انا رجعت

انا رجعت ياجدعان

الحمد لله قضيت يومين حلوين اوي

بورسعيد طلعت بلد جميلة اوي اوي اكتر ماكنت متخيل

هارجع تاني ان شاء الله احكيلكوا عن اليومين دول

بس بجد بجد وحشتوني اوي اوي ووحشتني المدونة جدا

انتظرونا

سنعود

ميسدات 2

في عشرة ايام
مشاكل في الشغل
سبعة عيادات لدكاترة
ثلاثة معامل تحاليل
مركز اشعة مقطعية
يوم صيام
دخول زوجتي غرفة العمليات
انهاك جسدي غير محدود
الخلاصة
الحمد لله

*****************************************************************

سيداتي انساتي سادتي
اليكم هذا النبأ الهام جدا
اخيرا
وبعد عناء
وطول انتظار
ودعوات وابتهالات
خدنا الاجازة
اه هما 3 ايام بس...بس اجازة
اه مش هالحق اعمل فيهم حاجة...بس اجازة
اه يدوبك اسافر والف شوية وارجع تاني....بس اجازة
اجازة وكنت بجد محتاجها اوي اوي اوي
شعاري فيها هيكون
اصحى الساعة واحده ولا اتنين ونص
البس قميص بكم ولا البس بنص
اتعشى انهارده ولا انام خفيف

هدفي الاول هيكون النوم والاسترخاء
النوم بدون تحديد عدد الساعات ولا الداونلود بتاع الاحلام
هاحاول الفترة دي اتابع المنشورات الهامة

مجلة نص الدنيا
مجلة ميكي ماوس
مجلة اخبار النجوم
مجلة فلاش
مجلة الشبكة
مجلة نادين
وطبعا
مجلة روتانا

وطبعا هارفع شعارات من قبيل
لا للقميص
لا للكلاسيك
لا لتشغيل الدماغ ( هاركنها اليومين دول)ء
لا للجزيرة
لا للجرايد الرسمية والمعارضة والمطبوعة والمقرؤة والالكترونية والمفرودة والمبطوحة
ولا ولا ولا ولا ولا ولا ولا ولا ولا
انها الحياااااااااااااااااااااااااااااااااااااااااااااااااااااااااااااااااااااااااااااه

*************************

مش هتاخر ان شاء الله واول هارجع هابعت بوست "اميرات الاحلام" اللي قلت عليه البوست اللي فات ومسمحتش الظروف اني اخلصه

*************************

ياترى هنقضي الاجازة فين؟
كل سنة كنت متعود اسافر مع اهلي و مجموعة كبيرة من اصحابنا بس السنة دي ظروف الشغل منعتني
دلوقتي اسافر فييييييييين؟؟
قعدت انا وسمسمة (زوجتي العزيزة) نفكر ونفتكس في الموضوع ده
ماهو اسكندرية زحمة اوي ...والساحل بعيد وهما يدوبك 3 ايام وماليش خبرة فيه
طب شرم ولا الغردقة...لا ماليش مزاج دلوقتي وبعدين اصل سمسمة بتبقى عايزة الاجانب يلبسوا حجاب باين
وقعدنا نفكر ثم نفكر ثم نفكر
وفجأه
وجدتها وجدتها وجدتها
لاقيت سمسمة بتقولي بنظرة استغراب
هي ايه دي اللي كانت تايهة منك يا ارشميدس
قلتلها المكان اللي هنقضي فيه ال 3 ايام دول
قلتلي
فين يابو سمرة؟
......
مروحتهاش قبل كده
ومافكرتش اني اروحها
لما دخلت عالم التدوين وقابلت مدونين منها
اتكلموا عنها كلام جميل
وحبيتها منهم
وحبيت ازورها واشوفها
وقررت اسافرها
بلد ابو العربي والبمبوطية
طرح البحر والجمهورية
الجامع الكبير والمينا
وميدان ديليسيبس ينادينا
انا مسافر ياجماعة على هناك
على
بورسعيييييييييييييد

ميسدات

تابع التحديث اخر البوست

تحية خاصة ابعتها للنادي الاهلي
نادي القرن
الاهلي فوق الجميع
كلمة احترمها الجميع واشتروا بيها حب الملاييين
الحب والوفاء والاخلاص والتفاني والثقة والايمان صفات كل من ينتمون لهذا الصرح المشرف
تحية خاصة للاداريين وللاعيبه وللجهاز الفني ولمجلس الادارة المحترم
جزاهم الله كل خير على الفرحة اللي جماهير النادي عايشه فيها
لما واحد ينسى همه وحزنة ويرسم بسمة على وشه عشان فرحة فوز او بطولة يبقى اكيد الناس هتاخد ثواب
تحية كبيرة للنادي الاهلي

****************************************

قررت اسافر الاجازة دي بالعربية
عايز اظبط الكاوتش
عايز اصلح الاستبن
عايز اظبط الكبالن
عايز اظبط زوايا
عايز اربط العفشة
عايز اراجع ع الكهربا
عايز اراجع ع الزيوت
عايز انضف فلتر البنزين
عايز وقت لدا كله

****************************************

انا متابع مستمر للبوستات الجديدة
لكن مش بقدر اكتب كومينت عشان البلوجر مقفول عندي في الشغل
رغم اني اوقات كتير بكون اول واحد يقرا البوست
واوقات كتير بكون هموت واكتب كومينت
عملتها مرة من الموبايل بس قعدت نص ساعة بدور ع الحروف العربي
فسامحونى بقا لو كنت بتاخر شوية في التعليقات

****************************************

اكتشفت ان الاخت هي نعمة وهبه جميلة من ربنا لاي انسان

****************************************

عشان بيبو فاضحاني ع البلوجسفير كله وكمان قالت عليا منوفي كل دا عشان عزمتها على بيبسي دايت واتاخرت عليها عشان سبته في التلاجة يسقع شوية وكمان بما ان ليموناده نفسها اتفتحت ع البطاطس بتاعت كوك دوور وبما اني اترقيت في الشغل من كام يوم كده فا انا قررت بقا اعزم كل المدونين ع الحفلة دي

يلا ياجماعة سندوتشات وتورتة وبيبسي وكولا وكل اللي نفسكوا فيه
انا كنت ناوي اخلي ايوية هي اللي تعمل التورتة بس قلت يانهار ابيض هو انا هاعزمها واقولها ابقى هاتي التورتة معاكي وانتي جايه...مش هينفع ...صح؟ فطلبتها من فندق جورج سانك في باريس وجاتلي بالطيارة
يارب تعجبكوا وياريت بقا وانتوا ماشيين كل واحد يسيب 20 جنيه على باب المدونة وهو خارج

****************************************

في وسط مشاغل الايام

ومن بين رحايا الحياة

نخطف من الزمن لحظات
نسبح بعيد..بعيد
في دنيا مسحورة

موجوده بس في الخيال

مع ارض الساحرات

مع البساط

مع فارس الاحلام

واجمل الاميرات

اميرات الاحلام

البوست القادم

انتظروني

############################

تحديث و بيان هام

انا عايز اقول نقطتين

اولا ناس كتير بتقول عليا فشار وان انا جايب التورتة من عم حسن الخباز والموضوع لا فيه جورج سانك ولا باريس ولا حاجة

وانا حفاظا على صورتي قدام جمهوري العزيز ولانهاء كل هذه الاشاعات المغرضة

جبتلكوا الدليل اللي مافيش زيوا مثيل

الوصل اللي دفعت بيه تمن التورتة في فندق جورج سانك في باريس

حد عنده كلام تاني عايز يقوله؟؟؟

تانيا

العشرين جنيه

الناس كلها فاكرة انها تمن العزومة...لا لا ابسوليوتلي

زي مانتو شايفين انا دافع 1400 يورو تقريبا عشان التورتة بس يبقى العشرين جنيه دي هتعمل ايه يعني

ياجماعة العشرين جنيه دي

معونة شتا

اشمعنى كل لما جي ادفع مخالفات المرور يدفعوني 5 جنيه معونة شتا غصب واقتدار على رأي اللمبى

وولا حد عارف المعونة دي بتروح فين

ولذلك انا قررت اجمع انا كمان معونة شتا

بس خلاص

انتهى البيان

ميال

يعني...ربما الموضوع اللي انا هكتبه مش هيجي على هوى ناس كتير...وربما انا نفسي مش من النوع اللي بخوض اوي في المواضيع دي

الموضوع بكل بساطة اني خبطت في مقال بالعنوان ده "تامر حسني: عمرو دياب غيران من نجاحي" قلت ندخل ونشوف ..لاقيت كلام بقا كبير من اخونا تامر عن عمرو دياب وازاي هو بيهاجموا ويسلط عليه ناس زي اللي حصل في حفلة منير وقد ايه هو (عمرو) غيران من نجاحه اللي حققه في 3 سنين واللي عمرو معملوش في 18 سنة وان عمرو بيقلده في في كل حاجة ومش عارف ايه وان عمرو وان عمرو...ْء
في ايه ياعم الحاج؟ ايه الحقد اللي انت عايش فيه ده واللي مغرقك من تحتك لفوقك.....ماله ابن اول امبارح ده اللي بيتكلم عن عمرو دياب بالطريقة دي وعمرو هيقلده في ايه بلا خيبة...تامر حسني ده اللي عمله شوية البنات الهبل اللي ماتربوش والشباب اللي عامل نفسه رجاله وكاتبين على تشيرتاتهم " بنحبك ياتامر" جتكوا وكسه...ياراجل دي كانت مظاهرات القضاه شغاله ودول عاملين مظاهرات في نفس الوقت عشان "توتو حبيب قلبي"... دا كان فاضل يعملوا جمعية " مزز من اجل التغير للدفاع عن تامر حسني"....هما دول اللي عملوا لتامر حسني اسم وخلوه بني ادم

دا مرة في برنامج شبابيك بتاع دريم كان في مكالمة من بنت وبيقولولها "مين اكتر شخصية اثرت في حياتك؟" بدون تفكير وفي لحظة واحده ردت "اكيد تامر حسني طبعا"...عليا النعمة البنت دي هابله...." ويارب يفرحه زي ماهو مفرحنا ومالي حياتنا بالحب" يلا ياعبيطة ..."انا نفسي اعمل أي حاجة عشان هو يفرح ويكون مبسوط"....اعملي ملوخية........شوفتوا بقه هي دي البنات الامامير اللي تامر حسني بيلعب بدماغهم..دا المزيعين ساعتها ماعرفوش يردوا يقولولها ايه

لكن عمرو دياب بقا بجد تاريخ طويل...واحد خدها من بدياتها...واحدة واحدة...لغايه ما بقى عمرو دياب...الراجل دا انا بجد بحترمه لانه بجد بجد شخص ناجح في مجاله بمعنى الكلمة...عمرو دياب ماركة مسجلة...لا هو طلع في يومين ولا طلع في اغنية وبعدين هبل في الاغاني...لا دا طلع بيشويش وعلى اقل من مهله وكل اغانيه ممتازة وعلى نفس الدرجة من الجمال...ياجماعة دول 20 سنة بيغني واغانيه معظمها تحفة
وبصراحة في حاجة انا لاحظتها...انا اول ماينزل شريط عمرو الجديد واسمعه مش بيعجبني اوي...بس بعد مرتين كده بكون فعلا مبسوط من الشريط كله...واغانيه بتعجبني اوي..ابن الايه برنس بيعرف من اين تؤكل الكتف
انما شريط تامر حسني يدوبك ممكن تطلع منه اغنيتين او تلاته بالكتير اوي يعجبوك وكمان ممكن مايعلقوش معاك

على فكرة انا بسمع تامر حسني بردو وفي اغاني ليه بتعجبني..وكمان رنة موبايلي اغنية بتاعته اسمها ارجعلي تقريبا...بس دا مايمنعشي انه استفزني اوي لما قال الكلام ده...عمرو دياب مين ياعم اللي بتقارن نفسك بيه...اغانيك كلها ماتجيش سكتة في اغنية من بتوع عمرو دياب

بالمناسبة..انا لا انا مجنون عمرو دياب ولا اصالة بس انا بحب اللي فعلا بيعمل شغله كويس ويكبر فيه واحده واحدة زي عمرو دياب وعادل امام والناس دي اللي خدت السلم من اوله واحترفت في مجالها لغاية ما بقى ليها اسمها واي حد مهما اختلف معاهم مايقدرش ينكر ده

مش كده ولا ايه؟

تاج جميل...وطويل

التاج ده وصلني من الصديقة العزيزة قلوب حائرة اللي بتزورني كل سنة مره

بس المرة دي افتكرتني بتاج لذيذ

ميرسي يا بيبو

اسيبكوا بقه مع التاج

أسم مدونتك ‏؟

غمض عينيك

لماذا أخترته .. ‏وما هى نيتك من وراء أختياره ؟

كنت مكتئب شوية من حال البلد وحالنا فيها وقد ايه احنا مظلومين رغم ان المفروض حياتنا تكون احسن من كده
وانا في الحالة دي قريت الجزء ده من رباعية صلاح جاهين "غمض عينيك وارقص بخفة ودلع...الدنيا هي الشابة وانت الجدع"ء
فسميتها غمض عينيك...وبقيت اغمض عينيا واحلم بحياة احلى واكتب اللي في نفسي

هل فكرت فى أغلاق مدونتك ؟ ولماذا ‏؟
لا محصلش ويوم ماحاولت اخد منها اجازة كانت مسيطرة على تفكيري

صورتك فى المدونه و ‏رمزيتها ؟؟

الصورة اللي في المدونة من مدينة "سيدي بو سعيد" التونسية...مدينة حبيتها اوي ونفسي اعيش فيها

لما ‏دخلت عالم التدوين من الأساس ؟

مش عارف بالظبط انا كنت بعمل سيرش على صورعلى ما اتذكر ورحت علي مدونة صور طريفة-شقير بالصدفه ومن وقتها وانا اصبحت متابع دائم لمدونتين اتنين "حكاوي شقير" و "مكسوفة" لمدة اكتر من سنة...كنت القارىء الخفي زي مابيسميه شقير
اقرأ بدون تعليق....اشارك ولكن مع نفسي...وفي نفس الوقت كنت اوقات بدخل في مناقشات كتير مع اصدقائي وقريابي ...فقلت طب ما انا اعمل مدونة واتجاوب مع ناس تانية واصدقاء جداد واكيد هاستفيد واوسع مداركي وافضفض باللي جوايا....وواحدة واحدة المدونة بقت بتشكل نافذة اجتماعية على الحياة بالنسبة لي

جمله قيلت ‏لك فى وصف مدونتك ؟

الحقيقة تعليقات كتير شكرت في المدونة وان كنت اعتقد معظمها كان مجاملة

التعليقات بالنسبه لك.. واهميتها ؟

مؤشر قوي جدا على مدى قبول القراء للي انا بكتبة حتى وان كانت فضفضة فاضية

أحلى بوست كتبته.... ضع اللنك ثم ‏أذكر لماذا ؟

انا بحب اوي بوستات التلاتة جيم والملك هارالد لانه يمكن يكون قدم معلومة جديدة
وبحب اوي بردو بوست عسلامة ياتونس لاني كتبتة في شوق ولهفة

أفضل بوست قرأته ؟ وضع ‏اللنك ؟

كتيييييييررر اوي اوي, انا اوقات بنفعل مع بوستات رائعة كتير

أفضل مدونه ‏قرأتها ؟

كتير اوي بردو ما شاء الله

حد قل أدبه فى التعليق وكان أيه رد فعلك ‏؟

لغاية دلوقتي لأ الحمد لله...واعتقد وقتها هيكون رد فعلي التجاهل ليس الا

أسوأ مدونه ؟

المدونة اللي صاحبها بيخرج عن حدود المقبول وان تحدث في اللا معقول

هيحصل أيه لمدونتك لما تموت ؟؟

بعد وفاة شيكو (الله يرحمها) قلت ليه مايكونش في حد ممكن يكمل هو المدونة بعد وفاتي
واهو تفضل الناس فاكرة ولو حتى اسم "غمض عينيك"ء

أديت الباسوورد لحد قبل كده ‏؟

ابدا ابدا..الباسورد من الاسرار المقدسة عندي

كانت أيه طبيعه علاقتك ‏بيه؟

الاحتفاظ بسر الباسورد لا ينتقص من قدر الاشخاص شيئا ابدا

أسمك؟

محمد سمير

المشهور بيه وسط أصحابك؟

ء"سمير" والمشهور بيه وسط جيراني واهلي هو "هاني" وجيراني بالذات كتير منهم مايعرفش ان اسمي الحقيقي

"محمد"

عمرك؟

26

دراستك ؟؟ مجالك ‏؟؟

هندسة الاتصالات وبشتغل بتاع موبيلات

شخصيتك نوعها ايه؟

راضي ومقبل على الحياة الحمد لله

السفر بالنسبه لك ؟

متعة متعة متعة

وقت ‏فراغك بتعمل ايه ؟

الخروج يحتل 75% من نسبة وقت فراغي سواء خروج التزامات او فسح
يليه الكمبيوتر والقراءة

المود بتاعك؟
يعني بحب الهزار واحب اكبر دماغي

الأكله المفضله ‏؟

تاني ؟؟؟ صينية فراخ في الفرن تخليني اعمل أي حاجة

الصفات التى أخذتها من بابا ؟

الحاج سمير ( ربنا يديله الصحة)ء
ابويا راجل طيب ومتسامح وعقلة كبير وكلمته مسموعة عند الكل ومابيفوتوش واجب سواء فرح او ترح
واسمة جواز مرور بيعديني من مشاكل كتير
اتمنى اني اكون خدت منه نص صفاته بس

الصفات التى ‏أخذتها من ماما ؟
دي بقه صاحبتي واللي بحب انم معاها عن اخبار العيلة
خدت منها الطيبة والعند وبيقولوا اني اشبهها من اخواتي
ربنا يخليهلنا

أكتر ست حاجات بتكرهها ؟

الظلم

الغباء....اكره اوي اللي يستغبى معايا

استبداد الرأي بدون سند وبدون مناقشة

اللي يستعبطنى.....زي اللي يتكلم عن تراجع الاسعار والقوة الاقتصادية..ماهو دا واحد بيستعبطني

الاستغلال

البن والقهوة بجميع مشتقاتهم

أكتر ست حاجات بحبها ؟

هتكلم عن الحاجات مش الاشخاص

بحب السفر

بحب السينما

بحب الضحك والتفاؤل

بحب الابداع والتفرد

بحب تونس

بحب الحياة

الشغل بالنسبه ‏لك؟

بيتي التاني وشىء مهم جدا في حياتي ومستقبلي

الأنترنت بالنسبه لك ‏؟
شباك ببص منه على العالم بكل اللي فيه
بتواصل عن طريقه بدنيا تانية
بحافظ بيه على شوية المهارات الاجتماعية اللي قربت انساها

أمرره لمين ؟؟

حنين

الله.الوطن.المدونة

عبده محتاس

ابو العربي

ايوية

ميرو-الحب كله

تخاريف هنونة

واي حد تاني يحب يتفضله ..التاج تاجك

البطابيط

كان ياما كان

كان في 3 بطابيط حلويين...اسمهم سوسو ولولو وتوتو

كانوا بيحبوا بعض خالص خالص وكانت لولو هي الاخت الصغيرة

وفي مرة مامتهم كانت سايباهم يلعبوا عند الورده الكبيرة اللي في البحيرة

لولو وسوسو وتوتو قعدوا يلعبوا مع بعض ويجروا ورا بعض في البحيرة

شوية كده وزهقوا...وقعدوا يفكروا في لعبة جديدة يلعبوها
سوسو وتوتو اتفقوا يلعبوا هما الاتنين بس عشان لولو صغيرة ومش ينفع تلعب معاهم

لولو زعلت وقالتلهم بس ماما قالت ان احنا التلاتة نلعب مع بعض

سوسو وتوتو قعدوا يضحكوا عليها

لولو زعلت ومشيت لوحدها وسوسو وتوتو بيبصوا عليها ويضحكوا

لولو راحت اشتكت لمامتها

مامتها زعلت اوي اوي وراحت واخداها ورايحة لسوسو وتوتو

قالتلهم ازاي تلعبوا لوحدكم من غير لولو وازاي كمان تسيبوها تمشي لوحدها وهي لسه صغيرة

سوسو وتوتو اعتذروا لمامتهم وصالحو لولو وقالوا انهم مش هايعملوا كده تاني
ولولو كمان اتأسفت انها مشيت لوحدها لانها كان ممكن تتهوه

مامتهم البطة الكبيرة انبسطت اوي وشالتهم ومشيت بيهم وقعدوا يغنوا مع بعض

وتوته توته فرغت الحدوتة

بالموناسبة انا طقت في دماغي اعمل البوست ده بعد ما اتحبست مع فرح بنتي في الاوضة 4 ساعات واضطريت اقعد احكي في حكايات

الصور:- عدسة العبد لله