...حدوته ملهاش مثيل ولا ينفع معاها امريكا ولا اسرائيل....ولغز لا يحله ولا يفهمه الا الشبراوي...ولا يهمنا قنبلة نووية ولا حتى ارتجاجية...طب بس خلي حد يجرب...يفكر....بس يهوب من شبرا....وهو يشوف اللي عمره ماشافه ولا هيشوفه..دا لو فضل واتبقى منه حاجة
وبعدين يعني هو خلاص...بقت شبرا مستهدفة في الحرب بين اسرائيل وايران.....شبرا.....لأ وايه بيقولك ان شبرا تقع في مدى الصواريخ الاسرائيلية...ياراجل قول كلام غير ده...دا سكان شبرا اكتر من سكان اسرائيل كلها
الناس اتجننت باين ولا ايه

لو عايز تعرف عن شبرا دووس هنا

وعدى النهار

خلال الفترة اللي فاتت كنت ذكرت ان الوقت بيضيع مني واني مش قادر اتحكم فيه وقلت اني عايز اركز يومين عشان اشوف انا ممكن انظم حياتي ازاي…والحقيقة اني كنت على مشارف اجازة طويلة من الشغل حوالي 10 ايام وكنت معتمد ان خلال الاجازة دي هظبط كل المسائل ولكن حدث مالم يكن في الحسبان…قبل الاجازة علطول وانا قاعد في الشغل اطلق الكمبيوتر صفيره ليعلن عن وصول ايميل جديد…وكانت المفاجأه…اعلان عن وظيفة شاغرة في احد اقسام الشركة…بالمسطرة زي ما انا عايز…بالمللي…الوظيفة..القسم..التخصص اللي انا عندي خبرة فيه…المواعيد المنضبطة…الاستقلالية في اسلوب العمل…الاحتكاك بشركات اخرى في السوق….تحفة تحفة تحفة وجاتلي في ميعادها ورغم كونها اقل ماديا من الوظيفة الحالية اللي انا فيها الا انها فيها كل طلباتي بالاضافة ان نوعية الشغل دي انا بحبها اوي…..ومكدبتش خبر وبلغت المدير بتاعي اني هقدم ع الوظيفة دي ورغم استياءة الا انه امام تصميمي لم يجد الا الموافقة وقدمت بالفعل وبدأت الاجازة متجاهلا كل مارتبت له من خطط ونوايا وصارت الوظيفة الجديدة هي محور تركيزي....وقضيت الاجازة بين الاوراق والكتب والكمبيوتر مستذكرا ومتذكرا شغلى السابق وما اكتسبته من خبرة اثق في انها لم تتاح لكثير من الناس في مثل سني....وبين الترقب والامل ذهبت لحضور المقابلة الشخصية...مدير ومهندس وانسه مختصة بالموارد البشرية (الاتش ار)...ساعة الا ربع...مناقشات بالانجليزية...اسئلة فنية...اسئلة اجتماعية ونفسية...ايه مميزاتك...ايه عيوبك....ايه اللي يخلينا نختارك؟...لوحصل كذا هتعمل ايه؟....لو جرى كذا هتتصرف ازاي؟....ايه الانجازات اللي حققتها في حياتك؟....اتكلم عن نفسك....وغيرها اسئلة تقنية كتير...وخرجت من المقابلة راضى عن نفسي ومتعلقا اكثر واكثر واكثر بأمل ارى انه خطوة جديدة في حياتي وتغيير هام في التدرج المهني بتاعي مش على مستوى الشركة بس لأ دا على مستوى الخبرات المكتسبة كمان...وبقيت منتظرا للنتيجة ومسترجعا ماحدث.....من بين 16 يوم مكنش يناسبني غير يوم واحد بس للمقابلة وبالصدفة تم تحديد المقابلة في اليوم ده فاستبشرت خيرا...زملائي كانت مقابلتهم بين 20 و25 دقيقة وانا 45 دقيقة فاستبشرت خيرا....ظروف كثيرة محيطة بالعمل حصلت في توقيتات معينة وغريبة ومتتابعة فاستبشرت خيرا....وفضلت منتظر على اعصابي...وبعد ماكنت بشتكي ان اليوم بيهرب مني وفي تطبيق رهيب لنظرية النسبية اصبح اليوم طويييييييييييييل ومابينتهيش....و قضيت الوقت اتشمم الاخبار التي تحاط بسرية مبالغ فيها في بعض الاحيان....واذا بالموبيل يعلن عن وصول رسالة جديدة استقبلتها بلهفة فاذا بكلمة واحدة.....بنا...وأحمد البنا هو زميل وصديق عزيز عليا اشتغلنا مع بعض اكثر من سنة في مكتبين متجاورين وهو اللي وقع عليه الاختيار
الحمد لله... والله اعلم بالخير فين....وربنا يوفق البنا ان شاء الله في مكانه الجديد ...بس يمكن اكون انا محبط الي حد كبير ويمكن دي غلطتي اني اتعلقت بالوظيفة دي بشدة..بس الحمد لله على كل شىء

خالو ميمي حبيبي

عفوا كانت هناك مشكلة في تشغيل ملف الفيديو وتم حلها الحمد لله

اسمه محمود..يبقى خالي العزيز...جدتي – الله يرحمها- كانت بتدلعه ب"ميمي" زي أي أم مابتدلع ولادها..واحنا

عيلتنا ماشاء الله فيها ميمي وتوتو وناني ولولا عيلة دلع من الاخر..المهم نرجع مرجوعنا تاني لخالي محمود
زي ماقلت جدتي كانت بتقوله ياميمي...ورغم ان الواحد لما بيكبر بيستعيد اسمه الحقيقي تاني الا ان خالي كبر وكبر اسم الدلع ده معاه واصبح بينافس اسمه الحقيقي وبقوة...حتى في الشغل ورغم تعامله باسمه الحقيقي الا ان ماحدش بيستغرب لما اسأل عن "خالو ميمي" ..الاسم ماحدش بقا يستغربه ولا يستنكره حتى بالرغم من الشعيرات البيضاء التى ظهرت على رأسه وبالرغم من علامة السجود الواضحة على جبينه...والاعجب من كده ان نتيجة للتعاملات الاجتماعية ظهر لقب جديد بيستخدمه بعض الناس وهو " أستاذ ميمي" لأ وكمان "حاج ميمي"....غريبة صح؟؟؟..انا بقا مش مستغربها خالص..مش لأنه خالي..لأ..لأني اتعاملت معاه كأنسان وعارفه كويس وعاشرته وعارف انه ماينفعش غير انه يكون "خالو ميمي"...ايوه..مبقاش مجرد اسم او لقب عائلي بيتنادى بيه.."خالو ميمي" بقت كلمة وصفة لشخصية متميزة جدا ماتنفعش غير انها تكون "خالو ميمي"...انا اصحابي اللي يعرفوه بيقلوله " خالو ميمي" ...زوجتي وخطيبة اخويا بيقلوله "خالو ميمي"...جيراني الشباب بيقلولوا " خالو ميمي"...متخيل؟
خالو ميمي فيه شبه كبير من محمد صبحي في " يوميات ونيس" نفس الشخصية تقريبا مع بعض الاختلافات...كان زمان واحنا صغيرين اللي يلاعبنا كان هو "خالو ميمي" اللي يفسحنا كان هو "خالو ميمي" كان ياخد شباب العيلة كلها ونخرج خروجة شبابي...صياعة كده..من غير ظبط ولا ربط..نسافراسكندرية مع بعض..ومرة حصلنا هو على اسكندرية...شباب في شباب ومعانا "خالو ميمي"...كنا لما نتجمع في بيت جدي –ايام الخير والبركة- كانت ماما تقعد في وسط الصالة ع الارض ومعاها كل البمب والبلالين والصواريخ وتبدأ توزعها على عيال العيلة كلهم...ويجي بعدها دور "خالو ميمي"...نعمل قنابل بالبمب.. صواريخ ماشي....بلالين مليانة ميه.. نلعب استغماية اوكي..كورة مافيش مانع... كان دايس معانا في اي حاجة ..."خالو ميمي" احسن واحد يعمل طيارة بالبوص والدوبارة وورق الجلاد ونطيرها من فوق السطح...وكمان نبعت مع الطيارة جوابات...كانت الجوابات عبارة عن ورق مربع نعمل فيه فتحه

وندخل فيها الحبل ف الورقة تطير فوووق لغاية ماتوصل للطيارة نفسها...ء
ء"خالو ميمي" لما نقل شقته الجديدة –الكلام ده من كتير اوي مش عارف كام سنة- قالي انا خليت الصالة مفتوحة ع الصالون عشان يبقى في مساحة كبيرة نلعب فيها و نعمل فيها اللي احنا عاوزينه....حد فكر كده قبل كده؟؟؟؟ حتى ولو كان مجرد كلام؟؟؟؟

ء"خالو ميمي" الكل بيحبه..الكبير والصغير..ومن اول نظرة ومن اول مقابلة...خالي طيب اوي بجد...ساعات عصبي..بس الاغلب طيب...شايل هموم ناس كتير ومع ذلك بيضحك ويهزر ويبسط المواضيع...خالي مش ملاك....بس هو تركيبة جميلة من صفات واخلاق واسلوب معاملات تخلى روح الملاك مغلفة لصفاته...مجرد ماتقابله او تقعد معاه تحس انه صاحبك وتعرفه من زمان...يحكيلك عن شبابه وجوازه وحكاياته وماتحس معاه بالوقت ابدا...مابين التعب والالم تلاقيه بيبتسم...كتير بردو بيزعل ويشيل الهم ويقفل الموبايل ويشد سلك التليفون وينعزل...بس انا مش بقلق اوي من الموضوع ده...بسميه فترة شحن...يشحن عواطفه فيها...او يفرغها...ممكن؟ مش عارف...بس بيرجع تاني زي ماكان ومهما كان اللي جواه بيرجع تاني "خالو ميمي"ء

وهو نفسه اللي كان بيلعب معاك وانت صغير..تلاقيه بردو "خالو ميمي" معاك وانت بتجهز شقتك..وانت بتشتري شبكتك...وانت بتجهز لفرحك...وانت بتستقبل ابنك او بنتك اللي مش هيقوله ياجدو....لأ هيقوله بردو يا "خالو ميمي"ء
ء"خالو ميمي" عنده في البلكونة جنينة صغنتوته ومحندقة اوي..بيهتم بيها ع الاخر...اخر مرة كنت هناك اداني شتلة صبار صغيرة...وكمان مزاج عنده يغسل العربية يوم الاجازة.. طبعا العرية الجديدة...لكن القديمة بقا كان مزاج عنده كل يوم الاجازة يروح ورشة شكل..مرة الميكانيكي..مرة الكهربائي...مرة ينزل الوكالة...العربية اللي قبلها بقا كان بيفككها ويركبها كل اسبوع..كانت 126 بس كانت ايه...ماحكيلكش

خالو ميمي بقا دا حكاية

قصة حلوة وغنواية

حنانه بيخلق حنين

لذكرى ايام وسنين
ايام جميلة شوفناها
ولسه عايشه جوانا
نسرح تيجي ف خيالنا
نرمح تجري ويانا